Li Xkab’ Xhu laj Nefi

1 Ut anajwan kik’ulman naq chirix naq laa’in, aj Nefi, kink’e xraqik xtzolb’aleb’ li was, li qayuwa’, aj Lehi, kiraatinaheb’ ajwi’ chirix k’iila na’leb’, ut kixnumsi chiruheb’ chanru xninqal ru li k’a’aq re ru kixb’aanu chaq li Qaawa’ choq’ reheb’ sa’ xk’amb’aleb’ chaq sa’ li ch’och’ Jerusalen.

2 Ut kiraatinaheb’ chirix lix po’jikeb’ xch’ool chiru li ha’, ut li ruxtaanal li Dios naq kixkol lix yu’ameb’, re naq ink’a’ ke’sub’e’ sa’ li palaw.

3 Ut kiraatinaheb’ ajwi’ chirix li ch’och’ li yeechi’inb’il, li ke’xtaw chaq—chanru li ruxtaanal chaq li Qaawa’ naq kooxtij chaq naq too’eeleliq chaq sa’ li ch’och’ Jerusalen.

4 Xb’aan naq k’ehomaq reetal, chan, wilom jun li k’utb’esinb’il matk’, sa’ li ninnaw wi’ naq sachb’il Jerusalen, ut wi ta kookana chaq Jerusalen, koo’oso’ ajwi’ raj.

5 A’b’anan, chan, us ta wan ch’a’ajkilal kiqak’ul, kiqataw jun li ch’och’ li yeechi’inb’il, jun li ch’och’ li sik’b’il wi’chik ru chiru chixjunil chik li ch’och’, jun li ch’och’ li x’ok wi’ li Qaawa’ Dios sa’ sumwank wik’in naq a’anaq jun ch’och’ choq’ reechanihomeb’ li wiyajil. Relik chi yaal, li Qaawa’ rik’in sumwank xk’e we li ch’och’ a’in, ut reheb’ li walal ink’ajol chi junelik, ut reheb’ ajwi’ li ani te’k’ame’q xb’e chi elk chaq sa’ jalaneb’ chik li ch’och’ xb’aan li ruq’ li Qaawa’.

6 Jo’kan ut, laa’in, aj Lehi, ninch’olob’ jo’ profeet, jo’ chanru li naxk’anjela wi’ li Musiq’ej li wan wik’in, naq maajun taachalq sa’ li ch’och’ a’in, ka’ajwi’ wi k’amb’il xb’aan ruq’ li Qaawa’.

7 Jo’kan naq osob’tesinb’il li ch’och’ a’in choq’ re li ani taak’ame’q chaq xb’aan a’an. Ut wi taa’uxq naq te’k’anjelaq chiru jo’ chanru li taqlahom li kixk’e chaq, taawanq choq’ xch’och’il li ach’ab’aak choq’ reheb’; jo’kan ut, maajo’q’e te’k’ame’q chi preexil; wi ta jo’kan, taa’uxq sa’ xk’ab’a’ li maa’usilal; xb’aan naq wi tanumtaaq li maa’usilal, majewanb’ilaq li ch’och’ choq’ reheb’, a’b’anan chiruheb’ li tiikeb’ xch’ool osob’tesinb’ilaq chi junelik.

8 Ut k’ehomaq reetal, a’an xchaab’ilal li na’leb’ naq toj maji’ taanawe’q li ch’och’ a’in xb’aaneb’ li jalanil tenamit; xb’aan naq k’ehomaq reetal, k’iila tenamit te’tub’laaq raj sa’ li ch’och’, jo’kan naq maak’a’aq raj na’ajej re taa’eechaniiq.

9 Jo’kan ut, laa’in, aj Lehi, k’eeb’il we jun li yeechi’inb’il na’leb’, naq a’ yaal jo’ chanru li ani te’k’ame’q chaq sa’ li ch’och’ Jerusalen xb’aan li Qaawa’ Dios te’xpaab’eb’ lix taqlahom, eb’ a’an te’usaaq chiru lix b’een li ch’och’ a’in; ut k’uulanb’ilaqeb’ chaq chiruheb’ chixjunil chik li tenamit, re naq xjuneseb’ rib’ te’reechani li ch’och’ a’in. Ut wi taa’uxq naq te’xpaab’ lix taqlahom a’an, te’osob’tesiiq chiru lix b’een li ch’och’ a’in, ut maajun taawanq re xch’i’ch’i’inkileb’, chi moko re xmaq’b’al lix ch’och’il li reechanihomeb’; ut te’wanq chi junelik sa’ xyaalalil.

10 A’b’an k’ehomaq reetal, naq taawulaq xq’ehil naq te’lajq chi maak’a’aqeb’ xpaab’aal, chirix naq ke’xk’ul li xninqal ru osob’tesink sa’ ruq’ li Qaawa’—chirix xnawb’al chirix lix yo’ob’tesinkil li ruchich’och’, ut chixjunileb’ li winq, ut chirix xnawb’al lix ninqal ru ut sachb’a-ch’oolejil k’anjel re li Qaawa’ chalen chaq xyo’ob’tesinkil li ch’och’; chirix naq xk’ehe’ wankilal reheb’ chixb’aanunkil chixjunil li k’a’aq re ru rik’in paab’aal, chirix xk’ulb’al chixjunileb’ li taqlahom chalen chaq sa’ xtiklajik, ut chirix naq ke’k’ame’ chaq xb’aan lix chaab’ilal maak’a’ roso’jik sa’ li chaq’al ru ch’och’ a’in li yeechi’inb’il—k’ehomaq reetal, ninye, wi taawulaq xkutankil naq te’xtz’eqtaana lix Santil Dios laj Israel, li tz’aqal Mesias, laj Tojol rixeb’ ut lix Dios, k’ehomaq reetal, taak’ojlaaq sa’ xb’eeneb’ lix raqb’a-aatin li ani tiik xna’leb’.

11 Relik chi yaal, a’an tixk’ameb’ chik li tenamit sa’ xb’eeneb’, ut tixk’eheb’ xwankil, ut a’an tixmaq’ chiruheb’ li ch’och’ wan wi’ li reechanihomeb’, ut tixk’eheb’ chi jek’iik ut chi sak’e’k.

12 Relik chi yaal, naq taanume’q li jun tasal tenamit ut taachalq li jun chik, taawanq li hoyok kik’, ut ninqi ula’aniik sa’ xyanqeb’; jo’kan ut, ex walal, nawaj raj naq taajultiko’q eere; relik chi yaal, nawaj raj naq tex’ab’inq chiru li waatin.

13 Aay, chi’ajq taxaq eeru; ajenqex chaq sa’ jun nimla wara, relik chi yaal, sa’ li wara re xb’alb’a, ut teechiq’ chaq cherix li xuwajel bak’leb’ ch’iich’ li b’ak’b’ookex wi’, a’an li b’ak’leb’ li nab’ak’ok reheb’ li ralal xk’ajoleb’ li winq, re te’k’ame’q chi preexil toj sa’ li jul li taawanq chi junelik, re rahilal ut rahil ch’oolejil.

14 Ajenqex! ut waklinqex chaq sa’ poqs, ut cherab’i li raatin jun li yuwa’b’ej li nasiksot, ut sa’ junpaat chik teeyokob’ li roq ruq’ sa’ li kehil ut ch’anch’ookil muqleb’aal, b’ar wi’ maajun aj b’ehenel taaruuq chi sutq’iik chaq; yal junjunq chik kutan ut tinxik sa’ xb’ehil chixjunil li ruchich’och’.

15 A’ut k’ehomaq reetal, li Qaawa’ xtoj rix li waam chiru li xb’alb’a; wilom lix loq’alil, ut q’alq’ookin chi junelik sa’ ruq’ lix rahom.

16 Ut nawaj naq taajultiko’q eere naq chepaab’ lix k’uub’anb’il aatin ut lix raqb’a-aatin li Qaawa’; k’ehomaq reetal, a’in lix k’oxlahom li waam chalen chaq sa’ xtiklajik.

17 X’aalo’ lin ch’ool rik’in rahil ch’oolejil chi yalaq jo’q’e, xb’aan naq xinxuwak maare anchal sa’ xk’ab’a’ lix kawil lee raam li Qaawa’ lee Dios taachalq rik’in xtz’aqalil lix josq’il sa’ eeb’een, re tex’isiiq chaq ut texsache’q chi junajwa;

18 Malaj ut naq taachalq jun li majewaak sa’ eeb’een chiru xnumik k’iila tasal tenamit; ut tex’ula’aniiq xb’aan li yok’leb’ ch’iich’, ut xb’aan li we’ej, ut xik’ tex’ile’q, ut texk’ame’q jo’ chanru li rajom ut lix preexil laj tza.

19 Ex walal, michal ta li k’a’aq re ru a’in sa’ eeb’een, chexwanq b’an taxaq choq’ jun tenamit sik’b’il ru ut usilanb’il xb’aan li Qaawa’. A’b’anan k’ehomaq reetal, chi’uxq li rajom xch’ool a’an; xb’aan naq tiik ru lix b’e chi junelik.

20 Ut a’an kixye naq: A yaal jo’ chanru nekepaab’ lin taqlahom tex’usaaq sa’ li ch’och’; a’b’an a’ yaal jo’ chanru ink’a’ nekepaab’ lin taqlahom, tex’isiiq chaq chiwu.

21 Ut anajwan, re naq taasaho’q li waam eerik’in, ut re taa’elq lin ch’ool sa’ li ruchich’och’ a’in rik’in sahil ch’oolejil cherix, re naq ink’a’ tink’ame’q sa’ li muqleb’aal rik’in yaab’ak ut rahil ch’oolejil, waklinqex chaq sa’ li poqs, ex walal, ut winqaqex, ut yalb’ilaq eeq’e chi junaj eek’a’uxl ut junaj eech’ool, sa’ junajil wanqex sa’ chixjunil li k’a’aq re ru, re naq ink’a’ texkub’siiq chi preexil;

22 Re naq ink’a’ texmajewaaq rik’in jun li rahil majewaak; ut jo’kan ajwi’, re naq ink’a’ teek’am sa’ eeb’een lix josq’il jun li Dios tiik xna’leb’, choq’ re li sache’k, relik chi yaal, lix sachlijik chi junajwa li aamej jo’ ajwi’ li tz’ejwalej.

23 Ajenqex, ex walal, k’ehomaq cherix li kolb’a-ib’ aq’ej re li tiikilal. Chiq’omaq chaq cherix li bak’leb’ ch’iich’ li bak’b’ookex wi’, ut cholex’eelq chaq sa’ li q’ojyin, ut waklinqex chaq sa’ li poqs.

24 Meepo’resi chik eech’ool rik’in lee riitz’in, li nim xloq’alil li rilom chaq, ut li xpaab’ank reheb’ li taqlahom chalen chaq sa’ xq’ehil naq koo’el chaq Jerusalen; ut li wanjenaq choq’ k’anjeleb’aal sa’ ruq’ li Dios, sa’ qak’amb’al toj sa’ li ch’och’ li yeechi’inb’il; xb’aan naq wi ta moko sa’ xk’ab’a’ ta a’an, kookam raj rik’in tz’okaak sa’ li yamyookil ch’och’; a’b’anan laa’ex xesik’ risinkil lix yu’am; relik chi yaal, k’a’jo’ li rahil ch’oolejil xnumsi sa’ eek’ab’a’ laa’ex.

25 Ut numtajenaq naq ninxuwak ut ninsiksot eeb’aan laa’ex, maare anchal tixk’ul wi’chik rahilal, xb’aan naq k’ehomaq reetal, laa’ex xejit, naq a’an xsik’ li wankilal ut li awa’b’ejink sa’ eeb’een; a’b’an laa’in ninnaw naq moko xsik’ ta li wankilal chi moko li awa’b’ejink sa’ eeb’een; a’an xsik’ b’an lix loq’al li Dios, ut lee chaab’ilal chi junajwa.

26 Ut laa’ex xexwech’ink xb’aan naq saqen ru x’aatinak eerik’in. Nekeye naq kaw li raatin; nekeye naq a’an xwan xjosq’il eerik’in; a’b’anan k’ehomaq reetal, lix kawil li raatin a’an xkawil lix wankilal li raatin li Dios, li kiwan rik’in, ut li k’a’ru josq’il nekeye re, a’an li yaal, jo’ chanru li wan rik’in li Dios, li ink’a’ kiru chixramb’al, li nak’utb’esin chi ch’olch’o chirix lee maa’usilal.

27 Ut ki’aje’ naq lix wankilal li Dios kiwan rik’in, toj reetal naq kitaqlank eere ut chi aajel ru kex’ab’in chiru. A’b’anan k’ehomaq reetal, moko a’an ta, a’an b’an lix Musiq’ li Qaawa’ li kiwan rik’in, li kitehok re lix tz’uumal re re taa’aatinaq, jo’kan naq ink’a’ kiru chixtz’apb’al.

28 Ut anajwan at walal Laman, ut jo’kanex ajwi’ Lemuel ut Sam, ut jo’kanex ajwi’ laa’ex walal, li ralalex laj Ismael, k’ehomaq reetal, wi tex’ab’inq chiru lix yaab’ xkux laj Nefi, ink’a’ tex’oso’q. Ut wi tex’ab’inq chiru tinkanab’ sa’ eeb’een jun li osob’tesink, relik chi yaal, li xb’een wosob’tesihom.

29 A’ut wi ink’a’ nekex’ab’in chiru, nawisi li xb’een wosob’tesihom, relik chi yaal, li wosob’tesihom, ut taakanaaq sa’ xb’een a’an.

30 Ut anajwan, at Tzoram, tatwaatina laa’at: K’e reetal, laa’at lix moos laj Laban, a’b’anan laa’at katk’ame’ chaq sa’ li ch’och’ Jerusalen, ut ninnaw naq laa’at tz’aqal nekera eerib’ aawochb’een li walal aj Nefi chi junajwa.

31 Jo’kan ut, sa’ xk’ab’a’ naq tiikat chi paab’ank, eb’ laa wiyajil te’osob’tesiiq rochb’een li riyajil a’an, re naq najt te’wanq chi usaak chiru lix b’een li ch’och’ a’in; ut maak’a’ wan, ka’ajwi’ wi taawanq maa’usilal sa’ xyanqeb’, li taarahob’tesinq malaj taa’eek’asinq re li usaak te’wanq wi’ chiru lix b’een li ch’och’ a’in chi junelik.

32 Jo’kan ut, wi teepaab’eb’ lix taqlahom li Qaawa’, li Qaawa’ xq’axtesi li ch’och’ a’in re te’wanq laa wiyajil sa’ xyaalalil rochb’eeneb’ li riyajil li walal.