1 Bwa e na nanoanga Iakobwa te Uea, ao e na rinea Iteraera, ao e na kamaekaia iaon oin abaia; ao a na botaki iruwa mangaia, ao a na reitaki kain te bata are Iakobwa.

2 Ao aomata a na uotia aomata ni kairia nakon aia tabo; eng, man tokin te aonaba ae raroa nako; ao a na oki nakon abaia ni berita. Ao te bata are Iteraera e na tautaekaniia, ao a na riki aomata aikai bwa toro mwaane ma aine iaon aban te Uea; ao a na kataenikaia aomata ake a tia ngkoa n taenikai irouia; ao a na babaire i aoia ake a tia n tautaekaniia.

3 Ao e na koro bukina bwa n te bong arei, e na anganiia te Uea te motirawa, man aia nanokawaki, ao man maakuia, ao man te tautoronaki are a tia n tauaki ma te matoa bwa a na karaoia.

4 Ao e na koro bukina n te bong arei, bwa ko na uotarake te taeka n rabakau aio ni kaitaraa uean Bwaburon ni kangai: E a kangara te tia tautaeka n toki ao te kaawa ni koora n toki!

5 E a tia te Uea n otoi okora ake a buakaka, ma aia kai n uea tooka.

6 Teuare e oroia aomata ma te un n aki toki, teuare e tautaekaniia aba nako ma te un, e na bwainikirinaki, ao akea ae e na tuka aei.

7 E na raoi aonaba ni bane, ao n rau; ao a na moana aia anene.

8 Eng, a na kimwareirei kai aika mwaiango irouna, ao tiiran Rebanon, ni kangai: Man te tai are ko bwaka iai ao akea te aomata are e a tia ni kawarira bwa e na kabwakaira.

9 Moone mai nano e ingainga nanona ni kan kaitibo ma ngkoe n rokom, e na kautiia maate ibukim, n irianaki ma mataniwi ngkoa iaon te aonaba; e a tia naba ni kautiia man aia kaintokanuea uea ni kabane man aaba nako.

10 A na bane n taetae nakoim ni kangai: Ko a tia n riki ni mamaara naba n ai arora? Ko a tia n riki n ai arora?

11 Raoiroim e a uotaki rikaaki nakon te ruanimate; ao akea ae e na ongo tangin am raea; a taakinaki teino iaam, ao e a rabunaki aom irouia iino.

12 Ai korakorara bwakam mai karawa, O Rutibero, ae natin te ingabong! Ngkai ko a tia ni kabwakaki nako aontano, ngkoe ae ko kamamaaraia aaba nako!

13 Bwa ko a tia ni kangai i nanom: N na waerake nako karawa, N na karietata riki au kaintokanuea nakon ana itoi aika a mwaiti te Atua; N na tekateka naba iaon te maunga are e a botaki te aba iai n iterana are mai meang;

14 N na waerake riaon rietaia naang; N na riki n aiaron Are Moan te Rietata.

15 Ma ae ko na kairaki nako moone, nako kabin te rua.

16 Ake a nooriko a na miakiniko, ao a na iangoiko ao a na kangai: Aei te aomata ae karaoa te aonnaba bwa e na ruru, ao n ioioi aaba n Uea?

17 Ao e karaoa te aonaba bwa aiaron te rereua, ao e urui taian kaawa ake i aona, ao e aki kauki aia auti ana bure?

18 Uea ni kabane man aaba nako, eng, ngaia ni kabane, a na wene n te mimitong, n tatabemania nako n oin aia auti.

19 Ma ko a teweaki nako mai nanon ruan matem n aiaron te mwanga ae ribaki, ma nikiraia ake a tiringaki n ewaraki n te kabaang, aika a teweaki nako kabin te rua ae rawata atibuna; n aiaron te mate ae toutouaki.

20 Ko na aki taunaki mangaia, ngkai ko a tia n urua abam ma n tiringia am bootanaomata; kanoaia taan karaoa ae buakaka a na aki karineaki.

21 Katauraoa tiringaia natiia ibukin aia bure tamaia, bwa a na aki teirake ke n abana te aba ke ni kaona aon te aonaba n taian kaawa aika bubura.

22 Bwa N na teirake ni kaaitaraia e taku aia Uea Taanga ni Buaka, ao N na kamauna mai Bwaburon, te ara ao te nikira, te nati te mwaane, ao ae ai te nati te mwaane, e taku te Uea.

23 Ao N na karikiia naba bwa nneia maan ni kiba aika biten ao neei n ran; ao N na taea aona n te kainiaaki n urubwai, e taku aia Uea Taanga ni Buaka.

24 Aia Uea Taanga ni Buaka e a tia n tuea, ni kangai: E koaua n aron ae I a tia n iangoia bwa e na koro bukina; n aron are I a tia ni motikia, ao e na riki—

25 Bwa N na kairia I-Aturia nakon abau, ao iaon au maunga N na toua i aan waeu, ao ngkanne ana amo e na nako mai aoia, ao rawawatana e na nako ma iaon angaia.

26 Aio te baire are e a tia ni katauaki ibukin te aonaba ni kabane; ao aio te bai are e aroraki nako aoia aaba ni kabane.

27 Bwa e a tia aia Uea Taanga ni Buaka ni baireia, ao antai ae e na bitia? Ao e a tia n arora baina nako, ao antai ae e na kaokia?

28 N te ririki are e mate iai te Uea are Aati ao aio bon te rawawata.

29 Tai kimwareirei, ngkami Bwaretaina ni kabane, ngkai e mwaoto ana kai are e oroingkami; bwa man wakaan te naeta e na kaoti te kaokateriti uaana bon taian naeta aika kibakiba ma ni kamaamate.

30 Ao aia moan nati ake a raarikin a na amwarake ao ake a kainnano a na wene i nanon te rau; ao N na tiringia wakaam n te rongo, ao e na tiringiia nikiraia am aomata.

31 Tang n nanokawaki, O te mataroa; tang, O te kaawa ae bubura. Ngkami Bwaretaina birinako ni kabane; bwa e na kaoti mai meang te bubu, ao a na akea ae e na aki mena ni nnena n te tai are e baireaki.

32 Teraa ae ti na taekinna nakoia taan uarongorongo man aaba nako? Bwa te Uea e a tia ni katea Tion, ao ana aomata aika kainnano a na onimakinna.