1 Nim no kuv, Nifais, hais tej yam txog tej lus uas kuv tau sau, uas tau raug hais los ntawm Yaxayas lub qhov ncauj. Vim saib seb, Yaxayas tau hais ntau yam uas nyuaj rau kuv cov neeg ntau tus to taub; vim lawv tsis paub txog cov Neeg Yudais tej kev qhia txog tej uas yuav muaj los yav tom ntej.

2 Vim kuv, Nifais, tsis tau qhia lawv ntau yam txog cov Neeg Yudais tej kev cai dab qhuas; vim lawv tej hauj lwm yog tej hauj lwm ntawm kev tsaus ntuj, thiab lawv tej kev ua ub ua no yog kev ua ub ua no ntawm txoj kev qias.

3 Yog li ntawd, kuv sau rau kuv cov neeg, rau tag nrho txhua tus uas yuav txais tej no tom qab uas kuv sau, xwv kom lawv yuav paub Vajtswv tej kev txiav txim, uas yuav los rau saum txhua txhia haiv neeg, raws li txoj lus uas nws tau hais lawm.

4 Yog li ntawd, cia li mloog, Au kuv cov neeg, uas yog tsev neeg Ixayees, thiab cia li cuab pob ntseg rau kuv tej lus; vim txawm tias Yaxayas tej lus tsis tshua meej rau nej los, txawm li ntawd los lawv yeej meej rau txhua txhia tus uas muaj tus ntsuj plig puv npo ntawm txoj kev tshwm sim. Tiam sis kuv qhia ib yam uas yuav muaj los yav tom ntej rau nej, raws li tus ntsuj plig uas nyob hauv kuv; yog li ntawd kuv yuav qhia tej uas yuav muaj los yav tom ntej raws li txoj kev qhia meej uas tau nrog kuv nyob txij li lub caij uas kuv tau tawm hauv Yeluxalees nrog kuv txiv tuaj lawm; vim saib seb, kuv tus ntsuj plig tau zoo siab nyob hauv txoj kev qhia meej rau kuv cov neeg, xwv kom lawv yuav kawm.

5 Muaj tseeb tiag, thiab kuv tus ntsuj plig zoo siab rau hauv Yaxayas tej lus, vim kuv tau tawm hauv Yeluxalees tuaj, thiab kuv lub qhov muag tau pom tej uas yog cov Neeg Yudais li, thiab kuv paub tias cov Neeg Yudais yeej to taub tej uas yog cov yaj saub li, thiab yeej tsis muaj dua lwm cov neeg uas to taub tej uas tau raug hais rau cov Neeg Yudais li lawv li, tsuas yuav yog tias lawv tau raug qhia mus raws li tej uas tau qhia rau cov Neeg Yudais lawm xwb.

6 Tiam sis saib seb, kuv, Nifais, tsis tau qhia kuv tej me nyuam mus raws li tej uas tau qhia cov Neeg Yudais; tiam sis saib seb, kuv, tus kheej, tau nyob tim Yeluxalees, yog li ntawd kuv paub txog tej cheeb tsam ib puag ncig; thiab kuv tau piav rau kuv tej me nyuam txog Vajtswv txoj kev txiav txim, uas tau muaj rau cov Neeg Yudais, rau kuv tej me nyuam, raws li txhua yam huv tib si uas Yaxayas tau hais, thiab kuv tsis sau lawv cia.

7 Tiam sis saib seb, kuv yuav pib ntxiv txog kuv tus kheej txoj kev qhia tej uas yuav muaj los yav tom ntej, raws li kuv txoj kev qhia meej; uas kuv paub tias tsis muaj neeg yuav muaj cuab kav ua kom tsis raug; txawm li ntawd los, nyob rau lub caij uas yuav muaj tshwm sim rau Yaxayas tej kev qhia tej uas yuav muaj los yav tom ntej neeg yeej yuav paub tseeb, nyob rau lub caij thaum uas lawv yuav muaj dhau los mus.

8 Yog li ntawd, cov no muaj nuj nqis rau tib neeg, thiab tus uas xav tias cov no tsis muaj nqis, kuv yuav hais rau lawv cov no nkaus xwb, thiab tsuas yuav hais tej lus no rau kuv cov neeg xwb; vim kuv paub tias lawv yuav muaj nuj nqis heev rau lawv nyob rau hauv hnub nyoog kawg; vim nyob rau hnub ntawd lawv yuav to taub lawv; yog li ntawd, rau qhov zoo rau lawv kuv thiaj tau sau lawv.

9 Thiab ib yam li ib tiam neeg tau raug puas tsuaj nyob hauv cov Neeg Yudais vim txoj kev tsis ncaj, ces lawv thiaj tau raug puas tsuaj ib tiam dhau ib tiam raws li lawv tej kev tsis ncaj ncees; thiab lawv yeej tsis tau muaj ib tug uas raug puas tsuaj tsuas yog tej uas tus Tswv tej yaj saub tau qhia rau lawv lawm xwb.

10 Yog li ntawd, lawv twb tau raug qhia hais txog txoj kev puas tsuaj uas yuav los rau lawv, sai sai tom qab uas kuv txiv tau ncaim Yeluxalees lawm; txawm li ntawd los, lawv tseem ua lawv tej siab tawv qhwb qhawv; thiab raws li kuv txoj kev qhia tej uas yuav muaj los yav tom ntej lawv tau raug puas tsuaj lawm, tsuas yog tshuav cov uas tau raug txhom coj mus ua qhev rau hauv Npanpiloos lawm xwb.

11 Thiab nim no kuv tau hais li no vim ntawm tus ntsuj plig uas nyob hauv kuv. Thiab txawm li ntawd los lawv tau raug cab coj mus lawm lawv yuav rov qab los dua, thiab tau thaj av ntawm Yeluxalees ua lawv tug; yog li ntawd, lawv yuav raug txum tim rov qab los rau ntawm thaj av uas yog lawv qub txeeg qub teg dua.

12 Tiam sis, saib seb, lawv yuav muaj tsov muaj rog, thiab lus paj lus cua txog tsov rog; thiab txog thaum lub sij hawm tias Leej Txiv Tib Leeg Tub los, muaj tseeb tiag, lub ntuj thiab lub ntiaj teb Leej Txiv, yuav los qhia nws tus kheej rau lawv nyob hauv cev nqaij daim tawv, saib seb, lawv yuav tsis lees yuav nws, vim lawv tej kev tsis ncaj ncees, thiab lawv txoj kev ua siab tawv qhwb qhawv, thiab lawv txoj kev uas ua caj dab tawv qhawv.

13 Saib seb, lawv yuav muab nws ntsia rau saum ntoo khaub lig; thiab tom qab uas nws tau raug muab tso rau hauv ib lub qhov ntxa pob zeb tau sij hawm puv peb hnub lawm nws yuav sawv tawm hauv qhov tuag los, nrog txoj kev kho tau tej neeg muaj mob nyob hauv nws tej tis; thiab txhua tus cov uas yuav ntseeg nws lub npe yuav raug dim nyob rau hauv Vajtswv lub nceeg vaj. Yog li ntawd, kuv tus ntsuj plig zoo siab yuav qhia tej uas yuav muaj los yav tom ntej txog nws, vim kuv tau pom nws lub neej, thiab kuv lub siab yeej qhuas nws lub npe uas dawb huv.

14 Thiab saib seb yuav tau muaj tias tom qab uas tus Mexiyas tau sawv hauv qhov tuag los lawm, thiab tau qhia nws tus kheej rau nws cov neeg paub lawm, rau cov txawm yuav coob npaum cas uas yuav ntseeg nws lub npe paub lawm, saib seb, Yeluxalees yuav raug puas tsuaj dua; vim txoj kev txom nyem yuav raug rau lawv cov uas tawm tsam Vajtswv thiab cov neeg ntawm nws lub koom txoos.

15 Yog li ntawd, cov Neeg Yudais yuav raug tawg khiav ri niab mus txuam rau txhua haiv neeg; muaj tseeb tiag, thiab Npanpiloos los kuj yuav raug puas tsuaj thiab; yog li ntawd, cov Neeg Yudais yuav raug ua kom tawg ri niab los ntawm lwm cov neeg.

16 Thiab tom qab uas lawv tau raug tawg ri niab lawm, thiab tus Tswv uas yog Vajtswv tau rau txim rau lawv los ntawm lwm haiv neeg tau sij hawm ntau tiam neeg lawm, muaj tseeb tiag, twb yuav nqis dhau ib tiam neeg mus rau ib tiam neeg mus txog thaum lawv yuav raug yaum los ntseeg Khetos, Vajtswv tus Tub, thiab txoj kev theej txhoj uas theej tag nrho rau sawv daws—thiab thaum uas hnub ntawd yuav los tias lawv yuav ntseeg Khetos, thiab teev tiam Leej Txiv los ntawm nws lub npe, nrog tej siab huv huv thiab tej tes huv si, thiab tsis txhob tos ntsoov ib zaug ntxiv rau lwm tus Mexiyas lawm, ces, nyob rau lub caij ntawd, hnub ntawd yuav los tias tsim nyog heev uas lawv yuav tsum ntseeg tej no.

17 Thiab tus Tswv yuav ncav nws txhais tes dua zaum ob los txum tim nws cov neeg ntawm lawv txoj kev poob zoo thiab txoj kev qaug kom zoo li qub. Yog li ntawd, nws yuav pib ua ib txog hauj lwm zoo kawg nkaus uas xav tsis thoob thiab ib txog uas xav tsis tag rau ntawm tib neeg.

18 Yog li ntawd, nws yuav coj nws tej lus los rau lawv, yog tej lus uas yuav txiav txim rau lawv nyob rau thaum hnub kawg, vim tej lus no yuav raug muab rau lawv ua txoj hau kev ntawm txoj kev yaum lawv ntawm tus Mexiyas tseeb, tus uas lawv tau tsis kam lees yuav; thiab rau txoj kev yaum ntawm lawv tias kom txhob tos ntxiv tias ib tug Mexiyas tseem yuav los, vim yuav tsis muaj ib tug los, tsuas yog yuav muaj tus Mexiyas cuav uas yuav dag ntxias cov neeg xwb; vim tsuas muaj tib tug Mexiyas uas tej yaj saub tau hais xwb, thiab tus Mexiyas ntawd yog tus uas yuav raug cov Neeg Yudais tsis kam lees yuav.

19 Vim raws li cov yaj saub tej lus, tus Mexiyas yuav los hauv rau pua xyoo txij li lub caij uas kuv txiv tau ncaim Yeluxalees; thiab raws li cov yaj saub tej lus, thiab raws li Vajtswv tim tswv lo lus thiab, nws lub npe yuav yog Yexus Khetos, Vajtswv tus Tub.

20 Thiab nim no, kuv cov kwv tij es, kuv tau qhia meej meej xwv kom nej thiaj tsis to taub yuam kev. Thiab ib yam li tus Tswv Vajtswv uas tseem muaj txoj sia nyob uas tau coj cov neeg Ixayees tawm tim lub teb chaws Iyiv los, thiab tau muab lub hwj chim rau Mauxes kom nws yuav tsum kho cov neeg tom qab uas lawv tau raug tej nab muaj taug tom, yog hais tias lawv yuav tsa qhov muag ntsia tus nab uas nws tau tsa sawv ntawm lawv xub ntiag, thiab kuj tau muab lub hwj chim rau nws xwv kom nws yuav ntaus tau lub pob zeb thiab dej yuav tawm hauv los; muaj tseeb tiag, saib seb kuv hais rau nej, tias xws li tej yam no twb muaj tseeb, thiab ib yam li tus Tswv Vajtswv uas tseem muaj txoj sia nyob, tsis muaj lwm lub npe nyob hauv qab ntuj no tsuas yog tus Yexus Khetos no xwb, tus uas kuv tau hais txog, uas neeg thiaj li yuav dim taus.

21 Yog li ntawd, vim yam xwm no tus Tswv uas yog Vajtswv thiaj tau cog lus rau kuv tias tej yam no uas kuv sau yuav tsum raug ceev thiab hwm tseg, thiab cev los rau kuv tej noob, ib tiam dhau ib tiam, xwv kom cov lus cog tseg yuav muaj tau puv npo rau Yauxej, xwv kom nws tej noob yuav tsis piam sij yog hais tias lub ntiaj teb no tseem yuav nyob.

22 Yog li ntawd, tej yam no yuav dhau ib tiam mus rau ib tiam ntev tau npaum li lub ntiaj teb yuav nyob; thiab lawv yuav mus raws li Vajtswv lub siab xav thiab lub siab nyiam; thiab cov haiv neeg uas yuav tau lawv yuav raug txiav txim raws li tej lus uas tau raug muab sau cia.

23 Vim peb rau siab ntso ua zoo sau, los yaum peb tej me nyuam, thiab peb cov kwv tij thiab, kom los ntseeg hauv Khetos, thiab rov los nrog Vajtswv sib raug zoo; vim peb paub hais tias twb yog los ntawm txoj kev zoo uas peb raug cawm dim, tom qab uas peb tau ua txhua txhia yam uas peb ua tau.

24 Thiab, txawm li ntawd los peb ntseeg hauv Khetos, peb coj Mauxes txoj kev cai, thiab cia siab ntsoov nrog txoj kev nyob khov kho rau Khetos, kom txog thaum uas txoj kev cai muaj tiav lawm.

25 Vim tias, yog rau qhov kawg no txoj kev cai thiaj raug muab; yog li ntawd txoj kev cai tau rais los tuag rau peb lawm, thiab peb tau raug ua kom muaj sia hauv Khetos vim peb txoj kev ntseeg; tsis tas li xwb peb coj txoj kev cai vim yog tej lus txib.

26 Thiab peb hais txog Khetos, peb zoo siab rau Khetos, peb qhia txog Khetos, peb qhia tej uas yuav muaj los yav tom ntej txog Khetos, thiab peb sau raws li peb tej kev tshaj tawm kev tshwm sim, xwv kom peb tej me nyuam yuav paub txog yam uas lawv yuav nrhiav los ntxuav lawv tej kev txhaum mus.

27 Yog li ntawd, peb hais txog txoj kev cai xwv kom peb tej me nyuam yuav paub txog txoj kev tuag ntawm txoj kev cai; thiab los ntawm txoj kev paub txog txoj kev tuag ntawm txoj kev cai, lawv yuav nrhiav mus rau txoj sia uas yog nyob hauv Khetos, thiab paub tias qhov uas muaj txoj kev cai yog rau qhov dab tsi. Thiab tom qab uas txoj kev cai muaj tiav los ntawm Khetos lawm, kom lawv yuav tsum tsis txhob ua lawv tej siab tawv qhwb qhawv tawm tsam nws thaum uas txoj kev cai twb tsis muaj nuj nqis lawm.

28 Thiab nim no saib seb, kuv cov neeg, nej yog cov neeg tawv ncauj; yog li ntawd, kuv tau qhia meej meej rau nej, xwv kom nej thiaj yuav tsis to taub yuam kev. Thiab tej lus uas kuv tau hais yuav sawv ua ib qho tim khawv rau nej; vim lawv yeej txaus qhia tau txoj kev yog txawm rau tus tib neeg twg; vim txoj kev tseeb yog ntseeg hauv Khetos thiab tsis txhob tsis kam lees nws; vim yog nej tsis kam lees nws ces kuj yog nej tsis kam lees yuav tej yaj saub thiab txoj kev cai.

29 Thiab nim no saib seb, kuv hais rau nej tias txoj kev tseeb yog ntseeg hauv Khetos, thiab tsis txhob tsis kam lees nws; thiab Khetos yog Ixayees Tus Dawb Huv; yog li ntawd nej yuav tsum khoov teev nws, thiab teev nws kom tag nej lub dag lub zog, lub siab lub ntsws, thiab lub plab lub plawv, thiab tag nrho nej tus ntsuj plig; thiab yog hais tias nej ua li no nej yeej yuav tsis raug ntiab tawm.

30 Thiab, npaum li cas los yog hais tias nws yuav txaus ces, nej yuav tsum coj tej kev ua ub ua no thiab tej kab ke ntawm Vajtswv mus txog thaum txoj kev cai uas tau muab rau Mauxes lawm tiav tso.