1 Karon ako, si Nephi, mosulti og diyotay mahitungod sa mga pulong nga akong gisulat, nga gipamulong sa ba-ba ni Isaias. Kay tan-awa, si Isaias namulong og daghang butang nga lisod sabton sa daghan sa akong katawhan; kay wala sila masayod mahitungod sa pamaagi sa pagpanagna sa mga Judeo.

2 Kay ako, si Nephi, wala motudlo kanila og daghang butang mahitungod sa pamaagi sa mga Judeo; kay ang ilang mga buhat mga buhat sa kangitngit, ug ang ilang gipanghimo mga buhat nga salawayon.

3 Mao nga, mosulat ako ngadto sa akong katawhan, ngadto sa tanan niadtong modawat sukad karon niini nga mga butang nga akong isulat, aron sila mahibalo sa mga paghukom sa Dios, nga moabot kini sa tanang kanasoran, sumala sa pulong nga iyang gipamulong.

4 Mao nga, patalinghog, O akong katawhan, nga anaa sa balay ni Israel, ug patalinghogi ang akong mga pulong; tungod kay ang mga pulong ni Isaias dili yano nganha kaninyo, apan yano kini ngadto sa tanan nga puno sa espiritu sa panagna. Apan hatagan ko kamo og usa ka panagna, sumala sa espiritu nga ania kanako; mao nga managna ako sumala sa kayano nga ania kanako sukad pa sa akong pagbiya sa Jerusalem uban sa akong amahan; kay tan-awa, ang akong kalag nahimuot sa kayano sa pagpakigsulti ngadto sa akong katawhan, aron sila makakat-on.

5 Oo, ug ang akong kalag nahimuot sa mga pulong ni Isaias, kay naggikan ako sa Jerusalem, ug ang akong mga mata nakakita sa mga butang sa mga Judeo, ug nahibalo ako nga ang mga Judeo nakasabot sa mga pulong sa mga propeta, ug walay laing katawhan nga makasabot sa mga butang nga gipamulong ngadto sa mga Judeo sama kanila, gawas kon sila matudloan sa naandang pamaagi sa mga butang sa mga Judeo.

6 Apan tan-awa, ako, si Nephi, wala motudlo sa akong mga anak sa naandang pamaagi sa mga Judeo; apan tan-awa, ako, mismo, nakapuyo sa Jerusalem, mao nga nahibalo ako mahitungod sa mga rehiyon nga nagpalibot niini; ug akong gihisgotan ngadto sa akong mga anak ang mahitungod sa mga paghukom sa Dios, nga nahitabo sa mga Judeo, ngadto sa akong mga anak, sumala sa tanan nga gipamulong ni Isaias, ug wala nako kini isulat.

7 Apan tan-awa, akong ipadayon ang akong kaugalingong pagpanagna, sumala sa akong pagkayano; diin nga kayano ako nahibalo nga dili masaypan sa pagsabot sa tawo; bisan pa niana, sa mga adlaw unya nga ang mga panagna ni Isaias matuman, ang mga tawo mahibalo sa tataw gayod, niana nga mga panahon kon kini mahitabo na.

8 Mao nga, kini mga bililhon sa mga anak sa katawhan, ug siya nga nagtuo nga dili kini bililhon, ngadto kanila ako mamulong sa piho, ug mohatag niining mga pulong ngadto sa kaugalingon nakong katawhan; kay ako nasayod nga dako kaayo kini og bili ngadto kanila sa kataposang mga adlaw; kay niana nga adlaw makasabot sila niini; mao nga, alang sa ilang kaayohan nga gisulat ko kini.

9 Ug sama nga ang usa ka henerasyon nalaglag taliwala sa mga Judeo tungod sa pagkadaotan, mao usab ang ilang pagkalaglag gikan sa usa ka henerasyon ngadto sa laing henerasyon sumala sa ilang mga pagkadaotan; ug walay bisan kinsa kanila ang nalaglag gawas nga kini gitagna diha kanila sa mga propeta sa Ginoo.

10 Mao nga, nasultihan na sila mahitungod sa pagkalaglag nga modangat kanila, dihadiha gayod human mibiya ang akong amahan sa Jerusalem; bisan pa niana, nagmagahi sila sa ilang mga kasingkasing; ug sumala sa akong panagna nangalaglag sila, gawas lang niadtong gipangdala nga bihag ngadto sa Babilonia.

11 Ug karon gipamulong ko kini tungod sa espiritu nga ania kanako. Ug bisan og gidala sila sa laing dapit mamalik gihapon sila, ug manag-iya sa yuta sa Jerusalem; mao nga, ipahiuli sila og balik sa yuta nga ilang kabilin.

12 Apan, tan-awa, makasinati sila og mga gubat, ug mga hungihong sa gubat; ug kon moabot na ang adlaw nga ang Bugtong Anak sa Amahan, oo, gani ang Amahan sa langit ug sa yuta, mopakita kanila sa unod, tan-awa, sila mosalikway kaniya tungod sa ilang mga kadaotan ug pagmagahi sa ilang mga kasingkasing, ug katikig sa ilang mga liog.

13 Tan-awa, sila molansang kaniya sa krus; ug human siya mapahimutang sa lubnganan sulod sa tulo ka adlaw siya mobangon gikan sa pagkamatay, dala ang pagpang-ayo diha sa iyang mga pako; ug kadtong tanan nga magatuo sa iyang ngalan maluwas sa gingharian sa Dios. Mao nga, ang akong kalag nahimuot sa pagpanagna mahitungod kaniya, kay ako nakakita sa iyang panahon, ug ang akong kasingkasing nagadayeg sa iyang balaan nga ngalan.

14 Ug tan-awa mahitabo nga human ang Mesiyas mobangon gikan sa pagkamatay, ug mopakita sa iyang kaugalingon ngadto sa iyang katawhan, ngadto sa tanan nga motuo sa iyang ngalan, tan-awa, ang Jerusalem pagalaglagon na usab; kay alaot sila nga makigbatok sa Dios ug sa katawhan sa iyang simbahan.

15 Mao nga, ang mga Judeo pagatibulaagon taliwala sa tanang kanasoran; oo, ug usab ang Babilonia pagalaglagon; mao nga, ang mga Judeo tibulaagon pinaagi sa ubang mga nasod.

16 Ug human nga sila matibulaag, ug ang Ginoong Dios mosakit kanila pinaagi sa ubang mga nasod sulod sa daghang mga henerasyon, oo, gani gikan sa usa ka henerasyon ngadto sa laing henerasyon hangtod nga maaghat sila sa pagtuo kang Kristo, nga Anak sa Dios, ug sa pag-ula, nga walay kinutoban alang sa tanan nga katawhan—ug kon moabot na kana nga adlaw nga sila motuo na kang Kristo, ug mosimba sa Amahan pinaagi sa iyang ngalan, uban sa putli nga mga kasingkasing ug limpyong mga kamot, ug dili na magpaabot og lain pang Mesiyas, nan, niana nga panahon, ang adlaw moabot nga kinahanglan silang motuo niini nga mga butang.

17 Ug ang Ginoo mosugod na usab sa ikaduhang higayon sa pagpahiuli sa iyang katawhan gikan sa ilang nawala ug napukan nga kahimtang. Mao nga, mopadayon siya sa paghimo og usa ka kahibulongan nga buhat taliwala sa mga anak sa katawhan.

18 Mao nga, iyang ipadayag ang iyang mga pulong ngadto kanila, diin nga mga pulong magahukom kanila sa kataposang adlaw, kay pagahatagan sila niini alang sa katuyoan sa pag-agni kanila bahin sa tinuod nga Mesiyas, kinsa ilang gisalikway; ug ngadto sa pag-agni kanila nga sila dili na kinahahanglang maghulat pa og laing Mesiyas nga moabot, kay wala nay lain pang moabot, gawas kon kini usa ka mini nga Mesiyas nga molingla sa katawhan; kay adunay usa lamang ka Mesiyas nga gipamulong sa mga propeta, ug kana nga Mesiyas mao siya kinsa isalikway sa mga Judeo.

19 Kay sumala sa mga pulong sa mga propeta, ang Mesiyas moabot unom ka gatos ka tuig gikan sa panahon nga ang akong amahan mibiya sa Jerusalem; ug sumala sa mga propeta, ug usab sa mga pulong sa anghel sa Dios, ang iyang ngalan mao si Jesukristo, ang Anak sa Dios.

20 Ug karon, akong mga igsoong lalaki, ako namulong sa yanong paagi aron dili kamo masayop. Ug kay buhi ang Ginoong Dios nga midala sa Israel pagawas gikan sa yuta sa Ehipto, ug mihatag kang Moises og gahom aron siya moayo sa kanasoran human nga sila gipamaak sa mga malala nga bitin, kon ipunting nila ang ilang mga mata ngadto sa bitin nga iyang giisa sa ilang atubangan, ug mihatag usab kaniya og gahom nga bunalan niya ang dako nga bato ug ang tubig mobugwak; oo, tan-awa ako mosulti kaninyo, nga kay tinuod man kini nga mga butang, ug kay buhi ang Ginoong Dios, walay laing ngalan nga gihatag ubos sa langit gawas niini nga Jesukristo, nga akong gipamulong, diin ang tawo maluwas.

21 Mao nga, tungod niini nga katuyoan ang Ginoong Dios misaad kanako nga kining mga butang nga akong gisulat pagatagoan ug ipatunhay, ug ipasa ngadto sa akong mga binhi, gikan sa usa ka henerasyon ngadto sa laing henerasyon, aron ang saad matuman ngadto kang Jose, nga ang iyang binhi dili gayod mangamatay samtang magbarog pa ang kalibotan.

22 Mao nga, kini nga mga butang mohangtod gikan sa usa ka henerasyon ngadto sa laing henerasyon samtang magbarog pa ang kalibotan; ug magpadayon kini sumala sa kabubut-on ug kahimuot sa Dios; ug ang kanasoran nga makaangkon niini pagahukman sumala sa mga pulong nga nahisulat.

23 Kay kami makugihong naghago sa pagsulat, aron sa pagdani sa among mga anak, ug usab sa among kaigsoonan nga motuo kang Kristo, ug makig-uli sa Dios; kay nahibalo kami nga pinaagi sa grasya kami maluwas, human sa tanan nga among mabuhat.

24 Ug, bisan pa og nagatuo kami kang Kristo, kami nagtuman sa balaod ni Moises, ug naglantaw sa umaabot uban ang pagkamakanunayon diha kang Kristo, hangtod matuman ang balaod.

25 Tungod kay, alang niini nga katuyoan ang balaod gihatag; mao nga ang balaod namatay ngari kanamo, ug gibuhi kami diha kang Kristo tungod sa among pagtuo; bisan pa niini nagtuman kami sa balaod tungod sa mga sugo.

26 Ug naghisgot kami kang Kristo, nagmaya kami diha kang Kristo, nagsangyaw kami mahitungod kang Kristo, nanagna kami mahitungod kang Kristo, ug nagsulat kami sumala sa among mga panagna, aron ang among mga anak mahibalo kon sa unsang tinubdan sila mosalig alang sa kapasayloan sa ilang mga sala.

27 Mao nga, namulong kami mahitungod sa balaod aron ang among mga anak mahibalo sa pagkawalay pulos sa balaod; ug sila, tungod kay nahibalo sa pagkawalay pulos sa balaod, maglantaw niana nga kinabuhi nga anaa tungod kang Kristo, ug mahibalo kon sa unsang katuyoan gihatag kana nga balaod. Ug pagkahuman ang balaod matuman diha kang Kristo, aron sila dili na gayod magmagahi sa ilang mga kasingkasing batok kaniya sa panahon nga ang balaod dili na angay nga ipatuman.

28 Ug karon tan-awa, akong katawhan, mga tikig kamo og liog nga katawhan; mao nga, sa yanong paagi ako namulong kaninyo, aron dili kamo masayop sa pagsabot. Ug ang mga pulong nga akong gipamulong mobarog nga usa ka pagpamatuod batok kaninyo; kay igo na kining makatudlo ni bisan kinsa nga tawo sa hustong pamaagi; kay ang hustong pamaagi mao ang pagtuo kang Kristo ug sa dili paglimod kaniya; kay pinaagi sa paglimod kaniya gilimod usab ninyo ang mga propeta ug ang balaod.

29 Ug karon tan-awa, sultihan ko kamo nga ang hustong pamaagi mao ang pagtuo kang Kristo, ug dili paglimod kaniya; ug si Kristo mao ang Balaan sa Israel; mao nga kinahanglan nga moyukbo kamo kaniya, ug mosimba kaniya pinaagi sa inyong tanan nga gahom, hunahuna, ug kusog, ug sa inyong tibuok nga kalag; ug kon buhaton ninyo kini, dili gayod kamo isalikway.

30 Ug, samtang mahinungdanon kini, kinahanglan kamong motuman sa mga buluhaton ug mga ordinansa sa Dios hangtod ang balaod nga gihatag ngadto kang Moises matuman.