1 Thiab nim no, saib seb, kuv cov kwv tij, kuv tau hais rau nej, raws li tus Ntsuj Plig tau yuam kom kuv hais; yog li ntawd, kuv paub tias tej no yeej yuav muaj los xwb xwb li.

2 Thiab tej uas yuav raug muab sau tawm hauv phau ntawv los yuav raug muaj nuj nqis heev rau noob neej, thiab qhov tseem ceeb yog rau peb tej noob, uas yog ib cov noob seem los ntawm tsev neeg Ixayees.

3 Vim yuav tau muaj tias nyob rau hnub ntawd cov koom txoos uas tau raug tsa, thiab tsis yog tsa rau tus Tswv, thaum uas muaj ib tug yuav hais rau lwm tus hais tias: Saib seb, kuv, kuv yog tus Tswv li; thiab lwm tus ho yuav teb tias: Kuv, kuv yog tus Tswv li; thiab txhua tus uas tau tsa tej koom txoos yuav hais li no, thiab tsis yog rau tus Tswv—

4 Thiab lawv yuav ib leeg cam ib leeg; thiab lawv cov pov thawj yuav ib leeg cam ib leeg, thiab lawv yuav qhia tej uas lawv kawm lawv, thiab tsis kam txais yuav tus Vaj Ntsuj Plig Dawb Huv, uas txawj muab kev qhia.

5 Thiab lawv tsis kam txais yuav Vajtswv lub hwj chim, uas yog Ixayees Tus Dawb Huv; thiab lawv hais rau cov neeg tias: Cuab pob ntseg mloog peb, thiab nej cia li mloog peb tej kev qhuab qhia; vim saib seb niaj hnub nim no yeej tsis muaj Vajtswv, vim tus Tswv thiab tus Txhiv Dim tau ua nws txoj hauj lwm tiav lawm, thiab nws tau muab nws lub hwj chim rau tib neeg lawm;

6 Saib seb, nej cia li cuab pob ntseg rau kuv tej kev qhuab qhia; yog lawv leej twg yuav hais tias muaj ib qho txuj ci tseem ceeb tau ua los ntawm tus Tswv txhais tes, cia li tsis txhob ntseeg; vim niaj hnub nim no nws tsis yog tus Vajtswv uas muaj tej txuj ci tseem ceeb; nws twb tau ua nws txoj hauj lwm tiav lawm.

7 Muaj tseeb tiag, thiab yuav muaj coob leej uas hais tias: Yeej meem noj, yeej meem haus, thiab cia li zoo siab, vim tag kis peb yuav tuag; thiab nws yuav zoo rau peb.

8 Thiab kuj yuav muaj coob tug uas yuav hais tias: Yeej meem noj, yeej meem haus, thiab cia li zoo siab; txawm li ntawd los, yuav tsum ntshai Vajtswv—nws yuav tsis xav li cas rau tej kev txhaum me uas peb ua; muaj tseeb tiag, dag me ntsis, txhav luag lwm tus vim tej lus uas nws hais, khawb ib lub qhov rau ib tug neeg uas nyob ze nej; tej no ua yeej tsis ua cas li; thiab cia li ua ib puas tsav yam no, vim tag kis peb yuav tuag; thiab txawm tias peb txhaum los, Vajtswv yuav ntaus peb ob peb nplawg xwb, thiab thaum kawg peb yeej yuav raug dim los mus nyob rau hauv Vajtswv lub nceeg vaj.

9 Muaj tseeb tiag, thiab yuav muaj ntau tus uas yuav qhia zoo li no, tej lus cuav thiab tej lus tsis muaj qab hau thiab tej lus qhia uas vwm ntsuav, thiab yuav khav txiv ntxhias hauv lawv tej siab, thiab yuav zais lawv tej kev qhuab qhia ntawm Vajtswv kom tob; thiab lawv tej hauj lwm yuav nyob hauv kev tsaus ntuj.

10 Thiab cov ntseeg tej ntshav yuav quaj hu tawm hauv av los tawm tsam lawv.

11 Muaj tseeb tiag, lawv txhua tus tau ncaim tawm ntawm txoj kev lawm; lawv tau rais los mus ua neeg ntxeev siab.

12 Vim txoj kev khav theeb, thiab vim tej xib hwb cuav, thiab tej lus qhuab qhia cuav, lawv tej koom txoos tau rais los mus ua ib co uas tsis ncaj tsis huv, thiab lawv tej koom txoos yog tej uas muaj muaj plhus; vim txoj kev khav theeb lawv thiaj li muaj muaj plhus.

13 Lawv nyiag ntawm tej neeg pluag vim tej chaw dawb huv zoo uas lawv muaj; lawv nyiag ntawm tej neeg pluag vim lawv tej tsuj tej npuag; thiab lawv tsim txom tej neeg uas txo hwj chim thiab tej neeg pluag tej siab tej ntsws, vim lawv txoj kev khav theeb lawv thiaj muaj muaj plhus.

14 Lawv ua caj dab txhav txhav thiab tsa taub hau siab; muaj tseeb tiag, thiab vim txoj kev khav theeb, thiab txoj kev phem, thiab tej kev qias, thiab tej kev ua niam ntiav, lawv txhua txhia tus tau mus yuam kev lawm tsuas yog tshuav ob peb tug, cov uas lawv tus Khetos qab uas txo hwj chim xwb; txawm li ntawd los, lawv tseem raug luag coj, kom ntau ntau zaus lawv ua txhaum vim lawv tau raug qhia los ntawm neeg tej kev qhuab qhia.

15 Au cov neeg txawj ntse, thiab paub ntaub paub ntawv, thiab cov neeg nplua nuj, uas muaj plhus los ntawm lawv tej siab khav theeb, thiab tag nrho cov uas qhia tej lus qhia cuav, thiab tag nrho cov uas ua txhaum kev nkauj kev nraug, thiab muab tus Tswv txoj kev yog pauv, tus Tswv uas yog Vajtswv tus uas muaj hwj chim loj kawg nkaus hais tias, kev txom nyem, kev txom nyem, kev txom nyem yuav raug rau lawv lauj, vim lawv yuav raug muab pov nqis mus rau hauv ntuj txiag teb tsaus!

16 Kev txom nyem yuav raug rau lawv cov uas saib cov neeg ncaj ncees tsis rau nqi thiab cem phem rau tej uas zoo, thiab hais tias tej ntawd tsis muaj nuj nqis dab tsi! Vim muaj hnub yuav los txog uas tus Tswv uas yog Vajtswv yuav los xyuas cov neeg ntawm lub ntiaj teb sai sai; thiab nyob rau hnub ntawd thaum uas lawv siav nyob hauv txoj kev tsis ncaj lawv yuav piam sij.

17 Tiam sis saib seb, yog hais tias cov nyob hauv ntiaj teb yuav hloov siab lees txim ntawm lawv tej kev phem thiab kev qias lawv yuav tsis raug puas tsuaj, Ib Tsoom Tub Rog tus Tswv hais li ntawd.

18 Tiam sis saib seb, lub koom txoos loj thiab txaus ntxub ntawd, uas yog tag nrho ntiaj teb tus niam ntiav, yuav tsum raug vau mus rau hauv av, thiab qhov vau ntawd yuav phem kawg nkaus.

19 Vim tus dab lub nceeg vaj yuav tsum raug tshee hnyo, thiab lawv cov uas nyob rau hauv nws tsim nyog yuav raug txhib kom los hloov siab lees txim, los sis tus dab yuav muab nws txoj saw hlau uas kav ib txhis li los txhom lawv khi, thiab lawv yuav raug txhib kom npau taws, thiab piam sij;

20 Vim saib seb, nyob rau hnub ntawd, nws yuav tshum tib neeg tej siab, thiab txhib kom lawv npau taws tawm tsam tej uas zoo.

21 Thiab nws yuav nplij kom lwm tus zoo siab, thiab ntxias lawv mus rau txoj kev tau zoo thiab kev muaj hauv ntiaj teb no, kom lawv yuav hais tias; Txhua yam tsav yeej zoo kawg nyob hauv Xi-oos; muaj tseeb tiag, Xi-oos yeej huaj vam, txhua yam puav leej zoo—thiab li ntawd tus dab thiaj dag ntxias tau lawv tej ntsuj plig, thiab yuav maj mam coj lawv mus rau hauv ntuj txiag teb tsaus.

22 Thiab saib seb, nws ntxias lwm cov lawm, thiab qhia rau lawv hais tias yeej tsis muaj ntuj txiag teb tsaus; thiab nws hais rau lawv tias: Kuv tsis yog dab, vim ib txwm yeej tsis muaj dab—thiab nws yuav ntxhi rau lawv tej pob ntseg li no, mus txog thaum uas nws muab nws txoj saw hlau uas dab tuag heev khi tau lawv, qhov ntawd lawv yuav nti tsis dim ib zaug li.

23 Muaj tseeb tiag, lawv twb raug khi nrog txoj kev tuag, thiab ntuj txiag teb tsaus; thiab txoj kev tuag, thiab ntuj txiag teb tsaus, thiab tus dab, thiab txhua txhia tus uas raug mag lub voj hlua ntawd yuav tsum raug los sawv ntawm Vajtswv lub rooj zaum, thiab raug txiav txim mus raws li lawv tes hauj lwm, ntawm qhov ntawd lawv yuav tsum tau mus rau hauv qhov chaw uas tau npaj rau lawv lawm, twb yog ib lub pas dej hluav taws thiab leej faj, uas muaj kev tsim txom tsis txawj kawg li.

24 Yog li ntawd, kev txom nyem yuav raug rau nws tus uas tau zoo nyob hauv Xi-oos!

25 Kev txom nyem yuav raug rau nws tus uas qw hais tias: Txhua txhia yam puav leej zoo!

26 Muaj tseeb tiag, kev txom nyem yuav raug rau nws tus uas mus cuab pob ntseg mloog rau neeg tej lus qhuab qhia, thiab tsis kam txais yuav Vajtswv lub hwj chim, thiab lub txiaj ntsim Vaj Ntsuj Plig tus Dawb Huv!

27 Muaj tseeb tiag, kev txom nyem yuav raug rau nws tus uas hais tias. Peb tau txais lawm, thiab peb tsis yuav ntxiv lawm!

28 Thiab thaum kawg, kev txom nyem yuav raug rau txhua txhia tus cov uas npau tshee hnyo, thiab npau taws vim Vajtswv txoj kev tseeb! Vim saib seb, nws tus uas raug tsa rau saum lub pob zeb yuav txais nws nrog txoj kev zoo siab; thiab nws tus uas tsa rau saum tej xuab zeb txheem ntshai nws yuav vau tshee hnyo.

29 Kev txom nyem yuav raug rau nws tus uas yuav hais tias: Peb tau txais Vajtswv txoj lus lawm, thiab peb tsis xav tau Vajtswv txoj lus ntxiv lawm, vim peb muaj txaus lawm!

30 Vim saib seb, tus Tswv uas yog Vajtswv hais li no: Kuv yuav muab rau noob neej ib kab tag mam li ib kab, ib zaj tag mam li ib zaj, me ntsis qhov no thiab me ntsis qhov tod; thiab lawv cov uas mloog kuv tej lus qhia, thiab cuab pob ntseg rau kuv tej lus ntuas, yuav tau txais koob hmoov, vim lawv yuav kawm kev txawj ntse; vim rau nws tus uas tau txais kuv yuav muab ntau ntxiv; thiab rau lawv cov uas yuav hais tias, Peb muaj txaus lawm, tej uas lawv muaj yuav raug muab tawm ntawm lawv mus.

31 Nws tus uas cia siab rau neeg, los sis cia siab rau nws lub hwj chim, los sis tus uas yuav mloog rau neeg tej lus qhuab qhia, yuav raug foom tsis zoo, tsuas yog tias lawv tej lus qhuab qhia yuav yog tus Vaj Ntsuj Plig Dawb Huv lub hwj chim muab xwb thiaj yuav tsis raug foom.

32 Kev txom nyem yuav raug rau Lwm Haiv Neeg, Ib Tsoom Tub Rog tus Tswv uas yog Vajtswv hais li! Vim txawm li ntawd los kuv yuav xyab kuv txhais caj npab rau lawv ib hnub dhau ib hnub los, lawv yeej yuav tsis lees paub kuv; txawm li ntawd los, kuv yuav ua siab ntev hlub lawv, tus Tswv uas yog Vajtswv hais li, yog hais tias lawv yuav hloov siab lees txim thiab los mus cuag kuv; vim kuv txhais caj npab yeej xyab rawv tas hnub li, Ib Tsoom Tub Rog tus Tswv uas yog Vajtswv hais li.