1 Ia raica, ena lewe vuqa—ena siga ko ya ni’u na qai cakava kina e dua na cakacaka talei ena kedra maliwa, me’u na nanuma kina na noqu veiyalayalati ka’u a cakava vei ira na luve ni tamata, me’u na dodoka tale kina vakarua na ligaqu me’u tauri ira tale mai kina na noqu tamata, ko ira na mataqali i Isireli;

2 Ka me’u na nanuma talega kina na vei yalayala au a cakava vei iko, Nifai, kei tamamu talega, ni’u na nanumi ira na nomu kawa; ka ni na lako yani mai gusuqu na nodra vosa na nomu kawa vei ira na nomu kawa; ka na vakasiusiutaki yani na noqu vosa ki na iyalayala kei vuravura, me nodra drotini na noqu tamata o ira na mataqali i Isireli;

3 Ia ena vuku ni sa na vakasiusiutaki yani na noqu vosa—era na kaya e vuqa na kai Veimatanitu Tani: E dua na iVolatabu! E dua na iVolatabu! Sa dua tiko na neimami iVolatabu, ka sa sega ni rawa me na dua tale na iVolatabu.

4 Ia sa kaya vakaoqo na Turaga na Kalou: A tamata lialia, ena dua na nodra iVolatabu; ka na lako mai vei ira na Jiu, na noqu tamata makawa ni veiyalayalati. Era sa bau vakavinavinakataka li vei ira na Jiu na iVolatabu era sa taura mai vei ira? Io, na cava era sa nanuma na kai Veimatanitu Tani? Era sa bau nanuma li na nodra veivakararawataki, na nodra cakacaka, kei na nodra oca na Jiu, kei na nodra gumatua vei au, me ra kauta yani kina na veivakabulai vei ira na kai Veimatanitu Tani?

5 Oi kemudou na kai Veimatanitu Tani, dou sa nanumi ira li na Jiu, ko ira na noqu tamata makawa ni veiyalayalati? E segai; ia dou sa cudruvi ira ga, ka a cati ira, ka sega ni segata mo dou kauti ira lesu tale mai. Ia raica, au na vakalesuya tale na veika kece oqo ena ulumudou; ni’u se sega ni guilecavi ira na noqu tamata koi au na Turaga.

6 O iko na lialia, ko sa kaya: E dua na iVolatabu, sa tiko e dua na neimami iVolatabu, ka keimami sa sega ni gadreva e dua tale na iVolatabu. Dou a rawata li e dua na iVolatabu kevaka era a sega na Jiu?

7 Dou sa sega beka ni kila ni sa vuqa na matanitu ka sega ni dua wale ga? Dou sa sega beka ni kila ni koi au, na Turaga na nomudou Kalou, au sa buli ira na tamata kecega, ka’u sa nanumi ira era sa tiko ena veiyanuyanu ni wasawasa; ka’u sa lewa tiko mai na vei lomalagi e cake kei na vuravura e ra; ka’u sa kauta yani na noqu vosa vei ira na luve ni tamata, io, ki na veimatanitu kecega e vuravura?

8 Ia na cava dou sa vosakudrukudru kina, ni dou na ciqoma e so tale na noqu vosa? Dou sa sega beka ni kila ni sa ivakadinadina vei kemudou na nodrau itukutuku na matanitu e rua ni sai au na Kalou, ka’u sa nanumi ira vakatautauvata na veimatanitu? O koya au sa vosataka kina na vosa vata ga vua e dua na matanitu ki vua e dua tale. Ia ni rau sa mai tovata na matanitu e rua, sa na tovata talega na nodrau ivakadinadina.

9 Ka’u sa kitaka oqo me’u vakadinadinataka kina vei ira na lewe vuqa ni’u sai koyakoya tiko ga e nanoa, na siga edaidai, ka sega ni mudu; ka’u sa tukuna yani na noqu vosa me vaka au sa lewa. Ia, baleta ni’u sa vosataka oti e dua na vosa, dou kakua kina ni nanuma ni’u sa sega ni vosataka rawa tale e dua; ni se bera ni oti na noqu cakacaka; ka na sega talega ni oti me yacova na ivakataotioti ni tamata, ka sega talega mai na gauna ko ya me lako yani ka tawamudu.

10 O koya gona, me vaka sa tiko vei kemudou e dua na iVolatabu dou kakua ni nanuma ni sa tu kece kina na noqu vosa; dou kakua talega ni nanuma ni’u a sega ni vakavuna me volai e so tale.

11 Ni’u sa vakarota na tamata kecega, ko ira mai na tokalau kei ira mai na ra, mai na vualiku kei ira mai na ceva, kei ira mai na veiyanuyanu ni wasawasa, me ra vola na vosa au sa vosataka vei ira; ni’u na lewai vuravura mai na ivola era na volai, na tamata yadua me vaka na nodra ivalavala, me vaka na ka sa volai.

12 Ia raica, au na vosa vei ira na Jiu, ka ra na vola; ka’u na vosa talega vei ira na Nifaiti ka ra na vola; ka’u na vosa talega vei ira na veiyavusa tale e so ni mataqali i Isireli, ka’u a tuberi ira tani, ka ra na vola; ka’u na vosa talega vei ira na veimatanitu kece e vuravura ka ra na vola.

13 Ia ena qai yaco ni ra na taura na Jiu na nodra vosa na Nifaiti, ka ra na taura na Nifaiti na nodra vosa na Jiu; ia ko ira na Nifaiti kei ira na Jiu ena tu vei ira na nodra vosa na veiyavusa i Isireli era sa yali tu; ia ko ira na veiyavusa i Isireli era sa yali ena tu vei ira na nodra vosa na Nifaiti kei na Jiu.

14 Ka na qai yaco ni ra na vakasoqoni vata tale ko ira na noqu tamata, na mataqali i Isireli, ki na vanua sa nodra me ra taukena; ka na vakauturi vata na noqu vosa me duabau ga. Ka’u na vakaraitaka vei ira sa valuta na noqu vosa ka valuti ira na noqu tamata, na mataqali i Isireli, ni sai au na Kalou, ka’u a veiyalayalati kei Eparaama ni’u na nanumi ira na nona kawa me sega ni mudu.