ບົດທີ 29
ຄົນຕ່າງຊາດຢ່າງຫລວງຫລາຍຈະປະຕິເສດພຣະຄຳພີມໍມອນ—ພວກເຂົາຈະເວົ້າວ່າ, ພວກເຮົາບໍ່ຕ້ອງການພຣະຄຣິສຕະທຳຄຳພີເຫລັ້ມອື່ນອີກ—ພຣະຜູ້ເປັນເຈົ້າໄດ້ກ່າວກັບຫລາຍປະຊາຊາດ—ພຣະອົງຈະພິພາກສາໂລກມະນຸດຕາມສິ່ງທີ່ຈະມີຂຽນໄວ້ໃນປຶ້ມ. ປະມານ 559–545 ປີ ກ່ອນ ຄ.ສ.
1 ແຕ່ຈົ່ງເບິ່ງ ໃນມື້ນັ້ນຈະມີຄົນເປັນຈຳນວນຫລວງຫລາຍ—ເວລາເຮົາຈະເລີ່ມທຳ ງານອັດສະຈັນໃນບັນດາພວກເຂົາ, ເພື່ອເຮົາຈະຄິດເຖິງ ພັນທະສັນຍາຂອງເຮົາ ຊຶ່ງເຮັດໄວ້ກັບລູກຫລານມະນຸດ, ເພື່ອເຮົາຈະລົງມືອີກເປັນຄັ້ງ ທີສອງທີ່ຈະນຳຜູ້ຄົນຂອງເຮົາ ຊຶ່ງເປັນເຊື້ອສາຍອິດສະຣາເອນກັບຄືນມາ;
2 ແລະ ເພື່ອເຮົາຈະລະນຶກເຖິງສັນຍາທີ່ເຮົາໄດ້ເຮັດໄວ້ກັບເຈົ້ານີໄຟ ແລະ ກັບບິດາຂອງເຈົ້າອີກວ່າ ເຮົາຈະລະນຶກເຖິງລູກຫລານຂອງເຈົ້າ ແລະ ວ່າ ຄຳເວົ້າຂອງລູກຫລານຂອງເຈົ້າຈະອອກຈາກປາກຂອງເຮົາໄປຫາລູກຫລານຂອງເຈົ້າ; ແລະ ຄຳເວົ້າຂອງເຮົາຈະ ຮຽກຮ້ອງອອກໄປຫາທີ່ສຸດຂອງແຜ່ນດິນໂລກ, ເພື່ອເປັນ ຫລັກສັນຍານໃຫ້ແກ່ຜູ້ຄົນຂອງເຮົາ, ຊຶ່ງເປັນເຊື້ອສາຍອິດສະຣາເອນ.
3 ເພາະຄຳເວົ້າຂອງເຮົາຈະສົ່ງສຽງອອກໄປ—ຄົນຕ່າງຊາດສ່ວນຫລາຍຈະເວົ້າວ່າ: ພຣະຄຣິສຕະທຳຄຳພີ! ພຣະຄຣິສຕະທຳຄຳພີ! ເຮົາມີພຣະຄຣິສຕະທຳຄຳພີຢູ່ແລ້ວ, ແລະ ຈະມີພຣະຄຣິສຕະທຳຄຳພີເຫລັ້ມອື່ນອີກບໍ່ໄດ້.
4 ແຕ່ອົງພຣະຜູ້ເປັນເຈົ້າໄດ້ກ່າວດັ່ງນີ້: ໂອ້ ຄົນໂງ່, ເຂົາຈະມີພຣະຄຣິສຕະທຳຄຳພີ; ແລະ ມັນໄດ້ອອກມາຈາກ ຊາວຢິວ, ຜູ້ຄົນແຫ່ງພັນທະສັນຍາໃນສະໄໝບູຮານຂອງເຮົາ. ແລະ ພວກເຂົາຕອບແທນບຸນຄຸນຊາວຢິວຢ່າງໃດແດ່ສຳລັບ ພຣະຄຣິສຕະທຳຄຳພີ ຊຶ່ງພວກເຂົາໄດ້ຮັບຈາກພວກນັ້ນ? ແທ້ຈິງແລ້ວ, ຄົນຕ່າງຊາດໝາຍເຖິງອັນໃດ? ພວກເຂົາໄດ້ນຶກເຖິງຄວາມຍາກລຳບາກ ແລະ ການທຳງານ, ແລະ ການເຈັບປວດຂອງຊາວຢິວ ແລະ ຄວາມພາກພຽນຂອງພວກນັ້ນທີ່ມີຕໍ່ເຮົາໃນການນຳຄວາມລອດມາສູ່ຄົນຕ່າງຊາດຫລືບໍ່?
5 ໂອ້ ເຈົ້າຄົນຕ່າງຊາດ, ເຈົ້າຄິດເຖິງຊາວຢິວ, ຊຶ່ງເປັນຜູ້ຄົນແຫ່ງພັນທະສັນຍາໃນສະໄໝບູຮານຂອງເຮົາຫລືບໍ່? ບໍ່ເຄີຍເລີຍ; ແຕ່ເຈົ້າສາບແຊ່ງພວກເຂົາ, ແລະ ຊັງພວກເຂົາ, ແລະ ບໍ່ພະຍາຍາມນຳພວກເຂົາກັບຄືນມາ. ແຕ່ຈົ່ງເບິ່ງ, ເຮົາຈະເອົາສິ່ງເຫລົ່ານີ້ທັງໝົດກັບມາໃສ່ເທິງຫົວຂອງເຈົ້າເອງ; ເພາະເຮົາພຣະຜູ້ເປັນເຈົ້າ ບໍ່ລືມຜູ້ຄົນຂອງເຮົາເລີຍ.
6 ເຈົ້າຄົນໂງ່ທີ່ຈະເວົ້າວ່າ: ພຣະຄຣິສຕະທຳຄຳພີ, ເຮົາມີພຣະຄຣິສຕະທຳຄຳພີຢູ່ແລ້ວ, ແລະ ເຮົາບໍ່ຕ້ອງການພຣະຄຣິສຕະທຳຄຳພີເຫລັ້ມອື່ນອີກ. ເຈົ້າຈະໄດ້ຮັບພຣະຄຣິສຕະທຳຄຳພີບໍ ນອກຈາກໂດຍຊາວຢິວ?
7 ເຈົ້າບໍ່ຮູ້ບໍວ່າ ມີປະຊາຊາດຫລາຍກວ່າໜຶ່ງຊາດ? ເຈົ້າບໍ່ຮູ້ບໍວ່າ ເຮົາພຣະຜູ້ເປັນເຈົ້າອົງເປັນພຣະເຈົ້າຂອງເຈົ້າ, ຜູ້ ສ້າງມະນຸດທັງປວງ, ແລະວ່າເຮົານຶກເຖິງຄົນທີ່ຢູ່ໃນ ເກາະໃນທະເລ; ແລະ ວ່າເຮົາປົກຄອງຢູ່ໃນຟ້າສະຫວັນເບື້ອງເທິງ; ແລະ ໃນແຜ່ນດິນໂລກເບື້ອງລຸ່ມ; ແລະ ເຮົານຳຄວາມເວົ້າຂອງເຮົາອອກມາຫາລູກຫລານມະນຸດ, ແທ້ຈິງແລ້ວ, ແມ່ນສູ່ປະຊາຊາດທັງໝົດຂອງແຜ່ນດິນໂລກ?
8 ດັ່ງນັ້ນ ເຈົ້າຈົ່ມວ່າ, ຍ້ອນວ່າເຈົ້າຈະໄດ້ຮັບຄຳເວົ້າຂອງເຮົາຫລາຍຂຶ້ນບໍ? ເຈົ້າບໍ່ຮູ້ບໍວ່າ ປະຈັກພະຍານຂອງ ສອງປະຊາຊາດເປັນ ພະຍານຕໍ່ເຈົ້າວ່າເຮົາຄືພຣະເຈົ້າ, ວ່າເຮົານຶກເຖິງປະຊາຊາດໜຶ່ງເໝືອນກັນກັບອີກປະຊາຊາດໜຶ່ງ? ດັ່ງນັ້ນ, ເຮົາເວົ້າຄຳດຽວກັບປະຊາຊາດໜຶ່ງຄືກັນກັບເວົ້າກັບປະຊາຊາດອື່ນ. ແລະ ເມື່ອສອງ ປະຊາຊາດຈະຮ່ວມກັນ ປະຈັກພະຍານທັງສອງປະຊາຊາດຈະຮ່ວມກັນອີກ.
9 ແລະ ເຮົາກະທຳເຊັ່ນນີ້ ເພື່ອຈະໄດ້ພິສູດຕໍ່ຄົນຢ່າງຫລວງຫລາຍວ່າ ເຮົາເປັນ ເໝືອນກັນເຊັ່ນມື້ວານນີ້, ມື້ນີ້, ແລະ ຕະຫລອດການ; ແລະ ວ່າເຮົາເວົ້າອອກໄປຕາມຄວາມພໍໃຈຂອງເຮົາ. ແລະ ເພາະວ່າເຮົາເວົ້າ ຄຳໜຶ່ງແລ້ວເຈົ້າບໍ່ຈຳເປັນຕ້ອງຄິດວ່າເຮົາເວົ້າອີກຄຳໜຶ່ງບໍ່ໄດ້; ເພາະວຽກງານຂອງເຮົາຍັງບໍ່ທັນຈົບ ແລະ ມັນຈະຍັງບໍ່ຈົບຈົນເຖິງທີ່ສຸດຂອງມະນຸດ, ທັງຈາກເວລານີ້ເປັນຕົ້ນໄປ ແລະ ຕະຫລອດການ.
10 ດັ່ງນັ້ນ, ເພາະເຈົ້າມີພຣະຄຣິສຕະທຳຄຳພີແລ້ວ ແລະ ເຈົ້າກໍບໍ່ຈຳເປັນຕ້ອງຄິດວ່າມັນມີ ຄຳເວົ້າທັງໝົດຂອງເຮົາຢູ່ໃນນັ້ນ; ທັງເຈົ້າບໍ່ຈຳເປັນຈະຕ້ອງຄິດວ່າ ເຮົາບໍ່ໄດ້ສັ່ງໃຫ້ບັນທຶກຕື່ມອີກ.
11 ເພາະເຮົາສັ່ງມະນຸດ ທັງປວງ, ທັງໃນທາງຕາເວັນອອກ, ແລະ ທາງຕາເວັນຕົກ, ທັງໃນທາງເໜືອ, ແລະ ທາງໃຕ້, ແລະ ໃນເກາະໃນທະເລ, ວ່າພວກເຂົາຈະ ບັນທຶກຄຳເວົ້າ ຊຶ່ງເຮົາເວົ້າກັບພວກເຂົາ; ເພາະຈາກ ໜັງສື ຊຶ່ງຈະມີບັນທຶກໄວ້ນັ້ນ ເຮົາຈະ ພິພາກສາໂລກ, ພິພາກສາທຸກໆຄົນຕາມວຽກງານຂອງພວກເຂົາ, ຕາມເລື່ອງທີ່ໄດ້ບັນທຶກໄວ້.
12 ເພາະຈົ່ງເບິ່ງ, ເຮົາຈະເວົ້າກັບ ຊາວຢິວ ແລະ ພວກເຂົາຈະບັນທຶກມັນໄວ້; ແລະ ເຮົາຈະເວົ້າກັບຊາວນີໄຟ ແລະ ພວກເຂົາຈະ ບັນທຶກມັນໄວ້; ແລະ ເຮົາຈະເວົ້າກັບເຜົ່າອື່ນໆຂອງເຊື້ອສາຍອິດສະຣາເອນອີກ, ຊຶ່ງເຮົາໄດ້ນຳອອກໄປແລ້ວ ແລະ ພວກເຂົາຈະບັນທຶກມັນໄວ້; ແລະ ເຮົາຈະເວົ້າກັບປະຊາຊາດ ທັງໝົດຂອງແຜ່ນດິນໂລກ ແລະ ເຂົາຈະບັນທຶກມັນໄວ້.
13 ແລະ ເຫດການຈະບັງເກີດຂຶ້ນຄື ຊາວຢິວຈະມີຄຳເວົ້າຂອງຊາວນີໄຟ, ແລະ ຊາວນີໄຟຈະມີຄຳເວົ້າຂອງຊາວຢິວ; ແລະ ຊາວນີໄຟກັບຊາວຢິວຈະມີຄຳເວົ້າຂອງ ເຜົ່າອິດສະຣາເອນທີ່ສູນຫາຍໄປ; ແລະ ເຜົ່າອິດສະຣາເອນທີ່ສູນຫາຍໄປຈະມີຄຳເວົ້າຂອງຊາວນີໄຟກັບຊາວຢິວ.
14 ແລະ ເຫດການຈະບັງເກີດຂຶ້ນຄື ຜູ້ຄົນຂອງເຮົາ ຊຶ່ງເປັນຄົນຂອງ ເຊື້ອສາຍອິດສະຣາເອນ ຈະຖືກເຕົ້າໂຮມກັບຄືນບ້ານສູ່ແຜ່ນດິນແຫ່ງຊັບສົມບັດຂອງພວກເຂົາ; ແລະ ຄຳເວົ້າຂອງເຮົາຈະຖືກເຕົ້າໂຮມໄວ້ ເປັນຄຳດຽວກັນ. ແລະ ເຮົາຈະສະແດງແກ່ຄົນທີ່ຕໍ່ສູ້ກັບຄຳເວົ້າຂອງເຮົາ, ແລະ ກັບຜູ້ຄົນຂອງເຮົາຜູ້ເປັນ ເຊື້ອສາຍອິດສະຣາເອນວ່າ ເຮົາຄືພຣະເຈົ້າ ແລະ ວ່າເຮົາໃຫ້ ພັນທະສັນຍາໄວ້ກັບອັບຣາຮາມ ວ່າເຮົາຈະລະນຶກເຖິງ ລູກຫລານຂອງລາວ ຕະຫລອດໄປ.