1 Ao ngkai, taraia tariu aika kam tangiraki, I taku bwa kam a tia n titiraki inanomi bwa teraa ae kam na karaoia i mwin touan te kawai ae eti iroumi. Ma taraia, bukin teraa ngkai kam iangoi bwaai aikai inanomi?

2 Kam aki uringa te bwai are I tuangkami are kam na kona n taetae n neweia anera ngkana e a tia n reke iroumi te Tamnei ae Raoiroi? Ao ngkai, kam na kanga ni kona n taetae n neweia anera ngkana akea te Tamnei ae Raoiroi iroumi?

3 A taetae anera ni mwaakan te Tamnei ae Raoiroi; ngaia ae a taekin ana taeka Kristo. Mangaia ae I taekina aei nakoimi, kanuaingkami n ana taeka Kristo; bwa taraia, a na tuangko ana taeka Kristo bwaai ni kabane aika ko riai ni karaoi.

4 Mangaia ae ngkai I a tia n taekin taeka aikai, ngkana kam aki oota n nanoia, ao bon ibukin ae ko aki titiraki, man aki karebwerebwe; mangaia ae ko na aki uotaki nakon te oota, ma ko na mate i nanon te roo.

5 Bwa taraia, N na manga tuangko riki bwa ngkana ko rin n te kawai aio, ma ni karekea te Tamnei ae Raoiroi, ao e na kaoti nakoim bwaai ni kabane aika ko riai ni karaoi.

6 Taraia, aio ana reirei Kristo, ao a na akea te reirei riki teuana ae kam na anganaki ni karokoa te tai are e na kaoti iai nakoimi n te rabwata. Ao n te tai are e kaoti iai nakoimi n te rabwata ao kam na karaoi bwaai ake e taekin nakoimi.

7 Ao ngkai, Ngai ae Nibwaai, I aki kona n taekin bwaai riki tabeua; e a katoka au taekanikawai te Tamnei, ao I a katukaki i nanon te tang ibukin kakewean te koaua, ma te buakaka, ma te aki ataibwai, ma bonotaningaia aomata; bwa a rawa n ukoukora te wanawana, ke ni kaotaia n te wanawana ae korakora, ngke e taekinaki nakoia n te aro ae maataata, n aron mataatan taian taeka.

8 Ao ngkai, tariu aika kam tangiraki, I namakinna bwa a mwaiti titiraki i nanomi; ao e rawawata nanou ngkai e riai bwa N na taekina te bwai aio. Bwa ngkana kam ongeaba nakon te Tamnei are reireinia aomata aron te tataro, ao kam na ataia ae kam riai n tataro; bwa te tamnei are e buakaka e aki reireinia aomata bwa a na tataro, ma te tamnei ae buakaka e reireina te aomata bwa e na aki tataro.

9 Ma taraia, I tuangkami bwa kam na teimatoa n tataro, ao n aki mamaara iai; ao akea te bwai ae kam na karaoia i matan te Uea ma ti ngkana kam a tia n rimoa n tataro nakon te Tama n aran Kristo, bwa e na katabua am mwakuri, ao e na reke mweraoin tamneim man te mwakuri are ko karaoia.