1 Ia oqo, koi au, ko Nifai, au sa sega ni rawa ni vola taucoko na veika a vakatavulici vei ira na noqu tamata; au sega soti ni maqosa ena volavola, me vaka ena vosa; ka ni sa vosa e dua na tamata ena kaukauwa ni Yalo Tabu, na kaukauwa ni Yalo Tabu ena qai vakadewataka ki na lomadra na luve ni tamata.

2 Ia raica, e lewe vuqa era sa vakaukauwataka na lomadra vua na Yalo Tabu, ka sa sega kina na nona tikina e yalodra; o koya, era sa biuta tani kina e vuqa na ka sa volai ka ra okata me ka wale.

3 Ia koi au, ko Nifai, au sa vola na ka au sa vola, ka’u okata me yaga vakalevu sara, vakabibi vei ira na noqu tamata. Au sa daumasulaki ira tiko ga e veisiga, ka sa suasua na noqu ilokoloko ena wai ni mataqu e veibogi, ena vukudra; ia au sa tagi vua na noqu Kalou ena vakabauta, ka’u kila ni na rogoca ko Koya na noqu masu.

4 Ia au kila ni na vakatabuya na Turaga na Kalou na noqu masu mera na vinaka kina na noqu tamata. Ia na veivosa au sa vola ena malumalumu, ena vakaukauwataki vei ira; ni sa uqeti ira me ra kitaka na ka vinaka; sa vakatakila vei ira na ka e baleti ira na nodra qase; a sa tukuni Jisu, ka uqeti ira me ra vakabauti Koya, ka vosota me yacova na ivakataotioti, sai koya na bula tawamudu.

5 Ka sa vosataka vakaukauwa na ivalavala ca, me vaka na kena matata na dina; o koya gona, ena sega ni dua na tamata me cudruvaka na veika au sa vola, ko koya ga sa tiko vua na yalo ni tevoro.

6 Au sa dau rekitaka na ka e matata; au daurekitaka na dina; au dau rekitaki noqu Jisu, ni sa vueta na yaloqu mai eli.

7 Sa tu vei au na loloma uasivi ena vukudra na noqu tamata, kei na vakabauta cecere ena vukui Karisito ni’u na sotava e lewevuqa na yalo sa sega ni duka ena nona idabedabe ni veilewai.

8 Sa tu vei au na loloma uasivi ena vukudra na Jiu—au tukuna na Jiu, baleta ni’u vakaibalebaletaka vei ira au a vu mai kina.

9 Sa tu talega vei au na loloma uasivi ena vukudra na kai Matanitu tani. Ia raica, sa sega ni dua vei ira oqo au sa nuitaka rawa ka vakavo ke ra sa veivakaduavatataki kei Karisito, ka curu ki na matamata rabailailai, ka lako ena sala qiqo sa basika ki na bula, ka muria tiko ga na sala me yacova ni oti na siga ni vakatovolei.

10 Ia oqo, oi kemudou na wekaqu lomani, kei kemudou talega na Jiu, kei kemudou kece mai na iyalayala kei vuravura, dou vakarorogo ki na vosa oqo ka vakabauta na Karisito; ia kevaka dou sa sega ni vakabauta na vosa oqo dou vakabauta ga na Karisito. Ia kevaka dou sa vakabauta na Karisito dou na vakabauta na vosa oqo, ni ra sa vosa i Karisito, ka a solia vei au ko koya; ka sa vakavulici ira na tamata kecega me ra kitaka na ka vinaka.

11 Ia kevaka sa sega ni nona vosa na Karisito, dou qai lewa—ia ena vakaraitaka vei kemudou na Karisito, ena kaukauwa kei na lagilagi, ni ra sa nona vosa, ena veisiga mai muri; ia daru na tu ka veirai ena nona idabedabe ni veilewai; ko na qai kila ni’u sa vakaroti mai vua me’u vola na veika oqo, e dina ga ni tu na noqu malumalumu.

12 Ka’u sa masuta na Tamada ena yacai Karisito me levu vei keda, ke sega ni oi keda kece, me vakabulai ena nona matanitu ena siga levu mai muri ko ya.

13 Ia oqo, oi kemudou na wekaqu lomani, oi kemudou kece na mataqali i Isireli, kei kemudou kece mai na iyalayala kei vuravura au sa vosa vei kemudou me vaka na domona e dua sa tagi mai na kuvu-ni-soso: Sa moce, me yacova ni sa yaco mai na siga levu ko ya.

14 Ia oi kemudou sa sega ni via vakaivotavota ena nona vinaka na Kalou, ka sega ni doka na nodra vosa na Jiu, kei na noqu vosa talega, kei na vosa kecega ena lako mai na gusuna na Lami ni Kalou, raica, au sa vakamoce vei kemudou ena veitalatala tawavakaiyalayala, ni na qai beitaki kemudou na vosa oqo ena siga mai muri.

15 Ia na veika au sa dregata e vuravura, ena beitaki kemudou ena mata ni idabedabe ni veilewai; ia sa vakaroti au vakaoqo na Turaga, ka sa dodonu me’u talairawarawa kina. Emeni.