1 Thiab nim no kuv hais rau koj, Yauxej, kuv tus me tub ntxawg. Koj tau yug nyob rau hauv hav zoov nyob rau thaum kuv muaj kev kub ntxhov; muaj tseeb tiag, koj niam tau yug koj rau thaum uas kuv muaj kev nyuaj siab tshaj plaws.

2 Thiab yuav thov tus Tswv tshwj thaj av no tseg rau koj, uas yog ib thaj av uas muaj nqis heev, pub rau koj ua qub txeeg qub teg thiab ua koj tej noob qub txeeg qub teg nrog rau koj tej tij laug, pub rau nej nyob tsis txob tsis ntxawj mus ib txhis li, yog hais tias nej yuav ceev cov neeg Ixayees Tus Dawb Huv tej kev cai.

3 Thiab nim no, Yauxej, kuv tus me tub ntxawg, tus uas kuv tau coj tawm hauv roob moj sab qhua tawm ntawm kuv txoj kev kub ntxhov, thov tus Tswv foom koob hmoov rau koj mus ib txhis mog, vim koj tej noob yeej yuav tsis raug puas tsuaj huv tib si li.

4 Vim saib seb, koj yog kuv tus tub; thiab kuv yog Yauxej tus uas tau raug cab coj mus ua qhev nyob tim Iyiv teb chaws ib tug xeeb ntxwv. Thiab tus Tswv tej kev khi lus uas nws tau khi rau Yauxej yog ib co uas tseem ceeb heev.

5 Yog li ntawd, Yauxej yeej tau pom lub caij uas peb nyob no tiag. Thiab nws tau txais ib lo lus khi tseg los ntawm tus Tswv, tias tus Tswv uas yog Vajtswv yuav tsa ib ceg neeg uas ncaj ncees sawv los rau cov neeg Ixayees los ntawm nws tej tub ki los; tsis yog tus Mexiyas, tiam sis yog ib ceg uas tau raug ntshua lawm, tsis tas li ntawd, yuav tau nco txog tus Tswv tej kev khi lus hais tias tus Mexiyas yuav los ua rau lawv paub, nyob rau hauv hnub nyoog kawg, nyob rau hauv lub hwj chim ntawm tus ntsuj plig, los coj lawv tawm ntawm qhov tsaus ntuj mus rau qhov kaj—muaj tseeb tiag, tawm ntawm txoj kev tsaus ntuj uas npog nrees thiab tawm ntawm txoj kev uas poob cev qhev mus rau txoj kev ywj pheej.

6 Vim Yauxej tau ua tim khawv tseeb, hais tias: Tus Tswv uas yog kuv tus Vajtswv yuav tsa ib tug uas pom yav tom ntej, yuav yog tus uas pom yav tom ntej tseem ceeb heev los rau koj tej tub tej ki.

7 Muaj tseeb tiag, Yauxej tau hais tseeb hais tias: Tus Tswv hais li no rau kuv hais tias: Ib tug uas pom yav tom ntej uas tseem ceeb heev yuav sawv tawm hauv koj tej tub ki los; thiab nws yuav yog ib tug uas koj tej tub ki yuav hwm heev. Thiab kuv yuav muab ib txoj lus txib rau nws xwv kom nws yuav ua tau ib txoj hauj lwm pub rau koj tej tub tej ki, pub rau nws cov kwv tij, qhov uas yuav yog ib qho tsim txiaj heev rau lawv, thiab txoj hauj lwm ntawd twb yuav coj lawv kom los paub txog tej kev khi lus uas kuv twb tau khi nrog koj tej yawg koob lawm.

8 Thiab kuv yuav muab ib txoj lus txib rau nws xwv kom nws tsis txhob ua lwm yam hauj lwm, tsuas yog ua txoj hauj lwm uas kuv txib kom nws ua xwb. Thiab kuv yuav ua kom nws yog ib tug neeg tsim txiaj nyob ntawm kuv lub qhov muag; vim nws yuav ua kuv txoj hauj lwm.

9 Thiab nws yuav yog ib tug uas tseem ceeb zoo ib yam li Mauxes, tus uas kuv tau hais tias kuv yuav tsa sawv los rau nej, los tso kuv haiv neeg, Au tsev neeg Ixayees.

10 Thiab kuv yuav tsa Mauxes sawv, los tso koj cov neeg tawm hauv teb chaws Iyiv.

11 Tiam sis kuv yuav tsa ib tug uas pom yav tom ntej sawv tawm hauv koj tej tub tej ki los; thiab kuv yuav muab hwj chim rau nws los qhuab qhia kuv tej lus rau koj tej xeeb leej xeeb ntxwv—thiab tus Tswv hais tias, tsis yog yuav los qhuab qhia kuv tej lus xwb, tiam sis yuav los yaum kom lawv ntseeg kuv tej lus, tej uas twb xub tau muab rau lawv lawm.

12 Yog li ntawd, koj tej tub tej ki yuav tau sau; thiab Yudas tej tub tej ki los yuav tau sau; thiab zaj uas koj tej tub tej ki yuav sau, thiab zaj uas Yudas tej tub tej ki yuav sau, yuav tsum loj hlob ua ib ke, los rhuav tej lus qhia uas tsis tseeb thiab los txo tej kev sib cav sib ceg tseg, thiab los tsim kev nyob kaj siab lug pub rau koj tej tub tej ki, thiab los coj lawv kom los paub txog lawv tej yawg koob nyob hauv hnub nyoog kawg, thiab kom los paub txog kuv tej kev khi lus thiab, tus Tswv hais li ntawd.

13 Thiab tawm hauv txoj kev qaug dag qaug zog nws yuav raug ua kom muaj dag muaj zog, hnub ntawd thaum kuv txoj hauj lwm yuav pib mus thoob plaws rau kuv haiv neeg, rau txoj kev txum tim koj dua, Au tsev neeg Ixayees es, tus Tswv hais li ntawd.

14 Thiab Yauxej tau qhia tej uas yuav muaj los yav tom ntej li no, hais tias: Saib seb, tus Tswv yuav foom koob hmoov rau tus uas pom yav tom ntej ntawd; thiab lawv cov uas nrhiav ua kom nws puas tsuaj yuav raug swb huv tib si; vim cov lus cog tseg no, cov uas kuv tau txais los ntawm tus Tswv, los rau kuv tej tub tej ki, yeej yuav tiav. Saib seb, kuv yeej paub tseeb hais tias yuav muaj txhij txhua li cov lus cog tseg no;

15 Thiab nws lub npe yuav hu li kuv lub; thiab yuav hu nws raws nws txiv lub npe. Thiab nws yuav zoo tib yam li kuv; vim tej yam xwm, uas tus Tswv yuav ua tawm ntawm nws txhais tes los, los ntawm tus Tswv lub hwj chim yuav coj tau kuv haiv neeg los mus rau txoj kev cawm seeg.

16 Muaj tseeb tiag, Yauxej tau qhia yam uas yuav muaj los yav tom ntej li no: Kuv paub tseeb txog tej yam xwm no, twb ib yam li kuv paub tseeb txog Mauxes cov lus cog tseg lawm; vim tus Tswv tau hais rau kuv tias, kuv yuav tsom kwm koj tej xeeb leej xeeb ntxwv mus ib txhis li.

17 Thiab tus Tswv tau hais tias: Kuv yuav tsa ib tug Mauxes sawv; thiab kuv yuav muab lub hwj chim rau nws nyob hauv ib tug pas nrig; thiab kuv yuav muab lub tswv yim zoo rau nws sau tej kev cai. Tiam sis kuv yuav tsis cia nws tus nplaig xoob, kom nws hais lus ntau, vim kuv yuav tsis ua kom nws hais tau lus npliag. Tiam sis kuv yuav xuas kuv tus ntiv tes ntawm kuv txhais tes kiag sau kuv tej kev cai rau nws; thiab kuv yuav muab ib tug neeg hais tau lus npliag rau nws.

18 Thiab tus Tswv kuj tau hais rau kuv ntxiv tias: Kuv yuav tsa ib tug rau koj tej tub tej ki; thiab kuv yuav muab ib tug neeg hais tau lus npliag rau nws. Thiab kuv, saib seb, kuv yuav pub kom nws yuav sau koj tej tub tej ki tej ntaub tej ntawv, pub rau koj tej tub tej ki; thiab tus neeg uas hais tau lus npliag ntawm koj tej tub tej ki yuav tshaj zaj no.

19 Thiab tej lus uas nws yuav sau yuav yog tej uas tseem ceeb nyob rau hauv kuv lub tswv yim uas yuav tsum mus thoob plaws rau koj tej tub tej ki. Thiab nws yuav zoo tau li tias koj tej tub tej ki tau hu lawv tawm hauv av los; vim kuv paub lawv tej kev ntseeg.

20 Thiab lawv yuav hu nrov nrov tawm hauv av los; muaj tseeb tiag, twb yog txoj kev hloov siab lees txim rau lawv tej kwv tij, twb yuav yog tom qab uas ntau tiam neeg tau dhau ntawm lawv mus. Thiab yuav muaj tias lawv lub suab hu yuav mus, raws nraim li lawv tej lus uas yooj yim to taub.

21 Vim lawv tej kev ntseeg lawv tej lus yuav tawm ntawm kuv lub qhov ncauj mus rau lawv cov kwv tij uas yog koj tej tub tej ki; thiab lawv tej lus uas qaug dag qaug zog kuv yuav ua kom tej lus ntawd muaj zog vim lawv tej kev ntseeg, kom nco txog kuv tej kev khi lus uas kuv tau khi rau lawv tej yawg koob lawm.

22 Thiab nim no, saib seb, kuv tus me tub Yauxej, kuv tus yawg koob tau qhia tej uas yuav muaj los yav tom ntej zoo li no.

23 Yog li ntawd, vim yog txoj kev khi lus no koj thiaj li tau txais koob hmoov; koj tej noob los yuav tsis raug puas tsuaj, vim lawv yuav mloog rau tej lus uas nyob hauv phau ntawv.

24 Thiab yuav sawv ib tug uas muaj hwj chim nyob hauv lawv, tus uas yuav ua tau ntau yam zoo, tsis hais kev hais lus los yog kev ua dej ua num, nws yuav yog Vajtswv ib rab cuab yeej uas nyob hauv nws txhais tes, uas muaj txoj kev ntseeg heev, los ua tau tej hauj lwm tseem ceeb, thiab ua tej yam xwm uas loj nyob ntawm Vajtswv lub qhov muag, rau txoj kev coj kev txum tim ntau yam rov qab rau tsev neeg Ixayees, thiab rau koj tej kwv tij tej noob.

25 Thiab nim no, koj tau koob hmoov, Yauxej. Saib seb, koj tseem yau; yog li ntawd cia li mloog koj tus tij laug, Nifais, tej lus, thiab koj yuav tau txais raws nraim li tej lus uas kuv tau hais lawm. Nco ntsoov koj txiv tus uas tab tom yuav tuag tej lus mog. Amees.