1 Ana taeka Iakobwa, ae tarin Nibwaai, ake e taekin nakoia ana botanaomata Nibwaai:

2 Taraia tariu aika kam tangiraki, I a tia Ngai ae Iakobwa, n rineaki iroun te Atua ma ni katabuaki n aron ana botaki ae tabu, ma ni katabuaki iroun tariu ae Nibwaai, are kam a tia ni karinea n aiaron te uea ke te tia kamanomano ao bon ngaia are kam onimakinna n teimatoan te rau, taraia kam ataia bwa I a tia n taekin bwaai aika a mwaiti nakoimi.

3 E ngae n anne ao I a manga taetae riki nakoimi; bwa I tabeaianga ibukin maiun tamneimi. Eng, e korakora tabeaiangau ibukimi; ao kam ataia i bon iroumi bwa e teimatoa aio. Bwa I a tia n taetae nakoimi ma te taotaonakinnano ae korakora; ao I a tia n reiakin ana taeka tamau nakoimi; ao I a tia n taekin nakoimi bwaai ni kabane ake a tia ni koreaki man moan karikan te aonaba.

4 Ao ngkai, taraia, N nang taekin nakoimi bwaai ngkai, ma aika a na roko; mangaia ae N na wareki nakoimi ana taeka Itaia. Ao taeka aikai aika e tangiria tariu bwa N na taekin nakoimi. Ao I taetae nakoimi ibukin maiumi, bwa kam aonga n reiakina ao ni kamimitonga aran te Atua.

5 Ao ngkai, taeka aika N nang taekin aika e a tia n taekin Itaia ibukiia kaain te bata are Iteraera; mangaia ae a bon kaineti naba nakoimi, bwa bon kaain te bata are Iteraera ngkami. Ao a mwaiti bwaai ake e tia n taekin Itaia aika a kona ni kabonganaki iroumi, ngkai kaain te bata are Iteraera ngkami.

6 Ao ngkai, aikai taian taeka: Ao e taku te Uea ae te Atua: Taraia, N na tabeka baiu nakoia Tientaire ma ni kaota au buraeki bwa a na nooria aomata; ao a na uotia natimi mwaane i nanon baia, ao natimi aine a na uotaki iaon angaia.

7 Ao a na riki taian uea n ai aroia taama nakoimi, ao aia uea aine n ai aroia tiina nakoimi; ane a na bobaraaki nakoimi ni katoma ubuia ma aontano, ao n newea te bubu are mena iaon waemi; ao kam na ataia bwa bon Ngai te Uea; bwa a na aki maamaa akana tataningai.

8 Ao ngkai, Ngai ae Iakobwa, N nang taetae ni kaineti ma taeka aikai. Bwa taraia, e a tia te Uea ni kaotia nakoiu bwa naake a mena i Ierutarem are ti roko mai iai a tia n tiringaki man uotaki nako n tautoronaki.

9 E ngae n anne ao e a tia te Uea ni kaotia nakoiu bwa ae a na manga kaokaki. Ao e a tia ni kaotia naba nakoiu ae e na kaoti te Uea ae te Atua, are Atuan Iteraera ae Tabu, n rabwata nakoia; ao ngke e a tia ni kaota rabwatana nakoia ao a na kataerea man tauria, n aron ana taeka te anera ake e taekin nakoiu.

10 Ao ngke a tia ni kamatoai nanoia ma n kamoamoa ni kaitaraa Atuan Iteraera ae Tabu, taraia, e na roko korakoran ana moti Atuan Iteraera ae Tabu iaoia. Ao e na roko te bong are a na katuaeaki ma ni karawawataki iai.

11 Mangaia ae a na maiu n tiotio, n aron are taekinna te anera, a mwaiti aika a na kakorakaiaki rabwataia, ma a na aki kariaia bwa a na mate, ibukin aia tataro aika a kakaonimaki; a na kamaenakoaki, kataereaki, ma n ribaki; ma e ngae n anne, ao e na nanoangaia te Uea, ao e na reke irouia taekan aia Tia Kaboia, ao a na manga botaki n aban rikiia.

12 Ao a na kakabwaiaki Tientaire ake a tia ni koreaki rongorongoia irouia burabeti; bwa taraia, bwa ngkana a rairinanoia ao n aki kaitaraa Tion, ao a aki botaki i nanon te ekaretia are korakora man ribaki, ao a na kamaiuaki; bwa e na kakoroi bukin ana berita aika tabu te Uea ae te Atua ake e a tia ni karaoi nakoia natina; ao a bane n tia ni koreaki taekan bwaai aikai iroun te burabeti.

13 Mangaia ae aomata ake a buakana Tion aika ana aomata i nanon te berita ae tabu te Uea a na newea te bubu are toka iaon waeia; ao a na aki maamaa ana aomata te Uea. Bwa ana botanaomata te Uea bon aomata ake a tataningaia; bwa a na tataninga rokon te Mesia.

14 Ao taraia, n aron ana taeka te burabeti, e na manga waaki te Mesia te kauatai ni kamaiuia mangaia ae e na kaoti nakoia n te mwaaka ao te mimitong ae korakora, ni kamaunaia aia kairiribai, n te bong are a na kakoaua iai; ao a na akea are a na tiringaki are a kakoaua.

15 Ao aomata ake a aki kakoua a na kamaunaaki, n te ai, ao te angibuaka, mwaingingin te aonaba, n te tiritiri, ao n te aoraki, ao n te rongo. Ao a na ataia ae te Uea bon te Atua, ae Atuan Iteraera ae Tabu.

16 Bwa e koaua ae a na kamaiuaki aika a kaeaki mai irouia aika korakora, ke ni kainaomataki ae eti tautoronakina i aan te tua?

17 Ma e taku te Uea: a na bon anaaki naba aika a tautoronaki iroun ae korakora, ao a na kamaiuaki aika a kakioaki irouia aika a buakaka; bwa e na kainaomataia ana aomata i nanon te berita ae tabu te Atua ae Moan te Korakora. Bwa e taku te Uea: N na kaitaraa ane e kaaitarako—

18 Ao N na kamwarakeia akana a bwainikiriniko n oin irikoia; ao a na manging n oin raraaia n aiaron te wain ae karewe; ao a na ataia aomata ni kabane bwa Ngai te Uea bon am Tia Kamaiu ao am Tia Kabomwi, ae Atuan Iakobwa ae Korakora.