Kapitulo 7
Si Jacob mipadayon sa pagbasa gikan ni Isaias: Si Isaias namulong alang sa mesiyas—Ang Mesiyas mogamit sa pinulongan sa mga makinaadmanon—Siya motugyan sa Iyang buko-buko ngadto sa mga tigbunal—Dili siya mahiubos—Itandi sa Isaias 50. Mga 559–545 B.C.
1 Oo, kay sa ingon niini miingon ang Ginoo: Gibiyaan ko ba ikaw, o gisalikway ko ba ikaw hangtod sa hangtod? Kay sa ingon niini miingon ang Ginoo: Hain ang kalig-onan sa panagbulag sa kaminyoon sa imong inahan? Ngadto kang kinsa ko ikaw gihatag, o kinsa ba sa akong mga tigpautang ang akong gibaligyaan kanimo? Oo, ngadto kang kinsa ko ba ikaw gibaligya? Tan-awa, tungod sa imong kadaotan imong gibaligya ang imong kaugalingon, ug tungod sa imong mga kalapasan nabulag kanimo ang imong inahan.
2 Mao nga, sa diha nga miabot ako, walay tawo; sa diha nga nanawag ako, oo, walay usa nga mitubag. O balay ni Israel, ang akong mga bukton gipamub-an ba sa bisan unsang paagi aron dili kini makatubos, o wala ba akoy gahom sa pagluwas? Tan-awa, pinaagi sa akong pagpangasaba akong napauga ang dagat, akong nahimo ang ilang mga suba nga usa ka kamingawan ug ang ilang isda nabaho tungod kay ang katubigan nauga, ug nangamatay kini tungod sa kauhaw.
3 Akong gisul-oban og kangitngit ang kalangitan, ug gihimo nako nga gansang-gansangon ang ilang tabon.
4 Ang Ginoong Dios mihatag kanako sa pinulongan sa mga makinaadmanon, aron makahibalo ako unsaon sa pagsulti og pulong sa tukmang panahon nganha kaninyo, O balay ni Israel. Dihang gikapoy kamo siya sa matag buntag nagtukaw. Ang akong dunggan iyang gipukaw aron mahisama sa mga makinaadmanon nga makapaminaw.
5 Ang Ginoong Dios miabli sa akong dunggan, ug wala ako magmasinupakon, ni motalikod.
6 Akong gitugyan ang akong buko-buko ngadto sa tigbunal, ug ang akong mga aping ngadto kanila nga manglabnot sa bungot. Wala nako itago ang akong nawong gikan sa pagpakaulaw ug pagpangluwa.
7 Kay ang Ginoong Dios motabang kanako, busa dili ako mahiubos. Busa ang akong nawong wala nako ipatarog sama sa gahi nga bato ug nasayod ako nga dili ako maulawan.
8 Ug ang Ginoo duol ra, ug siya mipawalay sala kanako. Kinsa ang makig-away kanako? Mag-atubangay kita sa pagbarog. Kinsa ang akong kaaway? Paduola siya kanako, ug silotan nako siya pinaagi sa gahom sa akong ba-ba.
9 Kay ang Ginoong Dios motabang kanako. Ug tanan sila nga mohimaraot kanako, tan-awa, tanan sila mahimong karaan sama sa sapot, ug ang anunugba mokitkit kanila.
10 Kinsa diha kaninyo ang nahadlok sa Ginoo, nga nagsunod sa tingog sa iyang sulugoon, nga naglakaw sa kangitngit ug walay kahayag?
11 Tan-awa kamong tanan nga nagdagkot og kalayo, nga nagpalibot og mga sulo sa inyong kaugalingon nga nagpakabuhi sa kahayag sa inyong kalayo ug sa mga sulo nga inyong gidagkotan. Makadawat kamo niini gikan sa akong kamot—mangamatay kamo sa kasub-anan.