1 Ut anajwan kik’ulman naq chirix naq kixchoy li Jesus li yehom a’in kixb’eresi li rilob’aal chixsutam wankeb’ wi’ li ch’utch’uukil tenamit, ut kixye reheb’: K’ehomaq reetal, xerab’i li k’a’aq re ru kink’ut naq maji’ nintaqe’ rik’in inYuwa’; jo’kan ut, ani najultiko’ re lin yehom a’in ut naxb’aanu, a’an tinwaklesi sa’ roso’jik li kutan.

2 Ut kik’ulman naq chirix naq li Jesus kixye li aatin a’in, kixk’e reetal naq wan junjunq sa’ xyanqeb’ li sachsookeb’ xch’ool, ut ke’xpatz’ rib’ sa’ xch’ool k’a’ru taaraj chirix lix chaq’rab’ laj Moises; xb’aan naq ink’a’ neke’xtaw ru li yehom naq oso’jenaq li k’a’aq re ru re najter, ut naq chixjunil li k’a’aq re ru ak’ob’resinb’il.

3 Ut kixye reheb’: Misach eech’ool naq xinye eere naq x’oso’ li k’a’aq re ru re najter, ut naq chixjunil li k’a’aq re ru ak’ob’resinb’il.

4 K’ehomaq reetal, ninye eere naq tz’aqlojenaq ru li chaq’rab’ li kik’eeman re laj Moises.

5 K’ehomaq reetal, laa’in li kink’ehok re li chaq’rab’, ut laa’in li kin’ok sa’ sumwank rik’in intenamit Israel; jo’kan ut, wik’in laa’in tz’aqlojenaq ru li chaq’rab’, xb’aan naq kinchal re xtz’aqob’resinkil ru li chaq’rab’, jo’kan naq wan xraqik.

6 K’ehomaq reetal, moko ninsacheb’ ta li profeet, xb’aan naq jo’ k’ihaleb’ li moko ke’tz’aqlok ta ru wik’in, chi yaal ninye eere, te’tz’aqloq ru chixjunil.

7 Ut rik’in naq kinye eere naq x’oso’ li ka’aq re ru re najter, moko ninsach ta li k’a’ru yeeb’il chirix li k’a’aq re ru toj taachalq.

8 Xb’aan naq k’ehomaq reetal, li sumwank li kink’uub’ rik’in lin tenamit maji’ natz’aqlok ru chixjunil; a’b’an li chaq’rab’ li kik’ehe’ re laj Moises wik’in laa’in wan xraqik.

9 K’ehomaq reetal, laa’in li chaq’rab’, ut li saqen. Chex’iloq wankin wi’ laa’in, ut chexkuyuq toj sa’ roso’jik, ut taawanq eeyu’am; xb’aan naq re li ani nakuyuk toj sa’ roso’jik tink’e li junelik yu’am.

10 K’ehomaq reetal, xink’e eere li taqlahom; jo’kan ut, chepaab’ intaqlahom. A’in ut li chaq’rab’ ut eb’ li profeet, xb’aan naq chi yaal eb’ a’an ke’xch’olob’ inyaalal laa’in.

11 Anajwan ut kik’ulman naq chirix naq li Jesus kixye li aatin a’in, kixye reheb’ li kab’laju a’an li kixsik’ chaq ru:

12 Laa’ex intzolom; ut laa’ex jun saqen chiru li tenamit a’in, a’aneb’ jun rela’ lix junkab’al laj Jose.

13 Ut k’ehomaq reetal, a’in lix ch’och’il eereechanihom, ut li Yuwa’b’ej kixk’e eere.

14 Ut maajun wa kixk’e li Yuwa’b’ej intaqlankil naq tinye reheb’ lee ras eeriitz’in aran Jerusalen.

15 Chi moko junaq sut kixk’e li Yuwa’b’ej intaqlankil naq tinye reheb’ chirix xkomoneb’ chik xteepal lix junkab’al laj Israel, li kixk’ameb’ chaq xb’e li Yuwa’b’ej chi elk sa’ li ch’och’.

16 Ka’ajwi’ a’in kinixtaqla li Yuwa’b’ej naq tinye reheb’:

17 Naq wankeb’ chik inkarneer moko xkomoneb’ ta a’ korral a’in; eb’ a’an tento ajwi’ teb’ink’am chaq, ut te’rab’i xyaab’ inkux, ut jun korral naq taawanq, ut junaq aj ilol karneer.

18 Anajwan ut, xb’aan xjipilal xk’a’uxleb’ ut xmaak’a’il lix paab’aaleb’ ink’a’ ke’xtaw ru li waatin; jo’kan naq kintaqlaak naq maak’a’ chik tinye reheb’ xb’aan li Yuwa’b’ej chirix li na’leb’ a’in.

19 A’b’anan chi yaal ninye eere, naq li Yuwa’b’ej kinixtaqla, ut ninye eere laa’ex, naq kijache’ chaq eeru sa’ xyanqeb’ sa’ xk’ab’a’ lix maa’usilaleb’; jo’kan naq a’an xb’aan xmaa’usilaleb’ naq moko neke’xnaw ta cherix.

20 Ut chi yaal, ninye wi’chik eere naq li jun ch’ol chik chi teep kixjach ru li Yuwa’b’ej rik’ineb’; ut a’an xb’aan xmaa’usilaleb’ naq moko neke’xnaw ta chirixeb’.

21 Ut chi yaal ninye eere, naq laa’ex li kinye wi’: Wankeb’ chik inkarneer moko xkomoneb’ ta a’ korral a’in; eb’ a’an tento ajwi’ teb’ink’am chaq, ut te’rab’i xyaab’ inkux, ut jun korral naq taawanq, ut junaq aj ilol karneer.

22 Ut ink’a’ ke’xtaw ru li kinye, xb’aan naq ke’xk’oxla naq a’aneb’ laj Gentil; xb’aan naq moko ke’xtaw ta ru naq eb’ laj Gentil te’jale’q xch’ool xb’aan li aatin te’xjultika a’an.

23 Ut ink’a’ ke’xtaw ru inyehom naq kinye naq te’rab’i xyaab’ inkux; ut ink’a’ ke’xtaw ru inyehom naq eb’ laj Gentil maajun wa te’rab’i xyaab’ inkux—naq ink’a’ tink’utb’esi wib’ chiruheb’, ka’ajwi’ rik’in li Santil Musiq’ej.

24 A’b’an k’ehomaq reetal, laa’ex kerab’i xyaab’ inkux, jo’ ajwi’ kineeril; ut laa’ex inkarneer, ut k’eeb’ilex sa’ ajl sa’ xyanqeb’ li k’eeb’ileb’ we xb’aan li Yuwa’b’ej.