1 Ka sa yaco ni a vakarota ko koya vei ira na lewevuqa kei ira na nona tisaipeli me sa tini mada na nodra masu. A sa vakaroti ira me kakua sara ni mudu na nodra dau masu e lomadra.

2 A sa vakaroti ira me ra duri ka tucake e yavadra. A ra sa duri ka tucake e yavadra.

3 Ka sa yaco ni sa dovia na madrai ka vakalougatataka ka solia vei ira na tisaipeli me ra kania.

4 Ia ni ra sa kania oti, sa vakaroti ira me ra dovia na madrai ka solia vei ira na lewevuqa.

5 Ia ni ra sa solia oti vei ira na lewevuqa, sa qai solia tale ga vei ira na waini me ra gunuva, ka vakaroti ira me ra solia vei ira na lewevuqa.

6 E a sega na madrai se waini era kauta mai na tisaipeli, se ko ira na lewevuqa;

7 Ia e a solia vakaidina vei ira ko koya na madrai me ra kania kei na waini me ra gunuva.

8 Ka a kaya vei ira: Ko koya yadua sa kania na madrai oqo sa kania na lewequ ki na yalona; kei koya sa gunuva na waini oqo, sa gunuva na noqu dra ki yalona; ia ena sega ni viakana se viagunu na yalona, ia ena vakasinaiti.

9 Ia, ni ra sa kana ka gunu kece na lewevuqa, era sa vakasinaiti ena Yalo; a ra sa tabalaka cake vata na domodra ka vakalagilagi Jisu, o koya era sa raica ka rogoca.

10 Ka sa yaco ni ra sa vakalagilagi Jisu kece sara, sa kaya vei ira ko koya: Raica au sa vakaotia oqo na ivakaro ka a vakaroti au kina ko Tamada me baleti ira na tamata oqo, ko ira e dua na ivovo ni mataqali i Isireli.

11 Ko ni nanuma li ni’u a kaya vei kemuni na gauna ena vakayacori kina na vosa i Aisea—raica era sa volai tu ka sa tu vei kemuni na nona vosa, ia mo ni vakasaqaqara sara kina—

12 E dina, e dina, ka’u sa kaya vei kemuni, ena gauna era na vakayacori kina, sa na vakayacori kina na veiyalayalati ka cakava ko Tamada vei ira na nona tamata, na mataqali i Isireli.

13 Ia era na qai vakasoqoni vata na ivovo era sa veiseyaki tu e delai vuravura, mai na tokalau kei na ra, mai na vualiku kei na ceva; ka ra na qai kila na Turaga na nodra Kalou o koya sa sereki ira.

14 Ka sa vakaroti au na Tamada me’u solia vei kemuni na vanua oqo me nomuni ivotavota vakawa.

15 Ka’u sa kaya vei kemuni, kevaka era sa sega ni veivutuni na Matanitu Tani ena gauna era sa ciqoma oti kina na veivakalougatataki, ni oti na nodra vakatalabusesetaki ira na noqu tamata—

16 Ko ni na qai lako yani ena kedra maliwa koi kemuni e dua na ivovo ni mataqali i Jekope; ia ko ni na tiko ena kedra maliwa na veimataqali e vuqa; ko ni na tu ena kedra maliwa, me vaka na laioni ena kedra maliwa na manumanu ni veikau, ka vaka na luve ni laioni ena loma ni qele ni sipi, o koya ke sa lako yani kina, sa na butuka sobu ka basuraka ka sega e dua me na vakabula.

17 Ena qai laveti cake na ligamuni vei ira na nomuni meca, ia ko ira kece sa cati kemuni era na muduki laivi.

18 Ia au na vakasoqoni ira mai na noqu tamata me vaka sa soqona vata na nona ivau sila e dua na tamata ki na rara ni sila.

19 Ia au na totaki ira na noqu tamata sa veiyalayalati kei ira ko Tamada, io na nomu ileu ka’u na cakava me kaukamea, kei na nomu ququ ka’u na cakava me parasa. Ia ko na butuqaqia na veimataqali e vuqa; ia ka’u na vakatabuya na nodra itoki ni valu vua na Turaga kei na nodra iyau vua na Turaga ni vuravura taucoko. Ka raica, sai au ga ka’u na kitaka na ka oqo.

20 Ka na qai yaco, sa kaya na Tamada, ni sa waraki ira tu ena siga ko ya na iseleiwau ni noqu lewa dodonu; ia ena tau vei ira kevaka era na sega ni veivutuni, io vei ira kecega na Matanitu Tani, sa kaya na Tamada.

21 Ka na qai yaco ni’u na vakataudeitaki ira na noqu tamata, na mataqali i Isireli.

22 Ka raica, au na vakataudeitaki ira na tamata oqo ena vanua oqo, me vakayacori kina na veiyalayalati au a cakava vei Jekope na tamamuni; ia ena yaco me Jerusalemi Vou. Ka na tiko na veikaukauwa ni lomalagi ena kedra maliwa na tamata oqo; io, au na tiko sara ga koi Au ena kemuni maliwa.

23 Raica sai au sa vosa kina ko Mosese ka kaya: Ena vakatubura vei kemuni na Turaga na nomuni Kalou e dua na parofita mai vei ira na wekamuni, me vakataki au; ia mo ni rogoca na ka kecega sa na vosataka vei kemuni. Ia ena qai yaco ni ko koya yadua na tamata sa sega ni rogoca na parofita ko ya, ena muduki tani mai na kedra maliwa na tamata.

24 Au sa kaya vakaidina vei kemuni, io, ko ira kecega na parofita, tekivu mai vei Samuela kei ira kece era muri mai, o ira kece era sa vosa, era sa vakadinadinataki au.

25 Ka raica, ko ni sa nodra kawa na parofita; ka ko ni sa mataqali i Isireli; ko ni sa tamata ni veiyalayalati ka cakava ko Tamada vei ira na nomuni qase, ni a kaya vei Eparaama: Ena vuku ni nomu kawa ena kalougata kina na veimataqali kecega e vuravura.

26 Sa vakaturi au cake ko Tamada ka talai au e liu vei kemuni me’u vakalougatataki kemuni, ena noqu vagolei kemuni tani mai na nomuni caka ca; ena vuku ni ko ni sa gone ni veiyalayalati—

27 Ia ni ko ni sa vakalougatataki oti, sa na vakayacori kina na veiyalayalati ka cakava ko Tamada vei Eparaama ka kaya: Ena kalougata tale ga na veimatanitu kecega e vuravura ena vuku ni nomu kawa—ena kena sovaraki na Yalo Tabu vei ira na Matanitu Tani mai vei au, ia ni ra sa vakalougatataki, era na qaqa matua sara kina na Matanitu Tani vei ira kecega, ka ra vakatalabusesetaki ira na noqu tamata, ko ira na mataqali i Isireli.

28 Era na vu ni veivakanakuitataki vei ira na tamata ni vanua oqo. Ia kevaka era na vakaukauwataka na lomadra vei au, ni ra sa rogoca oti na taucoko ni noqu kosipeli, au na sauma e uludra na nodra cakacala, sa kaya na Tamada.

29 Au na qai nanuma na veiyalayalati au a cakava kei ira na noqu tamata; raica au a veiyalayalati kei ira ni’u na vakasoqoni ira vata ena gauna au sa lewa, ni’u na solia tale me nodra ivotavota vakawa na nodra vanua na nodra qase, sai koya na vanua ko Jerusalemi, na vanua yalataki vei ira me sega ni mudu, sa kaya na Tamada.

30 Ena qai yaco ni na yaco mai na gauna, me na vunautaki kina vei ira na taucoko ni noqu kosipeli;

31 Era na qa vakabauti au ni sai Au ko Jisu Karisito na Luve ni Kalou ia era na qai daumasu vua na Tamada ena yacaqu.

32 Era na qai tabalaka cake na domodra na nodra ivakatawa, ka ia vata na nodra sere; ni ra na raica ena matana votu.

33 Ena qai vakasoqoni ira vata tale na Tamada, ka solia na vanua ko Jerusalemi vei ira me nodra ivotavota vakawa.

34 Era na qai lagata mai na sere ni marau—Mo ni lagasere vata na veiyasana lala ni Jerusalemi; ni sa vakacegui ira na nona tamata ko Tamada, ka sa sereki Jerusalemi.

35 Sa vakaraitaka ko Tamada na ligana tabu ena matadra na veimatanitu kecega; ia na iyalayala kecega kei vuravura ena raica na veivakabulai sa mai vua na Tamada; ia keirau sa duavata ko Tamada kei Au.

36 Ka na qai vakayacori kina na ka sa volai: Mo yadra, mo yadra tale, daramaka na nomu kaukauwa, Saioni; daramaka na nomu isulu rairai totoka, Jerusalemi na koro tabu, raica era na sega tale ni curumi iko ko ira sa sega ni cili kei ira sa tawasavasava.

37 Kuretaki iko mai na kuvu-ni-soso; duri, dabe sobu, Isa Jerusalemi; sereka tani na ivau ni domomu, ko iko na gone yalewa bobula ni Saioni.

38 Ni sa kaya vakaoqo na Turaga: Ko ni a volitaki kemudou wale, ka ko ni na sereki tale, ia ka segai ena ilavo.

39 E dina, e dina, au sa kaya vei kemuni, ni ra na kila na yacaqu na noqu tamata; io, era na kila ena siga ko ya ni sai au ga sa vosa tiko.

40 Era na qai kaya: Na kena rairai totoka ena ulunivanua na yavai koya sa kauta mai na itukutuku vinaka, sa vakarogoya mai na sautu; sa kauta mai na itukutuku vinaka ni ka vinaka, ka vakarogoya mai na veivakabulai; ka tukuna mai ki Saioni: Sa lewa na nomu Kalou!

41 Ia era na tabalaka cake na domodra ka vaka: Mo ni lako, mo ni lako, mo ni lako tani eke, mo ni kakua ni tara na ka sa tawasavasava; mo ni lako tani mai vua; mo ni savasava mai oi kemuni sa kauta na iyaya ni Turaga.

42 Ni ko ni na sega ni lako yani vakariri. Ka ko na sega ni dro; ni na liu vei kemudou na Turaga, ka muri kemudou na Kalou ni Isireli.

43 Raica, ena cakacaka vakavuku ko koya na noqu italatala; ena vakalevulevui ko koya ka vakacaucautaki, ia ena cecere sara.

44 Me vaka era kurabuitaki iko e lewevuqa—ni sa vakacacani vakalevu na kena irairai ka vakalailai na tamata kecega, kei na yagona tale ga vakalevu cake mai vei ira na luve ni tamata—

45 Ena vakamiraki ira na veimatanitu e vuqa; era na kurabui ka galu ko ira na tui ena vukuna, ni ra na raica na ka e a sega ni tukuni vei ira; kei na ka era sa sega ni rogoca era na vakasamataka.

46 E dina, e dina, au sa kaya vei kemudou, ena yaco vakaidina na veika kece me vaka sa vakarota vei au ko Tamada. Ena qai vakayacori na veiyalayalati a veiyalayalati kina na Tamada kei ira na nona tamata; ka na qai tawani tale ko Jerusalemi, mai vei ira na noqu tamata ka na yaco me nodra vanua ka sa ivotavota vakawa.