Wase 25
Era na vakamai me vaka na vu ni co o ira na daucaka ca, ena iKarua ni Lako Mai—Ena lesu tale mai ko Ilaijia ni bera na siga levu ka rerevaki ko ya—Vakatautauvatataka na Malakai 4. Rauta na 34 S.K.
1 Ia raica, sa lako mai na siga ko ya, ena waqa me vaka na lovo; ia ko ira kece era viavialevu, io, kei ira kece sa caka ca, era na vaka na vu ni co; ia ena vakamai ira na siga ka sa lako mai ko ya, sa kaya na Turaga ni Lewevuqa, ena sega kina ni laiva me vo vei ira na wakana se tabana.
2 Ia ena cadra vei kemuni sa rerevaka na yacaqu, na Luve ni Valavala Dodonu ena kauta lako ena tabana na veivakabulai; ka ko ni na lako yani ka tubu cake me vaka na luve ni bulumakau ena loma ni bai.
3 Ka ko ni na buturaki ira sobu na tamata ca; ni ra na dravusa e ruku ni qeteqete ni yavamuni ena siga ka’u na cakava kina na ka oqo, sa kaya na Turaga ni Lewevuqa.
4 Dou nanuma na lawa i Mosese na noqu tamata, o koya ka’u a vakarota vua mai Orepi me nodra kecega na Isireli, vata kei na ilesilesi kei na lewa.
5 Raica, au na talai Ilaija na parofita e liu vei kemuni, ni bera ni qai lako mai na siga levu ka rerevaki ni Turaga ko ya;
6 Ena vagolea ko koya na lomadra na qase kivei ira na gone, kei na lomadra na gone kivei ira na nodra qase, de’u na qai lako mai ka yavita na vuravura ena dua na cudru.