1 Ka sa yaco ni ra sa veilakoyaki voli na tisaipeli i Jisu ka vunautaka tiko na veika era sa raica ka rogoca, ka veipapitaisotaki ena yacai Jisu, a sa yaco ni ra a soqoni vata na tisaipeli ka ra a duavata ena masu kei na lolo vagumatua sara.

2 A sa rairai tale vei ira ko Jisu ni ra a masu tiko vua na Tamada ena yacana; a sa lako mai ko Jisu ka tu ena kedra maliwa ka kaya vei ira: A cava ko ni sa vinakata me’u solia vei kemuni?

3 Era sa kaya vua: Turaga, keimami gadreva mo ni tukuna vei keimami na yaca me vakayacani kina na lotu oqo, ni ra sa veileti tiko na tamata ena vuku ni ka oqo.

4 Ka sa kaya vei ira na Turaga: E dina, e dina au sa kaya vei kemuni a cava era sa vosa kudrukudru ka veileti kina na tamata ena vuku ni ka oqo?

5 Era sa sega li ni wilika na ivolanikalou ni sa kaya mo ni vakatokai ena yacai Karisito, sai koya na yacaqu? Ia ko ni na kacivi ena yaca oqo ena siga mai muri;

6 Ia ko koya yadua sa taura na yacaqu ka vosota me yacova na ivakataotioti, ena vakabulai vakaidina ena siga mai muri.

7 O koya mo ni kitaka kina na ka kecega ko ni sa kitaka, ena yacaqu; o koya mo ni vakatoka kina na lotu oqo ena yacaqu; ka kerea vua na Tamada ena yacaqu me vakalougatataka na lotu ena vukuqu.

8 Ia kevaka sa sega ni vakatokai ena yacaqu, ena rawa vakaevei me noqu lotu? Ia kevaka sa vakatokai e dua na lotu ena yacai Mosese, sa lotu i Mosese; se kevaka sa vakatokai ena yaca ni dua na tamata, ia sa lotu ni tamata ko ya; ia kevaka sa vakatokai ena yacaqu sa qai noqu lotu, kevaka sa tara cake ena noqu kosipeli.

9 Au sa kaya vakaidina vei kemuni ni ko ni sa tara cake ena noqu kosipeli; ia na ka kece ko ni sa vakayacana, mo ni vakayacana ena yacaqu; ia kevaka ko ni sa kerea vua na Tamada ena yacaqu e dua na ka me baleta na lotu, ena rogoci kemuni ko Tamaqu;

10 Ia kevaka sa tara cake na lotu ena noqu kosipeli, ena vakaraitaka kina na Tamada na nona cakacaka.

11 Ia kevaka sa sega ni tara cake ena noqu kosipeli ka sa tara cake ga ena cakacaka ni tamata se ena cakacaka ni tevoro, au sa kaya vakaidina vei kemuni, ena vakalekaleka ga na nodra marautaka na nodra cakacaka, ia ena dua na gauna lekaleka, ena yaco mai na ivakataotioti, ka ra na tamusuki sobu ka biu ki na bukawaqa ka sega ni lesu rawa mai kina.

12 Ni na muri ira ga na nodra ivalavala, ka ra na tamusuki sobu ena vuku ni nodra ivalavala; o koya mo ni nanuma tiko kina na veika au sa tukuna vei kemuni.

13 Raica au sa solia vei kemudou na noqu kosipeli, ia oqo na kosipeli au sa solia vei kemudou—ni’u a lako mai ki vuravura me’u kitaka na lomai Tamaqu, ni a talai au mai ko Tamaqu.

14 Ka sa talai au mai ko Tamaqu me’u na mai laveti cake ena kauveilatai; ia ni’u sa laveti cake oti ena kauveilatai me’u na kauti ira mai kina na tamata kecega kivei au, ia me vaka ni ra a laveti au cake na tamata, ena laveti ira cake tale ga vakakina ko Tamada me ra na tu e mataqu ka lewai ena nodra ivalavala, se vinaka se ca—

15 Raica ena inaki oqo au sa laveti cake kina; ia au na kauti ira mai na tamata kecega kivei au, me vaka na kaukauwa i Tamada, me ra lewai ena nodra ivalavala.

16 Ka na qai yaco ni o koya yadua sa veivutuni ka papitaisotaki ena yacaqu, ena vakasinaiti ena Yalo Tabu; ia kevaka sa vosota me yacova na ivakataotioti, au na kunea ni sa tawacala ko koya ena matai Tamaqu ena siga au sa tu kina me’u lewai ira na kai vuravura.

17 Ia ko koya sa sega ni vosota me yacova na ivakataotioti, ena tamusuki sobu ka biu ki na bukawaqa ka na sega ni lesu rawa mai kina, ena vuku ni lewa dodonu nei Tamada.

18 Ia sa vakaoqo na vosa sa solia ko Tamada vei ira na luve ni tamata. Raica, baleta na ka oqo, e sa vakayacora kina na vosa ka sa solia, ka sa sega ni lasu ko Koya, ia ena vakayacora vakaidina na vosa kecega sa tukuna.

19 Ka sa sega na ka tawasavasava sa curu rawa ki na nona matanitu; o koya sa sega kina e dua sa curu rawa ki na nona ivakavakacegu, ko ira ga sa savai na nodra isulu ena noqu dra ni ra sa vakabauta, ka veivutunitaka na nodra ivalavala ca ka vosota me yacova na ivakataotioti.

20 Ia oqo na ivakaro: Mo ni veivutuni, koi kemuni kecega mai na iyalayala kei vuravura, ka lako mai vei au ka papitaisotaki ena yacaqu, mo ni vakatabui kina ena isolisoli ni Yalo Tabu mo ni duri ka sega ni tauvi duka kina e mataqu ena siga mai muri.

21 E dina, e dina, au sa kaya vei kemudou, oqo na noqu kosipeli; dou sa kila na ka sa dodonu mo ni kitaka ena noqu lotu; ia na ka kecega dou sa raica ni’u sa kitaka, mo dou kitaka tale ga; io mo dou kitaka na ka kecega dou sa raica ni’u sa kitaka;

22 Ko ni sa kalougata kevaka ko ni sa kitaka na veika oqo, ni ko ni na laveti cake ena siga mai muri.

23 Mo ni vola na veika ko ni sa raica ka rogoca; ia me kakua ga na veika sa vakatabui.

24 Mo ni vola na veika era na cakava na tamata oqo, me vaka ni sa volai tu na veika era a cakava e liu.

25 Raica era na lewai na tamata oqo mai na veitukutuku sa volai oti tu kei na veika ko ni na qai vola e muri, io, ena kilai na nodra cakacaka vei ira na tamata mai na veika sa volai.

26 Ka raica, na ka kecega sa vola na Tamada; ia ena lewai ko vuravura mai na ivola era sa volai.

27 Ia mo dou kila ni dou na lewai ira na tamata oqo me vaka na lewa dodonu ka’u na solia vei kemudou. Ia a cava na ivalavala sa kilikili kei kemudou? Au sa kaya vakaidina vei kemudou, mo dou vakataki au.

28 Ia oqo, au sa lako vua na Tamada. Au sa kaya vakaidina vei kemudou, ena soli vei kemudou na veika kecega ko ni sa kerea vua na Tamada ena yacaqu.

29 O koya mo dou kerekere, ka na soli vei kemudou; mo dou tukituki ka na dolavi vei kemudou; ni sa rawata ko koya yadua sa kerekere; ka na dolavi vua sa tukituki.

30 Ia sa vuabale na noqu marau ena vukumudou kei ira na itabatamata oqo; a sa marau talega ko Tamada kei ira na agilosi yalosavasava ena vukumudou kei ira na itabatamata oqo; ni sa sega ni yali e dua vei ira.

31 Raica, au gadreva mo dou kila; ni’u sa tukuni ira na itabatamata sa bula tiko oqo; a sa vuabale na noqu marau ena vukudra, ni sa sega ni yali e dua vei ira.

32 Ka raica, au sa rarawataki ira vakaidina na ikava ni tabatamata mai na itabatamata oqo; raica ena rawai ira na dauvere me vaka a rawai ira na luve ni veivakarusai; raica era na volitaki au ena siliva kei na koula kei na iyau sa vakacacana na sarasara kei na veveka, ka ra na basuka na daubutako ka butakoca. Ia ena siga ko ya au na sikovi ira ka sauma vei ira na nodra ivalavala.

33 Ka sa yaco ni sa cavuta oti na vosa oqo ko Jisu, sa kaya vei iratou na nona tisaipeli: Mo dou curu ki na matamata ni koro qiqo; ni sa qiqo na matamata ni koro ka rabailailai na sala sa basika ki na bula, a ra sa lewelailai sa kunea; ia sa lalaga na matamata ni koro ka rabailevu na sala sa basika ki na mate, era sa lewevuqa era sa curu kina, raica sa voleka mai na bogi, sa sega ni cakacaka rawa kina e dua na tamata.