1 Ket napasamak idi naibagan ni Jesus dagitoy a balikas, nakisarita kadagiti disipulona, a saggaysa, a kinunana kadakuada: Ania ti tarigagayanyo kaniak, kalpasan ti ipapanko iti Amak?

2 Ket nagsaoda amin, malaksid ti tallo, a kinunada: Tarigagayanmi a kalpasan ti panagbiagmi iti rumbeng a panawen a kas tao, ti panagpapaaymi, a nangayabam kadakami, agpatingganto koma, tapno nadaras ti yaaymi kenka dita pagariam.

3 Ket kinunana kadakuada: Bendisionankayo agsipud ta tinarigagayanyo daytoy a banag kaniak; ngarud, kalpasan ti panagtawenyo iti pitopulo-ket-dua umaykayo kaniak iti pagariak; ket masarakanyo iti dennak ti inana.

4 Ket idi nalpas a nagsarita kadakuada, sinangona dagiti tallo, ket kinunana kadakuada: Ania ti tarigagayyo nga aramidek kadakayo, inton mapanakon ken Ama?

5 Ket nagladingitda iti puspusoda, agsipud ta saanda a kayat nga ibaga kenkuana ti banag a kayatda.

6 Ket kinunana kadakuada: Adtoy, ammok ti kapanunotanyo, ket tarigagayanyo ti banag a kinayat ni Juan, ti ay-ayatek, a kaduak iti panangaskasabak, sakbay ti panangbangon dagiti Hudio ti krus a nakailansaak.

7 Ngarud, ad-adu a parabur ti umay kadakayo ta saanyonto a pulos a mapadasan ti matay; ngem agbiagkayonto a mangsaksi iti amin nga aramid ti Ama kadagiti annak ti tao, nga agingga iti pannakatungpal ti amin a banag babaen ti pagayatan ti Ama, inton umayak a nagloriaan iti pannakabalin ti langit.

8 Ken diyonto mapadasan ti saem ni patay uray inton kaano man; ngem inton umayak iti gloriak mabaliwankayonto iti apagkirem manipud iti pannakatay ken iti kinaagnanayon; ket kalpasanna mabendisionankayonto iti pagarian ti Amak.

9 Ket manen, dinakayto kapten ti sakit bayat ti panagnaedyo iti lasag, uray ti ladingit malaksid laeng no gapu iti basol ti lubong; ket aramidek amin dagitoy gapu iti banag a tinarigagayanyo kaniak, agsipud ta kayatyo a yeg koma dagiti kararua ti tao kaniak, bayat ti kaadda pay laeng ti lubong.

10 Gapu iti daytoy maaddaankayto iti naan-anay a ragsak; ket agtugawkayto iti pagarian ti Amak; wen, naan-anayto ti ragsakyo, a kasla iti kinaan-anay ti ragsak nga inted ti Ama kaniak; ket kaslakayonto kaniak, ket kaslaakto iti Ama; ket ti Ama ken siak maymaysa;

11 Ket paneknekan ti Espiritu Santo ti kasuratan ti Ama ken kasta met kaniak; ket inted ti Ama ti Espiritu Santo kadagiti annak ti tao, gapu kaniak.

12 Ket napasamak nga idi maisawang ni Jesus dagitoy a balikas, kinuldingna ti tunggal maysa kadakuada iti ramayna malaksid dagiti tallo nga agbati, ket pimmanawen.

13 Ket adtoy, nalukatan ti langit, ket nagpalangitda, ket nakita ken nangngegda dagiti saan a maisarita a banag.

14 Ket naiparit kadakuada ti mangyebkas; wenno saan a naited kadakuada ti pannakabalin a mangibaga kadagiti banag a nakitada ken nangngegda.

15 Ket no addada man iti bagi wenno iti ruar ti bagi, saanda a maibaga; agsipud ta yarigda man ti kasla pannakabalbaliw ti langada, ta nagbaliwda manipud iti nainlasagan a bagi iti kinaan-anay a kasasaad, tapno maimatanganda dagiti banag ti Dios.

16 Ngem napasamak a nagpaayda manen iti rabaw ti daga; nupay kasta saanda nga imbaga dagiti banag a nakita ken nangngegda, gapu iti bilin a naited kadakuada idiay langit.

17 Ket ita, no matay wenno saanda a matay, manipud iti aldaw ti pannakabalbaliw ti langada, diak ammo;

18 Ngem kastoy ti kaadu ti ammok, babaen ti kasuratan a naited—napanda iti rabaw ti daga, ket nagpaayda kadagiti amin a tao, a mamagtitipon iti adu iti simbaan a mayat a mamati iti panangaskasabada; buniaganda ida, ket kas iti kaadu ti nabuniagan kasta met ti kaadu ti umawat iti Espiritu Santo.

19 Ket imbalud ida dagiti saan a kameng ti simbaan. Ket saan ida a malaon ti pagbaludan, ta marpuogda.

20 Ket naikalida iti uneg ti daga; ngem nasarangetda ti daga babaen ti balikas ti Dios, ken kasta met a babaen ti pannakabalinna naispalda manipud iti uneg ti daga; ket ngarud saanda a makakali iti abot nga umdas a pakaikalianda.

21 Ket namitlo a naikabilda iti urno ngem saanda a nadangran.

22 Ken namindua a naikabilda iti rukib ti atap nga ayup; ket adtoy nakipagay-ayamda kadagiti ayup a kas iti agsussuso nga urbon ti karnero, ket saanda a nadangran.

23 Ket napasamak a napanda kadagiti amin a tao ni Nephi, ket inkasabada ti ebanghelio ni Cristo kadagiti amin a tao iti rabaw ti daga; ket namatida iti Apo, ket naitiponda iti simbaan ni Cristo, ket iti kasta nabendisionan dagiti tao iti dayta a kaputotan, kas mayalubog iti balikas ni Jesus.

24 Ket ita siak, ni Mormon, isardengko pay laeng ti mangisalaysay iti maipapan kadagitoy a banag.

25 Adtoy, isuratko koman ti nagan dagiti saan a nairaman iti ipapatay, ngem imparit ti Apo; ngarud, saanko nga isurat ida, agsipud ta nailemmengda manipud iti lubong.

26 Ngem adtoy, naimatangak ida, ket nagpaayda kaniak.

27 Ket adtoy mairamandanto kadagiti Gentil, ket dinto maammuan ida dagiti Gentil.

28 Mairamandanto met kadagiti Hudio, ket dinto maammuan ida dagiti Hudio.

29 Ket mapasamakto, inton makita ti Apo a maikanada iti siribna nga agpaayda kadagiti amin a naisina a tribu ti Israel, ken iti amin a pagilian, kakabsat, pagsasao ken tattao, ket mangisaklangdanto iti adu a kararua ken ni Jesus, a mabalin a matungpal ti tarigagayda, ken kasta met a gapu iti makaawis a pannakabalin ti Dios nga adda kadakuada.

30 Ket mayarigda nga anghel ti Dios, ket inton umawagda iti Ama iti nagan ni Jesus mabalinda nga iparang ti bagida iti asino man a tao a madlawda a nasayaat.

31 Ngarud, naindaklan ken nakaskasdaaw nga aramid ti inaramidda, sakbay ti naindaklan ken ti dumteng nga aldaw a manamnaman a makapagtakder ti amin a tao a sumaklang iti pangukoman ni Cristo;

32 Wen uray dagiti Gentil addanto naindaklan ken nakaskasdaaw a maaramidda, sakbay dayta aldaw ti panangukom.

33 Ket no adda kadakayo ti amin a nasantuan a kasuratan a mangipakaammo kadagiti amin a nakaskasdaaw nga aramid ni Cristo, maammuanyonto, babaen dagiti balikas ni Cristo, nga awan duadua a dumteng dagitoy a banag.

34 Ket asi pay dagiti saan a dumngeg iti balikas ni Jesus, ken dagiti pinilina nga imbaonna kadakuada; agsipud ta siasino man a saan nga umawat kadagiti balikas ni Jesus ken ti balikas dagiti imbaonna dinanto awaten ida iti maudi nga aldaw;

35 Ket nasaysayaat koma no saanda a nayanak. Gapu ta ipagarupyo kadi a maadaywanyo ti linteg ti napasakitan a Dios, isu nga indadanes ti tao, tapno dumteng ti pannakaisalakan?

36 Ket ita adtoy, bayat ti panagsaok maipapan kadakuada a pinili ti Apo, wen, uray ti tallo a naipangato idiay langit, a saanko nga ammo no nadalusanda manipud iti pannakatay agingga iti saan a pannakatay—

37 Ngem adtoy, iti pay la rugi ti panagsuratko, nagsaludsodakon iti Apo, ket imparangarangna kaniak a masapul nga adda panagbaliw a maaramid iti bagida, wenno kasapulan a ramananda ti patay;

38 Ngarud, tapno saanda a ramanan ti patay adda panagbaliw a naaramid iti bagida, tapno saanda a malak-am ti ut-ot, wenno liday malaksid laeng no gapu kadagiti basol ti lubong.

39 Ita saan a maipada daytoy a panagbaliw iti dayta mapasamak iti maudi nga aldaw; ngem adda panagbaliw a naaramid kadakuada, kasta met nga awan ti bileg ni Satanas kadakuada, a dina ida masulisog; ken napasanto ti lasagda, a nasantuanda, ken saan a matengngel ida ti bileg ti daga.

40 Ket iti daytoy a kasasaad agtalinaedda agingga iti aldaw a panangukom ni Cristo; ket iti dayta nga aldaw umawatdanto iti dakdakkel a panagbaliw, tapno maawatda iti pagarian ti Ama a saanen a rummuar, ngem makipagtaeng iti Dios nga agnanayon idiay langit.