1 Ngeni i Alma, akakit nang ding amanu nang Amulek pepatahimik ne i Zeezrom, uling ikit na a i Amulek arakap ne king keang pamaglaram at pamamurait para siran ne, at akakit na a megumpisa yang mengalgal lalam ning kabaluan ning keang kasalanan, biklat ne ing keang asbuk at megumpisa yang migsalita kea, at para patiben ding amanu nang Amulek, at para iisplika ding bage migit pa, o para iladlad ding banal a kasulatan migit pa ketang gewa nang Amulek.

2 Ngeni ding amanu nang Alma a mesabi kang Zeezrom dimdam dala ding taung makapadurut; uling ing keraklan masyadu yang maragul, at migsalita ya king anti kanining paralan:

3 Ngeni Zeezrom, ikit mu a ika merakap ka king kekang pamaglaram at katusuan, uling eka kabud miglaram karing tau dapot miglaram ka king Dios; uling lawan, balu nala ngan ding kekang isipan, at akakit mu a ding kekang isipan pepabalu nala kekami ning keang Espiritu;

4 At ikit mu a balu mi a ing planu mu mapanlinlang yang planu, anti mo ing kapanlinlangan na ning demonyu, para maglaram at para lokuan la ding tau ba mulang ayadia laban kekami, bang amakan da kami at bang itabi ra kami.

5 Ngeni ini ing planu na ning kekang kasalang, at kea yang ginamit ing keang upaya keka. Ngeni buri ku a dapat yung ganakan a nanu ing sasabian ku keka sasabian ku karela ngan.

6 At lawan sasabian ku kekayu ngan a yapin ini ing silu na ning kalaban, a gewa na para dakpan la ding taung deni, a mapalyaring dalan na kayu king pangapailalam kea, bang agapus na kayu king keang tanikala, a malyaring itanikala na kayu king alang anggang pangalasak, agpang king keang upaya a asukul nala ding tau.

7 Ngeni aniang i Alma asabi nala dening amanu, i Zeezrom megumpisa yang masyadung mengalgal, uling lalu neng balu ing upaya ning Dios; at meniwala ya i Alma at Amulek atin lang beluan kea, uling maniwala ya a balu da ing keang kaisipan at kapagnasan na ning keang pusu; uling ing upaya mibiye ya karela bang abalu dala dening bage tungkul king espiritu ning pamanula.

8 At i Zeezrom megumpisa yang migsikap mangutang karela, bang abalu na pa ing tungkul king kayarian ning Dios. At sinabi na kang Alma: Nanu ing buri nang sabian nini a sinabi nang Amulek tungkul king pamanyubling mie ning mete, a ding eganagana mibangun la ibat king pangamate, ding makatuliran at ding e makatuliran, at midala la bang talakad arapan ning Dios bang miatulan agpang king karelang agawa?

9 At ngeni i Alma megumpisa yang menisplika karening bage kea, a sasabing: Iti mibiye ya karing dakal bang abalu dala ding misteryu ning Dios; makanian man mibili la lalam ning istriktung pamanutus a e dala kabud sabian agpang king parti ning keang amanu a biniye na karing tau, agpang king pamamintu at pamagtiyaga a bibiye da kea.

10 At uli na niti, ya a papasias king keang pusu, ya mu namang tanggap king ditak a parti ning amanu; at ya a e papasias king keang pusu, kea mibiye ing maragul a parti ning amanu, angga king mibiye ya kea bang abalu nala ding misteryu ning Dios angga king abalu nala king kabilugan.

11 At ila a papasias karing karelang pusu, karela mibiye ing ditak a parti ning amanu angga king ala nalang balu tungkul kareng keang misteryu; at kanita makua lang bihag na ning demonyu, at itake ning keang kaburian pababa king kasiran. Ngeni iti ing buri nang sabian ning tanikala ning infierno.

12 At i Amulek migsalita yang malino tungkul king kamatayan, at bilang mibangun ibat king pangamortal, papunta king kabiliang imortal, at bilang midala king arapan ning ukuman ning Dios, bang mayatul agpang karing kekatamung gawa.

13 Kanita nung ding kekatamung pusu mesias la, wa, nung agawa talang pepasias ding kekatamung pusu laban king amanu, angga king iti eya mayakit kekatamu, kanita ing kekatamung kabilian maging makapangilabut ya, uling kanita misumpa tamu.

14 Uling ding kekatamung amanu ilang mamarusa kekatamu, wa, ding anggang kekatamung gawa parusan da katamu; etamu mayakit alang musing; at ding kekatamung kaisipan parusan da katamu naman; at kening makapangilabut a kabilian e tamu subukang lumawe king kekatamung Dios; at lalu tamung tumula nung autus tala ding batu at ding bunduk para mibagsak kekatamu bang isalikut da katamu king keang arapan.

15 Dapot e malyari iti; dapat tamung lumual at talakad king arapan na king keang glorya, at king keang upaya, at king keang sikanan, kadakilan, at pamanibala, at tanggapan king kekatamung alang kapupusang dine a ding anggang keang atul makatuliran la; a makatuliran ya karing anggang keang gawa, at mapamakalulu ya karing anak ing balang tau a maniwala king keang lagiu at magdalang bunga a makabage king pamanisi.

16 At ngeni makiramdam, sasabian ku kekayu kanita datang ing metung a kamatayan, anggiyang kaduang kamatayan, a espiritual a kamatayan; kanita ya ing panaun a ninuman ing mate king keang kasalanan, anti ing metung a temporal a kamatayan, mate ya mu namang metung a espiritual a kamatayan; wa, mate ya karing bage tungkul king kayapan.

17 Kanita ing panaun potang ding karelang pasakit maging anti lang dayatdayatan malat ning api at asupri, a ing lablab mumukiat babo kapilanman at angga king angga; at kanita ya ing panaun a mitanikala lang pababa king metung a alang anggang kasiran, agpang kingupaya at pamamihag nang Satanas, ya pailalam nala agpang king keang kaburian.

18 Kanita, sasabian ku kekayu, maging anti la mong e mika pamanatbus a megawa; uling ela mayatbus agpang king justicia ning Dios; at ela mate, uling ala nang kabulukan.

19 At milyari a aniang i Alma pipusan na ing pamagsalita na karening bage, ding tau megumpisa lang lalung mengapamulala.

20 Dapot ating metung a Antionah, a pamuntuk yang manimuna karela, a linapit at sinabi na kea: Nanu ining kekang sinabi a ing tau dapat yang mibangun ibat king mete at mibayu ibat kening mortal papunta king imortal a kabilian, at ing kaladua e kapilanman mate?

21 Nanu ing buri nang sabian ning banal a kasulatan, a sasabing ing Dios mibili yang kerubin at mibabayang ispada king aslagan na ning mula ning Eden, bang ding kekatamung mumunang pengari ela milub at mangan king bunga na ning tanaman ning bie, at mie kapilanman? At anya pin akakit tamu a ala nang malyaring pamikatagun a ila mie la kapilanman.

22 Ngeni i Alma sinabi na kea: Ini ing bage a kakung iisplika. Ngeni balu tamu a i Adan mikasala ya king pamamangan king makabawal a bunga, agpang king amanu ning Dios; at anya pin akakit tamu, a uli na ning pamikasalang ini, ing anggang pangatau maging lili la at mikasalang tau.

23 At ngeni lawan, sasabian ku kekayu a nung maging posible para kang Adan ing makapangan king bunga na ning tanaman ning bie ketang panaun a ita, e na mika kamatayan, at ing amanu meging ala yang ulaga, at gagawan neng malaram ing Dios, uling sinabi na: Nung mangan ka siguradu kang mate.

24 At akakit tamu a ing kamatayan daratang ya karing tau, wa, ing kamatayan a sinabi nang Amulek, a temporal a kamatayan; makanian man ating panaung mibiye king tau nung kapilan malyari yang sumisi; king makanian ining bie meging pamagsubuk yang kabilian; metung a panaun para magsadia king pamakiarap king Dios; metung a panaun para magsadia para kanitang alang kapupusan a kabilian a sasabian mi, a iti kaibat na ning pamanyubling mie da ring mete.

25 Ngeni, nung alang planu ning pamanatbus mibiye manibat king pangatatag na ning yatu, e sana mika pamanyubling mie da ring mete; dapot ating metung a planu ning pamanatbus a mibiye, a papalyari king pamanyubling mie da ring mete, a mesabi.

26 At ngeni makiramdam, nung milyari a ding kekatamung mumunang pengari sinulung la at mengan king tanaman ning bie ila sana meging makalunus la kapilanman, uling ala lang pamagsadiang kabilian; at nung makanian ing planu ning pamanatbus mabigu ya, ating amanu ning Dios mawala yang ulaga, at milako ya epektu.

27 Dapot lawan, iti e meging makanian; dapot iti mitakda ya karing tau a dapat lang mate; at kaibat ning kamatayan, dapat lang miras king pamanatul, anggiyang ketang pareung pamanatul a sinabi mi, a yang kapupusan.

28 At kaibat nang tinakda ning Dios a ding bage a reni dapat lang datang karing tau, tutu, kanita ikit na a kailangan ing tau dapat nang abalu ing tungkul karing bage tinakda na karela.

29 Uli na niti mitubud yang angheles para makipagsalita karela, a pepalyari karing taung akit da ing keang glorya.

30 At manibat ketang panaun a ita megumpisa lang maus king keang lagiu; uli na niti ing Dios mekipagsalita ya karing tau, at pepabalu ne karela ing planu ning pamanatbus, a misadia manibat king pangatatag na ning yatu; at iti pepabalu ne karela agpang king karelang kasalpantayanan at pamanisi at karelang banal a gawa.

31 Uli na niti memiye yang kautusan karing tau, ila bilang mumunang mikasala king mumunang kautusan tungkul karing bage a temporal, at maging anti kayung Dios, a makibalu king mayap king marok, a bibili ing karelang sarili king kabiliang makakimut, o bilang makabili king metung a kabilian agpang karing karelang kaburian at katulan, nung gawang marok o gawang mayap —

32 Anya pin, ing Dios memiye ya karelang kautusan, kaibat neng pepabalu karela ing planu ning pamanatbus, bang ela dapat gawang marok, ing kaparusan karin bilang kaduang kamatayan, a metung a alang kapupusang kamatayan karing bage tungkul king kayapan; uling karela ing planu ning pamanatbus ala yang upaya, uling ding gawa ning justicia ela masira, agpang king pekamatas a kayapan ning Dios.

33 Dapot ing Dios minaus ya karing tau, king lagiu na ning keang Anak, (ini bilang planu ning pamanatbus a mibiye) a sasabing: Nung sumisi kayu, at eyu la pasiasan ding kekayung pusu, kanita mika pakalulu ku kekayu, king kapamilatan ning kakung Bugtung a Anak.

34 Uli na niti, ninuman ing sumisi, at ene pasiasan ing keang pusu, ya mika pamamandi ya king pakalulu king kapamilatan ning kakung Bugtung a Anak, angga king kapatawaran da ring keang kasalanan; at deni lungub la king kakung kapainawan.

35 At ninuman ing magmasias king keang pusu at gawa yang karokan, lawan, susumpa ku king kakung mua a eya lungub king kakung kapainawan.

36 At ngeni, kakung kapatad, lawan sasabian ku kekayu, a nung pasiasan yula ring kekayung pusu e kayu lungub king kapainawan na ning Guinu; anya pin ing kekayung karokan yang papamua kea para ibagsak na ing keang mua kekayu anti king mumunang pangamua, wa, agpang king keang amanu king tauling pangamua anti king mumuna, angga king alang kapupusang pangasira da ring kekayung kaladua; anya pin, agpang king keang amanu, angga king tauling pangamate, anti king mumuna.

37 At ngeni, kakung kapatad, uling balu tala deting bage, at tutu la, sumisi tamu, at e tala pasiasan ding kekatamung pusu, bang e taya apamua ing kekatamung Guinung Dios para ibaba ing keang mua kekatamu karening keang kaduang kautusan a biniye na kekatamu; dapot lungub tamu king kapainawan ning Dios, a makasadia agpang king keang amanu.