1 At milyari a meko la, at megumpisa lang menaral king amanu ning Dios karing tau, lulub la karing karelang sinagogas, at karing karelang bale; at anggiyang karing dalan penaral de ing amanu.

2 At milyari a kaibat ning dakal a pamagpagal karela, megumpisa lang mika tagumpe busal da ring pakakalulung klasing tau; uling lawan, mitabi la karing sinagogas uli ning kagaspangan ning karelang imalan —

3 Anya pin ela mipabureng lungub karing karelang sinagogas para samba king Dios, uling mituring lang marinat; uling pakakalulu la; wa, tinuring dala ding karelang kapatad bilang sukal; uling pakakalulu la karing bage na ning yatu; at makanian mu naman mababa la pusu.

4 Ngeni, kabang i Alma tuturu ya at manaral karing tau king bunduk-bundukan ning Onidah, ating dinatang a marakal a tau kea, ila detang kekatamung sasabian, a mababa pusu, uli ning karelang kakaluluan karing bage na ning yatu.

5 At minta la kang Alma; at itang metung a manimuna karela sinabi na kea: Lawan, nanu ing gawan da rening kakung kapatad, uling amakan dala ding anggang tau uli na ning karelang kakaluluan, wa, at lalu na ding kekaming sacerdote; uling ila tinabi da kami karing kekaming sinagogas a pipagalan ming masalese para italakad karing kekaming sariling gamat, at ila tinabi da kami uli na ning kekaming masyadung kakaluluan; at ala kaming lugal para samba king kekaming Dios; at lawan, nanu ing gawan mi?

6 At ngeni anyang i Alma dimdam na iti, kea neng inarap, ing keang lupa makayarap ya mismu kea, at ikit nang maki maragul a tula; uling ikit na a ding karelang kasakitan tutu lang mekapagpakumbaba karela, at ila makasadia lang makiramdam king amanu.

7 Anya pin ene migsalita pa karing aliwang keraklan; dapot inatyat nala ding keang gamat, at migsalita ya karetang ikit na, a tutung sisisi, at sinabi na karela:

8 Akakit ku a mapagkumbaba kayu king pusu; at nung makanian, nuan kayu.

9 Lawan ding kekayung kapatad sinabi da, Nanu ing gawan mi? — uling mitabi kami karing kekaming sinagogas, a e miya asamba ing kekaming Dios.

10 Lawan sasabian ku kekayu, palage yu eye asamba ing Dios maliban nung iti karing kekayung sinagogas kabud?

11 At makanian mu naman, kukutang ku, palage yu e kayu makasamba king Dios nung e mu misan king paruminggo?

12 Sasabian ku kekayu, mayap ing mitabi kayu karing kekayung sinagogas, bang meging mapagkumbaba kayu, at abalu yu ing kabiasnan; uling kailangan a dapat yeng abalu ing kabiasnan uling iti ing sangkan a mitabi kayu, a inamak da kayu ding kekayung kapatad uli ning kekayung masyadung kakaluluan, a midala kayu king kababan ning pusu; uling kailangan kayung mapilit bang maging mapagkumbaba.

13 At ngeni, uling mepilit kayung maging mapagkumbaba nuan kayu; uling ing tau neng kayi, nung mapilit yang maging mapagkumbaba, magnasa yang sumisi; at ngeni lawan, ninuman ing sisisi manakit yang pakalulu, at ya a menakit pakalulu at mibabata angga king kapupusan miligtas ya.

14 At ngeni anti ing sinabi ku kekayu, uling mepilit kayung maging mapagpakumbaba nuan kayu, e yu wari palage a migit lang nuan ilang tutung magpakumbaba king karelang sarili uli ning amanu?

15 Wa, ya a tutung magpakumbaba king keang sarili, at sisisi karing keang kasalanan, at mibabata angga king kapupusan, nuan ya — wa migit yang nuan kesa karela a mepilit maging mapagkumbaba uli ning karelang masyadung kakaluluan.

16 Uli na niti, nuan la a magpakumbaba a e mepilit maging mapagkumbaba; o kaya, king aliwang amanu, nuan ya a maniwala king amanu ning Dios, a mebiniag laus lub, wa, a ena kailangang abalu ing amanu, o anggiyang mepilit abalu, bayu la maniwala.

17 Wa, dakal la a sasabing: Nung mipakit ka kekaming metung a tanda ibat banua, kanita abalu ming maki kasiguraduan; kanita maniwala kami.

18 Ngeni kukutang ku, kasalpantayanan ine? Lawan, sasabian ku kekayu, Ali; uling nung ing metung a tau balu ne ing metung a bage ya ala neng sangkan para maniwala, uling balu na ne.

19 At ngeni, makananu ya anti kasumpa ya a makibalu king kaburian ning Dios at ena gagawan, kesa kea a maniwala mu, o kabud makisangkan para maniwala, at menabu king pamikasala?

20 Ngeni king bage a ini dapat kayung matul. Lawan, sasabian ku kekayu, a iti king metung a banda anti king aliwang banda; at iti malyari king balang tau agpang king keang gawa.

21 At ngeni anti ing sinabi ku tungkul king kasalpantayanan — ing kasalpantayanan e king ating sakdal a beluan karing bage; anya pin nung atin kang kasalpantayanan mamasa ka karing bage a e mayayakit, a tutu.

22 At ngeni, lawan sasabian ku kekayu, at buri ku a dapat yung ganakan, a ing Dios mapamakalulu ya karing anggang maniwala king keang lagiu; anya pin pignasan na, king mumuna, a dapat kayung maniwala, wa, anggang king keang amanu.

23 At ngeni, biniye ne ing keang amanu king kapamilatan da ring anghel karing tau, wa, emu karing lalaki dapot karing babai mu naman. Ngeni aliwa mu ngan ini; ding mangalating anak atin lang amanung mibiye karelang dakal a besis, a gugulu karing biasa at maki beluan.

24 At ngeni, kakung kaluguran a kapatad, anti king pignasan yung abalu kaku nung nanu ing gawan yu uling magkasakit kayu at mitabi — ngeni e ku pagnasan a dapat yung palage a buri ku atulan da kayu kabud agpang ketang tutu —

25 Uling eku buring sabian a ikayu ngan mepilitan kayung magpakumbaba king kekayung sarili; uling tutu kung maniwala a ating mapilan kekayu a magpakumbaba, paburen la king nanumang kabilian da.

26 Ngeni, anti ing sinabi ku agpang king kasalpantayanan — a eya sakdal a beluan — anggiyang karing kakung amanu. Eyu abalu ing karelang kasiguraduan king mumuna, angga king kasakdalan, nanuman a migit pa kesa king kasalpantayanan metung yang sakdal a beluan.

27 Dapot makiramdam, nung migising kayu at gisingan ding kekayung panamdam, anggiyang king metung a pamagsubuk karing kakung amanu, at gumamit ditak a kasalpantayanan wa, anggiyang ala na kayung buri kesa king magnasang maniwala, pabureng ing kapagnasang ini sumaup ya kekayu, anggiyang angga king maniwala kayu king metung a parti ning kakung amanu.

28 Ngeni ikumpara taya ing amanu king metung a bini. Ngeni nung mika lugal kayu, a ing metung a bini mitanam ya king kekayung pusu, lawan, nung tutu yang bini, o mayap yang bini, nung eya iugse king kekayung kelan kapaniwalan, a kekayu yang salangsangan ing Espiritu na ning Guinu, lawan, magumpisa yang dagul king kekayung salu; at potang damdaman yu ining pamandagul, magumpisa yung sabian king kekayung sarili — Kailangang iti mayap yang bini, o ing amanu mayap ya, uling inumpisan neng paragulan ing kakung kaladua; wa, inumpisan neng pasalan ing kakung pamanintindi, wa, megumpisa yang meging maniaman kaku.

29 Ngeni lawan, e na dagdagan nini ing kekayung kasalpantayanan? Sasabian ku kekayu, Wa; makanian man ini e medagul king sakdal a beluan.

30 Dapot lawan, kabang ing bini dadagul ya at lalabung at magumpisa yang tumubu, kanita dapat yung sabian a ing bini mayap ya; uling lawan iti dadagul ya, at lalabung, at magumpisa yang tumubu.

31 At ngeni, kukutnan da kayu, makasiguru kayung iti mayap yang bini? Sasabian ku kekayu, Wa; uling balang bini mamunga yang kalupa na.

32 Anya pin, nung ing bini tumubu ya mayap ya, dapot nung eya tumubu, lawan, eya mayap, uli na niti iti iugse ya.

33 At ngeni lawan, uling sibukan ye ing pagsubuk, at tenam ye ing bini, at meragul ya at linabung, at megumpisa yang tinubu, kailangan yung abalu a ing bini mayap ya.

34 At ngeni, kukutnan da kayu, ing beluan yu sakdal ya? Wa, ing kekayung beluan sakdal ya ketang bage ita, at ing kekayung kasalpantayanan matudtud ya; at iti uling balu yu, uling balu yu a ing amanu peparagul ne ing kekayung kaladua, at balu yu naman a linabung ya, a ing kekayung panintindi megumpisa yang mesala, at ing kekayung kaisipan megumpisa yang lumapad.

35 O kanita, e tutu ini? Sasabian ku kekayu, Wa, uling iti salaya; at nanumang sala, mayapya, uling iti mayayakit ya, uli na niti dapat yung abalu a iti mayap ya; at ngeni kukutnan da kayu, kaibat yung aranasan ining sala ing beluan yu meging sakdal ya?

36 Lawan sasabian ku kekayu, Ali; ni dapat yung ilele ing kekayung kasalpantayanan, uling ginamit yu kabud ing kekayung kasalpantayanan para itanam ing bini bang agawa ye ing pagsubuk bang abalu nung ing bini mayap ya.

37 At lawan, kabang ing tanaman magumpisa yang tumubu, sabian yu: Kekatamu yang sesen iti a maki maragul a pamaningat, bang iti mika uyat ya, bang iti tumubu ya, at mamiye yang bunga kekatamu. At ngeni lawan, nung sesen ye iting makimaragul a pamaningat mika uyat ya, at tumubu, at mamunga.

38 Dapot nung paburen ye ing tanaman, at eyu isipan ing pamanese kaniti, lawan iti eya mika nanumang uyat; at potang ing pali ning aldo datang at dulukan ne, uling ala yang uyat iti langi ya, at iti bagutan ye at iugse.

39 Ngeni iti e uli ning ing bini eya mayap, ni iti uli ning ing bunga na e buburian; dapot iti uli ning ing kekayung gabun mangabtak, at e ye sesesen ing tanaman, anya pin e kayu mika bunga na.

40 At nung makanian, nung eye sesen ing amanu, mamasang maki mata ning kasalpantayanan karing bunga na, e kayu kapilanman makayagtal king bunga na ning tanaman ning bie.

41 Dapot nung sesen ye ing amanu, wa, sesen ye ing tanaman kabang magumpisa yang tumubu, king kekayung kasalpantayanan maki maragul a pamagsikap, at maki pamagtiyaga, mamasa king bunga na, iti mika uyat ya; at tutu iti maging tanaman yang lalabung angga king alang kapupusan a bie.

42 At uli ning kekayung pamagsikap at kekayung kasalpantayanan at kekayung pamagtiyaga king amanu king pamanese kaniti, a mika uyat ya kekayu, lawan, kanita magtal kayung bunga na, a pekamaulaga, a pekamayumu karing anggang mayumu, at pekamaputi karing anggang maputi, wa, at pekadalise karing anggang dalise at magpasasa kayu king bungang ini anggiyang angga king kumatmu kayu, a e kayu dumanup, ni kumawa.

43 Kanita, kakung kapatad, pupulan yula ding premyu na ning kekayung kasalpantayanan, at kekayung pamagsikap, at pamagtiyaga, at makabang kasakitan, manenaya king tanaman para mamiye bunga kekayu.