1 Ngeni anak ku, oini pa ing buri kung sabian keka; uling daramdaman ku ing kekang kaisipan migaganaka ya agpang king pamanyubling mie da ring mete.

2 Lawan, sasabian ku keka, a alang pamanyubling mie — o, sasabian ku, king aliwang amanu, a dening mortal ela maging imortal, dening mabubuluk ela maging alang kabulukan — angga king kaibat ning pamaniatang nang Cristo.

3 Lawan, pepaliarian na ing pamanyubling mie da ring mete. Dapot makiramdam ka, anak ku, ing pamanyubling mie alayu pa. Ngeni, bubuklat ke keka ing metung a misteryu; makanian man, dakal a misteryung makasalikut, a alang metung mang makibalu nung e ing Dios mismu. Dapot ipakit ke keka ing metung a bage a mitmung sikap kung kitang king Dios bang kanita abalu ku — at ita agpang ya king pamanyubling mie.

4 Lawan, ating panaun a makatakda para ring eganagana mibangun la manibatan king pangamate. Ngeni potang ining panaun a ini datang ya alang metung mang makibalu; dapot ing Dios balu na ing panaun a makatakda.

5 Ngeni, nung mika metung mang panaun o kaduang panaun, o katlung panaun a ding tau mibangun la manibatan king kamatayan, alang ulaga iti; uling ing Dios balu na ngan deng bage a reni; at ustu na kaku ing abalu ku ing makanian ing malyari — a ating panaun a makatakda para mibangun ing eganagana manibatan king kamatayan.

6 Ngeni, kailangan ing mika panaun pilatan na ning panaun ning kamatayan at ning panaun ning pamanyubling mie.

7 At ngeni mangutang ku nung nanu ing malyari kareng kaladua da reng tau manibat king panaun ning kamatayan angga king panaun a mitakda para king pamanyubling mie?

8 Ngeni nung atin mang maigit keng metung a panaun ing mitakda para mibangun la ring tau alang ulaga; uling ding eganagana ela mangamate agnan agnan, at iti alang ulaga; ing anggang panaun metung yang aldo king Dios, at ing tau ya mung sukad king panaun.

9 Anya ngeni, ating panaun a makatakda karing tau a mibangun la manibatan king pangamate; at ating panaun pilatan ning panaun ning kamatayan at ning pamanyubling mie. At ngeni, agpang kening panaun a makapilatan, nanu ing milyari karing kaladua da ring tau yapin ing bage a masikap kung kitang king Guinu para mabalu; at iti ing bage a balu ku.

10 At potang datang ing panaun ding eganagana mibangun la, kanita da abalu ing Dios balu na ngan ing makatakdang panaun king tau.

11 Ngeni, agpang king kabilian ning kaladua pilatan ning kamatayan at ning pamanyubling mie — Lawan, pepabalu na kanaku ning metung a anghel, a ding espiritu da ring eganaganang tau, kaibat dang meko king katawan dang mortal, wa, ding espiritu da ring anggang tau, mangayap la man o marok, miuli la ketang Dios a miniye bie karela.

12 At kanita malyari, a ding espiritu da retang mangayap matanggap la king kabilian a masaya, a ausan dang paraiso, kabilian ya king kapainawan, kabilian ya king katahimikan, a nung nukarin painawa la keng eganagana dang problema at king eganaganang kapigaganakan at kalungkutan.

13 At kanita malyari, a ding espiritu da ring mangarok, wa, detang marok — uling tutu, ala lang parti o dake king Espiritu na ning Guinu, uling lawan, pinili da ing gawang marok kesa king mayap; king uli na nita ing espiritu na ning demonyu linub ya karela, at simsam ne ing katawan da — at deni miugse la king malaut a dalumdum; mika pamanangis, at gulisak, at lagitik da ring ipan, at iti uli ning sarili dang kasalanan, king pangagapus da king kaburian ning demonyu.

14 Ngeni oini ing kabilian da ring kaladua da ring mangarok, wa, king madalumdum, at king kabilian a makakilabut, makatakut a itsura uli ning malablab a api na ning mua ning Dios karela; anya manatili la kening kabilian a ini, makanian mu naman karing mangayap king paraiso, angga king panaun ning karelang pamanyubling mie.

15 Ngeni, ating mapilan a makaintindi kening kabilian a maligaya at kening kabilian a masakit ning kaladua, bayu ing pamanyubling mie, yapin ing mumunang pamanyubling mie. Wa, aminan ku ing mayaus yang pamanyubling mie, ing pamanalakad king espiritu o ning kaladua at ning pangadala ra king ligaya o kasakitan, agpang karing amanung mesabi.

16 At lawan, pasibayu iti mesabi, a ating mumunang pamanyubling mie, metung yang pamanyubling mie kareng eganaganang minuna kanita, at kareng ngening kasalukuyan, at kareng datang pa, angga king pamanyubling mie nang Cristo manibat king kamatayan.

17 Ngeni, etamu apagpalage ing ining mumunang pamanyubling mie a mesabi kening paralan a ini, yapin ing pamanyubling mie da ring kaladua at ing karelang kararasan king ligaya at kasakitan. Eyu aipalage ing iti yang buri nang sabian nita.

18 Lawan, sasabian ku keka, Ali; dapot ing buri nang sabian ing pamisanmetung na ning kaladua at ning katawan, da retang ketang panaun nang Adan angga king pamanyubling mie nang Cristo.

19 Ngeni, nung deng kaladua at katawan da retang mebanggit misanmetung lang agad, ding marok at ding mangayap, e ku sasabian; paburen yung maging sapat ne a sinabi ku a ila ngan mibangun la; o king aliwang amanu, ing karelang pamanyubling mie malyari bayu ing pamanyubling mie da retang mangamate na kaibat ning pamanyubling mie nang Cristo.

20 Ngeni, anak ku, e ku sasabian ing karelang pamanyubling mie datang king pangasubling mie nang Cristo; dapot nung e, bibiye ku iti bilang kanakung opinyun, a ding kaladua at ding katawan pasibayu lang misanmetung, da ring mangayap, keng pamanyubling mie nang Cristo, at ning pamanukiat na banua.

21 Dapot nung iti king keang pamanyubling mie o kaibat na, eku asabi; dapot oini mu ing asabi ku, a ating panaun pilatan ning kamatayan at pamanyubling mie ning katawan, at kabilian ning kaladua king kaligayan o kasakitan angga king panaun a tikda ning Dios a ing mete mibangun ya, at misanmetung lang pasibayu, ing kaladua at katawan, at midala ya para talakad king arap ning Dios, at miyatulan agpang keng gawa ra.

22 Wa, iti papalyarian na ing tungkul king pamibalik ning eganaganang bage a mebanggit karing asbuk da ring propeta.

23 Ing kaladua mibalik ya king katawan, at ing katawan king kaladua; wa, at balang bias at kasu-kasuan mibalik ya king katawan; wa, anggiyamang ing metung a buak ning buntuk e mawala; dapot ing eganagana misubli ngan king ustu at sakdal a balangkas.

24 At ngeni anak ku, iti yang pamibalik a mebanggit karing asbuk da ring propeta —

25 At kanita ding mangayap mangislap la king kayarian ning Dios.

26 Dapot lawan, ating makakilabut a kamatayan a datang karing mangarok; uling mangamate la karing bage a makaukul king kayapan; uling ila mangarinat la, at alang marinat a bage a malyaring magmana king kayarian ning Dios; dapot ila mitabi la, at mapuwersa lang mangan kareng bunga da reng karelang pipagalan o gewa, a mangarok; at inuman da ing palak ning mapait a kopita.