1 Ma o wee ruo na eze Lamonaị mere ka ụmụ-oru ya nile guzoro ma gbaa ama maka ihe nile nke ha hụworo gbasara ihe ahụ.

2 Ma mgbe ha nile gbaworo ama maka ihe nile ndị ha hụworo, ma ọ mụtaworiị maka ikwesị-ntụkwasị-obi nke Amọn n’ichekwa igwe-atụrụ ya nile, na kwa maka nnukwu ike ya n’ịlụ ọgụ megide ndị ahụ chọrọ igbu ya, ọ tụrụ ya n’anya karịa, ma sị: N’ezie, nke a karịrị otu nwoke. Lee, nke a ọbụghị Nnukwu Mụọ onye na-ezite ụdị nnukwu ntaram-ahụhụ nile n’arụ ndị a, n’ihi igbu mmadụ ha nile?

3 Ma ha zara eze ahụ, ma sị: Ma ọ bụ Nnukwu Mụọ ahụ ma-ọbụ otu nwoke, anyị amaghị; ma na nke ha otu a ka anyị matara, na ndị-iro nile nke eze ahụ nile enweghị ike igbu ya; ọbụghị ma ha nwere ike ịchụsasị igwe-atụrụ nile nke eze ahụ mgbe ọ na-anọnyere anyị, n’ihi ọkachamara na nnukwu ume ya; ya mere, anyị matara na ọ bụ enyi nke eze ahụ. Ma ugbua, O eze, anyị ekweghị na otu nwoke nwere nnukwu ike ha otu a, n’ihi na anyị matara na enweghị ike igbu ya.

4 Ma ugbua, mgbe eze nụrụ okwu ndị a nile, ọ sịrị ha: Ugbua a matara m na ọ bụ Nnukwu Mụọ ahụ; ma ọ rịdatawo n’oge nke a ichekwa ndụ unu nile, ka m wee ghara igbu unu dịka m mere ụmụnne unu nwoke. Ugbua nke a bụ Nnukwu Mụọ ahụ nke nna anyị ha kwuworo maka ya.

5 Ugbua nke a bụ omenala nke Lamonaị, nke ọ nataworo site n’aka nna ya, na enwere otu Nnukwu Mụọ. Na-agbanyeghị ha kwere na otu Nnukwu Mụọ, ha chere na ihe ọbụla ha mere dị mma; otu o sila dị, Lamonaị malitere ịtụ-egwu karịa, jiri egwu na eleghị anya o mewọrị ihe ọjọọ n’igbu ụmụ-oru ya.

6 N’ihi na o gbuworịị ọtụtụ n’ime ha n’ihi na ụmụnne ha nwoke achụsasịwọ igwe-atụrụ ha nile n’ebe ahụ mmiri dị; ma otu a, n’ihi na ha a chụsasịwọ igwe-atụrụ ha nile e gburu ha.

7 Ugbua ọ bụ ihe ndị Leman a na-eme iguzoro n’akụkụ mmiri nile nke Sibọs ịchụsasị igwe-atụrụ nile nke ndị ahụ, na site n’ebe ahụ ha ga-achịrị ọtụtụ ndị achụsasịworo baa n’ala nke ha, ebe ọ bụ ihe ha na-eme nke mpụnara dị n’etiti ha.

8 Ma o wee ruo na eze Lamonaị jụrụ ụmụ-oru ya nile, na-asị: Olee ebe nwoke ahụ nke nwere Ụdị nnukwu ike ahụ nọ?

9 Ma ha sịrị ya: Lee, ọ na-enye ịnyịnya gị nile nri. Ugbua eze ahụ enyewọrịị ụmụ-oru ya nile iwu, tutu o ruo oge inye igwe-atụrụ ha mmiri, ka ha wee kwado ịnyịnya ya nile na ụgbọ-ala ya nile, ma duga ya n’ala nke Nifaị; n’ihi na enwewọrịị nnukwu oriri eyiri n’ala nke Nifaị, site n’aka nna Lamonaị, onye bụ eze n’ala ahụ nile.

10 Ugbua mgbe eze Lamonaị nụrụ na Amọn na-akwado ịnyịnya ya nile na ụgbọ-ala ya nile ọ tụrụ ya n’anya karịa, n’ihi ikwesi-ntụkwasị-obi nke Amọn, na-asị: N’ezie enwebeghị nwa-oru ọbụla n’etiti ụmụ-oru m nile nke dịrịla ikwesi ntụkwasị obi dịka nwoke nke a; n’ihi na ọbụna ọ na-echeta iwu m nile na-edebe ha.

11 Ugbua a matara m n’ezie na nke a bụ Nnukwu Mụọ ahụ, ma a ga m achọ ya ka ọ batakwute m, mana a nwaghị m anwa.

12 Ma o wee ruo na mgbe Amọn jikeworo ịnyịnya nile ahụ na ụgbọ-ala nye eze ahụ na ụmụ-oru ya nile, ọ bakwugara eze ahụ, ma ọ hụrụ na mbara iru nke eze ahụ gbanwere; ya mere ọ chọrọ ịlaghachi si n’iru ya pụọ.

13 Ma otu n’ime ụmụ-oru eze ahụ sịrị ya, Rabbana, nke bụ ma asụgharịa ya, o si-ike ma-ọbụ nnukwu eze, ebe ha na-ewere ndị eze ha nile ịbụ ndị siri ike; ma otu a ọ sịrị ya: Rabbana, eze ahụ chọrọ ka ịnọdụ.

14 Ya mere Amọn tụgharịrị onwe ya n’ebe eze ahụ nọ, ma sị ya: Gịnị ka ị chọrọ ka m mere gị, O eze? Ma eze ahụ azaghị ya ruo ohere nke otu awa, dịka oge nke ha, n’ihi na ọ maghị ihe ọ ga-agwa ya.

15 Ma o wee ruo na Amọn sị kwara ya ọzọ: Gịnị ka ị chọrọ n’aka m? Mana eze ahụ azaghị ya.

16 Ma o wee ruo na Amọn, ebe o jupụtara na Mụọ nke Chineke, ya mere ọ matara echiche nile nke eze ahụ. Ma ọ sịrị ya: Ọ bụ n’ihi na Ị nụwo na m chekwara ụmụ-oru gị na igwe-atụrụ gị nile, ma gbuo ụmụnne ha nwoke asaa jiri ébè na jiri mma agha, ma bepụ aka ndị nke ọzọ nile, ka m wee chekwa igwe-atụrụ gị nile na ụmụ-oru gị; lee, ọ bụ nke a kpatara oke ịtụ-n’anya gị nile?

17 Asị m gị, ọbụ gịnị, ka oke ịtụ-n’anya gị jiri dị ukwuu otu a? Lee, abụ m nwoke, ma abụ m nwa-oru gị; ya mere, ihe ọbụla Ị chọrọ nke dị mma, nke ahụ ka m ga-eme.

18 Ugbua mgbe eze ahụ nụworo okwu ndị a nile, ọ tụrụ ya n’anya ọzọ, n’ihi na ọ hụrụ na Amọn nwere ike ịgụta echiche ya nile; mana na-agbanyeghị nke a, eze Lamonaị meghepụrụ ọnụ ya, ma sị ya: Onye ka Ị bụ? Ọbụ gị bụ Nnukwu Mụọ ahụ, onye mazuru ihe nile?

19 Amọn zara ma sị ya: Abụghị m ya.

20 Ma eze ahụ sịrị: Olee otu i siri mata echiche nile nke obi m? I nwere ike ikwu n’enweghị egwu, ma gwa m gbasara ihe ndị a nile; na kwa gwa m site n’ike gịnị ka I gburu ma bepụ aka nile nke ụmụnne m nwoke ndị chụsasịrị igwe-atụrụ m nile—

21 Ma ugbua, ọbụrụ na ị ga-agwa m gbasara ihe ndị a nile, ihe ọbụla ị chọrọ a ga m enye gị; ma ọbụrụ na a chọrọ, a ga m eche gị jiri ndị-agha m nile; mana a matara m na I siri ike karịa ha nile; otu o sila dị, ihe ọbụla Ị chọrọ n’aka m a ga m enye gị ya.

22 Ugbua Amọn ebe ọ ma ihe, ma na ọdịghị eme mmadụ ihe ọjọọ, ọ sịrị Lamonaị: Ị ga-an̄a ntị n’okwu m nile, ọbụrụ na m gwa gị site n’ike gịnị m mere ihe ndị a nile? Ma nke a bụ ihe m chọrọ n’aka gị.

23 Ma eze ahụ zara ya, ma sị: E, aga m e kwere okwu gị nile. Ma otu a ejidere ya site n’aghụghọ.

24 Ma Amọn malitere ịgwa ya okwu n’enweghị egwu, ma sị ya: I kwere na e nwere otu Chineke?

25 Ma ọ zara, ma sị ya: Amataghị m ihe nke ahụ pụtara.

26 Ma mgbe ahụ Amọn sịrị: Ikwere na e nwere otu Nnukwu Mụọ?

27 Ma ọ siri, E.

28 Ma Amọn sịrị: Nke a bụ Chineke. Ma Amọn sịrị ya ọzọ: I kwere na Nnukwu Mụọ a, onye bụ Chineke, kere ihe nile ndị dị n’elu-igwe na n’elu ụwa?

29 Ma ọ sịrị: E, kwere m na o kere ihe nile dị n’ụwa; mana a mataghị m maka elu-igwe nile.

30 Ma Amọn sịrị ya: Elu-igwe nile bụ ebe nke Chineke bị na ndị mụọ-ozi ya nile dị nsọ.

31 Ma eze Lamonaị sịrị: Ọ dị elu karịa ụwa?

32 Ma Amọn sịrị: E, ma ọ na-eleda anya lekwasị ụmụ nke mmadụ nile; ma ọ mazuru echiche nile na nzube nile nke obi; n’ihi na site n’aka ya ka ekere ha nile site na mmalite ahụ.

33 Ma eze Lamonaị sịrị: E kwere m ihe nile ndị a nke I kwuworo. Ezitara gị site n’ebe Chineke nọ?

34 Amọn wee sị ya: Abụ m nwoke; ma mmadụ na mmalite ka e kere n’ụdị oyiyi nke Chineke, ma a kpọrọ m site na Mụọ Nsọ ikuziri ndị a ihe ndị a nile, ka e wee weta ha n’ọmụma nke ihe ahụ nke zịrị ezi na ezi-okwu;

35 Ma ụfọdụ nke Mụọ ahụ bi n’ime m, nke na-enye m mmụta, na kwa ike dịka okwukwe m na ọchịchọ m nile nke dị n’ime Chineke siri dị.

36 Ugbua mgbe Amọn kwuworo okwu ndị a, ọ malitere na okike nke ụwa, na kwa n’okike nke Adam, ma gwa ya ihe nile gbasara ọdịda nke mmadụ, ma kwugharịa ma tọgbọ n’iru ya akụkọ-ndekọta nile na akwụkwọ-nsọ nile nke ndị ahụ, nke ndị-amụma nile kwuworo, ọbụna gbada ruo n’oge nke nna ha, Lihaị, hapụrụ Jerusalem.

37 Ma o kwugharịkwara nye ha (n’ihi na ọ bụ nye eze ahụ na nye ụmụ-oru ya nile) njem nile nke ndị nna ha n’ime ọzara ahụ, na ntaram-ahụhụ ha nile site n’agụụ na akpịrị ịkpọ nku, na ịrusi oru ike ha, na ihe ndị ọzọ.

38 Ma o kwugharịkwara nye ha gbasara nnupụ-isi nile nke Leman na Lemuel, na ụmụ nwoke nile nke Ịshmel, e, nnupụ-isi ha nile ka ọ kọọrọ ha; ma ọ kọwadaruru ha ala akụkọ-ndekọta nile na akwụkwọ-nsọ nile site n’oge ahụ nke Lihaị hapụru Jerusalem gbada ruo oge ugbua.

39 Mana nke a abụghị ihe nile; n’ihi na ọ kọwadaruru ha ala atụmatụ nke mgbapụta, nke a kwadoro site na ntọ-ala nke ụwa; ma o mekwara ka ha mata gbasara ọbịbịa nke Kraịst, na ọrụ nile nke Onye-nwe ka o mere ka ha mata.

40 Ma o wee ruo na mgbe o kwusịworo ihe ndị a nile, ma kọwadaruo ha ala nye eze ahụ, na eze ahụ kwere okwu ya nile.

41 Ma ọ malitere itiku Onye-nwe, na-asị: O Onye-nwe, mee ebere; dịka uju ebere gị nke I meworo ndị nke Nifaị siri dị, meere m, na ndị m.

42 Ma ugbua, mgbe o kwuworo nke a, ọ dara n’ala, dịka ọ nwụrụ anwụ.

43 Ma o wee ruo na ụmụ-oru ya kpọọrọ ya ma bubara ya nwunye ya, ma dínaa ya n’elu akwa-ụra; ma o dịnara dịka ọ nwụrụ anwụ ruo ụbọchị abụọ na abalị abụọ; ma nwunye ya, na ụmụ ya nwoke, na ụmụ-ada ya ruuru ya uju, n’ụdị usoro nke ndị Leman, na-akwa akwa-arịrị maka ofufu ya.