1 Ao ngkanne, kioina bwa Amon e tabe n reireinia ana aomata Ramonaai ni katoa tai, ti na oki rikaaki nakon rongorongoia Aaron ma tarina; bwa i mwin are e kitana te aba are Matonaai ao e kairaki iroun te Tamnei nakon te aba are Nibwaai, nakon naba mwengan te uea are e uea iaon te aba ni kabane ma tiaki n te aba are Itimaera; ao bon ngaia taman Ramonaai.

2 Ao e koro bukina bwa e nako n rin nakoina nako nanon ana bareti te uea, ma tarina, ao e bobaraaki i matan te uea man taku nakoina: Nooria, O te uea, ngaira tarin Amon, are ko kainaomata man te nne ni kaikain.

3 Ao ngkai, O te uea, ngkana ko kamaiuira ao ti na bon riki bwa am toro. Ao te uea e taku nakoia: Teirake, bwa N na anganingkami maiumi, ao I aki tangiria bwa kam na riki bwa au toro; ma N na kairoroingkami bwa kam na anganai te ibuobuoki; bwa I a tia n rawawata n au iango ibukin te akoi ma korakoran ana taeka tarimi are Amon; ao I tangiria n ataa bukina bwa e aera ngkai e aki kitana Matonaai ma ngkami.

4 Ao Aaron e taku nakon te uea: Nooria, e weteia Tamnein te Uea nakon te kawai teuana; e a tia n nako nakon te aba are Itimaera, n reireinia ana botanaomata Ramonaai.

5 Ngkai te uea e taku nakoia: Teraa te bwai ae kam taku ni kaineti ma Tamnein te Uea? Nooria, aio te bwai ae tabetabe nanou iai.

6 Ao i rarikina, teraa te bwai ae taku Amon ae kangai—Ngkana kam rairinanomi ao kam na kamaiuaki, ao ngkana kam aki rairinanomi, ao kam na teweaki nako n te kabanea ni bong.

7 Ao Aaron e kaeka ma n taku nakoina: Ko kakoaua bwa iai te Atua? Ao e taku te uea: I ataia bwa Amwarakaite a taku bwa iai te Atua, ao I a tia ni kariaia bwa a na katei umwaia aika tabu, bwa aonga n ikotaki n taromauria. Ma ngkai ko taku bwa iai te Atua, nooria, N na kakoaua.

8 Ao ngkai ngke Aaron e ongo aio, e kimwareirei nanona, ao e taku: Nooria, n aron ae ko maiu, O te uea, ao bon iai te Atua.

9 Ao te uea e taku: Ao bon te Tamnei ae Korakora te Atua are e kairia ara bakatibu ni kaotinakoia man te aba are Ierutarem?

10 Ao Aaron e taku nakoina: Eng, bon te Tamnei ae Korakora, ao e kariki bwaai ni kabane ake i karawa ao iaon te aba. Ko kakoaua aio?

11 Ao e taku: Eng, I kakoaua bwa te Tamnei ae Korakora e kariki bwaai ni kabane, ao I tangiria bwa ko na tuangai bwaai aikai ni kabane, ao N na kakoauai am taeka.

12 Ao e koro bukina bwa Aaron ngke e noria bwa te uea e na kakoauai ana taeka, ao e moanna man karikan Atam, ni wareware ni koroboki aika tabu nakon te uea—bwa e kanga te Atua ni karika te aomata n aron katotongana, ao bwa te Atua e anganna tua, ma ibukin riaoan te tua, ao e bwaka te aomata.

13 Ao Aaron e kabwarabwara nakoina koroboki aika tabu man karikan Atam, ao e kawenea bwakan te aomata i matana, ma arona n rabwata ao te babaire ni kabomwi naba, are e katauraoaki ma ni moan te aonaba, rinanon Kristo, ibukiia ni kabane ake a kakoaua arana.

14 Ao ibukina bwa te aomata e a tia ni bwaka bon akea te bwai ae kona ni karekea bon ibukina; ma marakin ao maten Kristo e karaoa te mwakuri ni kamaiu ibukin aia bure, i nanon te onimaki ao te rairannano ao a mwaiti riki; ao e urua ana kabaebae te mate, ao a na akea ana tokanikai te rua ni mate, ao kammarakin te mate e na kabwautaki ni kantaaningan te mimitong; ao Aaron e kabwarabwarai bwaai aikai ni kabane nakon te uea.

15 Ao e koro bukina bwa i mwin Aaron ngke e kabwarabwarai bwaai aikai nakoina, ao e taku te uea: Teraa ae N na karaoia bwa e aonga n reke irou te maiu ae akea tokina are ko a tia n taekinna? Eng, teraa ae N na karaoia bwa I aonga ni manga bungiaki iroun te Atua, bwa e na koutaki nako te tamnei ae buakaka aei inanou, ao ma ni butimwaea Tamneina, bwa I aonga n onrake n te kimwareirei, bwa I aonga n aki teweaki nako n te kabanea ni bong? Nooria, e taku, N na anganako au bwai ni kabane, eng, N na mwanuokina ueau, bwa I aonga ni karekea te kimwareirei ae korakora aio.

16 Ma Aaron e taku nakoina: Ngkana ko tangira te bwai aei, Ngkana ko kukurei ni bobaraaki i matan te Atua, eng, ngkana ko rairananom man am bure ni kabane, ma ni bobaraaki i matan te Atua, ma ni wetea arana n te onimaki, ni kakoaua bwa ko na karekea, ao ngkanne ko na karekea te kantaninga are ko tangiria.

17 Ao e koro bukina bwa ngke e taekin taeka aikai Aaron, ao te uea e bobaraaki i matan te Uea, i aon bubuan waena; eng, ao e bon wene n tangaina i aontano, ao ma n tang ni kakorakora, ni kangai:

18 O Te Atua, e a tia Aaron n tuangai bwa iai te Atua; ao ngkana iai te Atua, ao ngkana ngkoe te Atua, ko kona ni kaotiko nakoiu, bwa I aonga n anganako au bure ni kabane bwa I aonga n ataiko, bwa I aonga ni kateirakeaki man te mate, ma ni kamaiuaki n te kabanea ni bong. Ao ngkai ngke e a tia te uea n taekin taeka akekei, ao e bon rotaki naba n aron ae aongkoa e mate.

19 Ao e koro bukina bwa ana toro a biri n tuanga te uea n aine bwaai ni kabane ake a tia n riki nakon te uea. Ao e roko nakon te uea; ao ngke e nooria bwa e wene n aron ae mate, ma Aaron are e tei ma tarina are a taraa n ae ngaia bukin bwakana, e bon un irouia, ao e tua bwa ana toro, ke ana toro te uea, a na anaia man tiringia.

20 Ngkai taian toro a bon noora bukin bwakan te uea, ngaia are a bon aki kan katokai baia iaon Aaron ma tarina; ao a bubutia te uea n aine ni kangai: E aera ngkai ko tua bwa ti na tiringia mwaane aikai, bwa nooria ti temanna mai i buakoia e bon korakora riki nakoira ni kabane? Ngaia are ti na bon bwaka i mataia.

21 Ngkai te uea n aine ngke e noora maakuia ana toro ao e a bon korakora naba maakuna, bwa mwiina iai te bwai ae buakaka ae e na bwakaraki iai. Ao e tuangiia ana toro bwa a na nako ni weteia aomata, bwa a na tiringa Aaron ma tarina.

22 Ngkai Aaron ngke e noora nanomatoan te uea n aine, e ataa naba matoatoan nanoia aomata, ao e maaku bwa mwiina a ikotaki te mwaiti n aomata ao e na riki te kauntaeka ae korakora ma te kakiriwe i marenaia; ngaia are e arora baina ma ni kateirakea te uea mai aontano, man taku nakoina: Teirake. Ao e tei iaon waena, ma ni karekea marurungina.

23 Ao aio are e a karaoaki i matan te uea n aine ma toro aika a mwaiti. Ao ngke a noora aio ao e bon korakora miimiia, ao a moanna ni maaku. Ao te uea e tei i mataia, man reirei nakoia. Ao e bon reirei nakoia, n te aro are kaain batana ni kabane a bon rairaki nakon te Uea.

24 Ngkai bon iai te mwaiti n aomata ake a ikotaki i mwin are e tua te uea n aine, ao e a moanaki te ngurengure ae bati i marenaia ibukin Aaron ma tarina.

25 Ma te uea e tei i buakoia man reirei nakoia. Ao a marau nanoia nakon Aaron ma ake a raonna.

26 Ao e koro bukina bwa te uea ngke e nooria bwa a rau nanoia ana aomata, ao e kariaia bwa Aaron ma tarina a na tei i buakon te mwaiti n aomata arei, ao bwa a na kabwarabwara n te taeka nakoia.

27 Ao e koro bukina bwa te uea e kanakoa te katanoata ni kabuta te aba, i buakoia ana botanaomata ake a mena i abana ni kabane, ake a mena n taabo ake a uakaan, are e iaontia nako taari, i mainiku ao i maiaki, are e kamaenakoaki man te aba are Taraemera n te mwakoro n rereua ae wariki, are e biri mai taari mainiku nakon taari maeao, ni katobibia tian mataniwin te bike, ao tian te rereua are e mena i meang i rarikin te aba are Taraemera, rinanon tian Maentaai, i rarikin oin te karanga are Tiran, ni biri mai mainiku nako maeao—ao ikanne are e maenako iai Reimwanaite ma Nibwaite.

28 Ngkai, Reimwanaite ake a korakora taningarotia a maeka n te rereua, ma ni mena n umwanrianna; ao a kabutaa nanon te rereua i maeaona, n te aba are Nibwaai; eng, ao i maeaon naba te aba are Taraemera, n te tia i rarikin mataniwin te bike, ao i maeao n te aba are Nibwaai, n te tabo are aia moan tabo ni bwaibwai aia bakatibu ao are e bon tia i mataniwin te bike.

29 Ao a bon mwaiti naba Reimwanaite i mainiku i rarikin mataniwin te bike, ike a kakioaki nako iai irouia Nibwaite. Ao ngaia are a kuri ni katobibiaki Nibwaite irouia Reimwanaite; ma e ngae n anne ao Nibwaite a bon bwaini aba ni kabane ake i meang ake a toki tiaia iai n te rereua, n oin te karanga are Tiran, mai mainiku nako maeao, ni kaitaraa rarikin te rereua; i meang, ni karokoa ae a roko n te aba are aranna bwa te Aba ni Mari.

30 Ao e toki tiana n te aba are arana te Aba ni Kamaroa, are e bon rang raroa nako meang n te aro are e roko n te aba are e a tia ni kainaki ao e a tia naba ni kamaunaki, are bon riia ake ti a tia n taekin, are a kuneaki irouia kaain Taraemera, bwa bon ngaia te moan tabo are a waerake iai.

31 Ao a roko mai ikekei nakon te rereua are i maiaki. Ngaia are te aba are e nako meang e aranaki bwa te Aba ni Kamaroa, ao te aba are nako maiaki e aranaki bwa te Aba ni Mari, kioina ngkai bon te rereua ae onrake n aekaia maan nako ake a kakang, ake tabeua mai i buakoia a roko mai meang ni kakaea kanaia.

32 Ao ngkai, bon ti te bongina ma teiterana maanin te Nibwaite ni mwananga, man tian te Aba ni Mari man te Aba ni Kamaroa, mai mainiku nako taari maeao; are ngaia are te aba are Nibwaai ao te aba are Taraemera a bon kuri n otabwaniniaki ni kabane n te ran, ao bon iai te tabo ae e kuri n otabwaniniaki n te ran i marenan te aba nako meang ao te aba nako maiaki.

33 Ao e koro bukina bwa Nibwaite a kaaina te aba are te Aba ni Mari, mai mainiku nako taari maeao, ao ngaia are Nibwaite ni wanawanaia, ma aia tautia ma taanga ni buaka, a kabaeiia Reimwanaite i maiaki, bwa aonga n aki manga taua meang, n te aro are a na taua te aba nako meang.

34 Ngaia are aikoa abaaba Reimwanaite i meang ma ti n te aba are Nibwaai, ao n te rereua ni katobibia. Ao aio ae a wanawana iai Nibwaite—kioina ngkai bon aia kairiribai Reimwanaite, ao a na aki karawawataki n iteraia nako, ao bwa e aonga naba n iai abaia are a na biri nako iai, n aron nanoia.

35 Ao ngkai ngai, i mwin taekinan aio, N na okira rongorongon Amon ao Aaron, Aomna, ao Imnaai, ao tariia.