1 Ia oqo na vosa i Amoni vei ira na nona itokani ka kaya kina: Oi kemuni na taciqu kei na noqu itokani, raica au sa kaya vei kemuni, ni sa kilikili me da marau; raica ena gauna eda a biuti Saraemala mai kina, ko cei e kila ni na vakalougatataki keda vakalevu vakaoqo na Kalou?

2 Ia oqo, me’u taroga mada, sa vakalougatataki keda vakalevu beka ena cava? Ko dou kila li?

3 Raica, au na sauma ena vukumuni; ena vukudra ko ira na wekada na Leimanaiti era sa tu sara ena butobuto io na butobuto loaloa sara; ia raica oqo era sa lewevuqa sara era sa raica na rarama e veivakurabuitaki ni Kalou! Ia oqo na veika eda sa vakalougatataki kina, me da liga ni cakacaka vua na Kalou me vakayacori kina na cakacaka levu oqo.

4 Raica era sa kune marau e udolu vakaudolu, ka ra sa vakacurumi ki na nona lomanibai na Kalou.

5 Raica sa matua vinaka tu na were, ka dou sa kalougata, ni dou sa curumaka na nomudou isele takelo ka tatamusuki ena nomudou igu, io, ni sa cakacaka vagumatua ena siga taucoko, ka raica sa vuqa na nomuni ivau sila! Ia era na bini vata yani ki na lololo, me kakua ni vakamaumautaki.

6 Io, era na sega ni vakabalei sobu mai na cava ena siga mai muri; io, era na sega tale ga ni cukiraki cake ena covulaca; ia ni sa liwa mai na cava era na vakasoqoni vata ena nodra vanua, ka na sega ni liwa basikati ira na cava; io, ena sega ni vakasavi ira na cagi kaukauwa se evei ga na vanua e nakita na meca me kauti ira kina.

7 Ia raica, era sa tu ena ligana na Turaga ni tatamusuki, ka ra sa nona; ia ena vakaturi ira cake ko koya ena siga mai muri.

8 Ia me vakalougatataki ga na yaca ni noda Kalou; me da ia vua na sere ni veivakacaucautaki, io, me da vakavinavinakataka na yacana tabu, ni sa dau caka dodonu me sega ni mudu ko koya.

9 Ni kevaka eda a sega ni biuta na vanua ko Saraemala ka lako mai ki ke, ke ra a se cudruvi keda tu ga, ko ira na wekada lomani oqo, ka ra sa mai lomani keda vakalevu sara, io, ke ra se vulagi tu ga vua na Kalou.

10 Ia sa yaco ni sa cavuta na vosa oqo ko Amoni, sa vunauci koya ko Eroni na tuakana ka kaya: Amoni, au taqayataka de sa vakavuna mo dokadoka na nomu marau.

11 Ia sa kaya vua ko Amoni: Au sega ni dokadokataka na noqu kaukauwa, se na noqu yalomatua; ia raica, sa vuabale na noqu marau, io, sa reki vakalevu na lomaqu, ia au na mamarau tiko ga vua na noqu Kalou.

12 Io, au kila ni’u sa ka wale ga; ka’u sa tamata malumalumu sara; o koya au na sega ni dokadokai au kina, au na dokadokataka ga na noqu Kalou, ni’u sa rawa ni kitaka na ka kecega ena nona kaukauwa; io, raica, eda sa vakayacora eke e vuqa na cakacaka mana, o koya me da vakacaucautaka tiko ga kina na yacana ka sega ni mudu.

13 Raica, era sa lewe vica vata na udolu na wekada sa vakaluluqataka ko koya mai na mosi kei eli; ka ra seretaka na veisereki loloma, ia sa vakavuna oqo na kaukauwa ni nona vosa sa tu vei keda, o koya e sa dodonu beka meda marautaka?

14 Io, sa kilikili vakaidina me da vakacaucautaki koya ka sega ni mudu, ni sai koya na Kalou sa Cecere Sara, ka sa sereki ira na wekada mai na sinucodo kei eli.

15 Io, era a wavoliti ena butobuto kei na rusa tawavakaiyalayala; ia raica sa kauti ira mai kea ko koya ki na nona rarama tawavakaiyalayala, io, ki na veivakabulai tawavakaiyalayala; sa ovici ira ena nona loloma sa sega ni vakatautauvatataki rawa; io, ka da sa iyaya ga ni cakacaka ena ligana me caka kina na cakacaka levu ka veivakurabuitaki oqo.

16 O koya, me da vakamolimoli, io, meda na vakamolimoli vua na Turaga; io, me da na reki, ni sa vuabale na noda marau; io me da vakacaucautaka na noda Kalou ka sega ni mudu. Raica, ko cei me na vakacaucautaka vakalevu cake na Turaga? Io, ko cei me na tukuna na levu ni nona kaukauwa, kei na nona loloma cecere, kei na nona vosoti ira vakadede na luve ni tamata? Raica, au sa kaya vei kemuni, au sega ni rawa ni tukuna na kena matailalai au sa vakila.

17 Ko cei e a bau rawa ni nanuma ni na rui yalololoma vakalevu sara vakaoqo na Kalou me dretaki keda laivi kina mai na ituvaki ni bula vakarerevaki, sinai ena ivalavala ca, ka dukadukali eda a tu kina?

18 Raica, eda a lako yani ena cudru, kei na veivakarerei levu meda vakarusa na nona lotu.

19 Ia, a cava a qai sega kina ni vakayacora vei keda ko koya na veivakarusai rerevaki, io, a cava a sega kina ni laiva ko koya na iseleiwau ni nona lewa dodonu me tau vei keda, ka meda yaluma kina ka kune rarawa tawamudu?

20 Isa, sa vaka me voleka sara ni dro na yaloqu, ena kena vakasamataki. Raica, sa sega ni vakayacora ko koya na nona lewa dodonu vei keda, ia ena levu ni nona loloma cecere sa kauti keda tani kina mai na ikeli tawavakaiyalayala ni mate kei na rarawa, io, ki na vakabulai ni yaloda.

21 Ia oqo raica, kemuni na wekaqu, a yalo ni tamata vakavuravura cava sa kila rawa na ka oqo? Au sa kaya vei kemuni, sa sega e dua sa kila na veika oqo, ko ira ga sa veivutuni.

22 Io, ko koya sa veivutuni ka kitaka ena vakabauta, ka vuataka mai na cakacaka vinaka, ka dau masu tiko ga ka sega ni mudu—vei ira oqo sa vakatakilai kina na veika vuni ni Kalou; io, vei ira oqo sa soli me ra vakatakila na veika sa bera ni vakaraitaki; io, ena qai soli vei ira oqo me ra kauta mai e udolu na yalo ki na veivutuni, me vaka sa lesi vei keda meda kauti ira mai na wekada oqo ki na veivutuni.

23 Oqo, dou sa nanuma li, na wekaqu, ni da sa kaya vei ira na wekada ena vanua ko Saraemala, me da lako cake ki na vanua ko Nifai, me da vunau vei ira na wekada, na Leimanaiti, ka ra qai dredrevaki keda ena veivakalialiai?

24 Era sa kaya vakaoqo vei keda: Ko ni nanuma li ni rawa mo ni kauti ira mai na Leimanaiti me ra kila na ivakavuvuli dina? Ko ni nanuma li ni rawa mo ni veisautaka na lomadra na Leimanaiti me baleta na cala ni nodra ivakarau na nodra qase, me vaka ni ra sa tamata domodomoqa; ka dau taleitaka na lomadra me ra vakadavea na dra; ka ra daucaka ca ena nodra veisiga kecega; era sa daukitaka na caka ca ka dau talaidredre mai na ivakatekivu? Oqo oi kemuni na wekaqu, ko ni sa kila ni sa vakaoqo na nodra vosa.

25 Ia era a kaya tale ga: Me da valuti ira, me da vakarusai ira kei na nodra caka ca mai na vanua oqo, kevaka e sega, era na rawai keda ka vakarusai keda sara.

26 Ia raica, oi kemuni na wekaqu lomani; eda a sega ni lako mai ki na lekutu meda mai vakarusai ira na wekada, ia ena inaki ga ni rawa me da na mai vakabula e lewe vica na yalo vei ira.

27 Oqo ni da sa yalolailai, ka via lesu tale, raica, sa vakacegui keda na Turaga, ka kaya: Ni lako vei ira na wekamuni, ko ira na Leimanaiti, ka mo ni vosota vakadede na veika rarawa ena yaco vei kemuni, ka’u na qai solia vei kemuni na qaqa.

28 Ia raica oqo, eda sa yaco mai ki ke, ka mai tiko voli ena kedra maliwa; eda a sa vosota na veika rarawa, kei na leqa ni veika me da bula kina; io, eda sa lako yani ena nodra veivale, ka vakararavi ki na yalololoma ni vuravura—sega walega ena yalololoma ni vuravura ia ena yalololoma talega ni Kalou.

29 Ia eda curuma na nodra veivale ka vakavulici ira, ka da vakavulici ira ena nodra veisala; io, ka vakavulici ira ena nodra veidelana; ka da curuma na nodra veivaletabu kei na nodra valenilotu ka vakavulici ira; raica eda sa vakasavi tani, ka vakalialiai, kasiviti, ka sabici na baluda; ka da lauviri ena vatu, ka tauri ka vesu ena dali kaukauwa, ka biu ki na vale ni veivesu; ia sa vakabulai keda tale na kaukauwa kei na yalomatua ni Kalou.

30 Ka da sotava na veimataqali veivakararawataki kecega, ia ena ka kece oqo, me da rawa ni idewadewa kina ni nodra vakabulai eso na yalo; ka ni da a nanuma ni na vuabale na noda marau kevaka e rawa me da idewadewa ni nodra vakabulai eso.

31 Raica oqo, eda sa raica tu na vua ni noda cakacaka; ia era a lewe lailai li? Au sa kaya vei kemuni, E segai, era sa lewe vuqa sara; io, eda sa rawa ni vakadinadinataka na nodra yalodina, ni ra sa lomani ira na wekadra ka lomani keda tale ga.

32 Ia raica, era sa bolea na mate ia me ra kakua ga ni vakamatei ira na kedra meca; era sa buluta na nodra iyaragi ni valu ena qara titobu, ni ra sa lomani ira sara na wekadra.

33 Ia raica oqo au sa kaya vei kemuni, sa dua li na loloma levu vakaoqo ena vanua taucoko? Raica, au sa kaya vei kemuni, E segai, e sega sara, e sega mada ga vei ira na Nifaiti.

34 Ia raica, era sa taura cake tale na iyaragi me valuti ira na wekadra; ka sega ni soli ira me ra vakamatei. Ia raica e lewe vica vei ira oqo era sa bolea me ra vakamatei; ia eda kila ni ra sa lako vua na nodra Kalou, ena vuku ni nodra loloma kei na nodra cata na ivalavala ca.

35 Oqo e sega li ni kilikili me da marau? Io, au sa kaya vei kemuni, sa sega na tamata, me tekivu mai na ivakatekivu kei vuravura e kilikili me marau vakalevu cake me vakataki keda; io, sa vuabale sara na noqu marau ka’u a dokadokataka kina na noqu Kalou; ni sa tu vua na kaukauwa kece, kei na yalomatua, kei na kila ka; ka sa kila na ka kecega, ka sa yalololoma sara ko koya, sa vakabulai ira kecega, sa veivutuni ka vakabauta na yacana.

36 Kevaka sa okati oqo me dokadoka, ia au na dokadoka; ni sai koya oqo na noqu bula kei na noqu rarama, na noqu reki kei na noqu vakabulai, kei na noqu sereki mai na rusa tawavakaiyalayala. Io, me vakalougatataki na yaca ni noqu Kalou, ka sa daunanumi ira na tamata oqo, ko ira na taba ni vunikau ni Isireli, ka a yali mai na vuna ki na dua na vanua tani; io, au kaya, me vakalougatataki ga na yaca ni noqu Kalou, ka daunanumi keda, ni da sa mai tu ena vanua tani oqo.

37 Oqo oi kemuni na wekaqu, eda sa kila ni sa nanumi ira na tamata kecega na Kalou, ena veivanua cava ga era tu kina; io, sa kilai ira kece na nona tamata, ka sa roboti vuravura taucoko na nona loloma cecere. Oqo na noqu reki, kei na noqu vakavinavinaka vakalevu; io, au na vakavinavinaka tiko ga vua na noqu Kalou ka sega ni mudu. Emeni.