1 Ao ngkanne e koro bukina bwa i mwin are ana aomata Amon a tekateka raoi n te aba are Ietion, ao e a kateaki te ekaretia naba n te aba are Ietion, ao aia taanga ni buaka Nibwaite a katobibia te aba are Ietion, eng, n tian nako te aba n taabo nako n te aba are Taraemera; nooria aia taanga ni buaka Reimwanaite a tia n iria tariia nako nanon te rereua.

2 Ao ngaia are e a bo te buaka ae korakora; eng, ae aekan ae tuai man nonoraki i buakoia aomata n te aba man te tai are Riaai e kitana iai Ierutarem; eng, ao tebwina te ngaa ma ngaa Reimwanaite ake a tiringaki man maenako n taabo ake a raroa.

3 Eng, ao bon iai naba te tiritiri ae korakora i buakoia ana aomata Nibwaai, ma e ngae n anne, ao Reimwanaite a bon kakioaki nako ma ni kamaenakoaki, ao ana botanaomata Nibwaai a okira abaia.

4 Ao ngkanne bon te tai aio are e a korakora iai te tangi ni wenei ma te bwaebwaeti are e kona n ongoraeaki ni kabuta te aba.

5 Eng, tangiia aine ake akea buuia, a tang ni wenei ibukiia buuia, ao kaaro a tang ni wenei ibukiia natia mwaane, ao te nati te aine ibukin mwanena, eng, mwanena ibukin te karo; ao ngaia are te tang ni wenei e a ongoraeaki i buakoia, ngke a tang ni wenei ibukiia aia koraki ake a tiringaki.

6 Ao ngkanne e bon koaua bwa aio bon te bong ni kananokawaki; eng, te tai ae e aki manikangareaki, te tai are e a mwaiti iai te aki mamatam ao te tataro.

7 Ao ikai are e a toki iai aia katebwi ma nimaua n tautaeka taan moti i aoia ana botanaomata Nibwaai;

8 Ao aio ana rongorongo Amon ma tarina, aron mwamwanangaia i nanon te aba are Nibwaai, kainnanoia n te aba, nanokawakia, ma karawawatakia, ma kimwareireia ae akea kabootauana, ao butimwaeaia ma kawakinaia tariia n te aba are Ietion. Ao ngkanne te Uea, are aia Tia Kabomwi aomata nako, a na kakabwaia tamneia n aki totoki.

9 Ao aio rongorongon taian buaka ma itabaraara i buakoia Nibwaite, ao taian buaka naba i marenaia Nibwaite ma Reimwanaite; ao e a toki aia katebwi ma nimaua n ririki n tautaeka taan moti.

10 Ao te moan ririki nakon te katebwi ma nimaua e karika mateia ngaa ma ngaa aomata; eng, e karika te aro ae aki tamaroa.

11 Ao rabwataia ngaa ma ngaa a kaweneaki i aan tano, ao rabwataia ngaa ma ngaa a wene ni mka ni bwarikoriko iaon tano; eng, ao ngaa ma ngaa ake a tang ni wenei ibukin buaia aia koraki, ao bon iai bukin tangiia, n aron ana berita te uea, bwa a na tiku n aroia n nanokawaki are aki totoki.

12 Ao ngke tabemwaang a tang ni wenei koaua ibukiia aia koraki ake a bua, a bon kimwareirei naba man onrake n te kantaninga, man ataia naba, n aron ana berita te Uea, bwa a na kateirakeaki ni mena i angatain te Atua, n te aro ni kakukurei ae aki totoki.

13 Ao ngaia are ti a noora korakoran kakaokoroia aomata ibukin te bure ma riaoan te tua, ma mwaakan te riaboro, are e reke man ana babaire ni kamwamwane are e a tia ni karaoia bwa e na kamwanea nanoia aomata.

14 Ao ikai are ti a noora te wewete nakoia aomata aika a nanomwaka bwa a na beku n ana o ni kurebe te Uea; ao ikai are ti a noora riain te nanokawaki ae korakora, ao te kimwareirei naba—te nanokawaki ibukin te mate ma te tiritiri i buakoia aomata, ao te kimwareirei ibukin ootan Kristo nakon te maiu.