1 Ngan ine nahitabo nga hira in nasingadto, ngan nagtikang hin pagpasamwak han mensahe han Diyos ngadto han mga tawo, ngan nasakob ha ira mga sinagoga, ngan ha ira mga panimalay; oo, ngan magin ha ira kakalsadahan ira iginpapasamwak an mga mensahe.

2 Ngan ine nahitabo nga kahuman han damo nga paghimakuri ha butnga nira, hira in nagtikang hin pagkamayada hin kamalinamposon didto ha butnga han grupo han mga kablas nga mga tawo; kay sigurado, hira in igintatabog paggawas han mga sinagoga tungod han dire kamag-upay hadton ira mga panapton —

3 Sanglit hira in waray tutugoti nga makasakob han mga sinagoga pagampo ha Diyos, ha paghuna-huna nga mahugaw; sanglit hira in kablas; oo, hira in gin huna-huna han ira kabugtoan nga mga maglamiri; sanglit hira in kablas hadton mga butang nga kalibutanon; ngan liwat hira in kablas ha abilidad.

4 Ngan yana, samtang nga hi Alma in nagtututdo ngan nagyayakan ngadto han mga tawo ha bawbaw han tayod ha Onidah, may umabot nga kadam-an nga hugpo ngadto ha iya, nga hira amo adton amon hindadabihan, nga mga kablas ha abilidad, tungod han ira kakablasan hadton mga butang han kalibutan.

5 Ngan hira in dumaop ngadto kan Alma; nga an usa nga naguuna ha ira an nagsiring ha iya: Pagsumat, ano in bubuhaton hine nga akon mga kabugtoan, kay hira in gintatamay han ngatanan nga tawo tungod han ira kakablasan, oo, ngan labi na ha ngatanan han amon mga saserdote; kay ira ginpagawas kami tikang han amon mga sinagoga nga amon gingul-an hin duro agud itukod ha amon kalugaringon mga kamot; ngan kami in ginpalayas nira tipagawas tungod han amon duro nga kakablasan; ngan kami in waray na lugar agud magampo han amon Diyos; ngan kitaa, ano an amon bubuhaton?

6 Ngan yana han pakabati ni Alma, iya ine gin paatubang ha iya, ngan an iya nawong deretso ngadto ha iya, ngan iya nakita an dako nga kalipay; kay iya nasabotan nga an ira kakurian in ungod nga nagpamainobsanon ha ira, ngan hira in nag-aandam panmati han mga mensahe.

7 Sanglit waray na hiya magyakan pa ha iba nga mga hugpo; kundi igin-unat niya an iya kamot, ngan nagguliat ngadto han iya nahikikit-an, nga tinuod nga nagbabasul, ngan hiya nagsiring ngadto ha ira:

8 Ako in nakapanhuna-huna nga kamo in mapainobsanon ha kaburut-on; ngan kun sugad, kamo in bulahan.

9 Kamatuoran an iyo bugto in nagsiring, Ano an amon bubuhaton? — kay kami in ginpalayas ha gawas han amon sinagoga, agud dire kami makakapagampo han amon Diyos.

10 Kamatuoran nasiring ako ha iyo, nakakasiring ba kamo nga dire kamo makakapagampo ha Diyos labot kun ine in ha iyo la mga sinagoga?

11 Ngan labot la hine, mapakiana ako, nakakasiring ba kamo nga dire kamo makakapagampo ha Diyos gud la makausa ha usa ka semana?

12 Nasiring ako ngadto ha iyo, maupay adto nga kamo in ginpalayas ha gawas han iyo mga sinagoga, agud kamo magin mapainobsanon, ngan kamo in mahibaro hin kinaadman; kay kinahanglan nga kamo in mahibaro hin kinaadman; kay amo ine an hinungdan nga kamo in ginpalayas, nga kamo in gintatamay han iyo mga kabugtoan tungod han iyo duro nga kakablasan, nga kamo in nadara ngadto ha usa nga ungod nga pagpaubos hin kaburut-on; kay kinahanglan nga kamo in madara agud magin mapainobsanon.

13 Ngan yana, tungod nga hi kamo in napiritan nga magin mapainobsanon kamo in bulahan; kay an tawo in danay, kun napipirit nga magin mapainobsanon, hiya in nag-uungara nga magbasul; ngan yana piho, nga an hin-o man nga magbabasul makakakarawat hin kaluoy; ngan hiya nga nakakakarawat hin kaluoy ngan nakakag-antos tubtub ha katapusan la gihapon hiya in matatalwas.

14 Ngan yana, sugad han iginsiring ko ngadto ha iyo, nga tungod kay kamo in napiritan nga magin mapainobsanon bulahan kamo, dire ba niyo nahuna-hunaan nga labaw pa hin kabulahan adton tinuod nga nagpapaubos ha ira kalugaringon tungod han mensahe?

15 Sugad man, hiya nga tinuod nga nagpapaubos han iya kalugaringon, ngan nagbabasul han iya mga sala, ngan nag-aantos ngada ha katapusan, gihapon hiya in bebendisyonan — sugad man, dako an bendisyon kontra hadton napiritan magin mapainobsanon tungod hadton ira duro hin kakablasan.

16 Sanglit, bulahan hira nga nagpapaubos nga dire kinahanglan nga piriton nga magpaubos; o ha iba nga mga pulong, bulahan hiya nga natuod han mensahe han Diyos, nga nabunyagan nga waray katig-ahan han kaburut-on, oo, ngan waray madara nga mahibaroan an mensahe, o dire ngani pinirit nga mahibaroan, san-o hira tomuod.

17 Oo, ngan damo an nagsisiring: Kun ikaw in magpapakita ngadto ha amon hin tigaman tikang ha langit, ha sugad mahibabaroan namon nga may kapihoan; kahuman kami in matuod.

18 Ngan yana mapakiana ako, amo ba ine an pagtuo? Tuod, nasiring ako ngadto ha iyo, Dire; kay kun mahibaroan han usa nga tawo in usa nga nahuna-huna hiya in waray hinungdan agud tomuod, kay maaram na hiya hito.

19 Ngan yana, hain an labaw nga susumpaon han Diyos an usa nga maaram ha kaburut-on han Diyos ngan dire nagbubuhat, o hiya nga natuod la, o may hinungdan la nga tomuod, ngan nahulog ngadto hin pagtalapas?

20 Ngan yana ha hine nga nahuna-huna kamo in angay maghukom. Kamatuoran, nasiring ako ngadto ha iyo, nga ine in ha usa nga butang sugad liwat ha kaluyo nga bahin; ngan ine nahitatabo ha kada tawo subay han iya binuhatan.

21 Ngan yana han akon ginyakan an mahitungod han pagtuo — an pagtuo in dire pagkamayada hin hingpit nga kaaram han mga butang; sanglit kun mayada ka pagtuo naglalaum ka han mga butang nga waray pa makita, kundi tinuod.

22 Ngan yana, pamati, nasiring ako ha iyo, ngan hingyap ko nga iyo hinumduman, nga an Diyos in maloloy-on ngadto han ngatanan nga natuod han iya ngaran; sanglit karuyag niya, ha una nga lugar, nga ikaw in tumuod, oo, ngan bisan han iya tugon.

23 Ngan yana, iginpapadangat niya an iya mga tugon pinaagi han iya mga anghel ngadto ha tawo, oo, ngan dire la ha mga lalaki kundi pati ha mga babaye liwat. Ngan yana dire la ine; an gudtiay nga mga kabataan in mayada mga tugon nga iginhatag ha ira ha ikadamo ka beses, nga diin nakakalupig hadton may kinaadman ngan kamagaraman.

24 Ngan yana, akon hinigugma nga kabugtoan, sugad han karuyag niyo mahibaroan ha akon kun ano an iyo bubuhaton kay kamo in inol-ulan ngan ginpalayas — yana dire ko karuyag nga iyo huna-huna-on nga karuyag ko nga hukman ko la kamo subay hadton kamatuoran —

25 Kay dire ko karuyag sidngon nga kamo ngatanan in napiritan hin pagpaubos ha iyo mga kalugaringon; kay ako in ungod nga natuod nga mayada pipira ha iyo nga magpapaubos han ira kalugaringon, ha ano man nga kamutangan nira.

26 Ngan yana, han akon ginyakan mahitungod han pagtuo — nga ine in dire pagkamayada hin hingpit nga kaaram — sugad man an akon mga tugon. Dire mo hibabaroan an ira kapihoan ha una, ngadto ha pagkahingpit, ano man nga labaw ha pagtuo amo an hingpit nga kaaram.

27 Kundi kitaa, kun kamo in magmamata ngan mapukaw adton iyo mga huna-huna, bisan ha usa nga pagproyba han akon mga tugon, ngan maggamit hin bisan guti nga pagtuo, oo, ngan bisan nga waray niyo labaw nga hingyap kundi tomuod, pabay-i nga ine nga hingyap in makabulig ha iyo, ngada nga kamo in tomuod ha paagi nga kamo in maghahatag hin lugar para han usa nga bahin han akon mga tugon.

28 Ngan yana, aton igtanding an mensahe ha usa nga liso. Yana, kun kamo in maghahatag hin lugar, nga an liso in mahitanom ha iyo kaburut-on, kamatuoran, kun ito in tinuod nga liso, o usa nga maupay nga liso, kun dire niyo ine iglalabog pinaagi han iyo kawaray hin pagtuo, ngan iyo pupugngan an Espiritu han Ginoo, tinuod, ine in magtitikang hin pagtubo ha sakob han iyo dughan; ngan kun iyo abaton ine nga pagtubo, magtitikang kamo pagsiring ha iyo kalugaringon — Kaangayan nga ine in maupay nga liso, o ine nga mensahe in maupay, kay gintitikangan pagpadako an akon kalag; oo, ngan gintitikangan ngan magmalamrag an akon panhuna-huna, oo, ngan ine in nagtitikang nga magin marasa para ha akon.

29 Ngan yana kamatuoran, dire ba ine in makakagpadugang han iyo pagtuo? Nasiring ako ngadto ha iyo, Oo; sugad man ine in waray dumako ngadto ha hingpit nga kaaram.

30 Kundi kamatuoran, samtang an liso in natubo, ngan nananaringsing, ngan natikang pagtubo, kun masugad sisidngon niyo nga an liso in maupay; kay tanawa ine in natubo, ngan nanaringsing, ngan nagtikang pagtubo. Ngan yana, pagsumat, ine ba in dire magpapakusog han iyo pagtuo? Oo, ine magpapakusog han iyo pagtuo: kay kamo masiring maaram ako nga maupay ine nga liso; kay tan-awa nanaringsing ngan nagtitikang hin pagtubo.

31 Ngan yana, pagsumat, piho ka ba nga ine nga liso in maupay? Nasiring ako ngadto ha iyo, Oo; kay an kada liso in nagbubunga hin kapareho.

32 Sanglit, kun an liso in tumubo ine in maupay, kundi kun dire tumubo, kamatuoran ine in dire maupay, sanglit ine in ilalabog.

33 Ngan yana, tuod, tungod kay gintalingoha mo an pagproyba, ngan igintanom an liso, ngan ine in dumako ngan nanaringsing, ngan nagtikang hin pagturok, kinahanglan nga mahibaroan niyo nga an liso in maupay.

34 Ngan yana, pagsumat, an iyo ba hibaro in hingpit? Oo, an iyo hibaro in hingpit hadto nga nahuna-huna, ngan an iyo pagtuo waray umusbong; ngan ine in tungod kay iyo nahibaroan, kay maaram kamo nga an mga mensahe in nagpadako han iyo mga kalag, ngan maaram liwat kamo nga ine nanaringsing tipaigbaw, ngan an iyo pagsabot in nagtikang paglamrag, ngan an iyo panhuna-huna in nagtikang hin paghaluag.

35 O ngan yana, dire ba ine ungod? Nasiring ako ha iyo, Oo, kay ine in maupay; ngan ano man nga maupay, in matadong, tungod kay ine in nahisasabotan, sanglit kinahanglan niyo nga mahibaroan nga ine in maupay; ngan yana pagsumat, kahuman niyo matilawi ine nga kamaupay an iyo ba hibaro in hingpit?

36 Tuod nasiring ako ha iyo, Dire; dire niyo angay igsalikway an iyo pagtuo, kay kamo in naghimo han iyo pagtuo nga itanom an liso nga iyo proybahan agud niyo hibaroan kun an liso in maupay.

37 Ngan tuod, samtang an puno han kahoy in nagtitikadako, iyo sisidngon: Aton aatamanon hin maupay, nga magkamayada hin gamot, ngan tumubo, ngan magdara hin bunga ha aton. Ngan yana kitaa, kun iyo atamanon hin maupay ine in manggagamot, ngan matubo, ngan mamumunga.

38 Kundi kun iyo pababay-an an puno, ngan dire pag-isipon an pag-ataman hine, tuod adto in dire magkakamayada hin ano man nga gamot; ngan kun umabot an kapaso han adlaw ngan mauga, tungod kay waray gamot ine in malalaya, ngan gagabuton ngan ilalabog ha gawas.

39 Ngan yana, ine in dire tungod kay an liso in dire maupay, ngan dire liwat tungod kay an bunga hito in dire makaruruyag; kundi ine in tungod kay an iyo tuna in waray pulos, ngan waray niyo pag-atamana an puno, sanglit dire kamo magkakamayada hin bunga hadto.

40 Ngan kun masugad, kun dire niyo pag-atamanon an mensahe, nga may pagsiplat tikang ha mata han pagtuo ngadto han bunga hadto, dire kamo makakagburo han bunga han kahoy han kinabuhi.

41 Kundi kun iyo pag-atamanon an mensahe, oo, atamanon an puno samtang nga nagtitikang pa la pagtubo, pinaagi han iyo pagtuo nga may kamadoroto, ngan pag-antos, ngan mamumulat ngadto han bunga hadto, ine in magamot; ngan kamatuoran ine in magigin puno hin kahoy nga matubo ngadto ha waray katapusan nga kinabuhi.

42 Ngan tungod han iyo kamadoroto ngan iyo pagtuo ngan iyo pag-antos han pag-ataman han mensahe, ine in magamot ha iyo kalugaringon, kamatuoran, dire mag-iiha kamo in makakagburo han bunga hito, nga pinaka makaruruyag, nga matam-is labaw pa han pinakamatam-is, ngan mabusag labaw pa han ngatanan nga mabusag, Oo, maputli labaw pa han ngatanan nga putli; ngan magpiyesta hine nga bunga ngada hit iyo kabusog, nga dire magugutom, ngan dire mauuhaw.

43 Kun masugad, akon mga kabugtoan, kamo in mag-aani han balos han iyo pagtuo, ngan han iyo kamadoroto, ngan pag-antos, ngan halaba nga kakurian, naghuhulat han puno nga magdara han bunga ngada ha iyo.