An Libro Ni Alma
The Son Of Alma

1 Ngan yana ine nahitabo nga hi Alma nagtikang pagpadangat han tugon han Diyos ngadto ha mga tawo, una ha katunaan han Zarahemla, ngan tikang didto nasingadto ha ngatanan nga dapit han katunaan.

2 Ngan ine an mga tugon nga iya ginsumat ha mga tawo ha simbahan nga gintindog ha siyudad han Zarahemla, subay han iya kalugaringon nga mga sinurat, nga nasiring:

3 Ako, hi Alma, kahuman pilion han akon amay, nga hi Alma, agud magin usa nga hitaas nga saserdote han simbahan han Diyos hiya nga nagkakapot han gahum ngan awtoridad nga tikang han Diyos agud himoon ine nga mga hitabo, ungod, nasiring ako ha iyo nga hiya nga nagtikang pagtindog han simbahan ha katunaan nga aada ha mga pag-ultan han Nephi; ngan liwat, an katunaan nga gintatawag nga katunaan ni Mormon; oo, ngan ginbunyagan niya an iya mga kabugtoan ha katubigan han Mormon.

4 Ngan ungod, nasiring ako ha iyo, nga hira in naitalwas gawas ha mga pagtimangno han mga tawo ni hadi Noah, pinaagi han kaluoy ngan gahum han Diyos.

5 Ngan kamatuoran, pagkahuman hadto ngatanan, hira in gindara ha pagbariga han mga kamot han mga Lamanite ha kamingawan; oo, ngan nasiring ako ha iyo, hira in aada ha pagkabariga, ngan liwat hira in gintalwas han Ginoo ha ira pagbariga pinaagi han gahum han iya mando; ngan kami in gindara dinhe hine nga katunaan, ngan dinhe gintikangan namon an pagtindog han simbahan han Diyos ha ngatanan liwat nga dapit hine nga katunaan.

6 Ngan yana dayon ungod, nga nasiring ako ha iyo, akon kabugtoan nga mga lalaki, kamo nga kaapi han simbahan, nagpabilin ba niyo hin husto ha iyo mga panumduman an pagkauripon han iyo mga kaapoy-apoyan? Oo, ngan napabilin ba niyo hin igo ha iyo panumduman an iya kaluoy ngan hilaba nga pag-antos para ha ira? Ngan labot hadto, mapabilin ba niyo hin igo ha iyo panumduman nga iya gintalwas an ira mga kalag tikang ha empiyerno?

7 Sigurado, iya gin bag-o an ira mga abilidad; oo, ngan hira in iya ginpukaw ha mamook nga paghingaturog, ngan hira in nahimangno ha Diyos. Sigurado, hira in nakada ha butnga han kasisidman; sugad man, an ira mga kalag in nalamragan pinaagi hin suga han waray katapusan nga mensahe; oo, ngan hira in napalibotan han gapos han kamatayon, ngan han kadena han empiyerno, ngan an waray katapusan nga espirituhanon nga kawara in naghuhulat ha ira.

8 Ngan yana ginpapakianhan ko kamo, mga kabugtoan ko, hira ba in napuo? Kamatuoran, nasiring ako ha iyo, Waray, hira kapuo.

9 Ngan liwat akon ginpapakiana, an mga gapos han kamatayon in nautod, ngan an mga kadena han empiyerno nga nakapalibot ha ira, ine ba in nahubad? Nasiring ako ha iyo, Oo, ine in nahubad, ngan an ira mga kalag in dumako, ngan hira in nagkanta hin pagtubos han paghigugma. Ngan nasiring ako ha iyo hira in natalwas.

10 Ngan yana nagpapakiana ako ha iyo kun ha ano nga mga kondisyon nga hira in nagkatatalwas? Oo, ngan ano an ira basihan agud maglaum hin katalwasan? Ano an hinungdan han ira pakahubad tikang ha mga gapos han kamatayon, oo, ngan sugad man han kadena han empiyerno?

11 Kamatuoran, isisiring ko ha iyo — dire ba an akon amay nga hi Alma in tumuod han mga tugon nga iginpasamwak nga nagtikang han baba ni Abinadi? Ngan dire ba hiya in usa nga baraan nga propeta? Dire ba hiya in nagyakan han mga tugon han Diyos, ngan an akon amay nga hi Alma in tumuod ha iya?

12 Ngan subay ha iya pagtuo, usa nga dako nga pag bag-o an nahinabo han iya abilidad. Kamatuoran, nasiring ako ha iyo nga ine ngatanan in tinuod.

13 Ngan kamatuoran, iginwali niya an mensahe ha iyo mga kaapoy-apoyan, ngan usa liwat nga dako nga pagbag-o an nahitabo ha ira mga kaburut-on, ngan hira in nagpaubos ngan iginhatag an ira pagtapod ha tinuod ngan buhi nga Diyos. Ngan sigurado, hira in nagin tangkod tubtub ha katapusan; sanglit hira in natalwas.

14 Ngan yana pagsumat, nagpapakiana ako ha iyo, akon mga kabugtoan ha simbahan, kamo ba in espirituwal nga igin-anak ha Diyos? Iyo ba ginkarawat an iya ladawan ha iyo mga bayhon? lyo ba gin-agian ine nga dako nga pagbag-o han iyo mga kaburut-on?

15 Ginagamit ba niyo an iyo pagtuo ha pagkatalwas niya nga naghimo ha iyo? Kamo ba in naglalaum ngan mayada pananaw hin pagtuo, ngan huna-hunaon ine nga mga mortal nga lawas nga ginbangon ha kawaray kamatayon, ngan ine nga may pagkadunot iginbangon ha waray pagkadunot, agud tumindog ha atubangan han Diyos para hukman subay han mga buhat nga ira nahimo ha mortal nga lawas?

16 Nasiring ako ha iyo, nahuna-hunaan ba niyo ha iyo mga kalugaringon nga nabati niyo an tingog han Ginoo, ngan nagsisiring ha iyo, ha nga urhi nga adlaw: Daop kamo ha akon nga akon mga pinili, kay kamatuoran, an iyo buhat amo an mga buhat han kamatadong dinhe ha bawbaw han tuna?

17 O naghuna-huna ba kamo ha iyo mga kalugaringon nga kamo in makakagbuwa ngadto ha Ginoo ha urhi nga adlaw, ngan masiring — Ginoo, an amon mga buhat in nagin matadong nga mga buhat dinhe ha bawbaw ha tuna — ngan hiya magtatalwas ha iyo?

18 0 kundi man, nahuna-huna ba niyo an iyo mga kalugaringon nga gindara ha atubangan han hukmanan han Diyos ngan an iyo mga kalag in puno hin pagbasul ngan kabido, nga mayada paghinumdum han ngatanan nga iyo sala, oo, ngan usa nga hingpit nga paghinumdum han ngatanan nga iyo mga karaotan, oo, ngan usa nga paghinumdum nga iyo iginbali waray an mga kasugoanan han Diyos?

19 Nasiring ako ha iyo, kamo ba in makakahangad ha Diyos hadto nga urhi nga adlaw nga waray sala nga kaburut-on ngan malimpiyo nga mga kamot? Nasiring ako ha iyo, kamo ba in makakahangad, nga mayada ladawan han Diyos nga nakasilsil ha iyo mga hulagway?

20 Nasiring ako ha iyo, kamo ba in naghuhuna-huna nga matatalwas kun ginhatag na niyo an iyo mga kalugaringon nga nagin mga sakop han yawa?

21 Nasiring ako ha iyo, mahibabaroan niyo hadto nga urhi nga adlaw nga kamo in dire matatalwas; kay waray hin-o man nga tawo in matatalwas labot la nga an iya mga panapton in mahugasan ngan nagin mabusag; oo, ngan an iya mga panapton in kinahanglan nga malimpiyohan tubtub nga ine in makuhaan han ngatanan nga mga dum-it, pinaaagi han dugo niya nga amo an ginsisiring han aton mga kaapoy-apoyan, nga maabot agud tuboson an iya mga tawo han ira mga sala.

22 Ngan yana nagpapakiana ako ha iyo, akon mga kabugtoan, ano an iyo aabaton, kun hi kamo in matukdaw ha atubangan han hukmanan han Diyos, nga an iyo mga panapton in nadum-itan hin dugo ngan han ngatanan nga klase hin hugaw? Kamatuoran, ano an ginpapamatuoran hine nga mga butang kontra ha iyo?

23 Tinuod dire ba mapapamatud-an hine nga kamo in mamaratay hin tawo, oo, ngan kamo liwat in nakasala hin ngatanan nga klase hin karaotan?

24 Pamati, akon mga kabugtoan, naghuhuna-huna ba kamo nga an usa nga sugad in magkakamayada hin lugar nga lumingkod ha ginhadian han Diyos, kaupod ni Abraham, kaupod ni Isaac, ngan kaupod ni Jakob, ngan sugad man an ngatanan nga mga baraan nga mga propeta, nga an mga panapton in waray dum-it, ngan waray hugaw, uray, ngan mabusag?

25 Nasiring ako ha iyo, Dire; labot la kun himoon niyo an aton Maghirimo nga usa nga buwaon tikang ha tinikangan, o maghuna-huna nga hiya in buwaon tikang ha tinikangan, dire niyo mahuhuna-huna nga an sugad hine magkakamayada hin lugar ha ginhadian han langit; kundi hira in ilalabog ha gawas kay hira in mga anak han ginhadian han yawa.

26 Ngan yana kamatuoran, nasiring ako ha iyo, akon mga kabugtoan, kun iyo gin-agian an pagbag-o han kaburut-on, ngan kun iyo inabat an pagkanta han kanta han pagtubos ha paghigugma, nagpapakiana ako, inaabat ba niyo an sugad hine yana?

27 Kamo ba in naglalakat, nga ginhihirotan an iyo mga kalugaringon nga mawaray sayop ha atubangan han Diyos? Makakasiring ba kamo, kun kamo in tawagon nga mamatay yana nga takna, ha iyo mga kalugaringon nga kamo in igo nga nagmapainobsanon? Ngan an iyo mga panapton in malimpiyohan ngan nagin mabusag pinaagi han dugo ni Cristo, nga maabot agud tuboson an iya mga tawo ha ira mga sala?

28 Pamati, nakuha na ba ha iyo an kamapalabi-labihon? Nasiring ako ha iyo, kun waray pa kamo in dire andam umatubang han Diyos. Kamatuoran kamo in kinahanglan nga mag-andam hin dagmit; kay an ginhadian han langit in harani na, ngan an usa nga sugad hine in waray kinabuhi nga waray katapusan.

29 Pamati, nasiring ako ha iyo, mayada ba usa ha iyo nga dire pa nakuhaan hin kaawa? Nasiring ako nga an sugad hine in dire pa andam; ngan hingyap ko nga hiya in dagmit nga mag-andam, kay an oras in harani na, ngan dire nahibabaroan kun sano maabot an takna; kay an usa nga sugad hine in dire mabibilngan nga waray sala.

30 Ngan liwat nasiring ako ha iyo, mayada ba bisan usa ha iyo nga nagbubuhat hin pagtamay han iya bugto, o iginkakada ha iya an mga pagtimaraot?

31 Kairo an sugad hine, kay dire pa hiya nakaandam, ngan an takna in tikaharani na nga kinahanglan hiya magbasul o hiya in dire matatalwas!

32 Oo, ngan kairo han ngatanan nga nagbubuhat hin karaotan; magbasul, magbasul, kay an Ginoo nga Diyos an nagyakan hine!

33 Kamatuoran, hiya in nagpadara hin imbitasyon han ngatanan nga tawo, kay an mga butkon han pagkaluoy in iginbubuklad ha ira, ngan hiya nagsiring: Magbasul, ngan akon kamo kakarawaton.

34 Oo, ngan hiya nagsiring: Dumaop kamo ha akon ngan kamo in makakaon han bunga han kahoy han kinabuhi; oo, ngan kamo in libre nga makakakaon ngan mainom han tinapay ngan han mga tubig han kinabuhi hin waray bayad;

35 Oo, ngan paharani kamo ha akon ngan dad-a niyo an mga binuhatan nga magtadong, ngan dire kamo uutdon ngan ilalabog ha kalayo —

36 Kay kamatuoran, an takna in harani na ngan hin-o nga dire magdara hin maupay nga bunga, o hin-o man nga dire magbubuhat hin mga magtadong, hiya liwat in mayada hinungdan hin pagtangis ngan pagmabidoon.

37 O kamo nga nagbubuhat hin karaotan; kamo nga nagpasikat han waray pulos nga mga butang han kalibutan, kamo nga napakamaaram nga nahibabaro han mga paagi han katadungan bisan pa man in nagkawara, nga sugad han karnero nga waray magbarantay, nga bisan pa man an magbarantay in nagtawag ha iyo nga nagtatawag pa gud ha iyo, kundi nadire kamo panmati han iya tingog!

38 Ungod, nagsisiring ako ha iyo, ngan an maupay nga magbarantay in nagtatawag ha iyo; oo, ngan ha iya kalugaringon nga ngaran kamo in iya gintatawag, amo an ngaran ni Cristo; nga kun dire kamo manmati han tingog han maupay nga magbarantay, han ngaran nga igintatawag ha iyo, tuod, kamo in dire karnero han maupay nga magbarantay.

39 Ngan yana kun kamo in dire karnero han maupay nga magbarantay, hain nga karnero kamo nahiaapi? Tinuod; nasiring ako ha iyo, nga an yawa an iyo magbarantay, ngan kamo an iya karnero; ngan yana, hin-o an makakaglirong hine? Ungod, nasiring ako ha iyo, an hin-o man nga nagdidiwara hine in usa nga buwaon ngan anak hin yawa.

40 Kay nasiring ako ha iyo nga an ngatanan nga maupay in tikang ha Diyos, ngan ano man nga maraot in tikang ha yawa.

41 Sanglit, kun an usa nga tawo in nagdadara han maupay nga buhat hiya in nanmati han tingog han maupay nga magbarantay, ngan hira in masunod ha iya; kundi an hin-o man nga nagdadara hin maraot nga mga binuhatan, hiya in masusugad nga anak hin yawa, kay hiya in nanmati han iya tingog, ngan hiya in masunod ha iya.

42 Ngan hin-o man nga nagbubuhat hine in kinahanglan kumarawat han iya suhol tungod hito; sanglit, para han iya suhol hiya in makarawat hin kamatayon, para han mga nahuna-huna han magtadong, nga sugad hin patay ha ngatanan nga maupay nga binuhatan.

43 Ngan yana, akon mga kabugtoan, karuyag ko nga pamatian niyo ako, kay ako in nagyayakan ha kusog han akon kalag; kay kamatuoran, ako in naghihimangraw ha iyo hin malinaw agud kamo in dire magsayop, o naghihimangraw ako subay han mga kasugoanan han Diyos.

44 Kay ako in gintawag agud maghimangraw ha sugad hine nga paagi, subay han baraan nga katuhayan han Diyos, nga aada kan Cristo Jesus; oo, ngan ako in ginsugo nga tumukdaw ngan magpamatuod hine nga mga tawo han mga nahun-huna nga ginyakan han aton mga kaapoy-apoyan hiunong han mga nahuna-huna nga tiarabot.

45 Ngan dire la ine an ngatanan. Waray ba kamo maghuna-huna nga ha akon kalugaringon maaram ako hine nga mga nahuna-huna? Ungod, ako in nagpapamatuod ha iyo nga maaram ako nga an mga nahuna-huna nga akon ginyakan in tinuod. Ngan tipaonan-o ha iyo panhuna-huna nga nakahibaro ako han ira kasiguradohan?

46 Ungod, nasiring ako ha iyo nga adto in iginpahibaro ha akon pinaagi han Baraan nga Espiritu han Diyos. Tinuod, ako in nagpuasa ngan nagampo hin damo nga mga adlaw agud akon mahibaroan ine nga mga nahuna-huna ha akon kalugaringon. Ngan yana maaram ako ha akon kalugaringon nga ine in mga tinuod; kay an Ginoo nga Diyos in nagpakita hine ha akon pinaagi han iya Baraan nga Espiritu; ngan ine an espiritu han pagpadayag nga aadi ha akon.

47 Ngan labot hine, nasiring ako ha iyo nga han sugad hine ginpadayag ha akon, nga an mga tugon nga iginyakan ha aton han aton mga kaapoy-apoyan in tinuod, bisan an subay ha espiritu han panagna nga aadi ha akon, nga amo liwat an iginpakita han Espiritu han Diyos.

48 Nasiring ako ha iyo, nga maaram ako ha akon kalugaringon nga ano man nga akon isisiring ha iyo, hiunong hadton tiarabot, in tinuod; ngan ginsisiring ko ha iyo, nga maaram ako nga hi Jesucristo in maabot, oo, ngan liwat an Anak, an Bugtong nga Anak han Amay, nga pnno hin grasya, ngan kaluoy, ngan kamatuoran. Ngan kamatuoran, hiya ine nga maabot agud kuhaon an mga sala han kalibutan, ngan liwat, an mga sala han kada tawo nga mahugot nga natuod han iya ngaran.

49 Ngan ginsisiring ko ha iyo nga ine an katuhayan kun kay ano nga ako in gintawag, oo, agud, magwali ha hinigugma ko nga mga kabugtoan nga mga lalaki, oo, ngan kada tagsa nga naukoy dinhe ha katunaan; oo, agud magwali ha ngatanan, bisan ha tigurang ngan bata, bisan an bariga o libre; oo, ginsisiring ko ha iyo nga may edad, ngan sugad man han aada ha kabutnga-an han edad, ngan ha mga nagtutubo nga henerasyon; Oo, agud ig-proproklamar ha ira nga hira in magbasul ngan ipanganak hin otro.

50 Oo, ngan sugad han iginyakan han Espiritu: Magbasul, kamo ngatanan nga aada ha katubtuban han kalibutan, kay an ginhadian han langit in harani na; oo, ngan an Anak han Diyos in maabot ha iya kahimayaan, ha iya kamakusog, kadarayawon, kagamhanan, ngan pagdumara. Oo, ngan hinigugma ko nga mga kabugtoan, ginsisiring ko ha iyo, nga an Espiritu in nagsiring nga: Kamatuoran an kahimayaan han Hadi ha ngatanan nga katunaan; nga liwat an Hadi han langit ha madaliay nga panahon in masiga ha ngatanan nga anak han katawhan.

51 Ngan nagsiring liwat an Espiritu ha akon, sugad man, gumoliat ha akon nga may dako nga tingog, nga nasiring: Pasingadto ngan magsiring hine nga mga tawo — Magbasul, kay kun labot la nga kamo in magbasul dire kamo ha anoman nga paagi makakapanonod han ginhadian han langit.

52 Ngan liwat nasiring ako ha iyo, an Espiritu in nagsiring: Kamatuoran, an parakol in nahimumutang ha gamot han puno; sanglit an kada puno nga dire magdadara hin maupay nga bunga in pupudlon ngan ilalabog ha kalayo, sugad man, an kalayo nga dire mapaparong, usa nga dire mapaparong nga kalayo. Pamati, ngan hinumdumi, an Usa nga Baraan an nagyakan hine.

53 Ngan yana hinigugma ko nga kabugtoan, nasiring ako ha iyo, maiilob ba niyo ine nga klase hin mga pulong; oo, ipapaligid la ba niyo an sugad hine nga mga nahuna-huna, ngan tamakan an Usa nga Baraan han iyo mga tiil; oo, ngan kamo ba in mapamahitas-on nga may pagkalabi-labihon han iyo mga kaburut-on; oo, kamo ba in nagpipirit liwat hin pagsul-ot hin mga marahalon nga mga panapton ngan igpapahamutang an iyo mga kasingkasing ha waray pulos nga mga butang han kalibutan, ha iyo mga karikohan?

54 Oo, ngan kamo ba in magpipirit nga maghuna-huna nga kamo in makakalabaw han iba; oo, ngan kamo in magpipirit nga igtimaraot an iyo mga kabugtoan, nga nagpaubos han ira mga kalugaringon ngan lumakat subay han baraan nga katuhayan han Diyos, diin hira in nadara hine nga simbahan, nga ginpabaraan han Baraan nga Espiritu, ngan hira in nagdadara han mga buhat nga kinahanglan pagbasulan —

55 Oo, ngan kamo ba in magpipirit pagtalikod ha mga kablas, ngan an mga nanginginahanglan, ngan ha paghalot han iyo mga katigayonan ha ira?

56 Ngan ha pangatapusan, kamo ngatanan nga nagpipirit han iyo karaotan, nasiring ako ha iyo nga hira adton pupudlon ngan ilalabog ha kalayo labot la kun hira in madagmit nga magbasul.

57 Ngan yana nasiring ako ha iyo, kamo ngatanan nga naghihingyap nga sumunod han tingog han maupay nga magbarantay, gawas kamo tikang ha karaotan, bulag ngan ayaw paghuram han ira mahugaw nga mga butang; ngan sigurado, an ira mga ngaran in paparaon, agud an ngaran han mga maraot in dire maapi ha mga ngaran han magtadong, agud an mga mando han Diyos in matuman, nga nagsisiring: An mga ngaran han magraot in dire angay mahitimpo han mga ngaran han akon mga tawo;

58 Kay an mga ngaran han mga magtadong in nahisusurat ha libro han kinabuhi, ngan ha ira ihahatag ko an usa nga sorondon ha akon too nga kamot. Ngan yana, akon mga kabugtoan, ano an maisisiring niyo kontra hine? Nasiring ako ha iyo, kun kamo in nagyayakan kontra hine, ine in waray bali, kay an mando han Diyos in kinahanglan nga matuman.

59 Kay hin-o nga magbarantay an aada ha butnga niyo nga mayada damo nga karnero kun dire magbabantay ha ira, agud an mga mabangis nga hayop in dire makasulod ngan kaonon an iya mga karnero? Ngan tuod, kun an mabangis nga hayop in sumulod ha iya panon han karnero dire ba niya ine tatabogon tipagawas? Oo, nga ha urhi, kun iya mahihimo, iya papatayon.

60 Ngan yana nasiring ako ha iyo nga an maupay nga magbarantay in nagtatawag ha iyo; ngan kun kamo in manmamati ha iya tingog kamo in dadad-on niya ha iya panon, ngan kamo iya mga karnero; ngan kamo in iya ginsusugo nga iyo paghirotan nga waray gutom ngan mabangis nga hayop nga makasulod ha butnga niyo, agud kamo in dire mawaray pulos.

61 Ngan yana ako, hi Alma, in nagsugo ha iyo ha yinaknan niya nga nagsugo ha akon, nga iyo sundon an mga mando nga akon ginsisiring ha iyo.

62 Ako in maghihimangraw pinaagi han pagsugo ha iyo nga mga kaapi han simbahan; ngan adton dire kaapi han simbahan ako in nagyayakan pinaagi hin imbitasyon, nga nagsisiring: Kadi kamo ngan magpabunyag ngan magbasul agud kamo liwat in magin kasaro ha bunga han puno han kahoy han kinabuhi.