1 Ao ngkanne i mwin are Aramwa e a tia n taekin taeka aikai, ao a waaki nakoina ni kan ataia bwa a riai ni kakoaua te Atua ae ti temanna, bwa aonga ni karekea te uaanikai are e a tia n taekinna, ke a na kanga n unika te koraa, ke te taeka are e a tia n taekinna, are e taku bwa e na riai n unikaki inanoia; ke n te aro raa are a riai ni kamwakura aia onimaki.

2 Ao Aramwa e taku nakoia: Nooria, kam a tia n taku bwa kam aki kona n taromauria Atuami ibukina bwa kam teweaki nako mai nanon ami auti n nebo. Ma nooria, I taku nakoimi, ngkana kam kataua bwa kam aki kona n taromauria te Atua, e bon korakora ami kairua, ao kam riai n ukoukori koroboki aika tabu; ngkana kam kataua bwa a reireingkami aio, kam bon aki ota iai.

3 Kam uringnga bwa kam a tia ni wareka te bwai are e koroia Tinoti, are te burabeti ni kawai, ibukin te tataro ke te taromauri?

4 Bwa e taku: Ko bon nanoanga, O te Atua, bwa ko a tia n ongo au tataro, e ngae ngke I mena i nanon te rereua; eng, ko bon nanoanga ngke I tataro ni kaineti ma au kairiribai, ao ko rairiia nakoiu.

5 Eng, O te Atua, ao ko bon nanoangaai ngke I tang nakoim mai nanon au marae n aroka; ngke I tang nakoim n au tataro, ao ko bon ongo irou.

6 Ao riki, O te Atua, ngke I rairaki nakon mwengau ko bon ongo naba irou n au tataro.

7 Ao ngke I rairaki nakon au ruu ni bwai, O te Uea, man tataro nakoim, ko bon ongo naba irou.

8 Eng, ko bon nanoanga nakoia natim ngkana a tang nakoim, bwa a kan ongoraeaki mai iroum ma tiaki irouia aomata, ao ko na bon ongo irouia.

9 Eng, O te Atua, ko a bon tia n nanoanga nakoiu, man ongo tangiu i buakoia am botanaomata ngke a botaki.

10 Eng, ao ko a bon tia naba n ongo irou ngke I a tia n teweaki nako man ribaki irouia au kairiribai; eng, ko bon ongo tangiu, ma n un irouia au kairiribai, ao ko bon kawariia n unim ma ni waekoa n tiringiia.

11 Ao ko bon ongo irou ibukin karawawatakiu ma nanou ae koaua; ao bon ibukin Natim are ko bon nanoangaai iai, ngaia are N na tang nakoim ibukin karawawatakiu ni kabane, bwa e mena kimwareireiu iroum; bwa ko a tia ni kanakoi ami motikitaeka ma irou, ibukin Natim.

12 Ao ngkanne Aramwa e taku nakoia: Kam kakoauai koroboki aika tabu ake a bon koreaki irouiia ake ni kawai?

13 Nooria, ngkana kam kakoauai, kam na riai ni kakoaua are e taku Tinoti: bwa, nooria e taku, Ko a tia ni kanakoa am motikitaeka ibukin Natim.

14 Ao ngkanne nooria, tariu, N na titirakiningkami bwa kam a tia ni wareki koroboki aika tabu? Ngkana kam a tia, kam kangaa n aki kakoaua Natin te Atua?

15 Bwa e aki koreaki bwa aongkoa bon ti Tinoti ae taekin bwaai aikai, ma Tinoki e taekin naba bwaai aikai—

16 Bwa nooria, e taku: Ko un, O te Uea, irouia te botanaomata aio ibukina bwa a rawa n oota n am nanoanga are ko a tia ni karekea nakoia ibukin Natim.

17 Ao ngkanne, tariu, kam nooria bwa iai te kauoman ni burabeti ni kawai are e a tia naba ni kakoaua Natin te Atua, ao ibukina bwa aomata aki oota n ana taeka a karebanaia n te atibu n ua e mate.

18 Ma nooria, tiaki ti aio; tiaki ti naakai ake a tia n taekina Natin te Atua.

19 Nooria, e bon taekinaki naba iroun Mote; eng, ao noora katotongana ae e kateia rake i nanon te rereua bwa ane e taraia e na bon maiu. Ao a mwaiti ake a taraia ao a maiu.

20 Ma ti tabemwaang ake a ataa nanon bwaai aikanne, ao aio ibukin matoatoan nanoia. Ma a bon mwaiti ake a bon rang ni matoatoa ao ake aki kan tararake, ngaiia ake a mate. Ao ngkanne, bukin ae a rawa n tararake bon bukin ae aki kakoaua bwa e na kamaiuia.

21 O tariu, ngkana kam kona ni kamaiuaki ti man taratarami ni matami bwa ko aonga ni kamaiuaki, tiaki bwa kam na waekoa n taraia, ke kam kan kamatoai nanomi ni kakewea, man taningaroti, bwa kam rawa n taratara nako ni matami, bwa kam kan mate?

22 Ngkana ngaia anne, e na bwakaringkami te rekenikai; ma ngkana e aki, ao a na taratara nako matami ao moanna ni kakoaua Natin te Atua, bwa e na roko ni kabooia ana botanaomata, ao bwa e na maraki ma ni mate bwa e na karaoa te mwakuri ni kamaiu ibukin aia bure; ao bwa e na mangauti riki man te mate, ae e na kakoroa bukin te mangauti, bwa aomata ni kabane a na tei i matana, bwa a na motikaki taekaia n te kabanea ni bong ni motikitaeka, ni kaineti ma aia mwakuri.

23 Ao ngkanne, tariu, I tangiria bwa kam na unika te taeka aio inanomi, ao ngkana e moanna n riki rake kamwarakea n ami onimaki. Ao nooria, e na riki bwa te kai, ae bwebwe rake i nanomi nakon te maiu are aki totoki. Ao ngkanne ke e anganingkami te Atua kabebetean uotami, rinanon ana kimwareirei Natina. Ao kam kona ni karaoi aikai ni kabane ngkana nanomi. Amen.