1 Natiu, anga taningam nakon au taeka; bwa I berita nakoim, bwa ngkana ko kaawakin ana tua te Atua ao ko na kakabwaiaki iaon te aba.

2 I tangiria bwa kam na karaoa ae I a tia ni karaoia, n uringa tautoronakiia ara bakatibu; bwa a bon kabureaki, ao akea ae e kona ni kainaomataia ma bon ti Atuan Aberaam, ao Atuan Itaaka, ao Atuan Iakobwa; ao e bon kainaomataia raoi man karawawatakiia.

3 Ao ngkai, O natiu ae Ereman, nooria, ko bon mena i nanon am tai n rikirake, ao ngaia are, I bubutiko bwa ko na ongo au taeka man reirei mai irou; bwa I bon ataia bwa ane a onimakina te Atua ao a na bon boutokaaki n rawawataia, ma aia kaangaanga, ma karawawatakiia, ao a na uotaki rake n te kabanea ni bong.

4 Ao I aki tangiria bwa kam na taku bwa I bon ataia irou—tiaki man bwain aon te aba ma ma ni bwain te tamnei, tiaki man te iango n rabwata ma mai iroun te Atua.

5 Ao ngkanne, nooria, I taku nakoimi, ngke arona bwa I aki manga bungiaki iroun te Atua I bon aki atai bwaai aikai; ma e a tia te Atua, man wiin ana anera ae tabu, ni kaoti bwaai aikai nakoiu, tiaki ibukina bwa I kororaoi.

6 Bwa I mwananga ma natin Motiaea aika mwaane, ni kataia ni kamauna ana ekaretia te Atua; ma nooria, te Atua e kanakoa ana anera bwa e na katokiira iaon kawaira.

7 Ao nooria, e taetae nakoira, n aron te bwanaa ae kanga te baa, ao e ruru te aonaba ae bwanin i aan waera, ao ti bwaka nako aontano, bwa e roko maakan te Uea iaora.

8 Ma nooria, e taku te bwanaa nakoiu: Teirake. Ao I teirake, man noora te anera

9 Ao e taku nakoiu: Ngkana ko bon tangiria ngkoe bwa ko na tiringaki, ao tai manga ukoukora kamaunan ana ekaretia te Atua.

10 Ao e koro bukina bwa I bwaka nako aontano; ao maanin aio bon teniua te ngaina ao teniua te bong are I a aki kona ni kaurea wiiu iai, man aki kona naba ni kabonganai baiu ma waeu.

11 Ao e taekin bwaai riki aika a bati te anera nakoiu, are a ongoraeaki irouia tariu, ma I aki ongo; bwa ngke I ongo taeka aikai—Ngkana ko bon tangiria ngkoe bwa ko na tiringaki, ao tai manga ukoukora kamaunaan ana ekaretia te Atua—I a bon oreaki n te maaku ae korakora ma te miimi bwa mwiina I tiringaki, ngaia are I a bwaka nako aontano ao akea riki te bwai ae I ongo.

12 Ma I a kammarakaki n te karawawataki ae akea tokina, bwa tamneiu e a bon rang korakora rawawatana ma kammarakana n au bure ni kabane.

13 Eng, I bon uring au bure ni kabane ma buakakau, are I a bon kammarakaki iai ni kammarakin moone; eng, I nooria bwa I a tia ni kaitaraa Atuau, ao I a tia n aki kaawakin ana tua aika a tabu.

14 Eng, ao I a tia n tiringia natina aika a mwaiti, ke ni kairia nako nanon te tiringaki; eng, ni kakimototoa a bon rang korakora au bure, n te aro are iangoan okiu nako matan Atuau e bon kammaraka tamneiu n te maaku ae aki kona ni kabwarabwaraki.

15 O, I taku ngai, bwa I kona ni kanakoaki man riki n akea tamneiu ma rabwatau, bwa I aonga n aki uotaki bwa N na tei i matan Atuau, ao e na motikaki taekau n aron au mwakuri.

16 Ao ngkai, i nanon teniua te ngaina ao teniua te bong I a bon kammarakaki, ni marakin te aomata ae kabuakakaaki.

17 Ao e koro bukina bwa ngaia are I a kammarakaki, ngke I a karawawataki n uringakin au bure aika a mwaiti, nooria, I uringnga naba are I ongo ngke tamau e taetae ni burabeti nakoia aomata ibukin rokon Iesu Kristo, are Natin te Atua, bwa e na karaoa te mwakuri ni kamaiu ibukin buren te aonaba.

18 Ngkai, ngke au iango e iangoa raoi te koaua aio, I tang inanou: O Iesu, ngkoe Natin te Atua, nanoangaai, ngkai I mena n te aro ae kananokawaki ae moan te mao, man otabwaniniaki n ana kabaebae te mate ae aki totoki.

19 Ao ngkai, nooria, ngke I iangoa aio, I aki manga uring marakiu; eng, I a aki manga karawawataki n uringakin au bure.

20 Ao O, te kimwareirei teraa, ao te oota ae tamaroa teraa are I a nooria; eng, tamneiu e a onrake n te kimwareirei ae rianako n aron marakiu.

21 Eng, I taku nakoim, natiu, bwa akea riki te bwai ae rianako ma ni mao n aron marakiu. Eng, ao I taku riki nakoim, natiu, bwa n te itera teuana, akea riki te bwai ae e rianako ma ni karewerewe n aiaron kimwareireiu.

22 Eng, I taku ngai bwa I noora te Atua, n aron ara bakatibu are Riaai ngke e nooria, n tekateka iaon ana kaintoka n uea, n otabwaniniaki irouia anera aika aki kona ni warekaki mwaitia, aika a anene man neboneboa Atuaia; eng, ao tamneiu e tangiria ni kan mena ikekei.

23 Ma nooria, baiu ao waeu a manga reke riki korakoraia ao I tei iaon waeu, ma ni kaotia nakoia aomata bwa I a tia ni bungiaki iroun te Atua.

24 Eng, ao man te tai anne nua ngkai, I a tia ni beku n aki motirawa, bwa I aonga ni kairiia aomata nakon te rairannano; bwa I aonga ni kairiia bwa a na katoonga te kimwareirei ae rianako are I a tia ni katoonga; bwa aonga naba ngaia ni manga bungiaki iroun te Atua, ma ni kaonaki n te Tamnei ae Raoiroi.

25 Eng, ao ngkai nooria, O natiu, te Uea e bon anganai te kimwareirei ae rianako n uaan au beku.

26 Bwa ibukin te taeka are e a tia n anganai, nooria, a mwaiti ake a tia ni bungiaki mai iroun te Atua, man tia ni katoonga are I a tia ni katoonga, man noori n oin mataia bwaai ake I a tia n noori; ngaia are a bon atai bwaai ake I a tia n taekin, n aron ae I atai; ao te atatai ae irou bon mai iroun te Atua.

27 Ao I a bon tia ni boutokaaki i aan kakatai ma kaangaanga n aekaia nako, eng, ao n aekan karawawata nako; eng, te Atua e a tia ni kainaomataai man te nne ni kaikain, man te kabaeaki, ao man te mate; eng, ao I katuka au onimaki irouna, ao e na bon manga kainaomataai.

28 Ao I ataia bwa e na tabekairake n te kabanea ni bong, bwa N na maeka mangaia n te mimitong; eng, ao N na neboia n aki toki, bwa e a tia ni kairiia ara bakatibu mai Aikubita, ma ni kabwautiia I-Aikubita n Taari are e Uraura; ma ni kairia ni mwaakana nakon te aba ni berita, ao e a tia ni kainaomataia man te tautoronaki ma te kabureaki man te tai teuana nakon te tai teuana.

29 Eng, ao e a tia naba ni kairiia ara bakatibu man te aba are Ierutarem; man tia naba, ni mwaakana are aki totoki, ni kainaomataia man te tautoronaki ao te kabureaki, man te tai teuana nakon te tai teuana ni karokoa te bong aei; ao I aki toki n uringa kabureakia; eng, ao kam riai n aki toki n uringa kabureakiia, n aron ae I a tia, n uringa kabureakiia.

30 Ma nooria, natiu, tiaki ti aei; bwa kam riai n ataia n aron ae I ataia; bwa ngkana kam kawakina ana tua te Atua ao kam na rikirake iaon te aba; ao kam riai naba n ataia, bwa ngkana kam aki kawakina ana tua te Atua ao kam na teweaki nako mai i matana. Ao ngkanne aio are bon ana taeka.