1 Ao ngkai natiu ae te mwaane, aikai riki bwaai tabeua ake I kan taekin nakoim; bwa I nooria bwa e raraoma am iango ni kaineti ma mangautiia maate.

2 Nooria, I taku nakoim, bwa akea te mangauti—ke N na kangai, n taeka riki tabeua, bwa te rabwata n aomata aio e aki katokaa te aki maamate, te mka aio e aki katoka te aki mka—n karokoa ae e a tia n roko Kristo.

3 Nooria, e karekea mangautiia maate. Ma nooria, natiu ae te mwaane, e tuai n roko te mangauti. Ngkai, N na kabwaranakoa nakoim te bwai ae kamiimi; e ngae n anne ao a bon mwaiti bwaai aika a kamiimi aika a kawakinaki, ae akea ae e atai ma bon ti te Atua n ti ngaia. man N na kaota nakoim teuana are I a bon tia ni botumwaaka n ukoria mai iroun te Atua bwa I aonga n ataia—ao aio are e bon kaineti ma te mangauti.

4 Nooria, bon iai te tai ae e a tia ni baireaki bwa ni kabane ana uti man te mate. Ao ngkanne ngkana e roko te tai aei ao bon akea ae e ataia; ma ti te Atua ae e ataa te tai are e a tia ni baireaki.

5 Ngkai, tao e na teuana te tai, ke uoua te tai, ke teniua te tai, are aomata a na uti iai man te mate, e bon aki kakawaki; bwa te Atua e atai bwaai aikai ni kabane; ao e ti tau bwa N na ataia bwa aio ae e na riki—ao bwa iai te tai are e a tia ni baireaki bwa ni kabane a na uti man te mate.

6 Ngkai e riai bwa e na iai te marena i marenan te tai ni mate ao te tai ni mangauti.

7 Ao Ngkai N na titiraki bwa teraa ae e na riki nakon tamneia aomata man te tai ni mate nakon te tai are e baireaki iai te mangauti?

8 Ao ngkanne ngkana tao e na raka iaon teuana te tai are e a tia ni baireaki bwa a na uti iai aomata e bon aki kakawaki; bwa aki bane ni mate n te tai ae ti teuana, ao e aki kakawaki aio; bwa iroun te Atua aikai ti teuana te bong, ao te tai e bon ti babaireaki ibukiia aomata.

9 Nooria, bon iai te tai are e a tia ni baireaki iai nakoia aomata bwa ni kabane a na uti man te mate, ao bon iai te marena i marenan te tai ni mate ao te tai ni mangauti. Ao ngkai, ni kaineti ma te marena n tai aei, tera ae riki nakon tamneia aomata bon te bwai are I a tia ni botumwaaka n ukoria mai iroun te Uea bwa N na ataia; ao aio te bwai are I a bon ataia.

10 Ao ngkana e roko te tai are a na bane n uti man te mate, ao a na ataia ngkanne bwa te Atua e atai ni kabane taai ake a tia ni baireaki ibukiia aomata.

11 Ngkai, ni kaineti ma aron te aomata imarenan te mate ao te mangauti—Nooria, e a bon tia ni kaotaki nakoiu iroun te anera, bwa tamneia aomata ni kabane, man te tai are a kitana iai te rabwata ae maamate aio, eng, tamneia aomata ni kabane e ngae ngke a raoiroi ke a buakaka, a bon uotaki n okira mwengaia nakon te Atua are e anganiia te maiu.

12 Ao ngkanne e na koro bukina bwa, tamneia ake a raoiroi a na butimwaeaki nakon te aro ni kakukurei, are e bon aranaki bwa bwaretaiti, n te aro ni motirawa, te aro n rau, are a na motirawa iai man aia kaangaanga ni kabane ao man raraoma ni kabane ma nanokawaki.

13 Ao ngkanne e na koro bukina bwa, tamneia ake a buakaka, eng, ake a buakaka—bwa nooria, bwa akea mwangan ke mwakoron Tamnein te Uea irouia; bwa nooria, a bon rinei mwakuri ake a bubuaka nakon mwakuri aika a raraoi; ngaia are tamnein te riaboro e bon rin inanoia, man taua mwengaia—ao aikai ake a na teweaki nakon te rootongitong; ao e na iai te tang, te tatakarua, ma te kangenge wii, ao aio ibukin oin aia bure, are a kabureaki iai n nanon te riaboro.

14 Ngkai aio aron tamneia ake a buakaka, eng, n te rootongitong, ma te aro ae aki raoiroi, n taraa ni maaku ibukin korakoran unin te Atua i aoia; ngaia are a tiku n te aro aei, n aroia naba ake a raoiroi i bwaretaiti, n uaa te tai ni mangauti.

15 Ngkai, iai tabemwaang ake a tia n ataia bwa te aro ni kakukurei ao te aro ni kananokawaki iroun te tamnei i mwaain te mangauti, bon ngaia te moan mangauti. Eng, I kakoaua ae e kona n aranaki bwa te mangauti, kateirakean te tamnei ke te aomata nakon te aro ni kakukurei ke ni kananokawaki, n aron taeka ake a bon tia n taekinaki.

16 Ao nooria, e a tia ni manga taekinaki riki, bwa iai te moan mangauti, te mangauti ibukiia ake iai ngkoa, ake iai ngkai, ao ake a na iai rimwi, rikaaki nakon mangautin Kristo man te mate.

17 Ngkai, ti aki kantaningaia bwa te moan mangauti aei, are e taekinaki n te aro aei, bon mangautiia aomata ao kanakoaia nakon te kukurei ke te kananokawaki. Kam aki kona ni kantaningaia bwa bon aio nanona.

18 Nooria, I taku nakoimi, Tiaki; ma e kananonaaki manga ikotakin te tamnei ma te rabwata, irouia ake man ana tai Atam rikaaki nakon mangautin Kristo.

19 Ao ngkai, tao tamneia ma rabwataia ake a tia n taekinaki ake a buakaka ma ake a raoiroi a na manga ikotaki n te tai ae ti teuana, I aki kona n ataia; ma e a tau naba, ae N na taekinna, bwa a na bane n teirake; ke n taeka riki tabeua, mangautiia e na koro bukina i mwaain mangautiia ake a mate i mwin mangautin Kristo.

20 Ngkai, natiu ae te mwaane, I aki taekinna bwa e na roko mangautiia n tain mangautin Kristo; ma nooria, I taekinna bwa aio bon au iango, ae tamneia ma rabwataia ake a raoiroi a na ikotaki, n tain mangautin Kristo, ma rierakena nako karawa.

21 Ma tao e na riki aio n tain mangautina ke tao i mwina, I aki kona n taekinna; ma ti aio ae N na taekinna, bwa iai te marena n tai i marenan te mate ma mangautin te rabwata, ao aron te tamnei ni kukurei ke n nanokawaki n uaa te tai are e baireia te Atua bwa a na teirake maate, man ikotaki, te tamnei ma te rabwata, man uotaki nako bwa a na tei i matan te Atua, ma ni motikaki taekaia n aron aia mwakuri.

22 Eng, ao aio are e a karika kaokakin bwaai ni kabane ake a tia n taekinaki ni wiia burabeti.

23 E na kaokaki te tamnei nakon te rabwata; eng, ao baai ma wae ma toma nako a na manga kaokaki nakon te rabwata; eng, ao bon akea naba te iranatu teuana ae e na bua; ma bwaai ni kabane a na manga bane ni kaokaki nakon aroia ni kororaoi.

24 Ao ngkai, natiu te mwaane, aio kaokakin bwaai ake a tia n taekinaki ni wiia burabeti—

25 Ao ngkanne a na raneanea ootaia ake a raoiroi n uean te Atua.

26 Ma nooria, iai te mate ae aki tamaroa ae e na roko nakoia ake a buakaka; bwa a na mate ni bwaai ake bwaai aika a rekereke ma te raoiroi; kioina ngkai a baareka, ao akea te bwai ae e baareka ae kona n rin n uean te Atua; ma a na teweaki nako, ma ni katukaki bwa a na kana uaan aia beku ke aia mwakuri, ake a bon bubuaka; ao a na mooi n taurouro n te mwangko ae mao.