1 Afei me babanyin, iyi nye dza mepɛ dɛ mekã kyerɛ wo bio; osiandɛ muhu dɛ w’adwen rehaw wo wɔ dza ɔfa owusoɛr no ho.

2 Hwɛ mese wo dɛ owusoɛr nnyi hɔ—anaa, dza mebɛkã nye dɛ, ɔnnkyebo yi nntum mmfa bɛkyebo nnhyɛ, dza ɔprɔw yi remmfa dza ɔmmprɔw nnhyɛ kɛpem Christ ne mbae ekyir no ana.

3 Hwɛ, ɔno na ɔdze owusoɛr no bɛba. Mbom hwɛ, me babanyin, owusoɛr no nnyaa mmbae. Afei, merekã esumasɛm akyerɛ wo; eso, esumasɛm pii wɔ hɔ a wɔdze esuma a obiara nnyim gyedɛ Nyankopɔn no ara. Mbom mebɛkyerɛ wo adze kor bi a mibisaa fii Nyame hɔ enyiber do dɛ ɔmma munhu—ɔno nye dza ɔfa owusoɛr ho.

4 Hwɛ wɔahyehyɛ aber bi ato hɔ a obiara bɔsoɛr efi owu mu. Afei dɛm aber no dze obiara nnyim; na mbom Nyankopɔn nyim dɛm aber no.

5 Afei dɛ ɔbɛyɛ kor, anaa mpɛn ebien, anaa mpɛn ebiasa a nyimpa bɔsoɛr efi owu mu no dze ɔmmfa ho koraa; osiandɛ Nyankopɔn nyim ndzɛmba yinom nyina; na ɔyɛ me enyigye dɛ minyim dɛ dɛm na asɛm no tse—dɛ wɔahyehyɛ aber ato hɔ a obiara bɔsoɛr efi owu mu.

6 Afei ɔsɛ dɛ mber bi bɛda owu nye owusoɛr ntamu.

7 Na afei mibebisa dza ɔbɛba akra do fitsi dɛm owuber yi mu dze kesi aber a wɔahyehyɛ ato hɔ dze ama owusoɛrber no.

8 Afei sɛ aber a wɔahyehyɛ dze ama adasa dɛ wɔbɔsoɛr no bor kor mpo a ɔmmfa ho; osiandɛ nyimpa nyina mmbɔmu nnwu da kor, na iyi mmfa ho koraa; ne nyina yɛ da kor ma Nyankopɔn, na mber wɔ hɔ ma adasamba nko.

9 Dɛm ntsi, wɔahyehyɛ aber ato hɔ ama nyimpa dɛ wɔbɔsoɛr efi owu mu; na mber da owu nye owusoɛr ntamu. Na afei, ɔfa dɛm mber yi ho, dza ɔbɛba adasa hɔn akra do nye adze a mebisa Ewuradze enyiber do dɛ mepɛ dɛ muhu; na iyi nye adze a minyim.

10 Na sɛ aber no sõ dɛ obiara bɔsoɛr a, nna wobohu dɛ Nyankopɔn nyim mber nyina a wɔahyehyɛ ato hɔ ama nyimpa.

11 Afei, ɔfa ɔkra ne tsebew wɔ owu na owusoɛr ntamu no—Hwɛ, ɔbɔfo ama mehu dɛ sɛ nyimpa wu a ntsɛmara hɔn esunsum fi no nyimpadua a ɔnnkyebo yi mu, nyew, nyimpa nyina hɔn esunsum, dɛ wɔyɛ papa anaa bɔn no, san kɔ fie wɔ Nyankopɔn a ɔdze nkwa no maa hɔn no ne nkyɛn.

12 Nna afei ɔbɛba dɛ hɔn a wɔyɛ atseneneefo no, wɔbɛgye hɔn esunsum akɔ enyigye tsebew a wɔfrɛ no paradise, ahomgye tsebew na, asomdwee tsebew mu, hɔ na wɔbɔhom efi hɔn haw, nye adwendwen, nye awerɛhow nyina mu.

13 Nna afei ɔbɛba dɛ emumuyɛfo hɔn esunsum, nyew, ndzebɔnyɛfo no—na hwɛ wonnyi kyɛfa biara wɔ Ewuradze no Sunsum mu; osiandɛ hwɛ, wɔpɛɛ dɛ wɔbɛyɛ ndwuma bɔn kyɛn ndwuma pa; dɛm ntsi abɔnsam no sunsum kɛhɛɛn hɔn mu, na ɔfaa hɔn fie—na iyinom na wɔbɔtow hɔn egu ekyirekyir sum mu; hɔ na osũ, nye nkekamu, nye asetwɛr wɔ, na iyi bɛyɛ hɔ osian hɔnankasa hɔn emumuyɛ a ɔnam abɔnsam ne pɛ do dze hɔn kɔr ndɔmmum mu no ntsi.

14 Afei iyi nye emumuyɛfo hɔn esunsum ne tsebew, nyew, wɔ sum nye tsebew a ɔyɛ hu mu, na wɔdze suro bɔhwɛ Nyankopɔn n’ebufuhyew a ɔredzɛw wɔ hɔn do no; na wɔbɛtsena dɛm tsebew yi mu daa, dɛm na atseneneefo no so bɛtsena paradise, ekesi hɔn owusoɛrber.

15 Afei, binom wɔ hɔ a hɔn ntseasee kyerɛ dɛ dɛm ɔkra n’enyigye na n’awerɛhow tsebew yi a ɔwɔ mu ansaana owusoɛr aba no yɛ owusoɛr a odzi kan. Nyew, megye to mu dɛ wobotum afrɛ sunsum anaa ɔkra a worinyan no akɔ n’enyigye anaa n’awerɛhow gyinabew no owusoɛr dɛ mbrɛ wɔakã no.

16 Na hwɛ, wɔakã no bio dɛ owusoɛr a odzi kan wɔ hɔ, owusoɛr a ɔwɔ hɔ ma hɔn a wɔaba kɔ, nye hɔn a wɔwɔ hɔ sesei, nye hɔn a wɔbɛba, dze kesi aber a Christ bɔsoɛr efi owu mu.

17 Afei, yennsusu dɛ owusoɛr yi a wɔakã ho asɛm yi botum ayɛ akra hɔn wusoɛr, dza ɔdze hɔn bɔkɔ enyigye na awerɛhow tsebew mu. Irunntum nnsusu dɛ ɔtse dɛm.

18 Hwɛ, mese wo dɛ, Oho; mbom ɔkyerɛ ɔkra nye nyimpadua nkabɔmu no, ɔfa hɔn a wɔtsenaa ase fi Adam n’aber do dze besi Christ no wusoɛr no.

19 Afei, sɛ hɔn a wɔakã hɔnho asɛm no hɔn nyina hɔn akra nye hɔn nyimpadua bɛkã abɔmu prɛko, emumuyɛfo nye atseneneefo nyina, mennkã dɛm dze; na yɛmfa no dɛ hɔn nyina bɔsoɛr aba; anaa yɛbɛkã dɛ hɔn wusoɛr bedzi kan ansaana hɔn a wobowu wɔ Christ no wusoɛr ekyir no so aba.

20 Afei, me babanyin, mennka dɛ ber a Christ bɔsoɛr no nna hɔn so wɔbɔsoɛr; mbom hwɛ, mankasa m’adwen na medze rekã dɛ atseneneefo hɔn akra nye hɔn nyimpadua bɛkã abɔmu ber a Christ bɔsoɛr na ɔafow akɔ sor no.

21 Mbom sɛ iyi besi no wusoɛrber no mu anaa n’ekyir a, morunntum nnkã; na mbom dza mobotum akã ara nye dɛ mber da owu nye nyimpadua no nsoɛree fi owu mu no ntamu, na ɔkra n’enyigye anaa n’awerɛhow tsebew no ekodu aber a Nyankopɔn ahyehyɛ ato hɔ dɛ ewufo bɔsoɛr na hɔn akra nye hɔn nyimpadua bɛkã abɔmu, ma wɔdze hɔn aba ebegyina Nyankopɔn enyim, ma woeebu hɔn atsɛn dɛ mbrɛ hɔn ndwuma tse.

22 Nyew, iyi nye nsanananmu no a nkɔnhyɛfo no dze hɔn ano kãa ho nsɛm no.

23 Wɔdze ɔkra bɛsan ama nyimpadua no, na nyimpadua no so asan ama ɔkra no; nyew, na wobenya nsa na anan dze ama nyimpadua no; nyew, nhwi kor mpo rennyew; mbom ndzɛmba nyina bɛsananmu esisi ne sibew ma edzi mu.

24 Na afei, me babanyin, iyi nye nsanananmu no a nkɔnhyɛfo no dze hɔn ano kãe—

25 Na afei atseneneefo no bɛhyerɛn wɔ Nyankopɔn n’ahenman no mu.

26 Mbom hwɛ, owu huhu bi reba emumuyɛfo do; na wobowu ama tsenenee ndzɛmba; osiandɛ hɔnho nntsew, na adze a noho nntsew biara runntum nntsena Nyankopɔn n’ahenman mu; na mbom wobotwa hɔn akyen, na wɔama woekedzi hɔn ndwuma n’eduaba no, a ɔyɛ bɔn no; na wɔanom ɔwemba kuraba no ano.