1 Mo nao, boe blong mi, mi gat samting blong talem long saed blong fasin blong putumbak ol samting long stret ples we oli bin stap long hem bifo we oli bin tokbaot; from luk, samfala oli bin tantanem ol skripja, mo oli go lus longwe from samting ia. Mo mi luksave se tingting blong yu i wari tu long saed blong samting ia. Be luk, bae mi eksplenem samting ia long yu.

2 Mi talem long yu, boe blong mi, se plan blong putumbak ol samting long stret ples we oli bin stap long hem bifo, i mas hapen folem jastis blong God; from hem i mas hapen se evri samting bae oli putumbak long stret oda blong olgeta. Luk, hem i mas hapen mo i stret, folem paoa mo laef bakegen long ded blong Kraes, se sol blong man bae i kambak long bodi blong hem, mo se evri pat blong bodi bae i kambak long hem bakegen.

3 Mo hem i mas hapen wetem jastis blong God se ol man bae oli kasem jajmen folem ol wok blong olgeta; mo sapos ol wok blong olgeta long laef ia oli bin gud, mo ol tingting blong hat blong olgeta oli bin gud, long las dei, bae ol samting we oli gud oli kambak long olgeta.

4 Mo sapos ol wok blong olgeta i nogud, bae oli putumbak ol samting we i nogud long olgeta. From hemia, evri samting bae oli putumbak long prapa oda blong olgeta, evri samting bae i kambak long stret ples blong olgeta—bodi we i save ded i kam antap i kam wan bodi we i nomo save ded, wanem i roten i kam antap blong i nomo save roten—oli kam antap long glad we i no gat en blong kasem kingdom blong God, o oli go daon long harem nogud we i no gat en, blong kasem kingdom blong devel, wan long wan saed, narafalawan long narafala saed—

5 Wan i girap wetem glad folem ol tingting blong hem blong wantem glad, o gud folem ol tingting blong hem blong wantem gud; mo narafalawan i girap wetem nogud folem ol tingting blong hem blong wantem nogud; from we hem i bin wantem blong mekem nogud long fuldei mo long wei ia bae hem i kasem pei blong nogud fasin taem we naet i kam.

6 Mo sem samting long narafala saed. Sapos hem i bin sakem ol sin blong hem, mo hem i bin wantem stret mo gud fasin kasem en blong ol dei blong hem, long wei ia, bae hem i kasem pei blong stret mo gud fasin.

7 Olgeta ia, oli olgeta we Lod i pemaot olgeta; yes, olgeta ia, oli olgeta we Lod i tekemaot olgeta, we Lod i karemaot olgeta long naet blong tudak we i no gat en; mo olsem ia nao oli stanap o foldaon; from luk evri man, i jaj blong hemwan nomo, i jusum blong mekem gud o blong mekem nogud.

8 Nao, ol loa blong God oli no save jenis; from hemia, oli rere rod ia i stap, mekem se eni man we i wantem, i save folem rod ia mo God bae i sevem hem.

9 Mo nao luk, boe blong mi, yu no mas tekem wan moa janis blong mekem rong agensem God blong yu long ol poen ia blong doktrin ia, we yu bin tekem janis bifo blong mekem sin.

10 Yu no mas ting, from ol profet oli bin tokbaot fasin blong putumbak ol samting long stret ples we oli bin stap long hem bifo, se bae Lod i putumbak yu aot long sin, i go long glad. Luk, mi talem long yu, fasin nogud i neva bin fasin blong stap glad.

11 Mo nao, boe blong mi, evri man we i stap long wan ples blong folem fasin blong wol, o bae mi talem se, long wan ples blong wol, oli stap long konkon rabis ples mo long ol rop blong rabis fasin; oli no gat God long wol; mo oli go agensem fasin blong God; from hemia, oli stap long wan ples we i go agensem fasin blong glad.

12 Mo nao luk, ?yu ting se mining blong toktok ia, blong putumbak ol samting long stret ples we oli bin stap long hem bifo, i minim blong tekem wan samting folem fasin blong wol mo putum long wan fasin we i no blong wol, o blong putum hem long wan fasin we i defren long fasin blong hem?

13 O, boe blong mi, hem i no olsem; be mining blong toktok ia, blong putumbak ol samting long stret ples we oli bin stap long hem bifo, i minim blong putumbak nogud long man we i mekem nogud samting, o fasin blong wol long man we i folem fasin blong wol, o samting blong devel long man we i mekem samting blong devel—gud long hemia we i gud; stret mo gud fasin long hemia we i stret mo gud; raet long hemia we i raet; sore long hemia we i gat sore.

14 From hemia, boe blong mi, meksua se yu soem sore long ol brata blong yu; mekem stret samting, jaj wetem stret mo gud fasin, mo mekem gud oltaem; mo sapos yu mekem ol samting ia bae yu kasem pei blong yu; yes, bae fasin blong gat sore i kambak long yu bakegen; bae yu gat jastis i kambak long yu bakegen; bae fasin blong gat stret jajmen i kambak long yu bakegen; mo bae yu kasem gudfala pei bakegen.

15 From ol samting we yu sendem i go aot bae oli kambak long yu bakegen, mo bae oli kambak long stret ples we oli bin stap long hem bifo; from hemia, toktok ia, blong putumbak ol samting long stret ples we oli bin stap long hem bifo, i panisim moa bigwan man blong sin, mo i no talem se hem i no gat rong nating.