1 Ket ita, anakko, madlawko nga adda pay sumagmamano a mangburburibor iti panunotmo, a saanmo maawatan—a maipapan iti kinalinteg ti Dios iti pannakadusa ti managbasol; agsipud ta ipagarupmo a saan a nainkalintegan a maisaad ti managbasol iti nakay-ay-ay a kasasaad.

2 Ita kitaen, anakko, ilawlawagko daytoy a banag kenka. Agsipud ta kitaen, kalpasan nga imbaon ti Apo a Dios dagiti immuna a nagannak kadatayo manipud iti minuyongan ti Eden, a mangsukay iti daga, nga isu ti naggapuanda—wen, pinagtalawna ti tao, ket inkabilna iti akindaya a pungto ti minuyongan ti Eden, ti kerubin, ken ti umap-apoy nga espada nga agturong iti tunggal dalan, tapno masalakniban ti kayo ti biag—

3 Ita, makitatayo a nagbalin ti tao a kas iti Dios, nga ammona ti naimbag ken dakes; ket amangan ta igaw-atna ti imana, ket mangala met iti kayo ti biag, ket mangan ken agbiag nga agnanayon, inikkan ti Apo a Dios iti kerubin ken iti umap-apoy nga espada, tapno saan a mangan iti bunga—

4 Ket iti daytoy makitatayo, nga adda naited a panawen ti tao nga agbabawi, wen, ti pakapadasan a panawen, panawen tapno agbabawi ken agserbi iti Dios.

5 Agsipud ta kitaem, no pimmuros a dagus ni Adan, ket nangan ti kayo iti biag, nagbiag koma nga agnanayon, mayannurot iti balikas ti Dios; nga awan ti panawen para iti panagbabawi; wen, ken kasta met a naawan koma ti kaipapanan ti balikas ti Dios, ken natungday ti naindaklan a plano ti pannakaisalakan.

6 Ngem kitaen, naituding a ti tao ket matay—ngarud, gapu iti pannakaisinada iti kayo ti biag masapul a maisinada met iti rabaw ti daga—ket napukaw nga agnanayon ti tao, wen, nagbalinda a natnag a tao.

7 Ket ita, makita babaen iti daytoy a naisina dagiti immuna a nagannak kadatayo iti nainlasagan ken naespirituan manipud iti imatang ti Apo; ket iti kastoy makitatayo a nagbalinda a paspasurot iti bukodda a pagayatan.

8 Ita kitaen, saan a rumbeng a masubbot ti tao manipud iti daytoy nga ipapatay ti bagi, gapu ta dayta ti makadadael iti naindaklan a plano ti kinaragsak.

9 Ngarud, idinto ta saan a matay ti kararua iti kaano man, ket inyeg ti pannakatnag ti sangkataoan ti naespirituan a pannakatay ken kasta met ti nainlasagan, iti dayta, naisinada iti imatang ti Apo, nasken unay a masubbot ti sangkataoan manipud iti daytoy naespirituan nga ipapatay.

10 Ngarud, iti panagbalinda a nailubongan, nagartem, ken simmairo, babaen ti kasisigud, nagbalin daytoy pakapadasan a kasasaad a kasasaad para kadakuada tapno agsaganada; nagbalin daytoy a panagsagana a kasasaad.

11 Ket ita laglagipem, anakko, no saan a gapu iti plano ti pannakasubbot, (ipagarup nga awan daytoy) apaman a natayda dagiti kararuada ket nakaay-ay-ay, gapu ta naisinada iti imatang ti Apo.

12 Ket ita, awan ti pamuspusan a masubbot ti tao manipud iti daytoy natnag a kasasaad, nga impaay ti tao iti bagina met laeng gapu iti kinasubegna.

13 Ngarud, babaen ti kinalinteg, saan a matungpal ti plano ti pannakasubbot, no di laeng gapu iti panagbabawi ti tao iti daytoy pannakatingiting a kasasaad, wen, daytoy panagsagana a kasasaad; agsipud ta malaksid laeng kadagitoy a sasaaden, awan ti pagmaayan ti panangngaasi malaksid no dadaelenna ti aramid ti kinalinteg. Ita saan a mabalin a madadael ti aramid ti kinalinteg; ta no kasta, agsardengto a Dios ti Dios.

14 Ket iti kastoy makitatayo a ti sangkataon ket natnag, ket addada iti ikut ti kinalinteg; wen, ti kinalinteg ti Dios, a nangiturong kadakuada iti agnanayon a pannakaisina manipud iti imatangna.

15 Ket ita, saan a mapasamak ti plano ti panangngaasi malaksid no maaramid ti pannubbot; ngarud ti Dios met laeng ti mangsubbot kadagiti basol ti lubong, a mangtungpal iti plano ti panangngaasi, a mangpennek iti kasapulan ti kinalinteg, tapno ti Dios ket maysa a naan-anay, nalinteg a Dios, ken manangngaasi met a Dios.

16 Ita, saan a makagteng ti tao iti panagbabawi malaksid no adda pannakadusa, nga agnanayon met a nasken a kas iti biag ti kararua, a kasupadi a karaman iti plano ti kinaragsak, nga agnanayon met a kas iti biag ti kararua.

17 Ita, kasano nga agbabawi ti tao malaksid a nasken nga agbasol? Kasano nga agbasol no awan ti linteg? Kasano nga adda linteg malaksid no adda dusa?

18 Ita, adda karamanna a dusa, ken naited a nalinteg a paglintegan, a nangipaay iti panagleddaang ti konsiensia ti tao.

19 Ita, no awan ti linteg a naited—a no nangpapatay ti tao nasken a matay—mabuteng kadi isuna no mangpapatay?

20 Ken kasta met, no awan naited a linteg a maibusor iti basol ti tao saan a mabuteng nga agbasol.

21 Ket no awan ti linteg a naited, ania ti maaaramid ti kinalinteg no nagbasol ti tattao, wenno ti panangngaasi, gapu ta awan ti karbenganda kadayta a parsua?

22 Ngem adda linteg a naited, ken karamanna a dusa, ken ti panagbabawi a naipaay; tuntonen ti panangngaasi; no saan a kasta, tuntonen ti linteg ti parsua ket ipakatna ti linteg, ket ipakat ti linteg ti dusa; no saan a kasta, madadael dagiti aramid ti kinalinteg, ket ti Dios agsardeng a Dios.

23 Ngem ti Dios saan nga agsardeng a Dios, ket tuntonen ti panangngaasi ti agbabawi, ken dumteng ti panangngaasi gapu iti pannubbot; ket ipatungpal ti pannubbot ti panagungar dagiti natay; ket ti panagungar dagiti natay isublina ti tao iti imatang ti Dios; ket iti kastoy naisublida iti imatangna, a maukom mayannurot iti aramidda, mayannurot iti linteg ken kinalinteg.

24 Agsipud ta kitaem, ipakat amin ti kinalinteg ti dawatna, ken tuntonen met ti panangaasi ti kukuana; ket iti kasta, awan ti maisalakan malaksid ti pudno a nagbabawi.

25 Ania, ipagarupmo kadi a mabalin a takawan ti panangngaasi ti kinalinteg? Kunak kenka, Saan; uray maysa a kabassitan. No kasta, agsardeng a Dios ti Dios.

26 Ket iti kasta tungpalen ti Dios ti naindaklan ken dagiti agnanayon a panggepna, a naisagana manipud iti pamuon ti lubong. Ket iti kasta dumteng ti pannakaisalakan ken pannakasubbot ti tattao, ken kasta met ti pannakadadael ken kinaay-ay-ayda.

27 Ngarud, O anakko, siasino man nga umay mabalin nga umay ken makiranud iti danum ti biag a siwawaya; ket siasino man a saan nga umay saan a mapilit nga umay; ngem iti maudi nga aldaw maisublinto kenkuana a mayannurot iti aramidna.

28 No nagtarigagay nga agaramid iti dakes, ket saan a nagbabawi iti aldawna, kitaen, mapasamakto kenkuana ti dakes, a mayannurot iti panangisubli ti Dios.

29 Ket ita, anakko, tarigagayak a saanmo ipalubos a riribukennaka pay dagitoy a bambanag, ket dagiti laeng basolmo ti pakariribukam, iti dayta a pannakariribuk ti mangiturong kenka iti panagbabawi.

30 O anakko, tarigagayak a saanmo koman a libaken ti kinalinteg ti Dios. Saanmo nga ipalubos ti bagim nga agpambar iti kabassitan a banag gapu kadagiti basolmo, babaen ti panangilibak iti kinalinteg ti Dios; ngem palubosam nga umno nga agari ti kinalinteg ti Dios, ken ti kinamanangaasina, ket ti naunday a panagibturnar iti pusom; ket palubosam a daytoy ti mamagtamed kenka iti katapukan a sipapakumbaba.

31 Ket ita, O anakko, inawagannaka ti Dios a mangikasaba iti balikas kadagitoy a tattao. Ket ita, anakko, mapankan iti dalanmo, ipakdaarmo dagiti balikas babaen iti kinapudno ken kinasimbeng, tapno sika ti mangidanon kadagiti kararua iti panagbabawi, tapno tuntonen ida ti naindaklan a plano ti kinamanangngaasi. Ket ipaay koma ti Dios kenka a mayannurot kadagiti balikasko. Amen.