1 Ao ngkai e koro bukina bwa natin Aramwa mwaane a waaki i buakoia aomata, n tataekina te taeka nakoia. Ao Aramwa, naba, i bon irouna e aki kan motirawa, ngaia are e waaki naba.

2 Ngkai ti na aki manga taekina aia kabwarabwara, ma ti na ti taekinna bwa a kabwarabwara te taeka, ma te koaua, n aron tamnein te taeka ni burabeti ma te kaotioti; ao a kabwarabwara n aron ana botaki ae tabu te Atua are a bon weteaki iai.

3 Ao ngkai N na okira rongorongon taian buaka i marenaia Nibwaite ma Reimwanaite, n aia katebwi ma waniua n ririki n tautaeka taan moti.

4 Bwa nooria, e koro bukina bwa Tioramwaite a riki bwa Reimwanaite; ngaia are, ni moan waakin te katebwi ma waniua n ririki ao ana aomata Nibwaai a nooria Reimwanaite n roko nakoia; ngaia are a katauraoia ibukin te buaka; eng, a ikotiia aia taanga ni buaka n te aba are Ietion.

5 Ao e koro bukina bwa a roko Reimwanaite ma aia ngaa n aomata; ao a roko nakon te aba are Anteonam, are abaia Tioramwaite; ao te mwaane ae arana Teraemena bon aia mataniwi.

6 Ao ngkanne, kioina ngkai Amwarakaite a bon korakora riki buakakaia ao aia kakan tiritiri riki nakoia Reimwanaite, i bon irouia, ngaia are, Teraemena e rineia mataniwi i aoia Reimwanaite, ao bon Amwarakaite ma Tioramwaite ni kabane.

7 Ao e karaoa aio bwa e aonga n teimatoa aia kairiribai nakoia Nibwaite, bwa e aonga ni kairia nakon te tautaekanaki ibukin kakoroan bukin ana babaire.

8 Bwa nooria, ana babaire e na kauerakea nanoia Reimwanaite bwa a na un nakoia Nibwaite; ao e karaoa aio bwa e aonga ni korakora mwaakana i aoia n te aro ni babakanikawai, ao bwa e aonga naba n reke mwaakana i aoia Nibwaite ngkana e kairia nakon te tautoronaki.

9 Ao ngkai aia babaire Nibwaite bwa a na kaawakin mai irouia aia kairiribai, abaia, ma mwengaia, ma buuia, ao natiia, bwa a na kamauria mai nanon baia aia kairiribai; ao bwa aonga naba ni kawakina inaomataia ma aroia aika a raka, eng, ao inaomataia naba, bwa aonga n taromauria te Atua n aron nanoia.

10 Bwa a bon ataia bwa ngkana a reke i nanon baia Reimwanaite, ao ane e taromauria te Atua i nanon te tamnei ma te koaua, ae te Atua ae koaua ma ni maiu, ao e na tiringaki irouia Reimwanaite.

11 Eng, ao ataa naba korakoran aia kairiribai Reimwanaite nakoia tariia, ake te botanaomata are Aentaai-Nibwaai-Riaai, ake aranaki bwa ana aomata Amon—ao a bon rawa n tabeki bwaai ni buaka, eng, bwa a tia ni karaoa te berita ae tabu ao a bon rawa n urua—ngaia are, ngkana a reke i nanon baia Reimwanaite ao a na bon tiringaki.

12 Ao Nibwaite a bon aki kariaia bwa a na tiringaki; ngaia are, anganiia abaia bwa a na bwaibwai iai.

13 Ao te botanaomata are Amon a bon anganiia Nibwaite mwakoron kaubwai bwa a na boutokaa aia taanga ni buaka; ngaia are Nibwaite a bon kataua, bwa ti ngaia, ni kaaitaraia Reimwanaite, ake bon kanoaia Reimwan ma Remuera, ma natin Itimaera mwaane, ao ni kabane ake a kitania Nibwaite, ake bon Amwarakaite ma Tioramwaite, ma kanoan ana ibonga Noa.

14 Ngkai a bon rang mwaiti kanoaia aikai, e kaniia, mwaitia Nibwaite; ao ngaia are Nibwaite a kataua bwa a na un ma tariia, ma ni kawawaea te raraa.

15 Ao e koro bukina bwa ngke a ikotaki aia taanga ni buaka Reimwanaite n te aba are Anteonam, nooria, a tauraoi aia taanga ni buaka Nibwaite ni kaitibo ma ngaia n te aba are Ietion.

16 Ngkai, aia mataniwi Nibwaite, ke te aomata are e a tia n rineaki bwa mataniwia mataniwi i aoia Nibwaite—ngkai mataniwia mataniwi e kairia aia taanga ni buaka Nibwaite ni kabane—ao arana bon Moronaai;

17 Ao Moronaai e taua aron te kairiri ma tautaekan aia bubuaka. Ao bon ti uabwi ma nimaua ana ririki ngke e rineaki bwa mataniwia mataniwi i aon aia taanga ni buaka Nibwaite.

18 Ao e koro bukina bwa a kaitibo ma Reimwanaite n tian te aba are Ietion, ao ana botanaomata a bon katokai aia bwai ni buaka aika kabaang, ma kabaang aika a uarereke, ma aekan bwaai ni buaka nako.

19 Ao ngke aia taanga ni buaka Reimwanaite a noora te botanaomata are Nibwaai, ke Moronaai, bwa e a tia ni katauraoia ana botanaomata ma otangan bwabwaia ma otangan baia, eng, ma otanga ibukin atuuia, ao a kunnikaiaki naba ni kunnikai aika a matenten.

20 Ngkai ana taanga ni buaka Teraemena a bon aki tauraoi ma aekan bwaai aikai; bwa ti iai irouia aia kabaang, ma kabaang aika a uarereke, ma aia kai ni katebe ma aia kanoa ni katebe, aia atibu ma aia bana; ao a bon aki kunnikainia, ma ti iai te kun ni man are a toka iaon koreaia; eng, a bane n aki kunnikainia, ma ti Tioramwaite ma Amwarakaite;

21 Ma a bon aki katokai bwaai ni buaka aika otanga ni bwabwaia, ke ootanga—ngaia are e a bon rang korakora maakaia aia taanga ni buaka Nibwaite ibukin aia bwai ni buaka, e ngae ngke e bon korakora riki mwaitia nakoia Nibwaite.

22 Nooria, ngkai e koro bukina bwa a bon rawa n roko ni kaaitaraia Nibwaite n tian te aba are Ietion; ngaia are a kitana te aba are Anteonam nako nanon te rereua, n raroa ma atuun te karanga are Tiran, bwa aonga n roko nakon te aba are Maentaai man taua te aba; bwa a taku n aia kantaninga bwa ana taanga ni buaka Moronaai a bon aki ataia bwa a nako n te tabo raa.

23 Ma e koro bukina bwa, n te tai naba are a nako nanon te rereua ao Moronaai e kanakoia ana taan kareke rongorongo nako nanon te rereua bwa a na taratara aia taanga n tautia; ao Moronaai, kioina bwa e ataa naba ana taeka ni burabeti Aramwa, e kanakoia tabeman mwaane nakoina, bwa a na tangiria bwa e na titirakina te Uea bwa a na riai aia taanga ni buaka Nibwaite ni mwananga ni buaka ni kaaitaraia Reimwanaite ke a na aki.

24 Ao e koro bukina bwa ana taeka te Uea e roko nakon Aramwa, ao Aramwa e kaongoia ana tia uaa rongorongo Moronaai, bwa aia taanga ni buaka Reimwanaite a mwaamwananga ni katobibia nanon te rereua, bwa aonga n roko n te aba are Maentaai, bwa a na waakina ekinakoaia te botanaomata aio ake a aki rang korakora. Ao taan uaa rongorongo aikai a nako ma ni karokoa te rongorongo iroun Moronaai.

25 Ngkai Moronaai, e katuka mwakoron ana taanga ni buaka n te aba are Ietion, bwa mwiina mwakoroia Reimwanaite a roko n te aba arei ao a taua te kaawa are bubura, ao e kairia nikiraia kaain te taanga ni buaka ao e mwananga nakon te aba are Maentaai

26 Ao e karekea te anga are ni kabane aomata man mwakoron te aba are teuana a na ikotaki ni buaka ni kaaitaraia Reimwanaite, bwa a na kamanoi aia tabo ma abaia, ma inaomataia ma kainaomatakia; ngaia are a bon tauraoi ni kaitaraa aia tai n roko Reimwanaite.

27 Ao e koro bukina bwa Moronaai e karekea te anga are ana taanga ni buaka a na karabaia n te mwarua are e kaan ma etan te karanga are Tiitan, are e mena i maeaon te karanga are Tiitan n te rereua.

28 Ao Moronaai e katukuia taan kareke rongorongo n taabo aika a mwaiti bwa e aonga n ataia bwa a na roko ningai aia taanga n tautia Reimwanaite.

29 Ao ngkanne, ngkai Moronaai e ataa aia iango Reimwanaite, bwa nanoia te kan tiringia tariia, ke te tautaekaniia bwa a na kairia nakon te tautoronaki bwa aonga ni katea te abanuea bon ibukiia ni kabuta te aba.

30 Ao e bon ataia naba bwa bon ti oin nanoia Nibwaite bwa a na kaawakin abaia, ma inaomataia, ma aia ekaretia, ngaia are e taku i nanona bwa bon tiaki te bure ngkana e kamanoia n te aro ni kamwane; ngaia are, e kunea mai irouia ana taan kareke rongorongo bwa teraa te waaki are a na karaoia Reimwanaite.

31 Ngaia are, e bwenaua ana taanga ni buaka ma ni kairia ake te mwakorona nako nanon te mwarua, ma ni karabaia i mainiku, ao i maiakin te tabuki are Ribwara.

32 Ao ake nikiraia e karabaia n te mwarua are i maeao, ni maeaon te karanga are Tiitan, ao inano n tian te aba are Maentaai.

33 Ao ngaia are ngke e a tia ni katikuia ana taanga ni buaka n aron are e tangiria, e a bon tauraoi ni kaaitaraia.

34 Ao e koro bukina bwa a waerake Reimwanaite i meangin te tabuki, are a karabaki iai mwakoron ana taanga ni buaka Moronaai.

35 Ao ngke Reimwanaite a tia ni kitana te tabuki are Ribwara, man roko n te mwarua, man rinanon te karanga are Tiitan, te taanga ni buaka are a karabaia i maiakin te tabuki, are a kairaki iroun te mwaane ae arana Riaai, e kairia ana taanga ni buaka ma ni katobibia Reimwanaite ibukiia mai mainiku.

36 Ao e koro bukina bwa Reimwanaite ngke a nooria Nibwaite bwa a roko i aoia ma ibuki, a rairaki man un ma ana taanga Riaai.

37 Ao te mwakuri ni kamamate e mena n itera aika uoua, ma e bon korakora riki n aia itera Reimwanaite, bwa rabwataia are e aki karabaki a bon teretere raoi nakon aia oro Nibwaite n aia kabaang ma aia kabaang aika a uarereke, are e karekea te mate ni katoa tai ae a oro iai.

38 Ao n te itera are teuana, ao e bwaka temanna ngkai ao e manga bwaka temanna te mwaane i mwina mai i buakoia Nibwaite, a bwaka n te kabaang ao waawanakon raraaia, ma a bon otangaaki bwain rabwataia ake a kakawaki riki, ke bwain rabwataia ake a kakawaki riki a bon otangaaki man aia oro Reimwanaite, n otangan bwabwaia, ao otangan baia, ao otangan atuia; ao ai ngaia are Nibwaite a waakina te mwakuri ni kamamate i buakoia Reimwanaite

39 Ao e koro bukina bwa a maaku Reimwanaite, ibukin te urubwai are e korakora i buakoia, n te aro are a biri nako nakon te karanga are Tiitan.

40 Ao a bon kakioaki irouia Riaai ma ana aomata; ao a bon kakioaki iroun Riaai nakon ranin Tiitan, ao a rinanon ranin Tiitan. Ao Riaai e katikuia ana taanga ni buaka i etan te karanga are Tiitan bwa aonga n aki rinanona.

41 Ao e koro bukina bwa Moronaai ma ana taanga ni buaka a kaitibo ma Reimwanaite n te mwarua, n iteran te karanga are Tiitan, ma ni bwaka i aoia n tiringia.

42 Ao a biri nako Reimwanaite mai irouia, nakon te aba are Maentaai; ao a manga kaitibo naba ma ana taanga ni buaka Moronaai.

43 Ao n te tai aei ao a bon kakorakoraia n un Reimwanaite; eng, ao ai bon tiba te tai ae a nooraki iai Reimwanaite bwa e rianako korakoraia ma ninikoriaia n un, tiaki ti aei ma bon mai moana.

44 Ao a bon kaungaaki irouia Tioramwaite ma Amwarakaite, are bon mataniwia aia mataniwi ma aia taan kairiri, ao iroun Teraemena, are bon mataniwia aia mataniwi, ke mataniwia aia tia kairiri ke aia tia babaire; eng, ao a bon un n ai aroia raakon, ao a mwaiti Nibwaite ake a mate i aan baia, eng, bwa a bon katabwenai ootangan atuuia ao a kabwangabwangai ootangan bwabwaia, ao a kakibanakoi baaia; ao ikai are Reimwanaite a bon oro ma uniia ae kakamaaku.

45 Ma e ngae n anne, ao Nibwaite a bon kaungaaki ibukin ae raoiroi riki, bwa aki buaka ibukin te kan uea ke te mwaaka ma a bon buaka ibukin mwengaia ma inaomataia, ma buuia ma natia, ma aia bwai ni kabane, eng, ibukin waakin aia taromauri ao aia ekaretia.

46 Ao a bon karaoa are a namakinna bwa tabeia nakon Atuaia; bwa e a tia n taku te Uea nakoia, ao nakoia naba aia bakatibu, bwa: ngkana kam aki kuneaki ni bure n te moan tai, ao te kauoua naba, ao kam na bon aki kona n tiringaki i aan baia ami kairiribai.

47 Ao riki, e a tia n taku te Uea bwa: Kam na kamanoia ami utu, e ngae ngke e na waanako te raraa iai. Ngaia are ibukin aei ao a bon un iai Nibwaite ma Reimwanaite, bwa a na kamanoia i bon irouia ao aia utu, ma aia tabo, ma abaia, ma inaomataia, ma aia aro.

48 Ao e koro bukina bwa ana aomata Moronaai ngke a noora kakamaakuia ma uniia Reimwanaite, ao a bon moanna ni kerikaaki ma ni biri nako mai irouia. Ao Moronaai, e noora nanoia, ngaia are e a waaki rake ma ni kaungai nanoia man ana iango aikai—eng, iangoan abaia, ma inaomataia, eng, kainaomatakia man te tautoronaki.

49 Ao e koro bukina bwa a rairakia Reimwanaite, man takarua n teuana te bwanaa nakon aia Uea ae Atuaia, ibukin inaomataia ma kainaomatakia man te tautoronaki.

50 Ao a waaki n teirake ni kaaitaraia Reimwanaite ma te korakora; n te aoa naba are a tang nakon te Uea ibukin inaomataia, ao a biri nako Reimwanaite mai mataia; ao a birinako nakon ranin Tiitan.

51 Ngkai a bon mwaiti riki Reimwanaite, eng, bon uoua okiokin mwaitia Nibwaite; ma e ngae n anne, ao a bon kakioaki n te aro are a bon ikotaki n ti teuana te rabwata n te mwarua, i etan te karanga are Tiitan.

52 Ngaia are ana taanga ni buaka Moronaai e otabwaninia, eng, n iteran te karaanga ake uoua, bwa nooria, a mena ana aomata Riaai i mainiku.

53 Ngaia are ngke e nooriia ana aomata Riaai Teraemena bwa a mena i mainikun te karanga are Tiitan, ao ana taanga ni buaka Moronaai a mena i maeaon te karanga are Tiitan, ao bwa a otabwaniniaki irouia Nibwaite, a bon rotaki n te maaku.

54 Ngkai Moronaai, ngke e noora maakuia, e tuangiia ana aomata bwa a na katoka kawawaean raraaia.