1 Nooria, ngkanne e a koro bukina bwa ana botanaomata Nibwaai a bon rianako kukureia, ibukina bwa te Uea e kainaomataia mai nanon baia aia kairiribai; ngaia are anga aia kaitau nakon te Uea ae Atuaia; eng, ao a bon kakorakoraia n aki mamatam man tataro, ao a bon taromauria te Atua ma te kimwareirei ae bati.

2 Ao e koro bukina bwa n aia katebwi ma ruaiwa n ririki n tautaeka taan moti i aoia ana botanaomata Nibwaai, ao Aramwa e roko nakon natina are Ereman man taku nakoina: Ko kakoauai taeka ake I taekin nakoim ni kaineti ma taian rongorongo ake a tia ni kawakinaki?

3 Ao e taku Ereman nakoina: Eng, I kakoauai.

4 Ao e taku Aramwa riki: Ko kakoaua Iesu Kristo are e na roko?

5 Ao e taku: Eng, I kakoauai taeka ni kabane ake ko a tia n taekin.

6 Ao Aramwa e taku nakoina riki: Ko kona ni kaawakin au tua?

7 Ao e taku: Eng, N na kaawakin am tua ma nanou ni kabane.

8 Ao ngkanne e taku Aramwa nakoina: Ko na kakabwaiaki; ao te Uea e na kanakoraoa arom n te aba aei.

9 Ma nooria, iai te bwai ae I kan taetae ni burabetiia nakoim; ma te bwai ae I taetae ni burabetiia ko na bon aki kaotia; eng, te bwai are N na taetae ni burabetiia e na bon aki kaotaki, ni karokoa ae koro bukin te taeka ni burabeti; ngaia are koroi taeka ake N na taekin.

10 Ao aikai taeka: Nooria, I nooria bwa te botanaomata ae aomata aikai, ake Nibwaite, n aron tamnein te kaotioti are irou, abubua te ririki mai i mwin te tai are Iesu Kristo e na kaoti nakoia, ao a na bon kerikaaki n aia aki onimaki.

11 Eng, ao ngkanne a na noori bubuaka ma aoraki n aekaia nako, eng, te rongo ma kawawaean te raraa; ni karokoa ae ana aomata Nibwaai a na mauna mataia—

12 Eng, ao e riki aio ibukina bwa a na kerikaaki n aia aki onimaki ma ni karaoi mwakuri n roo, ma aaro ni kaibwabwaru; eng, I taku nakoim, bwa kioina ngkai a bure ni kaitaraa te oota ae korakora ma te rabakau, eng, ao I taku nakoim bwa man te bong arei, ao te kaaua n rooro e na bon aki mauna nako i mwaain rokon te buakaka ae korakora aei.

13 Ao ngkana e roko te bong are e korakora arei, nooria, ao e a kan roko te tai are aomata ngkai, ke are kanoaia ake a warekaki i buakoia ana aomata Nibwaai, a na bon aki manga oki ni warekaki i buakoia ana aomata Nibwaai.

14 Ma ane e tiku n nikirana, man aki kamaiuaki n te bong are e korakora ma ni kakamaku arei, e na bon warekaki i buakoia Reimwanaite, ao e na riki n aekaia, ma ti tabemwaang ake a na aranaki bwa ana reirei te Uea; ao aikai ake a na ukoukoraki irouia Reimwanaite n uaa a mauna nako. Ao ibukin te buakaka ao e na koro bukin te taeka ni burabeti aio.

15 Ao e koro bukina bwa i mwin are Aramwa e tia n taekin bwaai aikai nakon Ereman, e kakabwaia, ma natina mwaane ake tabemwaang; ao e kakabwaia naba te aba ibukin te raoiroi.

16 Ao e taku: E taku te Uea ae te Atua—E na maraia te aba, eng, te aba aio, nakoia aba nako, ma botanaomata, ma neewe, ma aomata nako, ake a karaoa ae buakaka, ngkana e a koro buakakaia; ao e na koro bukina n aron are I taekinna; bwa aio ana kamaraia ao ana kakabwaia te Atua iaon te aba, bwa te Uea e bon aki kona n taraa te bure ma ni kariaia karaoana naba teutana.

17 Ao ngkai, ngke e a tia Aramwa n taekin taeka aikai e kakabwaia te ekaretia, eng, ni kabane ake a na teimatoa i nanon te onimaki man te tai arei.

18 Ao ngke e a tia ni karaoa aio Aramwa e otinako man te aba are Taraemera, man taraa n ae e na nako nakon te aba are Mereki. Ao e koro bukina bwa akea riki rongorongona are e ataaki; ao e aki ataaki matena ke tao aron taunana.

19 Nooria, ti aio ae ti ataia, bwa bon te aomata ae e raoiroi; ao e a buti te rongorongo ni kabuta te ekaretia bwa e uotaki rake nako karawa iroun te tamnei, ke e taunaki ni bain te Uea, n aron Mote. Ma nooria, e taekinaki ni koroboki aika tabu bwa te Uea i bon irouna e anaa Mote nakoina; ao ti katautaua bwa e bon butimwaea naba Aramwa n te tamnei, nakoina; ngaia are, ibukin aei ao bon akea te bwai ae ti ataia ni kaineti ma matena ao taunakina.

20 Ao ngkai e koro bukina bwa ni moan waakinan aia katebwi ma ruaiwa n ririki n tautaeka taan moti i aoia ana botanaomata Nibwaai, ao Ereman e waaki i buakoia aomata n tataekina te taeka nakoia.

21 Bwa nooria, ibukin aia bubuaka ma Reimwanaite ma aaro ni kaiangatoa ma aaro ni kamangaongao aika a uarereke i buakoia aomata, ao e bon riai bwa ana taeka te Atua e na bon taekinaki i buakoia, eng, ao bwa e na karaoaki te tua ni kabuta te ekaretia.

22 Ngaia are, Ereman ma tarina a waaki ni katea te ekaretia riki ni kabuta te aba, eng, n taian kaawa nako ake a bwainaki irouia ana aomata Nibwaai. Ao e koro bukina bwa a bon rineia ibonga ma tia reirei ni kabuta te aba, ni kabuta te ekaretia.

23 Ao e koro bukina bwa i mwin are a tia Ereman ma tarina n rineia ibonga ma taan reirei n te ekaretia ao e a riki rake te kaiangatoa i buakoia, ao a rawa n ongo n aia taeka Ereman ma tarina;

24 Ma a rikirake ni kamoamoa, man tabekaki rake inanoia, ibukin rianakon kaubwaia; ngaia are a kaubwai n oin aia taratara, man rawa n ongo nakon aia taeka, bwa a na kaeta nakonakoia i matan te Atua.