1 Ngkai e koro bukina bwa n aia kaonoua n ririki n tautaeka taan moti iaoia ana aomata Nibwaai, bon akea te itabaraara ke taian buaka n te aba are Taraemera;

2 Ma aomata a bon karawawataki, eng, e korakora karawawatakia ibukin buan tariia, ao ibukin naba buan aia nanai ni man, ao ibukin naba buan aia marae ni wiita, are e toutouaki i aan te wae man uruakaki irouia Reimwanaite.

3 Ao e bon rang korakora karawawatakia n te aro are e bon riai bwa a na nanokawaki aomata ni kabane; ao a bon kakoaua bwa bon ana motikitaeka te Atua are e karokoa iaoia ibukin buakakaia ma aia mwakuri aika bati n ribaki; ngaia ae a bon uti ibukin uringakin tabeia.

4 Ao a waaki ni katea te ekaretia ni kabobonga; eng, ao a mwaiti aika a bwabetitoaki n ranin Tiran ao a reitaki ma ana ekaretia te Atua; eng, a bon bwabetitoaki ni bain Aramwa are e a bon tia ni katabuaki bwa te ibonga ae rietata iaoia kaain te ekaretia, ni bain tamana are Aramwa.

5 Ao e koro bukina bwa n aia kaitiua n ririki n tautaeka taan moti, bon iai tao teniua tenga ao nimabubua aomata ake a katiteuanaia ma ana ekaretia te Atua ao a bwabetitoaki. Ao anne are e toki iai aia kaitiua n ririki n tautaeka taan moti iaoia ana aomata Nibwaai; ao e bon reitinako te rau ni kabanea te tai anne.

6 Ao e koro bukina bwa n aia kawanua n ririki n tautaeka taan moti, ao kaain te ekaretia a moanna n rikirake ni kamoamoa, ibukin rianakon kaubwaia, ao aia tirika aika a tamaroa rarangaaia, ma aia rinen aika a raoiroi rarangakia, ao ibukin mwaitin aia nanai ni man, ma aia koora ao aia tirewa, ma aekan bwai nako aika a kakawaki, are a bon karekei man aia mwakuri korakora, ao ibukin bwai aikai ni kabane, a bon rikirake ni kainikatonga, bwa a bon kunnikaini kunnikai aika a bobuaka.

7 Ngkai aio bon oin reken te karawawataki ae korakora nakon Aramwa, eng, ao nakoia aomata aika a mwaiti are Aramwa e a tia ni katabuia bwa taan reirei, ao ibonga, ao unimwaane iaon te ekaretia; eng, a mwaiti ma i buakoia aika a korakora nanokawakia ibukin te buakaka are a nooria bwa e a waaki i buakoia aomata.

8 Bwa a taratara man nooria ma te nanokawaki ae korakora bwa kaain te ekaretia a moanna n rikirake ni kainikatonga, ao a kabanei nanoia iaon taian kaubwai ao iaon bwain te aonaba ake akea bongaia, n te aro are a moanna ni kairiribai i marenaia, ao a waaki ni bwainikirinia ake aki kakoauaia n aron oin nanoia ma kukureia.

9 Ao ngkanne, n te kawanua n ririki aio n aia tai n tautaeka taan moti, e a waaki te itabaraara ae korakora i buakoia kaain te ekaretia; eng, ao bon iai nanonibwi, itabaraara, ao nanobuaka, ao bwainikirinaki, ao kainikatonga, ae riaon kainikatongaia naake aki kaaina ana ekaretia te Atua.

10 Ao ngkanne e a toki te kawanua n ririki n aia tai n tautaeka taan moti; ao buakakan te ekaretia bon te bwai ae korakora n totoko nakoia ake aki kaaina te ekaretia; ao ngkanne te ekaretia e a moanna ni bwaka n rikirakena.

11 Ao e koro bukina bwa ni waakinan te karuaiwa n ririki, Aramwa e a noora buakakan te ekaretia, ao e nooria naba bwa bannan te ekaretia e a moanna ni kairia naake taan aki kakoaua man te buakaka teuana nakon teuana, ao aio are e a uota kamaunakia aomata.

12 Eng, E noora korakoran te kaokoroaki i buakoia aomata, tabemwaang a tabekakirake n aia kainikatonga, n ribaia tabemwaang, man katannakoi nukaia nakoia ake a kainnano man akea karabakia ao nakoia ake a baki, ao nakoia ake a bora n taka, ao nakoia ake a aoraki man karawawataki.

13 Ngkai aio bon te bwai ae karika te bwaebwaeti ae korakora i buakoia, i nanon aia tai tabemwaang ni kananorinanoia, man buokiia ake a kainnanoa aia ibuobuoki, n aron anganakoakin aia bwai nakoia ake a rarikin ao ake a kainnano, kamwarakeaia ake a baki, ibukin aron Kristo, are e na roko ni kaineti ma tamnein te taeka ni burabeti.

14 Ni kariaria te bong arei, man reitanako kamaunan aia bure, n onrake n te kimwareirei ibukin mangautiia maate, ni kaineti ma nanon ao mwaakan ao kainaomatakin Iesu Kristo man ana kabaebae te mate.

15 Ao ngkai e koro bukina bwa Aramwa, ibukin nooran karawawatakia naake a nanorinano ake a ira te Atua, ao bwainikirinaia ake a kauataoaki iaoia irouia nikiraia ana aomata, ao ibukin nooran aron kakaokoroaia, e a moanna n nang nanokawaki; ma e ngae n anne ao Tamnein te Uea e aki bwaka mai irouna.

16 Ao e a rinea te aomata ae wanawana ae mena i buakoia unimwaanen te ekaretia, ao e anganna te kariaiakaki ae butimwaeaki n nanoia aomata, bwa e na iai irouna te mwaaka bwa e na wakin tua ake a kaineti ma tua ake a tia n anganaki, ao e na kamatoai ni kaineti ma buakakaia ao aia bure aomata.

17 Ngkai, aran te mwaane aio bon Nibwaaia, ao e bon rineaki bwa mataniwia taan moti, ao e tekateka n te kaintekateka ni motikitaeka bwa e na motikitaeka ao e na tautaeka iaoia aomata.

18 Ngkai Aramwa e aki anganna te nakoa are e na riki bwa te ibonga ae rietata iaon te ekaretia, ma e taua te nakoa are te ibonga ae rietata bon ibukina, ma e anga te kaintekateka ni motikitaeka nakon Nibwaaia.

19 Ao e karaoa aio bwa e aonga n ae ngaia e na kona n nako i buakoia ana botanaomata, ke i buakoia ana botanaomata Nibwaai, bwa e aonga n taekina ana taeka te Atua, nakoia, ni kamwakuria bwa ana uringa tabeia, bwa e aonga ni kabwaka man kabonganan ana taeka te Atua, te kainikatonga ni kabane ao te kamwamwane ao te kauntaeka ni kabane are e mena i buakoia ana botanaomata, i mwin nooran akean te anga are e na kona ni kaokia iai ma ti man taekinan te koaua raoi ni kaaitaraia.

20 Ao man moan waakin te karuaiwa n ririki n aia tai n tautaeka taan moti i aoia ana aomata Nibwaai, Aramwa e anga nako te kaintekateka ni motikitaeka nakon Nibwaaia, ao e a tiku ngaia n te nakoanibonga ae rietata n ana botaki ae tabu te Atua, n taekina koauan ana taeka te Atua, ni kaineti ma tamnein te kaotioti ma te taeka ni burabeti.