1 Ita napasamak a rinugian ni Alma nga ibaga ti balikas ti Dios kadagiti tattao, immuna iti daga ti Zarahemla, ket manipud idiay nagwaras iti amin a pagilian.

2 Ket dagitoy ti balikas nga imbagana kadagiti tattao iti simbaan a naipasdek iti siudad ti Zarahemla, mayannurot ti bukodna a kasuratan, a kinunana:

3 Siak, ni Alma, gapu ta nakonsagrarannak ti amak, ni Alma, nga agbalin a nangato a saserdote iti simbaan ti Dios, isu nga addaan iti bileg ken turay manipud iti Dios a mangaramid kadagitoy a banag, kitaen, kunak kadakayo a nangrugi a mangipasdek iti simbaan iti daga nga ayan ti beddeng ti Nephi; wen, ti daga a naawagan iti daga ti Mormon; wen, ket isu ti nangbuniag kadagiti kabsatna iti dandanum ti Mormon.

4 Ket kitaen, kunak kadakayo, nawayawayaanda manipud kadagiti ima dagiti tattao ni ari Noe, babaen ti kaasi ken bileg ti Dios.

5 Ket kitaen, kalpasan dayta, naiturongda iti pannakaadipen babaen kadagiti ima dagiti Lamanita iti langalang; wen, kunak kadakayo, naadipenda, ket manen nawayawayaan ida ti Apo manipud iti pannakaadipen babaen ti bileg ti balikasna; ket naiturongkami iti daytoy a daga, ket idtoymi met a rinugian a mangipasdek ti simbaan ti Dios iti amin a paset daytoy a daga.

6 Ket ita kitaen, kunak kadakayo, kakabsatko, dakayo a kameng daytoy a simbaan, naan-anay kadi a naitaginayonyo ti panglaglagip ti pannakaadipen dagiti ammayo? Wen, naan-anay kadi a naitaginayonyo ti panglaglagip ti asi ken naunday a panagsagabana para kadakuada? Ken kangrunaanna, naan-anay kadi a naitaginayonyo ti panglaglagip nga isu ti nangwayawaya kadagiti kararuada manipud iti impierno?

7 Kitaen, pinagbalbaliwna dagiti pusoda; wen, riniingna ida manipud iti nargaan a pannaturog, ket bimmangonda iti Dios. Kitaen, addada iti kasipngetan; nupay kasta, nasilnagan dagiti kararuada iti lawag ti agnanayon a balikas; wen, napalikmutanda iti bedbed ni patay, ken iti kawar ti impierno, ken agur-uray kadakuada ti agnanayon a pannakadadael.

8 Ket ita saludsodek kadakayo, kakabsatko, nadadaelda kadi? Kitaen, kunak kadakayo, Saan, saanda a nadadael.

9 Ket manen saludsodek, naltat kadi ti bedbed ni patay, ken limmukay kadi ti kawar ti impierno a nanglikmut kadakuada? Kunak kadakayo, Wen, limmukayda, ket kimmur-as dagiti kararuada, ket kinantada ti manangsubbot nga ayat. Ket kunak kadakayo a naisalakanda.

10 Ket ita saludsodek kadakayo no ania ti kasapulan iti pannakaisalakanda? Wen, ania ti nangibatayanda a mangnamnama iti pannakaisalakan? Ania ti gapu ti pannakaruk-atda iti bedbed ni patay, wen, ken kasta met iti kawar ti impierno?

11 Kitaen, maibagak kadakayo—saan kadi a namati ti amak, ni Alma, kadagiti balikas a nagaon iti ngiwat ni Abinadi? Ken saan kadi a nasantuan a propeta? Saan kadi a nagsao iti balikas ti Dios, ken namati kadagitoy ti amak a ni Alma?

12 Ket babaen ti pammatina naaramid ti naindaklan a panagbalbaliw iti pusona. Kitaen, kunak kadakayo a pudno amin dagitoy.

13 Ket kitaen, inkasabana ti balikas kadagiti ammayo, ket dakkel met ti panagbalbaliw a napasamak iti puspusoda, ket impakumbabada ti bagbagida ket nagtalekda iti pudno ken sibibiag a Dios. Ket kitaen, nagtulnogda agingga iti panungpalan; ngarud naisalakanda.

14 Ket ita kitaen, saludsodek kadakayo, kakabsatko iti simbaan, naespirituankayo kadi a naipasngay manen iti Dios? Maipakitayo kadi ti ladawanna iti langayo? Napadasanyo kadi daytoy a mabileg a panagbalbaliw kadagiti pusoyo?

15 Ipatpatungpalyo kadi met laeng ti pammati iti pannubbot ti namarsua kadakayo? Mangnamnamakayo kadi met laeng babaen iti mata ti pammati, ket imatanganyo nga agungar daytoy nainlasagan a bagi iti kinaagnanayon, ken maital-o daytoy a panagrupsa iti saanen a panagrupsa, tapno tumakder iti sango ti Dios a tapno maukom a mayannurot kadagiti inaramidna iti nainlasagan a bagi?

16 Kunak kadakayo, mailadawanyo kadi iti bagbagiyo a mangngegyo ti timek ti Apo, a kunana kadakayo, iti dayta nga aldaw: Umaykayo kaniak dakayo a naparaburan, ta kitaen, aramid a nalinteg dagiti inaramidyo iti rabaw ti daga?

17 Wenno mailadawanyo kadi iti bagbagiyo a mabalinyo ti agulbod iti Apo iti dayta nga aldaw, ket kunayo—Apo, nalinteg dagiti aramidmi iti rabaw ti daga—ket iti dayta isalakannakayonto?

18 Wenno iti sabali a bangir, mailadawanyo kadi ti bagiyo a maidatag iti pangukoman ti Dios a napno ti karuruayo iti rikna a nakabasol, panagbabawi, nga adaan iti panglaglagip kadagiti amin a basolyo, wen, ti naan-anay a panglaglagip kadagiti amin a kinadakesyo, wen, ti panglaglagip a ginagaranyo ti panagsalungasing kadagiti bilin ti Dios?

19 Kunak kadakayo, mabalinyo kadi a kumita iti Dios iti dayta nga aldaw nga addaan iti natarnaw a puso ken nadalus nga im-ima? Kunak kadakayo, mabalinyo kadi a kumita, a naikitikit ti ladawan ti Dios iti langayo?

20 Kunak kadakayo, mapanunotyo kadi a maisalakankayo no intulokyo metten ti bagbagiyo nga agbalin a ituroyan ti sairo?

21 Kunak kadakayo, maammuanyonto iti dayta nga aldaw a saankayo a maisalakan; agsipud ta awan ti tao a maisalakan malaksid a no napapudaw dagiti kawesna iti pannakaugasna; wen, nasken a magugoran dagiti kawesna agingga a maikkat amin a mansana, babaen ti dara dayta a naisaon dagiti ammatayo, a masapul nga umay a mangsubbot kadagiti taona manipud iti basbasolda.

22 Ket ita saludsodek kadakayo, kakabsatko, anianto ngata ti riknayo no tumakderkayo iti sango ti pangukoman ti Dios, a mansamansa dagiti kawesyo iti dara ken iti amin a kita ti kinarugit? Kitaen, anianto ti ipaneknek dagitoy a banag a maibusor kadakayo?

23 Kitaen saanda kadi nga ipaneknek a mammapataykayo, wen, ken kasta met a sibabasolkayo iti amin a kita ti kinadakes?

24 Kitaen, kakabsatko, ipagarupyo kadi a ti maysa a kasta a mabalin nga addaan iti lugar a pagtugawan iti pagarian ti Dios, kada Abraham, Isaac, ken Jacob, ken kasta met kadagiti amin a nasantuan a propeta, a nadalusan ken awanan rugit, nga awanan mulit ken puraw dagiti kawesda?

25 Kunak kadakayo, Saan; malaksid no aramidenyo nga ulbod ti Namarsuatayo manipud idi punganay, wenno ipagarupyo a managulbod manipud idi punganay, saanyo mabalin nga ipagarup a maaddaan ti kasta iti lugar iti pagarian ti langit; ngem mapapanawdanto gapu ta annakda iti pagarian ti sairo.

26 Ket ita kitaen, kunak kadakayo, kakabsatko, no napadasanyo ti panagbalbaliw iti pusoyo, ken no nariknayo nga agkanta iti kanta ti manangsubbot nga ayat, kayatko a saludsoden, mabalin kadi a mariknayo ita?

27 Nagnakayo kadi, a nagtalinaed nga awan ti pakababalawanna iti sango ti Dios? Maibagayo kadi, no mataykayo iti daytoy a kanito, iti bagbagiyo, a naan-anay ti kinapakumbabayo? A nadalusan ken napapuraw dagiti kawesyo babaen iti dara ni Cristo, nga umay mangsubbot kadagiti taona manipud kadagiti basolda?

28 Kitaen, naikkat kadin ti kinapalanguadyo? Kunak kadakayo, no saan pay saankayo a sisasagana a sumabat iti Dios. Kitaen darasenyo ti agsagana, gapu ta asidegen ti pagarian ti langit, ket ti kasta a tao saan a makagun-od iti agnanayon a biag.

29 Kitaen, kunak, adda kadi maysa kadakayo a saan a naikkatan iti kinaapal? Kunak kadakayo a saan a nakasagana ti kasta a tao; ket kayatko a darasenna ti agsagana gapu ta asidegen ti oras, ket saanna nga ammo ti idadateng ti kanito; gapu ta saan a mabalin nga awan ti basol ti kasta a tao.

30 Ket kunak manen kadakayo, adda kadi maysa kadakayo a manglalais iti kabsatna, wenno mangibunton kenkuana ti pannakaidadanes?

31 Asi pay ti kasta a tao, ta saan pay a nakasagana, ket asidegen ti kanito a masapul nga agbabawi wenno saan a maisalakan!

32 Wen, ken asikayo pay amin nga agar-aramid iti kinadakes; agbabawikayo, agbabawikayo, gapu ta insaon ti Apo a Dios!

33 Kitaen, awisennna ti amin a tao, gapu ta naidiaya kadakuada ti takiag ti kaasi, ket kinunana: Agbabawikayo, ket awatenkayo.

34 Wen, kinunana: Umaykayo kaniak ket mangankayo iti bunga ti kayo ti biag; wen, mangankayo iti tinapay ken uminum iti danum ti biag a siwawaya;

35 Wen, umaykayo kaniak ket itugotyo dagiti aramid ti kinalinteg, ket saankayonto a mapukan a maipurruak iti apuy—

36 Ta kitaen, asidegen ti kanito a siasino man a makapataud iti saan a naimbag a bunga, wenno siasino man ti saan nga agaramid iti nalinteg, isu met laeng ti addaan iti rason nga agdung-aw ken agladingit.

37 O dakayo nga agar-aramid iti kinadangkes; dakayo a mangitangsit iti ubbaw a banag iti lubong, dakayo a nangipaduyakyak nga ammoyon dagiti wagas ti kinalinteg ngem naiwawakayo, a kas iti karnero nga awan ti pastorna, nupay maysa a pastor ti immawag kadakayo ken umaw-awag pay laeng kadakayo, ngem saanyo nga ipangag ti timekna!

38 Kitaen, kunak kadakayo, nga inawagannakayo ti pastor a naimbag; wen, inawagankayo iti naganna, nga isu ti nagan ni Cristo; ket no saanyo nga ipangag ti timek ti naimbag a pastor, iti nagan a pakaawaganyo, kitaen, saannakayo a karnero ti naimbag a pastor.

39 Ket no saankayo a karnero ti naimbag a pastor, ania a pangen ti ayanyo? Kitaen, kunak kadakayo, a ti sairo ti pastoryo, ket addakayo iti pangenna; ket ita, asino ti makailibak iti daytoy? Kitaen, kunak kadakayo, nga ulbod ken anak ti sairo ti siasino man a mangilibak iti daytoy.

40 Gapu ta kunak kadakayo a ti ania man a naimbag ket naggapu iti Dios, ket naggapu iti sairo ti ania man a dakes.

41 Ngarud, no mangpataud ti tao kadagiti naimbag nga aramid dumdummgeg iti timek ti naimbag a pastor, ken sumurot kenkuana; ngem ti siasino man a mangpataud kadagiti dakes nga agaramid, isu met laeng ti agbalin nga anak ti sairo, agsipud ta dumdumngeg ti timekna, ken sumurot kenkuana.

42 Ket siasino man a mangaramid iti daytoy nasken nga awatenna ti tangdanna kenkuana; ngarud, para iti tangdanna umawat iti patay, kas iti bambanag a maipapan iti kinalinteg, ta natayen para iti amin a naimbag nga aramid.

43 Ket ita, kakabsatko, kayatko a masapul a dumngegkayo kaniak, agsipud ta isaok iti amin a kabaelak, ta kitaen, insaokon kadakayo iti nalawag tapno saankayo nga agbiddut, wenno nagsaoak mayannurot kadagiti bilbilin ti Dios.

44 Agsipud ta nabagaanak nga agsao iti kastoy a wagas, a mayannurot iti nasantuan nga orden ti Dios, nga adda ken ni Cristo Jesus; wen, nabilinak a tumakder ken mangipaneknek kadagitoy a tao kadagiti banag a naisaon dagiti ammami maipapan kadagiti banag nga umay.

45 Ket saan laeng a dagitoy. Saanyo kadi nga ipagarup nga ammok a mismo dagitoy a banag? Kitaen, paneknekak kadakayo nga ammok a pudno dagitoy a banag a naisaokon. Ket ania ti panangipagarupyo nga ammok ti kinapudnoda?

46 Kitaen, kunak kadakayo a naipakaammoda kaniak babaen ti Nasantuan nga Espiritu ti Dios. Kitaen, nagayuno ken nagkararagak iti adu nga aldaw tapno maammuak dagitoy a banag. Ket ita ammok a mismo a pudno dagitoy; agsipud ta imparangarang kaniak ti Apo a Dios babaen ti Nasantuan nga Espiritu; ket daytoy ti espiritu ti paltiing nga adda kaniak.

47 Ket kasta met, kunak kadakayo a naipaltiing kaniak, a pudno dagiti balikas a naisaon dagiti ammatayo, kasta iti mayannurot iti espiritu ti pammadto nga adda kaniak, a kas met iti panangiparangarang ti Espiritu ti Dios.

48 Kunak kadakayo, nga ammok a mismno nga ania man nga ibagakto kadakayo, maipapan iti dayta nga umay, pudno; ket kunak kadakayo, nga ammok nga umayto ni Jesucristo, wen, ti Anak, ti Bugbugtong nga Anak ti Ama, napnuan iti parabur, ken kinamanangngaasi, ken kinapudno. Ket kitaen, isu ti umay mangsubbot iti basbasol ti lubong, wen, dagiti basol ti tunggal tao a natibker ti pammatina iti naganna.

49 Ket ita kunak kadakayo a daytoy ti orden a nakaawagak, wen, ti mangasaba kadagiti ay-ayatek a kakabsat, wen, ken iti tunggal maysa nga agtaeng iti daga; wen, ti mangasaba iti amin, nataengan man ken ubbing, adipen man ken siwayawaya; wen, kunak kadakayo a nataengan, ken kasta met dagiti agkabannuag, ken agtutubo a henerasion; wen, ti iwaragawag kadakuada a nasken nga agbabawida ket mayanakda manen.

50 Wen, kastoy ti kinuna ti Espiritu: Agbabawikayo, dakayo amin nga ungto ti daga, agsipud ta asidegen ti pagarian ti langit; wen, umay ti Anak ti Dios iti kinadayagna, iti kinapigsa, kinatan-ok, kinabileg ken kinaturayna. Wen, ay-ayatek a kakabsatko, kunak kadakayo, a kinuna ti Espiritu: Kitaen ti dayag ti Ari ti amin a daga; ket kasta met asideg unayen agsilnag ti Ari ti langit kadagiti amin nga annak ti tattao.

51 Ken kasta met a kinuna kaniak ti Espiritu, wen, ipukkawna kaniak iti napigsa a timek, a kunkunana: Mapanka ket ibagam kadagitoy a tao—Agbabawikayo, agsipud ta malaksid nga agbabawikayo saanyo pulos a matawid ti pagarian ti langit.

52 Ket kunak manen kadakayo, kuna ti Espiritu: Kitaen, naipakagat ti wasay iti ramut ti kayo; ngarud mapukanto ken maipuruak iti apuy ti tunggal kayo a saan a mangpataud iti nasayaat a bunga, wen, ti apuy a saan a maibus, uray pay ti apuy a saan a masebseban. Kitaen, ket laglagipenyo, naisaon ti Nasantuan a Napili daytoy.

53 Ket ita ay-ayatek a kakabsatko, kunak kadakayo, masupiatyo kadi dagitoy a pagsasao; wen, mabalinyo kadi nga iwaksi dagitoy a banag, ket baddebaddekan ti Nasantuan a Napili; wen, mabalinyo kadi a pagpannakkel ti kinapalangguad ti puspusoyo; wen, itultuloyyo kadi pay ti agaruat iti nangina a pagan-anay ken mangisaad iti puspusoyo dagiti awan serbina a bambanag iti lubong, iti kinabaknangyo?

54 Wen, itultuloyyo kadi nga ipagarup a nasaysayaatkayo ngem dagiti sabali; wen, itultuloyyo kadi iti pannakaidadanes dagiti kabsatyo, a nangipakumbaba iti bagbagida ken iturongyo ti panagbiagyo iti nasantuan nga orden ti Dios, nga isu ti nakayeganda iti daytoy a simbaan, a napasanto babaen ti Espiritu Santo, ket maawat a pakapaneknekan iti panagbabawi—

55 Wen, itultuloyyo kadi a tallikudan dagiti napanglaw, ken ti agkasapulan, ken ti mangipaidam iti sanikuayo kadakuada?

56 Ket kamaudiananna, iti amin nga agtultuloy iti kinadakesyo, kunak kadakayo a dagitoy dagiti mapukanto ken maipuruak iti apuy malaksid no alistuanda ti agbabawi.

57 Ket ita kunak kadakayo, dakayo amin nga agtarigagay a mangsurot iti timek ti naimbag a pastor, panawanyo dagiti dakes, ket makisinakayo, ket saanyo a sagiden dagiti narugit nga alikamenda; ket kitaen, ti nagnaganda ket mapunasto, tapno saanto a maibilang ti nagan dagiti dakes kadagiti nagan dagiti nalinteg, tapno matungpal ti balikas ti Dios, a kunana: Saanto a mailaok dagiti nagan dagiti dakes kadagiti nagan dagiti tattaok;

58 Agsipud ta maisuratto ti nagan dagiti nalinteg iti libro ti biag, ket ikkakto ida iti tawidenda iti makanawan nga imak. Ket ita, kakabsatko, ania ti maibagayo a maisuppiat iti daytoy? Kunak kadakayo, no agsaokayo iti maisuppiat iti daytoy, awan aniamanna, agsipud ta masapul a matungpal ti balikas ti Dios.

59 Ta siasino kadakayo a pastor nga addaan iti adu a karnero ti saan a mangbantay kadagitoy, tapno saan a sumrek dagiti lobo ket lamutenda dagiti arbanda? Ket kitaen, no serken ti lobo ti arbanda, saanna kadi a pagtalawen? Wen, ket iti kamaudiananna, no makastrek, dadaelenna daytoy.

60 Ket ita kunak kadakayo nga umaw-awag kadakayo ti naimbag a pastor; ket no denggenyo iti timekna itiponnakayo iti pangenna, ket agbalinkayo a karnerona; ket bilinennakayo tapno saanyo palubosan ti narawet a lobo a sumrek kadakayo, tapno saankayo a madadael.

61 Ket ita siak, ni Alma, ti mangbilin kadakayo iti pagsasao ti apo a nangbilin kaniak, a tungpalenyo dagiti balikas a naisaokon kadakayo.

62 Agsaoak babaen ti pammilin kadakayo a kameng ti simbaan; ken agsaoak babaen ti panangawis kadagiti saan a kameng ti simbaan, a kunak: Umaykayo ket agpabuniagkayo a napnuan panagbabawi, tapno mangankayo met iti bunga ti kayo ti biag.