U Libroil Alma

1 Úch tun beyoʼ Almaeʼ h cáh u yaʼalic u tʼan Hahal Dios tiʼ le cahoʼ, yáxeʼ tu luʼumil Zaraheʼmla, bey túnaʼ tac tiʼ tulácal u cahiloʼob le luʼum heʼeloʼ.

2 Lelaʼ letiʼ le tʼanoʼob heʼebix u yaʼalmaʼhil tiʼ u maʼquiʼloʼob múchʼucbaloʼob yanoʼob teʼ iglesia tu nohoch cahil Zaraheʼmla tu myaʼalah:

3 Ten Alma, dzoʼoc in tʼaʼanal utiaʼal in betiʼnba nohchil ich u iglesia Hahal Dios tumen in tata Alma, bey tún yan tiʼ u páhtalil dzaʼan tumen Hahal Dios utiaʼal u betiʼc le baʼaloʼoboʼ, heʼel túnaʼ, quiʼn wáʼalic teʼex cah hoʼopʼ u cáhsic humpʼél u múchʼul u iglesia tiʼ u luʼumil yan caʼachiʼ tu xulil u luʼumil Nefi, bey kahólmaʼhil u luʼumil Mormon; bey, letiʼ tu dzah oc haʼ tiʼ u sucuʼunoʼob tiʼ u haʼil Mormon.

4 Heʼel túnaʼ quiʼn wáʼalic teʼex hálkabtaaboʼob tu kaboʼob le u maʼquiʼloʼob tu cahal rey Noe tu yoʼolal tu chʼah otsilil Hahal Dios yétel u páhtalil.

5 Cu dzoʼocol lelaʼ, heʼel túnaʼ le u palal Laman tu sutahoʼob letiʼ le maʼcoʼob escalvoʼob teʼ kaxoʼ beyoʼ quiʼn wáʼalic teʼex yanoʼob caʼach bey esclavoʼobiloʼ, tu caʼatén Yumtsil tu luʼsoʼob tiʼ u cuxtal bey esclavoʼoboʼ tu yoʼolal u páhtalil u tʼan; tásaʼaboʼon tiʼ le luʼum heʼelaʼ, wáy túneʼ t cáhsah edzcuntiʼc le u iglesia Hahal Dios tiʼ tulácal le luʼum xanaʼ.

6 Behlaʼ túneʼ in sucuʼuneʼex, teʼex le yaneʼex tiʼ le iglesia heʼel túnaʼ quiʼn kátiʼc teʼex, kahaʼan wá tiʼ teʼex bix bisaʼabic a tataeʼex bey esclavoʼobil? Bey, kahaʼan wá tiʼ teʼex de que dzoʼoc u chʼaʼabal ótsilil tiʼoʼob yétel u yacunah Hahal Dios? Yételeʼ kaʼahaʼan wá tiʼ teʼex de que letiʼeʼ dzoʼoc u luʼsic u pixanoʼob tiʼ u cúchil tuʼux yan quiʼsin?

7 Heʼel túnaʼ, Letiʼ tu kexah u pucsiʼkaloʼob, bey, tu yahsahoʼob tiʼ humpʼél quiʼquiʼ wenel, yétel ahoʼob tiʼ Hahal Dios. Heʼel túneʼ tyaʼanoʼob caʼach chumuc ehoʼchʼeʼenil, beyoʼ, le u maʼntadz sásilil tʼanoʼ tu sásilcunsah u pixanoʼob, bey, kaxaʼanoʼob tumen u kaxil le químiloʼ, yétel u sumil le cúchil tuʼux yan quiʼsin, tán u paʼtiʼcoʼob caʼach u xuʼulul minaʼan u xul.

8 Teneʼ quiʼn kátiʼc behlaʼeʼ in sucuʼuneʼex: H xuʼuloʼob wá? Heʼ quiʼn wáʼalic túnaʼ, maʼ, maʼ h xuʼuloʼobiʼ.

9 Quin kátiʼc teʼex xan: Cacachʼpah wá u kaxil le químiloʼ pʼát wá mixbaʼal u belal le u sumil le cúchil tuʼux yan quiʼsin tuʼux caʼachoʼ? Teneʼ quiʼn wáʼalic teʼex, bey, h pát wách, u pixanoʼobeʼ nohochchahoʼob yétel quiʼmaʼc ólal, h kaynahoʼob u yacunahil salvacion. Teneʼ quiʼn wáʼalic teʼex letiʼoʼobeʼ salvartnahoʼob.

10 Quin kátiʼc teʼex behlaʼeʼ: Baʼax oʼolal salvartoʼob? Bey, baʼax oʼolal cu paʼtiʼcoʼob le salvacionoʼ? Baʼax oʼolal chʼaʼaboʼob tumen u kaxil le químiloʼ, bey, tiʼ le xan u kaxil le tuʼux cahaʼan quiʼsin xan.

11 Heʼel túnaʼ teneʼ heʼel páhtal in wáʼalic teʼexeʼ: Maʼ tu creertah in tata Alma u tʼanoʼob Abinadiʼ? Maʼ wá huntúl hahil profeta letiʼ? Maʼ tu yaʼalah u tʼan Hahal Dios ca tu creertah in tata Alma?

12 Yétel heʼebix u creertiʼqueʼ anchah u yúchul u kexpahal u pucsiʼkal. Heʼel tunaʼ quiʼn wáʼalic teʼex lelaʼ u hahil.

13 Letiʼeʼ tu dzah ohéltbil tʼan tiʼ a tataeʼex, u pucsiʼkaloʼobeʼ h kexpahiʼ tu chin u poloʼob u dza u yóloʼob tiʼ u hahil Hahal Dios cuxaʼan. Heʼel túnaʼ, untiʼch tadz tu betoʼob uts tac tu xul, tu yoʼolaleʼ anchah tiʼoʼob salvacion.

14 Behlaeʼ quiʼn kátiʼc teʼex in sucuʼuneʼex tiʼ u iglesia dzoʼoc wá a síhileʼex a pixaneʼex tiʼ Dios? Dzoʼoc wá wuʼuyiqueʼex tiʼ teʼex le nohoch kexpahalil ta pucsiʼkaleʼexaʼ?

15 Ca peʼecsic wá a feeʼex tu yoʼolal le u salvacion le maʼx mentmaʼileʼexoʼ? Ca wiliqueʼex actánil yétel a wichoʼob de fe yétel ca wiliqueʼex wá letiʼeʼ wínclil cu químilaʼ cu líkiʼl yétel xmaʼ químilil, le cu tuʼutal yétel xmaʼ tuʼutaabiʼ utiaʼal ca xiʼic tu tánil Dios utiaʼal ca juzgartaaqueʼex heʼebix baʼaxoʼob a betmaʼheʼex a meyaheʼex wáy luʼumileʼ?

16 Quin kátiʼc teʼex: Hu páhtal a naʼatiʼqueʼex a wuʼuyiqueʼex u tʼan Yumtsil cu yaʼalic teʼex tu kinileʼ: Coʼoteneʼex tiʼn wicnal, dzaʼabaʼan teʼex bendicion, heʼel túnaʼ, a meyaheʼexeʼ toh anicoʼob yókol u yich le luʼumaʼ?

17 Ca tucliqueʼex wá heʼ u páhtal a tusiqueʼex Yumtsileʼ le kin heʼeloʼ ca wáʼaleʼex: Yumtsil, c meyahoʼobeʼ toh anicoʼob tu yókol u yich le Iuʼumaʼ; letiʼeʼ wá cu salvartiʼqueʼex?

18 Wá maʼ beyoʼ heʼ wá u páhtal tucliqueʼex a bisaʼaleʼex tu tán tu cúch tuʼux cu kuʼubul u meyahoʼ tiʼ Dios yétel a pixaneʼex chuptac yétel u kasiʼleʼ, yétel yayah tucul utiaʼal ca kaʼahseʼex tulácal a kebaneʼex, bey yétel a woheʼleʼex chucaʼan tiʼ tulácal a kasaʼanileʼexeʼ, yétel kahaʼan teʼex dzoʼoc a bineʼex tu contra u leyoʼob Dios?

19 Quin wáʼalic teʼex: Heʼel wá u páhtal a wiliqueʼex Dios le kin heʼeloʼ yétel humpʼél sac pucsiʼkal yétel kaboʼob pʼoʼaʼantac? Heʼel wá u páhtal a líksic a wicheʼex tyaʼan u yocheʼl Dios takaʼan ta wicheʼexeʼ?

20 In wáʼalic teʼex, hu páhtal a tucliqueʼex can kameʼex le salvacionoʼ wá dza chaʼic u kaxiqueʼex quiʼsin?

21 Quin wáʼalic tiʼ teʼex le kin heʼeloʼ yan a wohéltiʼqueʼex maʼ tu páhtal a salvartiʼcabaeʼex, tumen mix maʼc cun páhtal u salvartiʼcuba wá u nokileʼ maʼ pʼoʼaʼan hasta quen pʼátac láh saquiʼl, bey, kabét u pʼátal sactacoʼob tiʼ tulácal maʼncha tu yoʼolal u kiʼikel le maʼx aʼalaʼan tumen tataoʼob bín talac utiaʼal u salvartiʼc u cahal tiʼ u kebanoʼob.

22 Quin kátiʼc teʼex behlaʼeʼ in sucuʼuneʼex: Bix can a wuʼuyabaeʼex le can a wilabaeʼex tu tánil Dios yétel a nokeʼex maʼnchado yétel kiʼikel yétel tulácal kasiʼloʼob? Heʼel túnaʼ, baʼax cun u yaʼaloʼob tulácal le baʼaxoʼob heʼelaʼ ta wókoleʼex?

23 Heʼel túnaʼ, Maʼ wá bin yaʼaleʼ teʼexeʼ h quínsah maʼqueʼex, yétel teʼex xaneʼ yan teʼex keban tu yoʼolal ta mentahileʼex tulácal le heʼheʼlás kakas baʼaloʼobaʼ?

24 Heʼel túnaʼ in sucuʼuneʼex, heʼel wá tucliqueʼexeʼ maʼxoʼob heʼexeʼexaʼ heʼ u páhtal u caxtiʼqueʼex tuʼux a cultaleʼex teʼ cúchil Dios yétel Abraham, Isaac, Jacob yétel le hahil profetaoʼob sactac u nokoʼob minaʼan maʼncha tiʼoʼob pʼoʼaʼanoʼob?

25 Quin wáʼalic teʼexeʼ maʼ; haʼaliʼ wá teʼex ca wáʼaliqueʼex le Máx mentmaʼiloʼoneʼ letiʼ dzoʼoc u tusic tiʼ toʼon desde h cáhiʼ, wá ca tucliqueʼex de que letiʼ dzoʼoc u tusic toʼon desde h cáhiʼ, beyoʼ, maʼ bín a tuculteʼex de que le maʼcoʼob beyaʼ maʼ tún u caxt humpʼél cúchil utiaʼaltoʼob tu reinoil caʼanoʼobeʼ, baʼaleʼ bín puʼulicoʼoboʼ táncab, tumen letiʼoʼobeʼ u paliloʼob u reinoil quiʼsin.

26 Behlaʼ túneʼ in sucuʼuneʼex, wá behlaʼeʼ dzoʼoc a wuʼuyiqueʼex tiʼ teʼex u kexpahal a pucsiʼkaleʼ wá dzoʼoc a wuʼuyiqueʼex tac a kayeʼex u yacunahil salvacion, heʼel túnaʼ tac in kátiʼc teʼex: Heʼ wá u páhtal a wuʼuyiqueʼex le heʼelaʼ behlaʼaʼ?

27 Dzoʼoc wá a xímbaleʼex a canántiʼcabaeʼex xmaʼ kebanileʼex tu tánil Dios tiʼ a cuxtaleʼex? Wá ca químiqueʼex behlaʼeʼ heʼ wá u páhtal a wáʼaliqueʼex ichil teʼexeʼ dzoʼoc a dzic a wóleʼex tu yólal letiʼ chucaʼan a wólileʼex a nokeʼexeʼ dzoʼoc u pʼoʼobol yétel dzoʼoc u saccuntaal tumen u kiʼikel Cristo bin talac utiaʼal u salvartiʼc u cahal tu kebanoʼob?

28 Heʼel túnaʼ, dzoʼoc wá lúksic teʼex le caʼanal ichoʼ? Wá maʼeʼ quiʼn wáʼalic tiʼ teʼex maʼ listoeʼex utiaʼal ca xiʼiqueʼex tu tánil Diosiʼ. Heʼel túnaʼ kabét a listocuntiʼqueʼex tumen u reinoil caʼanoʼobeʼ tu nádzal, le maʼx beyoʼ maʼ bín anac tiʼ cuxtal minaʼan u xul.

29 Heʼel túnaʼ, yan wá ichileʼex maʼx maʼ u dzíbotiʼc le yan tu lak maʼcoʼ? Quin wáʼalic teʼex lelaʼ maʼ listoiʼ; in káteʼ ca u séb listocuntiʼc, tumen u kinileʼ tu nádzal, baʼaleʼ maʼ yoheʼl baʼax kinil can kuchiquiʼ tu yoʼolal le maʼcoʼ yan culpa tiʼ.

30 Bey xan quiʼn kátiʼc teʼex: Yan wá ichileʼex maʼx cu cheʼehtiʼc u sucuʼun cu nácsic yól yétel cu chʼaʼapachtiʼc?

31 Ótsil tiʼ tumen maʼ pʼátal listoiʼ dzoʼoc u kúchul u kinil kabét u kexic u tucul wá maʼeʼ maʼ tun salvartiʼcuba.

32 Heʼeleʼ, kasiʼleʼex teʼex le ca betiʼqueʼex u kasiʼl baʼal, kex a wóleʼex, kex a wóleʼex tumen Yumtsil aʼaleʼ!

33 Heʼel túnaʼ letiʼ cu túxtiʼc u tʼan tiʼ tulácal maʼc, tiʼ tulácal letiʼoʼob cu tiʼchic u kab yétel cu chʼa ótzilil yétel cu yaʼalic: Kex a wóleʼex utiaʼal in kameʼex.

34 Bey, coʼoteneʼex tiʼn wicnal ten, ca a hanteʼex u yich u cheʼil le cuxtaloʼ, can hanteʼex yétel a wukeʼex u wáhil yétel u haʼil cuxtal bucaʼah heʼex a káteʼ.

35 Heʼeleʼ, coʼoteneʼex tiʼ ten, taseʼex tadz meyahoʼob beyoʼ maʼ taneʼex tuʼuybil yétel maʼ léchénbil ich kák.

36 Tumen heʼel túnaʼ, le kinoʼ tu nádzal tiʼ le maʼxoʼob maʼ tu tasoʼob maʼalob icheʼ wá maʼ tun betoʼob tadz meyaheʼ yan baʼax oʼolal cun u yáwát yétel u yahtal yól.

37 Máqueʼex a mentmaʼheʼex kas, caʼanal pacatiʼqueʼex tiʼ u baʼaxiʼloʼob wáy yokolcabaʼ, teʼex ca tucliqueʼex a kahóltiʼqueʼex u tohil beh, cu dzoʼocoleʼ teʼexeʼ ta tsel teʼex bey tamaʼn mixmaʼc yan utiaʼal cu canánte, quex tún yan huntúl Máx cu canántiʼc tamaʼn, dzoʼoc u tʼaniqueʼex yétel tán u tʼaniqueʼex, baʼaleʼ teʼexeʼ maʼ a káteʼex a wuʼuyeʼex u tʼaniʼ.

38 Heʼel túnaʼ quiʼn wáʼalic teʼex le maʼalob maʼx cu canántiʼc tamaʼn cu tʼaniqueʼex, bey, letiʼ tʼaniqueʼex tu kabaʼ letiʼ, letiʼ u kabaʼeʼ Cristo wá maʼ ca wuʼuyiqueʼex u tʼan le maʼalob maʼx cu canántiʼc tamaʼn teʼ kabaʼ iquiʼl u tʼaniqueʼexoʼ, heʼel túnaʼ maʼ u tamaʼneʼexiʼ.

39 Wá maʼ u tamaʼneʼex le maʼalob maʼx cu canántiʼc tamaʼnoʼ, maʼx utiaʼalintiʼqueʼex tún? Heʼel túnaʼ quiʼn wáʼalic teʼex u tamaʼneʼex quiʼsin, quiʼsineʼ utiaʼaleʼex, maʼx hu páhtal u yaʼalic maʼ haheʼ? Heʼel túnaʼ le maʼx aʼalic maʼ haheʼ huntúl tus maʼc yétel u pal quiʼsin.

40 Tumen quiʼn wáʼalic tiʼ teʼex heʼebaʼaxac baʼal maʼalobeʼ tiʼ Dios cu tal, heʼebaʼaxac baʼal kaseʼ tiʼ quiʼsin cu tal.

41 Tu yoʼolaleʼ le maʼc cu betiʼc maʼalob baʼaloʼobeʼ, cu yuʼubic u tʼan le maʼalob maʼx cu canántiʼc tamaʼneʼ yétel cu bin tu pacheʼ; baʼaleʼ le maʼx cu betiʼc baʼaloʼob kaseʼ cu sut u pal quiʼsin, tumen cu yuʼubic u tʼan yétel cu bin tu pach.

42 Le maʼx betiʼquelaʼ bín u kam tiʼ letiʼ u boʼolal, bey túnaʼ cu kamic u boʼolalaʼ químil tu yoʼolal le baʼax tohiloʼ, tumen quiʼmen tiʼ tulácal maʼalob meyahoʼob.

43 Behlaʼ túneʼ in sucuʼuneʼex in kát ca a wuʼuyeʼex, tumen quiʼn tʼan yétel u mukil in wól, tumen heʼel túnaʼ dzoʼoc in tʼaniqueʼex toh, heʼebix yaʼalmaʼhil u maʼndamientoʼob Hahal Dios tu yoʼolal maʼ chʼaʼiqueʼex u kasiʼl beh.

44 Tumen teneʼ tʼanen utiaʼal ca tʼanaquen beyaʼ, heʼebix u meyahil Hahal Dios le yan tiʼ Cristo Jesusoʼ, bey, yan in wáʼalic tiʼ le cahaʼ le baʼax tu caʼansah toʼon c tataoʼob nádzaʼan anic u tal.

45 Baʼaleʼ lelaʼ, maʼ letiʼ tulácaliʼ. Maʼ a woheʼleʼex teʼex de que teneʼ in woheʼl tiʼn woʼolal teniʼ le baʼaloʼob heʼelaʼ? Heʼel túnaʼ, quiʼn wáʼalic tiʼ teʼex teneʼ in woheʼleʼ le baʼaxoʼob dzoʼoc in wáʼalic tiʼ teʼexaʼ u hahiloʼob. Bix a tucliqueʼex in wohélt u hach hahil?

46 Heʼel túnaʼ, quiʼn wáʼalic teʼex le hahil Pixan Dios tu mentah in wohéltiʼc. Dzoʼoc in pʼatiʼc hanal in betiʼc oracion yaʼabach kinoʼob utiaʼal ca pátac in wohéltiʼc le baʼaloʼobaʼ chén tiʼn woʼolal. Behlaeʼ in woheʼl chén tiʼn woʼolal leloʼobaʼ hahtacoʼob; tumen Yumtsil Dios tu yeʼesahoʼob ten tu yoʼolal u Hahil Pixan, lelaʼ letiʼ le u Hahil Pixanil cu yeʼesic tiʼ tenoʼ.

47 Cu dzoʼocoleʼ, quiʼn wáʼalic tiʼ teʼex bey eʼesaʼabiquen, le tʼanoʼob tu yaʼalahoʼob c tataoʼobeʼ u hahiloʼob, heʼebix xan le pixan cu yeʼesiquen le baʼax bín úchucoʼ leloʼobaʼ h eʼesaʼab ten xan tumen u hahil Pixan Dios.

48 In woheʼl ten le baʼax quiʼn wáʼalic teʼex yoʼolal le baʼax bín úchucoʼ hah. Quin wáʼalic in woheʼl Jesucristo bin talac; heʼeleʼ, le Pal, u huntúliliʼ Pal le Tataoʼ; chup yétel gracia yétel cu chʼa ótzilil yétel u hahil. Heʼel túnaʼ, letiʼeʼ, le cu tal u luʼs u keban yókolcab, heʼeleʼ, u kebanil tulácal maʼx cu dzaic u fe tiʼ u kabaʼ.

49 Behlaeʼ túneʼ quiʼn wáʼalic teʼex, le heʼelaʼ bix u tsoʼolol tʼaniquen; heʼeleʼ, utiaʼal ca in caʼans in yabilah sucuʼunoʼob yétel tiʼ tulácal maʼx cahaʼan teʼ luʼumaʼ; heʼeleʼ, ca in caʼans tiʼ chʼíhaʼanoʼob yétel le meheʼn palaloʼob, le esclavoʼob yétel le maʼx hálkabaʼanoʼob, beyoʼ, quiʼn wáʼalic tiʼ le chʼíhaʼaneʼex, le nuctaqueʼex yétel le tanquelmeʼex; beyoʼ, ca a wáʼaleʼex tiʼoʼob yan u kexic yóloʼob yétel ca caʼa síhicoʼob tu caʼatén.

50 Heʼeleʼ, le hahil pixanoʼ bey u yaʼalicaʼ: Kex a wóleʼex tulácaleʼex teʼex, tac tu xulil luʼum, tumen u reinoil teʼ caʼanoʼoboʼ tu nádzal; u Pal Dioseʼ tán u tal yétel u gloriail, u mukil, u nohchil u páhtalil. Heʼeleʼ, in yabilah sucuʼuneʼex, quiʼn wáʼalic teʼex le Hahil Pixan cu yaʼalic: Heʼel túnaʼ u gloriail u Reyil tulácal yokolcab u Reyil le caʼanoʼob yan xan u séb sásiltal ichil tulácal u paliloʼob le maʼcoʼoboʼ.

51 Cu yaʼalic ten xan le Pixanoʼ, heʼeleʼ, cu tʼaniquen kaʼam tán yaʼalic: Xen aʼal tiʼ le cahaʼ: Kex a wóleʼex, tumen wá maʼeʼ, maʼ tu páhtal umpuliʼ, maʼ tu páhtal atiaʼalintiʼqueʼex u reinoil le caʼanoʼoboʼ.

52 Ulak xaneʼ, quiʼn wáʼalic teʼex le pixan cu yaʼalic: Heʼel túnaʼ, le bátoʼ tyaʼan tu chun le cheʼoʼ; tu yoʼolaleʼ le cheʼ maʼ tu dzic maʼalob ichiʼ, cu chʼácal cu puʼulul ichil kák, heʼeleʼ, humpʼél kák maʼ tu hábal, humpʼél kák maʼ tu tuʼupul. Heʼel túnaʼ, ca kaʼahac teʼex, Le maʼx Tohoʼ u yaʼalmaʼh.

53 Behlaeʼ quiʼn wáʼalic in yabilah sucuʼuneʼex: Heʼel wá u páhtal a xachʼcabaeʼex tiʼ le tʼanoʼobaʼ yétel a yaʼachʼetiʼc le Máx Tohoʼ yanal a woqueʼex; heʼeleʼ, cu páhtal wá u caʼanaltal a wichiloʼob? Heʼeleʼ, ca búquiʼntiʼqueʼex yétel coʼoh nokoʼob, ca dzic a pucsiʼkaleʼex tiʼ le baʼax wáy yokolcabaʼ minaʼan bilal tiʼ, tiʼ a ayikalileʼex?

54 Bey, wá ca xachʼcabaeʼex a creerteʼex hach maʼalobeʼex minaʼan ulak maʼxoʼob hach maʼaloboʼ heʼexeʼexeʼ? Heʼeleʼ, wá ca xachʼcabaeʼex a chʼaʼapachiqueʼex a sucuʼuneʼexeʼ cu kubic yóloʼob cu maʼnoʼob heʼex tsolaʼanil tumen Dios, tu yoʼolaleʼ h tasaʼab tu iglesia, dzoʼoc u sactaloʼob yoʼolal le Hahil Pixanoʼ, yétel cu betiʼcoʼob meyahoʼob maʼalob cu yeʼesic tán u kexic u yóloʼob;

55 Heʼeleʼ, wá ca xachʼcabaeʼex a sut a pacheʼex tiʼ le ótsiloʼoboʼ yétel tiʼ le maʼxoʼob mixbaʼal yan tiʼoʼoboʼ maʼ ta dzic tiʼoʼob baʼax yan tiʼ teʼexoʼ?

56 Tu dzoʼoqueʼ, tulácalil teʼex ca xachʼcabaeʼex ichil a kebaneʼex, quiʼn wáʼalic teʼex, letiʼoʼobeʼ bín tanaʼacoʼob yétel léchantacoʼob ich kák wá maʼ tu séb kex yóloʼobiʼ.

57 Tulácal teʼex a káteʼex ca bin a wuʼuyeʼex u tʼan le maʼalob maʼx cu canántiʼc tamaʼnoʼ, behlaʼeʼ quiʼn wáʼalic tiʼ teʼex: Hókeneʼex ichil le kakas maʼcoʼoboʼ yétel pʼatabaeʼex nách tiʼoʼob, maʼ a maʼcheʼex u baʼaliloʼob tuʼutacoʼ; heʼel túnaʼ u kabaʼoʼobeʼ, bín tuʼupucoʼ, tu yoʼolal u kabaʼoʼob le kasaʼanoʼoboʼ maʼ u xoʼocol ichil u kabaʼoʼob le maʼalob maʼcoʼoboʼ utiaʼal ca úchuc le baʼax u yaʼalmaʼh Dios ca tu yaʼalah: u kabaʼoʼob le kasaʼanoʼob maʼ tu xaʼacpahal yétel u kabaʼoʼob in cahoʼ.

58 Tumen u kabaʼoʼob le maʼalob maʼcoʼob bín dzíbtacoʼob tiʼ u libroil cuxtal; bín in dza tiʼoʼob humpʼél cúchil tu xnoʼoh in kab. Behlaʼ túneʼ in sucuʼuneʼex, baʼax can a wáʼaleʼex tu contra lelaʼ? Quin wáʼalic teʼex wá ca wáʼaliqueʼex maʼ haheʼ, mixbaʼal yan tiʼ, tumen u tʼan Dios kabét yúchul.

59 Baʼaleʼ maʼx cu canántiʼc tamaʼn yan ichileʼexeʼ yan yaʼab tamaʼnoʼob, maʼ tán u canántiʼc tu yoʼolal maʼ u taloʼob le lobosoʼob u hantoʼob u tamaʼnoʼob? Heʼel túnaʼ wá huntúl lobo ca ococ chumuc ichil u tamaʼnoʼobeʼ maʼ wá tún u hoʼosbil táncab? Heʼeleʼ, tu dzoqueʼ wá cu páhtal u quínsiqueʼ bín u menteʼ.

60 Behlaeʼ quiʼn wáʼalic tiʼ teʼex le maʼalob maʼc cu canántiʼc tamaʼn cu tʼaniqueʼex, wá ca wuʼuyiqueʼex u tʼaneʼ, cu bisiqueʼex ichil u tamaʼnoʼob ca pʼátaqueʼex u tamaʼneʼex; letiʼeʼ cu yaʼalic tu hahil maʼ pʼatiʼc mix huntúl lobo ca ococ ichileʼex, tu yoʼolal maʼ quínsaʼaleʼex.

61 Behlaeʼ túneʼ ten, Alma heʼebix u tʼan le maʼx yaʼalmaʼileneʼ quiʼn wáʼalic teʼex ca a beteʼex le tʼanoʼob in wáʼalmaʼheʼ.

62 Le tʼanoʼobaʼ humpʼél maʼndamiento tiʼ teʼex yaneʼex ichil le iglesiaoʼ; baʼaleʼ tiʼ le maʼx maʼ yan tiʼ le iglesiaoʼoboʼ quiʼn wáʼalic wá bey u káta: Coʼoteneʼex, kameʼex oc haʼ yoʼolal a kexic a wóleʼex, tu yoʼolal ca a hanteʼex u yich le u cheʼil le cuxtaloʼ.