1 Alma túneʼ, le maʼx anchah u pʼudzul tiʼ u meyhul maʼcoʼob le rey Noe; ca tu kexah yól tu yoʼolal u kebanoʼobeʼ ca hoʼopʼ u yocol bin ichil le cahoʼ ca hoʼopʼ u caʼansic baʼax u yaʼalmaʼh Abinadi.

2 Beyoʼ, tu yoʼolal le baʼax cun úchul yétel tu yoʼolal u caʼa cuxtaliʼl le quiʼmenoʼobo beyxann u salvacion le cah cun úchul tu yoʼolal le páhtaliloʼ, u mukyah Cristo yétel u químil beyxann u caʼa cuxtal yétel u naʼacbal teʼ caʼan.

3 Tu caʼansah háytúl maʼc u kát u yuʼub baʼax cu yaʼaliqueʼ, tán caʼach u tsolic tu yoʼolal maʼ u yoheʼltaal tumen le reyoʼ. Yaʼab maʼc tu creertoʼob u tʼan.

4 Uch túneʼ tulácal le cu creertiʼqueʼ cu binoʼob tiʼ humpʼél cúchil cu kabaʼ Mormon, kabaʼeʼ h dzaʼab tiʼ tumen le reyoʼ, le cúchil heʼelaʼ tiʼ yan tu hál u luʼumil u cahaloʼobeʼ, yan kinoʼobeʼ chup yétel dzic baʼalcheʼoʼobiʼ.

5 Yan tún xan caʼach tiʼ cúchil cu kabaʼtiʼc Mormonoʼ humpʼél u sayabil maʼalob haʼ tuʼux hach cu bin Alma, nadz tiʼ leloʼ yan humpʼél cúchil tuʼux yan yaʼabach cheʼoʼob teʼeloʼ tiʼ cu taaquiʼcuba yétel kin tu yoʼolal maʼ u caxtaal tumen le reyoʼ.

6 Cah úcheʼ tulácal le maʼxoʼob le creertiʼcoʼobeʼ cu binoʼob teʼeloʼ tu yoʼolal u yuʼubicoʼob u tʼan.

7 Dzoʼoc u maʼn yaʼab kineʼ, muchʼucbal yaʼab maʼcoʼob teʼ chan cahtalil Mormonoʼ utiaʼal u yuʼuboʼob u tʼan Alma. Beyoʼ, tulácal le maʼxoʼob cu creertiʼcoʼob le tʼanoʼob muchʼucbal anicoʼob utiaʼal tu yoʼolal u yuʼubicoʼob u tʼan. Ca tu caʼansah tiʼoʼob yétel tu tsolah tiʼoʼob kabét u kexic u yóloʼob yétel le salvacion yétel le fe tiʼ Yumtsil.

8 Cah anchah tún u yaʼalic tiʼoʼob: Heʼel túnaʼ u haʼil Mormoneʼ (tumen bey caʼach u kabaʼoʼob) le bey a káteʼex ocol ichil u canan tamaʼn Dios tu yoʼolal a tʼaʼanaleʼex u cahal yétel a múl bisiqueʼex u alil a kucheʼex tu yoʼolal u sáltaloʼob;

9 Beyoʼ wá xan káteʼex okol yétel le cu yokoloʼoboʼ beyoʼ yétel ca a betabaeʼex u hahil tanil tiʼ Dios tulácal kin yétel tiʼ tulácal baʼal, tiʼ tulácal tuʼux ca yanaqueʼex, quex tac utiaʼal a químileʼex, tu yoʼolal a salvartiʼcabaeʼex tumen Dios, yétel tu yoʼolal xan a xoʼocoleʼex ichil le maʼxoʼob tu kinil le yáx caʼa cuxtaloʼ, tu yoʼolal ca anac teʼex cuxtal minaʼan u xul —

10 Quin wáʼalic tún teʼex behlaʼeʼ wá letiʼ le heʼel u dzíbolal a pucsiʼkaleʼexaʼ baʼax mu chaʼic a kameʼex a wochaʼ tu kabaʼ Yumtsil, bey humpʼél hahil tʼan tu tánileʼ dzoʼoc a betiʼqueʼex humpʼél promesa utiaʼal a meyahtiʼqueʼexeʼ yétel a betiʼqueʼex u tʼanoʼob, tu yoʼolal ca pátchahac u wequiʼc yaʼab u pixan ta wókoleʼex?

11 Le cah uʼuyaʼab tumen le maʼcoʼoboʼ le tʼanoʼobaʼ, papax kabnahoʼob tu yoʼolal hach quiʼmaʼquiʼl u yóloʼob ca tu yaʼalahoʼob: Leloʼ letiʼ u dzíbolal c pucsiʼkal.

12 Ca úcheʼ Almaeʼ tu maʼchah Helam, tumen letiʼ tyaʼan ichil le maʼcoʼob actánoʼ cah bin cah wáʼalahoʼob ichil le haʼoʼ ca tu kaʼam aʼalah: Yumtsil, wec a pixan yókol a meyhil maʼc ca u bet le meyahaʼ yétel sac pucsiʼkal.

13 Le cah dzoʼoc u yaʼalic le baʼaloʼobaʼ h lúb u pixan Yumtsil yókol ca tu yaʼalah: Helam, tumen yan ten u páhtalil le Dios minaʼan u xul u páhtalil Diosoʼ; quiʼn dzaʼic a woc haʼ bey humpʼél hahil tʼan de que dzoʼoc a betiʼc humpʼél promesa utiaʼal a meyahtiʼc tac tu kinil le quen químic a wínclil ca anac u weʼequel u pixan Yumtsil ta wókol, yétel ca anac u dzaʼabal tech cuxtal minaʼan u xul tu yoʼolal u salvacionil Cristo maʼx dzoʼoc u betiʼc desde tu cáhalil le yókolcabaʼ.

14 Le cah dzoʼoc u yaʼalic Alma le tʼanoʼobaʼ tu caʼatúliloʼob Alma yétel Helam h buʼuloʼob ichil le haʼoʼ, le cah líkoʼob cah hókoʼob ichil le haʼoʼ hach quiʼmaʼcchah u yóloʼob tumen h chuʼupoʼob yétel le Pixanoʼ.

15 Ca tu maʼchah Alma ulak maʼqueʼ ca caʼa oc tu caʼatén ichil le haʼoʼ ca tu dzah oc haʼ tiʼ xan heʼebix tu betiʼl yétel le yáx huntúloʼ, chén baʼaleʼ letiʼeʼ maʼ tu bulahuba ichil le haʼoʼ.

16 Bey úchic u láh dzaʼabal u yoc haʼ tulácal le maʼxoʼob h binoʼob teʼ cahtalil cu kabaʼtiʼc Mormonoʼ, u xoʼocol le maʼcoʼoboʼ u yaʼabiloʼobeʼ tu kúchul mín doscientos cuatro maʼcoʼob, beyoʼ h oc haʼnahoʼob ichil u haʼil Mormon cah chuʼupoʼob yétel u gracia Hahal Dios.

17 Ca tu kabaʼtubaoʼobeʼ, u iglesia Hahal Dios, wá u iglesia Cristo, tiʼ le kinoʼoboʼ tac le bín talacoʼ, cah úcheʼ tulácal le maʼxoʼob cu yoc haʼoʼob tu yoʼolal u páhtalil Hahal Diosoʼ tán caʼach u dzaʼabal tiʼ le iglesia.

18 Ca úcheʼ, Almaeʼ, tiʼ hach yaniʼl u páhtahil Dios tiʼeʼ, ca tu yéyah maʼcoʼob bey nohchiloʼob, huntúl nohchil yókol cincuenta maʼcoʼob tu dzah letiʼ utiaʼal u tsolic yétel u yeʼesic tiʼoʼob u baʼaliloʼob u reinoil Hahal Dios.

19 Ca tu yaʼalah tiʼoʼob mu caʼansicoʼob mixbaʼal wá maʼ chén le baʼaxoʼob dzoʼoc u caʼansic letiʼoʼ yétel letiʼ le baʼax aʼalaʼan tumen le hahil profetaoʼoboʼ.

20 Beyoʼ tu yaʼalah maʼ u caʼansicoʼob mixbaʼal wá maʼ chén ca u kex u yóloʼob yétel le fe tiʼ Yumtsil maʼx dzoʼoc u salvartiʼc u cahal.

21 Ca tu yaʼalah xan tiʼoʼob maʼ u yantal kuxil ichiloʼob baʼaleʼ cu sut u yichoʼob tánil tiʼoʼob yétel chén humpʼéliliʼ pacat, ca anac u humpʼél fe yétel humpʼél oc haʼ ca yanac u pucsiʼkaloʼob hunmuchʼ humpʼéliliʼ yétel yacunah tiʼ huntúl yétel ulak.

22 Bey úchic u yaʼalic tiʼoʼob ca u caʼansoʼob. Bey xan úchic u betiʼcubaoʼob u palaloʼob Hahal Diosoʼ.

23 Ca tu yaʼalah tiʼoʼob ca u betoʼob u kinil Yumtsil yétel ca xan u dzaoʼob gracia tiʼ Hahal Dios sánsamaʼl.

24 Ca tu yaʼalah xaneʼ le maʼcoʼob yan páhtalil tiʼoʼob letiʼ le maʼc tu yéyoʼoboʼ ca meyahnacoʼob yétel u kaboʼob utiaʼal u caxtiʼc u cuxtaloʼob.

25 Cah dzaʼab humpʼél kin tiʼ semaʼna utiaʼal u muchʼtaloʼob u caʼansoʼob le cahoʼ yétel utiaʼal u yeʼesicoʼob u yacunah tu Yumtsil Hahal Dios yétel xan u muchʼquiʼntiʼcubaoʼob heʼe haytén u páhtaleʼ.

26 Le xan le maʼcoʼob nohchiloʼob maʼ u tséntaaloʼob tumen le cahoʼ baʼaleʼ yoʼolal u meyahoʼob cu kamicoʼob u gracia Hahal Dios tu yoʼolal u nohochtaloʼob tiʼ pixan ca yanac u cambalil Dios tiʼoʼob tu yoʼolal u páhtal u caʼansicoʼob yétel u mukil Hahal Dios.

27 Tu yaʼalah xan Almaeʼ le maʼxoʼob cu muchʼtaloʼob teʼ iglesia cu deber u dzaic u baʼalubaoʼob, heʼebix anic heʼel bucaʼah yan tiʼ cada huhuntúlileʼ, wá hach yaʼab yan tiʼeʼ, yaʼab cu deber u dzaic, wá xan humpʼít yan tiʼeʼ, chén humpʼít u kátaal tiʼ, le maʼx minaʼan xan tiʼeʼ ca dzaʼabac tiʼ.

28 Bey cu deber u dzaicoʼob humpʼít tiʼ baʼax yan tiʼoʼoboʼ, le cun síhil tu tuculoʼob yétel tu yilahoʼobeʼ yétel u hach maʼalob dzíbolal tiʼ Hahal Dios, xan tiʼ le maʼcoʼob nohchiloʼob wá minaʼan tiʼoʼob, beyoʼ, bey xan tulácal le maʼxoʼob minaʼan u nokoʼoboʼ.

29 Lelaʼ letiʼ le tu yaʼalah tiʼoʼobaʼ tumen bey úchic u yaʼalaʼal tiʼ tumen Dios, cah xímbalnahoʼob hach toh tu tánil Hahal Dios, tán u yántiʼcubaoʼob tu batsiloʼob, le baʼax kabét tiʼ u wínclil yétel u pixanil, heʼebix kabétiʼl tiʼ cada huhuntúlileʼ.

30 Tulácal tun lelaʼ h úch teʼ cúchil cu kabaʼeʼ Mormonoʼ, beyoʼ tu hál haʼil Mormon, teʼ káx nadz tiʼ u haʼil Mormonoʼ, tu káxil Mormon, bucaʼah hadzutsil tiʼ u yichoʼob le maʼxoʼob kúch tiʼoʼob u naʼatiʼl u Salvador teʼeloʼ. Beyoʼ bucaʼah quiʼ yóloʼob, tumen bín u kayoʼob quiʼmaʼc ólal kayoʼob minaʼan u xul.

31 Ca h betaab le baʼaloʼobaʼ tu hálil tiʼ le luʼumoʼ tu yoʼolal maʼ u yoheltiʼc le reyoʼ.

32 Baʼaleʼ heʼel túnoʼ le rey ca tu yoheltah humpʼél líkiʼl teʼ cahoʼ, tu túxtah u meyhul maʼcoʼob utiaʼal ca u chʼucoʼob. Le betiʼqueʼ humpʼél kin le cah muchʼlahoʼob utiaʼal u yuʼuboʼob u tʼan Yumtsileʼ dzoʼoc u yoheltiʼc le rey.

33 Ca tu yaʼalah le reyoʼ, Almaeʼ tán u chiʼichnaccunsic le cah utiaʼal u sut yóloʼob tu contra le reyoʼ le betiʼqueʼ tu túxtah u meyah maʼcoʼob utiaʼal ca quínsaʼacoʼob.

34 Chén baʼaleʼ Alma yétel u cahal Yumtsil tu yoheltahoʼob tán u tal le meyhil maʼcoʼob le reyoʼ, le betiʼqueʼ tu chʼahoʼob u bisbil nahoʼob yétel u kaloʼob cah pʼudzoʼob tac ich kaxil.

35 U yaʼabiloʼob cu kúchul mín cuatrocientos cincuenta maʼcoʼob.