1 Le ca úch, le ca h dzoʼoc u tán rey Benjamin yétel u cahaleʼ tu túxtah ichiloʼobeʼ tu yoʼolal u yoheltiʼc wá cu creertiʼcoʼob u tʼan tu yaʼalah tiʼoʼoboʼ.

2 Tulácal le maʼcoʼoboʼ tu mul yáwátoʼob ca tu yaʼalahoʼob: C creertiʼc tulácal le tʼanoʼob dzoʼoc a wáʼalic toʼonaʼ, xan c oheʼl hach hahtac tumen u pixan Yumtsil tulácal páhtalil yan tiʼeʼ kexpah c pucsiʼkal ichiloʼon, dzoʼoc u pʼaʼatal maʼatech u tactal c betiʼc kas, baʼaleʼ chén c betiʼc uts maʼntadz.

3 Beyxan chén toʼoneʼ tu yoʼolal u minaʼan u xul u yutsil Hahal Dioseʼ yétel le baʼax tu caʼansah le Hahil Pixanoʼ yan toʼon yaʼab naʼatiʼl tiʼ le baʼaloʼob cun h taloʼoboʼ, wá xan quen kabétchaqueʼ heʼel u páhtal c aʼalic tu yoʼolal le Hahil Pixanoʼ tulácal baʼax bín úchucoʼ.

4 Tu yoʼolal le fe yan toʼon tiʼ le baʼax tu yaʼalah toʼon c reyoʼ, c naʼatiʼc le nohoch caʼansahaʼ, tu yoʼolal xan leloʼ cu quiʼmaʼcchahal c ól yétel humpʼél quiʼmaʼc ólal hach táh nohoch.

5 Yétel c dzíboltiʼc c bet promesa yétel Dios utiaʼal ca c bet u yólal yétel u tʼan tiʼ tulácal le baʼax quen u túxt toʼon, tac u xuʼulul c kinil tu yoʼolal maʼ c tasic t ókol humpʼél mukyah minaʼan u xul heʼebix dzoʼoc u yaʼalic le u angeloʼ tu yoʼolal maʼ c ukic tu copail u kuxil Dios.

6 Lelaʼ hach letiʼ le tanoʼob u kát u yuʼub caʼach le rey Benjaminoʼ; le betiʼqueʼ tu yaʼalah tiʼoʼob: Dzoʼoc a wáʼaliqueʼex hach le baʼax in kát caʼacheʼ, le xan le promesa dzoʼoc a betiʼqueʼexaʼ humpʼél promesa hach toh.

7 Behlaʼtúneʼ tu yoʼolal le promesa dzoʼoc a betiʼqueʼexaʼ bin tʼanaqueʼex u palaloʼob Cristo, u xíbil palal yétel u xchʼupul palal tumen heʼel túnaʼ behlaʼeʼ letiʼ dzoʼoc u dzic teʼex u sásil pixan, tumen ca wáʼaliqueʼexeʼ dzoʼoc u kexpahal a pucsiʼkaleʼex tiʼ a feoʼ tu kabaʼ, le betiʼqueʼ h síheʼex tiʼ letiʼ yétel dzoʼoc a betiʼcabaeʼex u xíbil palal yétel u xchʼupul palal.

8 Yétel yanal le kabaʼ heʼelaʼ ca xímbaleʼex hálkabil, tumen minaʼan ulʼak kabaʼ utiaʼal a ca pátac a salvartaaleʼex, le betiʼqueʼ in kát a chʼaʼeʼex ta wókoleʼexeʼ u kabaʼ Cristo, tulácaleʼex le dzoʼoc a betiʼqueʼex promesa yétel Dios utiaʼal a wuʼuyiqueʼex u tán tac tu xul a cuxtaleʼexoʼ.

9 Bín úchuc túneʼ le maʼx quen u bet lelaʼ bín anac tu xnoʼoh kabil Dios, tumen u yoheʼl le kabaʼ cu tʼaʼanaloʼ tumen bín tʼaʼanac tu kabaʼ Cristo.

10 Tán u yúchuleʼ le maʼx maʼ tu chʼaic u kabaʼ Cristo tu yókoleʼ yan u bisic u yanal kabaʼ, le betiʼqueʼ bín anac tu xdzíc Dios.

11 In kát xan ca kaʼahac teʼexeʼ, lelaʼ letiʼ le kabaʼ tiʼn wáʼalah teʼex quen in dza teʼexaʼ, lelaʼ mix bikin bín tuʼupuc chén wá tu yoʼolal keban, le betiʼqueʼ canántabaeʼex maʼ a wocoleʼex ich keban tu yoʼolal maʼ u tuʼupul le kabaʼ ta pucsiʼkaleʼexaʼ.

12 Quin wáʼalic teʼexeʼ ca a kaʼahseʼex teʼex a bisiqueʼex maʼntadz dzíbaʼan ta pucsiʼkaleʼex le kabaʼaʼ tu yoʼolal maʼ a yantaleʼex tu xdzíc Hahal Dios, baʼaleʼ ca a wuʼuyeʼex yétel ca kahólteʼex u tán le iquiʼl bín tʼanaqueʼex, bey xan le kabaʼ can u tʼanileʼexoʼ.

13 Tumen bix heʼel kahóltiʼc huntúl maʼc u dzuʼulil maʼ u meyahtmaʼheʼ, maʼ u kahóliʼ, nách xan yán tiʼ u tucul yétel baʼax u kát u bet u pucsiʼkaleʼ.

14 Ulák baʼal xaneʼ, cu chʼaʼic wá huntúl maʼc u tsímin tiʼ le maʼc cahaʼan tu tseloʼ yétel cu taaquiʼc? Quin wáʼalic teʼexeʼ, maʼ mix bín u chaʼ u hanal ichil u tamaʼnoʼobiʼ, baʼaleʼ bín u hóks táncab, quiʼn wáʼalic teʼexeʼ bey bín úchuc teʼex wá maʼ a woheʼleʼex le kabaʼ iquiʼl can tʼanbileʼexoʼ.

15 Le betiʼqueʼ in kát ca pʼátaqueʼex maʼalobiʼ yétel maʼ sutiʼc a wóleʼex ca yaʼabchac a betiʼqueʼex uts tu yoʼolal u páhtal a kaʼaxaleʼex tiʼ Cristo Yumtsil yan tulácal páhtalil tiʼ, tu yoʼolal u páhtal a bisaʼaleʼex caʼan yétel cuxtal minaʼan u xul tu yoʼolal naʼatiʼl, páhtalil, tohil yétel u chʼaʼabal ótsilil le maʼx h bet tulácal le baʼaloʼob wáy luʼumaʼ yétel teʼ caʼanoʼ, Hahal Dios tu yókol tulácal baʼal. Amen.