U Libroil Mosiah

1 Úchil u yúchul cu dzoʼocol u mentiʼc Mosiah le baʼax h aʼalaʼab tiʼ tumen u tataeʼ yétel u túxtiʼc tʼan tiʼ tulácal le nohoch cahaloʼ, cah muchʼlah maʼcoʼob h taloʼob tiʼ tulácal cahoʼob, tu yoʼolal u páhtal u binoʼob tiʼ templo u yuʼuboʼob u tʼan rey Benjamin quen u yaʼaleʼ.

2 Tiʼ hach yaʼabil maʼcoʼob h binoʼobeʼ maʼ tu xocahoʼobiʼ; tumen le cahoʼ dzoʼoc u hach sén yaʼabtal yétel dzoʼoc hach nohochtal tiʼ le luʼumoʼ.

3 Tu bisahoʼob xan u yáxoʼob tiʼ u h tamaʼnoʼob utiaʼal u mentiʼcoʼob humpʼél boʼol tiʼ Dios yétel u toʼoquiʼcoʼob baʼaloʼob heʼebix yaniʼl tu tʼan Moiseseʼ;

4 Yétel tu yoʼolal xan u páhtal u dzaic gracias tiʼ Yumtsil Hahal Dios tu yoʼolal u taasaloʼob lukicoʼob tu luʼumil Jerusalen, dzoʼoc u toʼocoloʼob tu kab u enemigoʼob yétel yéyaʼab xan uts maʼcoʼob yoʼolal u caʼansahoʼob ichiloʼob heʼebix xan huntúl maʼc hach uts bey u reyil, maʼx tu dzah paz ichiloʼob tu luʼumil Zaraheʼmla, tu caʼansah tiʼoʼob u betiʼcoʼob u tʼan Hahal Dios, tu yoʼolal ca quiʼmaʼcchahac u yóloʼob yétel ca chuʼupucoʼob yétel yacunah tiʼ Hahal Dios yétel tulácal maʼcoʼob.

5 Cah úch tún cu kuchuloʼob teʼ templooʼ ca tu wáʼalcuns u tanahoʼob pachil tiʼ cada huntúl maʼc yétel u láktsiloʼ, leloʼobaʼ, u yatan, u xíbil palal yétel u xchʼupul palal yétel u wáʼabiloʼob, cu cáhal tu nuctaquiʼl tac tu h tʼupil cada naheʼ chan náchaʼanoʼob láktsiloʼobeʼ tiʼ ulak.

6 Ca tu wáʼalcunsoʼob u meheʼn tanahoʼob tu baʼpach le templooʼ, ca tu dzahoʼob u honahil u tanahoʼobeʼ tu tohil le templooʼ, beyaʼ u páhtal u pʼaʼataloʼob ich naheʼ baʼaleʼ cu páhtal u yuʼubicoʼob baʼax cu yaʼalic Benjamin u reyil;

7 Tu yoʼolal hach yaʼabil le maʼcoʼoboʼ rey Benjamineʼ maʼ tu páhtal u caʼansicoʼob tulácal ichil u pakiloʼob le templooʼ. Le betiʼqueʼ tu betah humpʼél caʼanal cheʼ, tuʼux cun h naʼacal tʼan tu yoʼolal u páhtal u yuʼubaʼal baʼax quen u yaʼaleʼ.

8 Ca tun anchah u cáhal u tʼan yétel u cahal tu caʼanil cheʼoʼ, baʼaleʼ maʼ tulácal maʼc cu páhtal yuʼubic baʼax cu yaʼalic tu yoʼolal hach yaʼabil le maʼcoʼobo, le betiʼqueʼ ca tu túxtah ca dzíbtaac u tʼan ca túxtaac tiʼ le maʼxoʼob tuʼux maʼ túxtah ca dzíbtaac u tʼan ca túxtaac tiʼ le maʼxoʼob tuʼux maʼ tu kuchul u yuʼubaʼal u tʼanoʼ tu yoʼolal u páhtal u kamicoʼob xan.

9 Leloʼobaʼ letiʼ le tʼanoʼob yaʼalahaʼ yétel tu túxtah dziʼibilaʼ: In sucuʼuneʼex, tulácal le dzoʼoc a múchʼtaleʼex yétel cu páhtal a wuʼuyiqueʼex le tʼanoʼob quen in wáʼal teʼex behlaʼaʼ. Heʼel túnaʼ maʼ tiʼn betah a taleʼex ca in báxaltʼanteʼexiʼ baʼaleʼ utiaʼal ca a wuʼuyeneʼex, le quen a heʼ a xiquiʼneʼex tu yoʼolal u páhtal a wuʼuyiqueʼex, heʼ a pucsiʼkaleʼexeʼ tu yoʼolal u páhtal a naʼatiʼqueʼex a heʼiqueʼex a tuculeʼex tu yoʼolal u páhtal u yeʼesaʼal teʼex le baʼax tiʼ Hahal Dios maʼ kahólaʼaniʼ.

10 Maʼ túxteʼex ca taqueʼex wáy utiaʼal ca a chʼaeʼex sáhquiʼliʼ mix utiaʼal ca a tuculteʼexeʼ teneʼ hach maʼs nohochén tiʼ heʼmaʼxac maʼxileʼ.

11 Baʼaleʼ teneʼ beyen heʼebix teʼexoʼ pakbeʼenen tiʼ yétel tulácal heʼheʼlás kohaʼaniloʼob cu dzic ten tiʼn wínclil yétel pixanil. Chén baʼaleʼ tu yéyaheʼn le cahaʼ ca tu yéyen in tata, u kab Yumtsil dzaic u páhtalil ten in betiʼquiʼnba u nohochil tiʼ le cahaʼ yétel u maʼs nohochil páhtalil úch u taaquen tu yoʼolal in meyahtiʼqueʼex yétel tulácal páhtalil, naʼatiʼl yétel muk dzoʼoc u dzaic ten Yumtsil.

12 Quin wáʼalic teʼexeʼ bey úchic u chaʼabal ten in dzaic in kiniloʼob utiaʼal in meyahtiʼqueʼex tac tu kinil behlaʼeʼ; maʼ in dzamaʼh in tucul tiʼ a oro, mix tiʼ a plata, mix tiʼ ulʼak ayika lil;

13 Mix in chaʼ xan a kaʼalaleʼex tiʼ humpʼél kalbil mix ca betabaeʼex meyhuleʼex ichileʼex ta batsileʼex, mix ca a quínseʼex a wét maʼquiʼleʼex, h ocol, mix u cahtal mix huntúl atantsil yétel ulak yanal maʼc mix le íchamoʼ yétel yanal coʼolel maʼ dzoʼocaʼan u beliʼ; mix xan in chaʼ a betiʼqueʼex kas, baʼaleʼ dzoʼoc in caʼansic teʼex a betiʼqueʼex u tʼan Yumtsil tiʼ tulácal baʼaloʼob u yaʼalmaʼh teʼex.

14 Tac teneʼ h meyahnaheʼn yétel in kab tu yoʼolal u páhtal in meyahtiʼqueʼex, tu yoʼolal maʼ pʼusiqueʼex yókol boʼoleʼex yétel in luʼsic ta wókoleʼex baʼal aloʼob, tulácal baʼax in wáʼalmaʼh teʼexaʼ teʼex mismo hach a woheʼleʼex behlaʼeʼ.

15 Tulácal lelaʼ in sucuʼuneʼex, maʼ in bét le baʼaloʼobaʼ utiaʼal in nohochquiʼntiʼquiʼnbaiʼ, mix xan tán in wáʼalic utiaʼal in taquiʼc a poleʼex; baʼaleʼ tán in wáʼalic teʼex le baʼaloʼobaʼ tu yoʼolal ca anac a wohéltiʼqueʼexeʼ behlaʼeʼ cu páhtal in núquiʼc tu tán Hahal Dios yétel sac tucul.

16 Heʼel túnaʼ quiʼn wáʼalic tiʼ teʼex, maʼ in wáʼalmaʼh dzoʼoc in dzáic in cuxtal utiaʼal meyahtiʼqueʼexeʼ yoʼolal in nohochcuntiʼquiʼnba ta tánileʼexaʼ, baʼaleʼ chén tu meyhul Hahal Dios yaneʼn.

17 Heʼel túnaʼ, quiʼn wáʼalic teʼex le baʼaloʼoba tu yoʼolal ca a caneʼex naʼatiʼl; tu yoʼolal ca a wohélteʼexeʼ le cún yanac teʼex tu meyhul a láktsileʼexeʼ, chén tu meyhul a Dioseʼex yaneʼex.

18 Heʼel túnaʼ, dzoʼoc a tʼaniqueneʼex a reyileneʼex; wá ten, le maʼx a tʼaniqueʼex reyoʼ, quiʼn meyah utiaʼal in meyahtiʼqueʼex, maʼ wá u deber ca meyahnaqueʼex teʼex utiaʼal a meyahtiʼcabaeʼex ta batsileʼexiʼ?

19 Heʼel túnaʼ, wá ten, le maʼx ca wáʼaliqueʼex a reyeʼex, maʼx dzoʼoc u maʼnsic u kíniloʼob ta meyhuleʼex, chén baʼaleʼ dzoʼoc u yantal tu meyhul Hahal Dios, cun nahmaʼtiʼc a dza diosboʼotiʼquiʼleʼexeʼ, sén kaʼanaʼan a dziqueʼex gracias tiʼ a rey teʼ caʼanoʼ!

20 Quin wáʼalic teʼexeʼ, in sucuʼuneʼex, wá ca dzaʼeʼex tulácal a gracias yétel a yabilah tʼanoʼob, yétel tulácal u páhtalil a wóleʼex, tiʼ le Dios h menteʼexoʼ, dzu taaquiʼqueʼex yétel dzu canántiʼqueʼex, dzoʼoc xan u betiʼc ca quiʼmaʼcchahac a wóleʼex, dzoʼoc xan u chaʼic a cahtaleʼex tiʼ paz, huntúl yétel ulʼak.

21 Tu háhil quiʼn wáʼalic teʼexeʼ, wá ca meyahtiʼqueʼex le maʼx betmaʼhiqueʼex desde u yáxil, yétel tu canántiʼqueʼex tiʼ humpʼél kin yétel ulʼakeʼ, tán u dzaic teʼex ik tu yoʼolal ca páhchac a cuxtaleʼex, a péqueʼex yétel a meyaheʼex heʼebix a wólaheʼexeʼ, tán xan u yántiʼqueʼex tiʼ hun sútuc tac tiʼ ulʼak, quiʼn wáʼalic teʼexeʼ wáʼ ca a meyahteʼex yétel tulácal a wóleʼex lailiʼ chén meyhul maʼqueʼex minaʼan baʼal u belal.

22 Heʼel túnaʼ, chén baʼax u kát letiʼeʼ ca a beteʼex u tʼanil; tumen dzoʼoc u prometertiʼc teʼex xa neʼ, wáʼ teʼex ca betiʼqueʼex u tʼaniloʼ, yan a nohochtaleʼex wáy yókol luʼumeʼ; letiʼ xaneʼ maʼ tu quexpahal yétel baʼax dzoʼoc u yaʼalic; le betiʼc túneʼ, wáʼ ca betiʼqueʼex le baʼax u yaʼalmaʼhoʼ, yan u dzaʼiqueʼex bendicionoʼob yétel yan u nohochquiʼnsiqueʼex.

23 Tumen yáx humpʼéleʼ, letiʼ h beteʼex yétel dzoʼoc xan u dzaic teʼex cuxtal, lelaʼ letiʼ a pʼaxmaʼheʼex tiʼ.

24 U caʼapʼéleʼ, letiʼeʼ u kát ca beteʼex baʼax dzoʼoc u yaʼalic, tumen wá a betiʼqueʼexeʼ séb dzic teʼex bendicion; bey túnaʼ dzoʼoc u boʼotiʼqueʼex. Lailiʼ a pʼaxmaʼheʼex tiʼeʼ; beyxann behlaʼeʼ, beyxann teʼ kinoʼob bín tacoʼob minaʼan u xul. Tiʼ baʼax can a nohochquiʼnsicabaeʼex?

25 Quin kátiʼc tún teʼex behlaʼeʼ: Heʼel wá u páhtal a wáʼaliqueʼex wábaʼax ta woʼolaleʼexeʼ? Quin núquiʼc teʼexeʼ: Maʼ. Maʼ tu páhtal a wáʼaliqueʼex beyeʼex heʼebix u polvoil le luʼumoʼ; cu dzoʼocoleʼ, tiʼ u polvoil luʼum h mentaabeʼex; baʼaleʼ heʼel túnaʼ, u polvoil le luʼum utiaʼal le maʼx h beteʼexoʼ.

26 Mix ten, maʼx ca wáʼaliqueʼex a reyeneʼex, maʼ u hach maʼalobiʼlen tiʼ teʼex ichileʼexiʼ, tumen teneʼ polvoen luʼum xan. Ca wiliqueʼex túneʼ dzoʼoc in chʼíhil, yétel hach taitac in kubic le wínclil wáy h luʼumaʼ tiʼ u naʼil luʼum.

27 Le betiʼqueʼ, heʼebix tiʼn wáʼalah tiʼn meyahtaheʼex, yétel in meyah tac hach tu sasaquiʼl in tucul tu tán Dios beyxann tiʼn betiʼlac a muchʼtaleʼex wáy behlaʼeʼ, tu yoʼolal ca in wilinba xmaʼ culpa yétel maʼ u wecah a kiʼikeleʼex tu yókol in pol le quen kuchuquen tu tán Dios utiaʼal u juzgartiʼquen tu yoʼolal baʼax tu túxten in bet ta woʼolaleʼex.

28 Quin wáʼalic teʼex dzoʼoc in túxtiʼqueʼex ca taqueʼex tu yoʼolal u páhtal in pʼoʼic in nok tiʼ a kiʼikeleʼex, behlaʼ tún hach taitac in wénel teʼ mucnal, tu yoʼolal in químil tiʼ paz, yétel tu yoʼolal u páhtal u unirtiʼcuba in pixan maʼ tu químil yétel pixanoʼob cu kayoʼob utiaʼal u kayic humpʼél quiʼmaʼc ólal tu tánil Dios toh.

29 Quin wáʼalic xan teʼexeʼ, tiʼn betah a múchʼtaleʼex wáyeʼ tu yoʼolal u páhtal in tsolic teʼexeʼ maʼ tu páhtal in betiʼquiʼnba a maʼestroileʼex mix a reyileʼex xan;

30 Tumen tac hach beʼora, tulácal in wínclileʼ tán u sén quiʼquiʼlanquiʼl, caʼaliquiʼl tán in tsicbatiʼc teʼex; baʼaleʼ Yumtsil Dios yántiʼquen yétel dzoʼoc u chaʼic in tʼan ta woʼolaleʼex; dzoʼoc xan u yaʼalic ten ca in wáʼal teʼexeʼ desde behlaʼeʼ in pal Mosiaheʼ letiʼ a reyileʼex yétel a nohchileʼex.

31 Beʼoraʼ túnaʼ; in sucuʼuneʼex, in kát ca yanac a meyaheʼex heʼebix dzoʼoc a betiʼqueʼex tac behlaʼaʼ. Bey heʼebix dzoʼoc a betiʼqueʼex le baʼaxoʼob tiʼn wáʼalah teʼexoʼ, beyxann le baʼax tu yaʼalah in tataoʼ, dzoʼoc u nohochchahaleʼex, yétel dzoʼoc a chʼaʼaleʼex tu kab a enemigoʼob, cu yúchul beyxannoʼ, wá ca betiʼqueʼex u tʼanoʼob in pal, wá u tʼanil Hahal Dios bín dzaʼabac teʼex tumen letiʼ, bín nohochquiʼnsaʼaqueʼex wáy luʼumeʼ, a enemigoʼobeʼexeʼ maʼ bín yanac páhtalil tiʼoʼob ta wókoleʼexiʼ.

32 Chén baʼaleʼ in cáhal, canántabaeʼex tu yoʼolal maʼ u líkiʼl baʼatel ichileʼex mix a chintaleʼex a wuʼuyeʼex u tʼan le kakas pixan, letiʼ tu yaʼalah in tata Mosiah.

33 Tumen heʼel túnaʼ, dzoʼoc u yaʼalic baʼal yoʼolal le maʼx u kát u yuʼub u tʼan le pixan heʼeloʼ; tumen le maʼx u kát u yuʼub u tʼaneʼ cu pʼátal cu químil ichil u kebanoʼobeʼ, cu yukic baʼal kas utiaʼal u pixan; tumen cu kamic u boʼoleʼ humpʼél hadz minaʼan u xul, tumen dzoʼoc u betiʼc keban tu tánil Dios tu contra le maʼalob baʼal u canmaʼhoʼ.

34 Quin wáʼalic tiʼ teʼexeʼ minaʼan mix huntúl ichileʼex, haʼali chén le hach meheʼn palal maʼ u kam caʼansah tiʼ le baʼaloʼobaʼ, a woheʼleʼex a pʼaxmaʼheʼex minaʼan u xul tiʼ a Tata teʼ caʼanoʼ utiaʼal a kubic tiʼ tulácal baʼax yan teʼex yétel teʼex mismo; dzoʼoc xan a cambal tiʼ le baʼaxoʼob aʼalaʼan tumen le profetaoʼob tac tu kinil c tata Lehi h hók tiʼ Jerusalen.

35 Tulácal baʼax tu yaʼalahoʼob c tataoʼob tac behlaʼeʼ. Heʼel túnaʼ, tu yaʼalahoʼob baʼax túxtaab tiʼoʼob tumen Yumtsil; le bétiʼqueʼ hach tohtacoʼob yétel hach tu hahil.

36 Quin wáʼalic tún teʼex behlaʼeʼ, in sucuʼuneʼex, cu dzoʼocol a wohéltiʼqueʼex yétel cu dzoʼocol a caʼansaʼaleʼex le baʼaloʼobaʼ, wá ca betiʼqueʼex kebanil yétel ca betiʼqueʼex baʼaloʼob heʼlaʼan tiʼ le baʼax aʼalaʼantacoʼ ca kuchuleʼex a kiʼitcabaeʼex tiʼ pixanil Yumtsil, maʼ ta dzaiqueʼex tuʼux u yantal tiʼ teʼex utiaʼal u yeʼesiqueʼex tu behil le naʼat tʼanoʼ, tu yoʼolal ca dzaʼabac teʼex bendicion ca nohochchahqueʼex a canántaaleʼex.

37 Quin wáʼalic teʼexeʼ, maʼx betiʼc le baʼaloʼob heʼelaʼ letiʼoʼob le cu líkiʼloʼob tu yókol Hahal Dios, le betiʼc túneʼ cu betiʼc le cu yaʼalic le kakas pixanoʼ yétel cu betiʼcuba enemigoil tiʼ tulácal baʼal toh, le betiʼc tún minaʼan tuʼux utiaʼal Yumtsil ich le maʼcoʼ, tumen maʼatech u cahtal ich temploʼob tuʼhaʼan.

38 Le betiʼc túneʼ wá le maʼc maʼ tu kexic u yóleʼ, baʼaleʼ cu químil yétel cu pʼátal sén nách tiʼ Hahal Dioseʼ, le baʼax cu kátiʼc le justiʼciaoʼ cu yahsic u yól humpʼél cuxaʼan yayah ólal minaʼan u xul tiʼ u keban le cu betiʼc u náchtal tu tánil Yumtsil yétel cu chupic u tsém yétel culpa yétel cu yahtal u yól, bey humpʼél kák maʼ tu tuʼupuleʼ, u kákileʼ naʼacal utiaʼal tulácal kin minaʼan u xul.

39 Quin wáʼalic tún teʼex maʼ tu chʼaʼabal otsil tu yókol le maʼcoʼ, le bétiʼqueʼ u hach xúlil cuxtaliʼleʼ u mukyahtiʼc humpʼél nohoch mukyah minaʼan u xul.

40 Teʼex tulácaleʼexeʼ! Chʼíhaʼaneʼex, teʼexeʼ tanqueleneʼex teʼexeʼ meheʼn palaleʼex cu páhtal a naʼatiʼqueʼex in tʼan tumen dzoʼoc in tʼaniqueʼex yétel tʼanoʼob hach tu bel tu yoʼolal u páhtal a naʼatiʼqueʼex in kát ca ahaqueʼex a kaʼahsic teʼex bucaʼah hach yayah ólal le maʼxoʼob dzoʼoc u lúbul ich kebanoʼob.

41 In kát xan ca a tuculteʼex bucaʼah utsil yétel quiʼmaʼc ólal anicoʼob le maʼxoʼob dzu betiʼcoʼob u tʼanil Hahal Diosoʼ. Tumen heʼel túnaʼ letiʼoʼobeʼ dzoʼoc u kamicoʼob u bendicion tiʼ tulácal baʼaloʼob, bey wáy h luʼumaʼ beyxann le ich pixan aniloʼoboʼ, yétel wá xan chucaʼan u yóloʼob tac tu dzoʼoqueʼ, bín kaʼamaʼcoʼob teʼ caʼanoʼ tu yoʼolal u cahtaloʼob yétel Hahal Dios minaʼan u xul u quiʼmaʼc ólal. Kaʼahac teʼex, kaʼahac teʼex, hach tu hahil tulácal le baʼaloʼoba tumen Hahal Dios aʼalmaʼhil.