1 Nooria, ngkanne e koro bukina bwa e aki maan i mwin are Moronaai e kanakoa ana reta nakon mataniwia kowana, ao e a karekea ana reta ma iroun Bwaoraan, mataniwia kowana ao aikai taeka ake e a karekei:

2 Ngai, ae Bwaoraan, are mataniwia kowana n te aba aei, I kanakoi au taeka aikai nakon Moronaai, mataniwia mataniwi n te taanga ni buaka. Nooria, I taku nakoim, Moronaai, bwa I aki kimwareirei ibukin karawawatakim ae korakora, eng, e bon karawawata tamneiu.

3 Ma nooria, iai ake a kimwareirei ibukin karawawatakimi, eng, n te aro are a teirake ni kaitaraai, ma au aomata naba ake naake a inaomata, eng, ao naake a tia n teirake e a bon rianako mwaitia.

4 Ao bon ibukiia naake a tia ni kataia n anaa te kaintekateka ni motikitaeka mai irou ae a karika te buakaka ae korakora aio; bwa a tia ni kabongana te mwaamwanaa te aba ae bati, ao a tia ni kairia nako nanoia aomata aika a mwaiti, are e na karika te karawawataki ae korakora i buakora; ao a tia n tauii ara bwai ake ti kainnanoi, man kabwara nanoia ara aomata ake a inaomata n te aro are aki roko nakoimi.

5 Ao nooria, a tia ni kakioai nako mai irouia, ao I a tia ni biri nako nakon te aba are Kiteon, ma raou mwaane are mwaitin are I kona ni karekea.

6 Ao nooria, I a tia ni kanakoa te katanoata ni kabuta mwakoron te aba aei; ao nooria, ao a bwarikoriko nakoira ni katoa bong, nakon aia bwai ni buaka, bwa a na tei ibukin abaia ma inaomataia, ma ni kabooi mwiin kairua ake a karaoaki nakoira.

7 Ao a tia n roko nakoira, n te aro are naake a teirake ni kaaitaraira a bon kaaitaraki, eng, n te aro are a bon maakuira man rawa n roko ni kaaitaraira n te buaka.

8 E a reke irouia te aba, ke te kaawa, are Taraemera; ao a tia n rinea te uea i aoia, ao e a tia ni koroboki nakon aia uea Reimwanaite, are e a itoman iai mangaia, are e itoman mangaia ma ni kukurei bwa e na kawakina te kaawa are Taraemera, are kawakinana aio e taku i nanona bwa e na reke iai aia anga Reimwanaite n tokanikai iaon nikiran te aba, ao e na katukaki bwa e na uea i aoia te botanaomata aio ngkana a tautaekanaki i aaia Reimwanaite.

9 Ao ngkai, n am reta ao ko a tia ni kabuakakaai, ma e aki kakawaki; I aki un, ma I bon kimwareirei n aron korakoran nanom. Ngai, ae Bwaoraan, I aki ukoukora te mwaaka, ma ti tauan au kaintekateka n tautaeka bwa I aonga ni kawakina inaomataia ma kainaomatakia au botanaomata. E teimatoa tamneiu n te inaomata ae e a tia ni kainaomataira iai te Atua.

10 Ao ngkai, nooria, ti na totokoa te buakaka e ngae ngkana e na waanako te raraa. Ti bon aki kan kawawaea raraaia Reimwanaite ngkana a bon tiku n oin abaia.

11 Ti aki tangiria ni kawawaea raraaia tarira ngkana aki teirake ni kaaitaraira ma n ana te kabaang ni kaaitaraira.

12 Ti na bon tautaekanaki n te amo n tautoronaki ngkana e riai ma ana momotiraoi te Atua, ke ngkana e bon anganiira te tua bwa ti na riai ni karaoia.

13 Ma nooria e bon aki anganiira te Atua bwa ti na tautaekanaki irouia ara kairiribai, ma ti na kawenea ara onimaki irouna, ao e na kainaomataira.

14 Ngaia are, tariu ae ko tangiraki, ae Moronaai, ti na riai n totokoa te buakaka, ao te buakaka are ti aki kona n totokoia n ara taeka, eng, taian kaitara ma itabaraara, ti na totokoi n ara kabaang, bwa e aonga n tiku inaomatara, bwa ti aonga ni kimwareirei ni bwaai aika a raka n te ekaretia, ao n ana waaki ara Tia Kabooira ao Atuara.

15 Ngaia are, kawaekoako nakomai nakoiu ma tabemwaang am koraki, ma ni katikuia nikiraia bwa a na kairaki irouia Riaai ma Teaenikam; anganiia te mwaaka bwa a na waakina te buaka ni mwakoron te aba anne, ni kaineti ma ana kairiri Tamnein te Atua, are bon tamnein te inaomata are irouia.

16 Nooria I a tia ni kanakoi tabeua bwaai ake a kainnanoi bwa aonga n aki mate ni karokoa ae kam kona n roko nakoiu.

17 Ikoikotiia am taanga ni buaka ake ko kona i nanon mwanangam n nakomai, ao ti na waekoa ni kaaitaraia taan biri nako mai iroura, ni korakoran te Atua ni kaineti ma te onimaki are iai iroura.

18 Ao ti na taua te kaawa are Taraemera, bwa ti aonga ni karekea riki te amwarake bwa ti na kanakoa nakoia Riaai ma Teaenikam; eng, ti na waaki nako ni kaaitaraia ni korakoran te Uea, ao ti na katoka te buakaka ae korakora aei.

19 Ao ngkai, Moronaai, I bon kimwareirei ngke I karekea am reta, bwa kanga I bon raraoma ni kaineti ma te bwai ae ti riai ni karaoia, bwa tao e riai ke e aki bwa ti na nako ni kaaitaraia.

20 Ma ko a tia n taku, ngkana aki rairinanoia ao e anga te tua te Uea bwa kam na nako ni kaaitaraia.

21 Taraia bwa ko na kamatoatoaia Riaai ma Teaenikam i nanon te Uea; tuangiia bwa a na aki maaku, bwa te Atua e na kainaomataia, eng, ma naake a bane n teimatoa i nanon te kainaomataki are te Atua e a tia ni karekea iai inaomataia. Ao ngkanne I kaina au reta nakoim tariu ae moan te tangiraki, Moronaai.