1 Ao ngkai e koro bukina bwa Aramwa e oki man te aba are Kiteon, i mwin reireinaia kaain Kiteon bwaai aika a mwaiti ae angiia aikoa kona ni manga koreaki, man tia ni katea bairean te ekaretia, n aron are e a tia ni karaoia n te aba are Taraemera, eng, e oki nakon oin ana auti i Taraemera bwa e na motirawa man ana mwakuri are e a tia ni karaoi.

2 Ao e a toki aia karuaiwa n ririki n tautaeka taan tia moti iaoia ana botanaomata Nibwaai.

3 Ao e koro bukina bwa i nanon waakin aia katebwina n ririki n tautaeka taan moti iaoia ana botanaomata Nibwaai, ao Aramwa e kitana te tabo arei ma ni waakina mwanangana nakon te aba are Mereki, i maeaon te karaanga are Tiron, i maeao i rarikin tian te rereua.

4 Ao e waaki n reireinia aomata ake a mena n te aba are Mereki ni kaineti ma ana botaki ae tabu te Atua, are e a tia ni weteaki iai; ao e waaki n reireinia aomata ni kabuta te aba ae Mereki.

5 Ao e koro bukina bwa aomata a roko irouna man tian te aba ni kabuta are e mena i rarikin te rereua. Ao a bwabetitoaki ni kabuta te aba.

6 Ao ngke e a tia ana mwakuri i Mereki ao e kitana ikekei, ao ma ni mwananga i nanon tenibong nakon te aba are i meangin Mereki ao e roko nakon te kaawa ae arana Amonia.

7 Ngkai bon te katei irouia ana botanaomata Nibwaai bwa a na arana abaia, ao aia kaawa, ao aia kaawa aika a uarereke, eng ma aia kaawa aika a rang n uarereke riki, n iangoan te moan aomata are e taua; ao ai bon aron are e karaoaki i Amonia.

8 Ao e koro bukina bwa ngke e a roko Aramwa nakon te kaawa are bubura are Amonia ao e a waaki n tataekina ana taeka te Atua nakoia.

9 Ngkai Tatan e a bon korakora ana mwakuri inanoia aomatan te kaawa are Amonia; mangaia ae a bon rawa n ongo nakon ana taeka Aramwa.

10 Ma e ngae n anne Aramwa e beku korakora n tamneina ni borabwata ma te Atua n te tataro ae korakora bwa e na kabwaroa Tamneina ae korakora iaoia ana botanaomata ake a maeka n te kaawa arei; bwa e na kariaiakaki bwa e na bwabetitoiia nakon te rairannano.

11 Ma e ngae n anne, ao a kamatoai nanoia, man taku nakoina: Nooria, ti ataia ae ngkoe Aramwa; ao ti ataia bwa ngkoe te ibonga ae rietata iaon te ekaretia are ko a tia ni katei n tabo aika a mwaiti n te aba, n aron ami katei; ao bon tiaki kaain am ekaretia ngaira ao ti bon aki kakoauai ami katei aika a burababa.

12 Ao ngkai ti ataia bwa ibukina bwa tiaki kaain am ekaretia ngaira ti ataia bwa akea mwaakam iaora; ao ko a tia n anganako te kaintekateka ni motikitaeka nakon Nibwaaia mangaia ae tiaki ngkoe te tia moti ae rietata iaora.

13 Ngkai ngke a tia n taekina aio aomata, ma ni kaaitarai ana taeka ni kabane, ma ni karawawata n aia taeka, ao ma ni bawareia, ao ma ni kariaia bwa e na teweaki nako man aia kaawa, e kitana ikekei ma ni waakina kawaina nakon te kaawa ae bubura ae Aaron.

14 Ao e koro bukina bwa i nanon mwanangana, e bon karawawataki n te nanokawaki, man rinanon te kataki ae bati ma kammarakan tamneina, ibukin buakakaia te botanaomata ake a mena n te kaawa ae bubura ae Amonia, e koro bukina bwa i nanon ana tai Aramwa ni karawawataki n te nanokawaki, nooria e kaoti ana anera te Uea nakoina, man taku:

15 Ko na kakabwaiaki ngkoe Aramwa; mangaia ae, tabeka atuum ao kimwareirei, bwa e korakora bukina bwa ko na kimwareirei; bwa ko a bon tia ni kakaonimaki ni kaawakin ana tua te Atua man te tai are ko moan karekea te rongorongo mai irouna. Nooria, bon ngai are I nikiria iroum.

16 Ao nooria, I kanakoaki bwa N na anganiko te tua bwa ko na oki nakon te kaawa ae bubura ae Amonia, ao ma ni kabwarabwara riki nakoia kaain te kaawa ae bubura anne; eng, kabwarabwara nakoia. Eng, taekina ae kangai nakoia, e na kamaunaingkami te Uea ae te Atua ti ngkana kam rairinanomi.

17 Bwa noria, a kakorakoraia n iango n te tai aei bwa ana urua inaomataia am botanaomata, (bwa e taku te Uea) are e kaaitarai tua ao motikitaeka, ao ana tua te Atua are e a tia n angania ana botanaomata.

18 Ao ngkai e koro bukina bwa i mwin are Aramwa e karekea te rongorongo mai iroun ana anera te Uea e waekoa n oki nakon te aba are Amonia. ao e rin nakon te kaawa ae bubura aei n te kawai teuana, eng, man te kawai are e mena i maiakin te kaawa are Amonia.

19 Ao ngke e rin n te kaawa ao e roko irouna te baki, ao e taku nakon temanna te mwaane: Ko kona n angan ana toro te Atua ae mangori te bwai ae e na kanna?

20 Ao e taku teuarei nakoina: Ngai te Nibwaite, ao I ataia bwa ngkoe ana burabeti ae tabu te Atua, bwa bon ngkoe teuare e taku te anera n te mii ni burabeti bwa N na butimwaea. Mangaia ae, nako ma ngai nakon au auti ao N na anganiko kanau; ao I ataia bwa ko na riki bwa te kakabwaia nakoiu ao nakon batau.

21 Ao e koro bukina bwa teuarei e butimaeia nakon ana auti; ao teuarei bon arana Amureki; ao e uota te kariki ao te iriko ao e katikui i matan Aramwa.

22 Ao e koro bukina bwa Aramwa e kana te kariki ao e nuai; ao e kakabwaia Amureki ao batana, ao e karabwarabwa nakon te Atua.

23 Ao i mwin are e a tia n amwarake ao e nuai e taku nakon Amureki: Ngai Aramwa, ao te ibonga ae rietata ngai iaon ana ekaretia te Atua ni kabuta te aba.

24 Ao nooria, I a tia ni weteaki bwa N na tataekina ana taeka te Atua i buakoia te botanaomata aio, ni kaineti ma tamnein te kaotioti ao te taetae ni burabeti; ao I mena n te aba aio ao a aki butimwaeai, ma a tewenakoai ao N nang waaki n tannako man te aba aio n aki toki.

25 Ma nooria, I a tia n tuangaki bwa N na rairaki kaua ao man taetae ni burabeti nakoia te botanaomata aio, eng, ao ma ni kakoaua nakoia buakakaia.

26 Ao ngkai, Amureki, ibukin ae ko a tia ni kamwarakeai ma ni butimwaeai, ko na kakabwaiaki; bwa I baki, ibukin ae I a tia n aki mamatam i nanon bong aika a mwaiti.

27 Ao Aramwa e tiku ma Amureki i nanon bong aika a mwaiti i mwaain ae e kabwarabwara nakoia aomata.

28 Ao e koro bukina bwa aomata a matoatoa ma ni korakora riki buakakaia.

29 Ao e roko te taeka iroun Aramwa, ni kangai, Nako; ao taekinna naba nakon au toro ae Amureki, bwa e na waaki nako ao n taetae ni burabeti nakoia te botanaomata aio ni kangai, Rairinanomi ngkami, bwa e taku te Uea, ngkana kam aki rairinanomi ao N na kawaria te botanaomata aio n uniu; eng, ao e na aki rairaki nako uniu ae korakora.

30 Ao Aramwa e waaki nako, ao Amureki naba, i buakoia aomata, n taekina ana taeka te Atua nakoia; ao a kaonaki n te Tamnei ae Raoiroi.

31 Ao iai te mwaaka are a anganaki, n te aro are a aki kona ni kabureaki i nanon taian nono, ao bon akea naba te aomata ae kona n tiringia; ma e ngae n anne a bon aki kabongana mwaakaia ni karokoa ae a kabaeaki ni bwaai ni kabaebae ao a teweaki nako nanon te karabuti. Ngkai, e karaoaki aio n te aro ae te Uea e na kaota mwaakana irouia.

32 Ao e koro bukina bwa a waaki nako ao a kabwarabwara man taetae ni burabeti nakoia aomata, n aron te tamnei ao te mwaaka are e a tia te Uea n anganiia.