1 Ka sa qai yaco ni sa lesu mai na vanua o Kitioni ko Alama, ni sa oti na nona vakavulica e vuqa na ka ena sega ni rawa me volai, vei ira na tamata mai Kitioni, ka tauyavutaka na ivakarau ni lotu, me vaka sa vakayacora oti ena vanua ko Saraemala, io, sa qai lesu ko koya ki na nona vale mai Saraemala me vakacegu mai na cakacaka sa vakayacora oti.

2 Ia sa vakaoqo na kena mai cava na ikaciwa ni yabaki ni nodra veiliutaki na turaganilewa vei ira na tamata i Nifai.

3 Ka sa yaco ena itekivu ni ikatini ni yabaki ni nodra veiliutaki na turaganilewa vei ira na tamata i Nifai, sa biuta na vanua ko ya ko Alama ka lako yani ki na vanua ko Mileki, ka koto ena ra ni uciwai ko Saitoni, ena ra ni iyalayala ki na lekutu.

4 Sa tekivu me vakavulici ira na tamata ena vanua ko Mileki me vaka na ivakarau tabu ni Kalou, me vaka sa lesi kina; ka sa tekivu me vakavulici ira na tamata ena vanua taucoko ko Mileki.

5 Ka sa yaco me ra lako mai vua na tamata mai na iyalayala ni vanua kece ki na lekutu. Ka ra sa papitaiso kecega ena vanua taucoko;

6 Ia ni sa oti na nona cakacaka ena vanua ko Mileki sa qai biuta na vanua ko ya, ka lako cake ki na vualiku kei Mileki me tolu na siga, sa qai yaco ki na koro levu ko Amonaia.

7 Sa dau nodra ivalavala na tamata i Nifai me ra vakayacana na nodra vanua, na nodra koro lelevu, kei na nodra koro lalai, io, na nodra veikoro kecega vei koya a taukena taumada; ia sa vakakina ena vanua ko Amonaia.

8 Ka sa yaco ni tadu ga yani ko Alama ki na koro levu ko Amonaia, sa tekivu me vunautaka sara na vosa ni Kalou vei ira na tamata.

9 Oqo sa taura vakaukauwa tu na yalodra na kai Amonaia ko Setani; o koya e ra sa sega ni via vakarorogo kina ki na vosa i Alama.

10 Ia oqo sa kaukauwa sara na nona cakacaka vakayalo ko Alama, sa veimulomulo kei na Kalou ka masuta vagumatua, me sovaraka na Yalona vei ira na tamata ena koro; ka vakatara me papitaisotaki ira ki na veivutuni.

11 Ia oqo, era sa vakaukauwataka ga na lomadra, ka kaya vua: Raica, keimami kila ni sai iko ko Alama; ka keimami kila talega ni sai iko na bete levu ni lotu ka ko sa tauyavutaka ena vuqa na vanua me vaka na nomuni ivakarau; ia keimami sega ni lewe ni nomu lotu, ka keimami sega tale ga ni vakabauta na lialia ni kena ivakarau.

12 Ia oqo keimami sa kila me vaka ni keimami sega ni lewe ni nomu lotu, keimami kila ni ko sa sega kina ni lewai keimami; ka ko sa solia na itikotiko ni veilewai vei Nifaia; o koya ko sa sega kina ni neimami turaganilewa levu.

13 Ia ni ra sa kaya oti vakaoqo na tamata, ka saqata na nona vosa kecega, ka ra sa vosa vakacacataki koya, kasivita, ka ra vakavuna me vakasavi tani mai na nodra koro levu, a sa cavutu mai kea ko koya ka lako vaka ki na koro levu ka vakatokai ko Eroni.

14 Ka sa yaco ni sa lako tiko ki kea, sa bikai koya na yaluma, ni vuto voli ena rarawa levu ni yalo ena vuku ni nodra ivalavala ca na tamata mai Amonaia, e a yaco ni sa bikai Alama tu vakaoqo na yaluma, raica sa rairai vua e dua na agilosi ni Turaga ka kaya:

15 Ko sa kalougata ko iko, Alama; o koya mo laveta cake kina na ulumu ka marau, ni sa kilikili mo marau; ni ko sa yalodina ni muria na ivakaro ni Kalou tekivu mai na gauna ko a taura kina nai matai ni tukutuku mai vei koya. Raica, sai au ga ka solia yani vei iko.

16 Ia raica, au sa talai mai me’u vakaroti iko mo lesu tale ki na koro levu ko Amonaia, ka vunauci ira tale na tamata ena koro levu ko ya; io, mo vunau vei ira. Io, mo kaya vei ira, vakavo sara ke ra veivutuni na Turaga na Kalou ena vakarusai ira.

17 Ia raica, era sa vulica tiko oqo me ra vakacacana na nodra galala na nomu tamata, (ni sa kaya vakaoqo na Turaga) ni sa veisaqasaqa kei na lawa, kei na lewa kei na ivakaro sa solia oti na Turaga vei ira na nona tamata.

18 Oqo ka sa yaco ni sa taura oti na nona itukutuku ko Alama mai vua na agilosi ni Turaga sa lesu kusarawa ko koya ki Amonaia. A sa curu ki na koro levu ena dua tale na sala, io, na sala ka koto ena ceva ni koro levu ko Amonaia.

19 Ia ni sa curuma ko koya na koro levu ko ya sa viakana sara, sa kaya vua e dua na tamata: E rawa beka mo solia vua na tamata yalomalumalumu ni Kalou oqo e dua na ka me kania?

20 A sa kaya vua na tamata ko ya: Koi au e dua na Nifaiti, au kila ni ko sa parofita yalosavasava ni Kalou, ka sai kemuni na tamata sa tukuna vei au na agilosi ena raivotu ka kaya: Mo na ciqoma. O koya, me daru mai lako ki na noqu vale me’u solia vei kemuni na kakana; ia au kila ni ko na veivakalougatataki vei au kei na noqu vuvale.

21 Ka sa yaco me kauti koya ki na nona vale; na yaca ni tamata ko ya ko Amuleki; sa vakarautaka e matai Alama na madrai kei na lewe ni manumanu.

22 Ka sa yaco me kana ko Alama ka mamau; sa vakalougatataki Amuleki kei na nona vuvale, ka vakavinavinaka vua na Kalou.

23 Ia ni sa kana oti ka mamau sa qai kaya vei Amuleki: Koi au ko Alama, na bete levu ni lotu ni Kalou ena vanua taucoko.

24 Ia raica, au sa vakaroti me’u mai vunautaka na vosa ni Kalou ena kedra maliwa na tamata kece oqo, me vaka na yalo ni vakatakila kei na parofisai; ka ni’u a tiko ena vanua oqo era qai sega ni ciqomi au, ia e ra sa vakasavi au tani, ia au a sa vakarau vakanadakuya me sega ni mudu na vanua oqo.

25 Ia raica, au sa vakaroti me’u lesu tale mai ka parofisai vei ira na tamata oqo, io, me’u vakadinadinataka na nodra ivalavala ca.

26 Ia oqo, Amuleki, ni ko sa vakani au ka kauti au ki vale, ko sa kalougata; raica sa vuqa na siga na noqu lolo voli, ka’u sa viakana sara tu ga.

27 A sa tiko ko Alama me vuqa na siga ena vale nei Amuleki ni se bera na nona vunau vei ira na tamata.

28 Ka sa yaco ni sa sivia sara na nodra caka ca na tamata.

29 A sa yaco vei Alama na vosa, ka kaya: Mo lako yani; ka kaya tale ga vei Amuleki na noqu tamata, me lako yani ka parofisai vei ira na tamata oqo, ka kaya—Dou veivutuni, ni sa kaya vakaoqo na Turaga, kevaka dou sa sega ni veivutuni au na sikovi ira na tamata oqo ena noqu cudru; io, au na sega ni kauta tani vei ira na noqu cudru waqawaqa.

30 Sa lako yani ko Alama, ka vakakina ko Amuleki, vei ira na tamata, ka vunautaka na vosa ni Kalou vei ira; a rau sa vakasinaiti ena Yalo Tabu.

31 A sa soli vei rau na kaukauwa, ka sa sega kina ni rawa me rau sogo ena vale butobuto; io sa sega tale ga ni rawa me dua e yaviti rau; ia erau sa sega ni vakaraitaka na nodrau kaukauwa oqo me yacova ni rau sa vesu ka biu ki na vale ni veivesu. Sa yaco na ka oqo, me vakaraitaka kina na Turaga na nona kaukauwa sa tu vei rau.

32 Ka sa yaco ni rau sa lako yani ka tekivu me vunau ka parofisai vei ira na tamata, me vaka na yalo kei na kaukauwa sa solia vei rau na Turaga.