Mukanda wa Enosha

1 Monayi, biakalua ne mema, Enosha, mumanya tatuanyi ne uvua muntu mululama—bualu bua wakandongesha mu muakulu wenda, ne kabidi mu dikolesha ne didimuisha dia Mukalenga—ne dibeneshibua dikala dîna dia Nzambi wanyi bua nanku—

2 Ne nennuambila bua mvita imvua nayi kumpala kua Nzambi, kumpala kua mema kupeta dilekedibua dia mibi yanyi.

3 Monayi, ngakaya kuasa nyama mu metu; ne mêyi amvua ngumvua tatuanyi wamba misangu mivula bua moyo wa tshiendelela, ne disanka dia bansantu, akadîna menamena mu mutshima wanyi.

4 Ne anyima wanyi uvua ne nzala; ne ngakatua binu kumpala kua Mufuki wanyi, ne ngakabila kudiye mu disambila dia bukitu ne ditendekena bua anyima wanyi; ne dituku dijima ngakabila kudiye; eyowa, ne pakalua butuku ntshivua mbandisha dîyi bikola bua ne difika mu diûlu.

5 Ne kuakalua dîyi kundi, diamba: Enosha, mibi yeba yabuikidibu, ne neubeneshibua.

6 Ne mema, Enosha, mvua mumanya ne Nzambi kavua bua kushima to; bua nanku, dipîla dianyi diakakupudibua.

7 Ne ngakamba: Mukalenga, bidi bienzeka munyi?

8 Ne wakangambila: Amu bua ditabuija dieba mu Kilisto, ûtu kuyi muanji kumvua anyi kumona. Ne bidimu bia bungi nebipita kumpala kua yeya kudileja mu musunyi; ki bualu kayi, ndâku, ditabuija dieba diakupandishi.

9 Mpindiewu, biakalua ne pangakumvua mêyi â ngakabanga kujinga diakalengela dia bana betu, Bena Nefi; bua nanku, ngakapumuna anyima wanyi mujima kudi Nzambi buabu.

10 Ne pantshivua nduangana nanku mu nyuma, monayi, dîyi dia Mukalenga diakalua mu meji anyi kabidi, diamba: Nenkumbula bana benu bilondeshila dinanukila diabu ku dilama dia mikenji yanyi. Ngakabapesha bulaba ebu, ne budi bulaba bua tshijila; ne ntshiena mbutshipa to pa kumbusha bua bubi; bua nanku, nenkumbula bana benu bilondeshila mungakamba; ne disambuka dia mikenji diabu nedikulula ne kanyinganyinga kanyi pa mitu yabu nkayabu.

11 Ne kunyima kua mema, Enosha, mumana kumvua mêyi â, ditabuija dianyi kudi Mukalenga diakabanga kulua kadiyi dinyungana to; ne ngakamusambila ne diditatshisha dia bungi dila bua bana betu, Bena Lamana.

12 Ne biakalua ne kunyima kua mema mumana kusambila ne kuenza mudimu ne dinanukila dionsu, Mukalenga wakangambila: Nenkupesha bilondeshila majinga eba, bualu bua ditabuija dieba.

13 Ne mpindiewu mona, etshi tshivua dijinga dimvua njinga kudiye—ne bikalabi nanku, bua ne bantu banyi, Bena Nefi, bapona mu disambuka mikenji, ne mu mushindu mukuabu babutuka, ne Bena Lamana kabayi babutuka, ne Mukalenga Nzambi anyisha kulama miandiku ya bantu banyi, Bena Nefi; nansha biobi bikala ku bukola bua diboku dienda dia tshijila, bua atuadibua mu amua matuku alualua kudi Bena Lamana, bua, pamuapa, badi bua kupeta lupandu—

14 Bualu mpindiewu ntatu yetu idi tshianana bua kubapinguluja ku ditabuija dilelela. Ne bakaditshipa mu tshiji tshiabu ne, bu biobi bua kukumbana, bavua mua kutushipa, ne kunyangakaja miandiku yetu ne kabidi ngikadilu yonsu ya batatuetu.

15 Bua nanku, mema mumanya ne Mukalenga Nzambi uvua ukumbana kulama miandiku yetu, ngakabila kudiye ne munanunanu, bualu uvua mungambila: Tshintu tshionsu tshiwalomba ne ditabuija, witaba ne neutshipeta mu dîna dia Kilisto, neutshipeta.

16 Ne mvua ne ditabuija, ne ngakabila kudi Nzambi bua alama miandiku; ne wakenza tshipungidi nanyi ne neayituala kudi Bena Lamana mu diba dienda nkayenda.

17 Ne mema, Enosha, mvua mumanya ne nebikala bilondeshila ku tshipungidi tshivuaye muenza; bua nanku anyima wanyi wakikisha.

18 Ne Mukalenga wakangambila: Ba tatueba bakandomba pabu tshintu etshi; ne netshienzeka bilondeshila ku ditabuija diabu; bualu ditabuija diabu divua bu dieba.

19 Ne mpindiewu biakalua ne mema, Enosha, ngakendakana munkatshi mua bantu ba Nefi, mu kuamba ku Nyuma bua malu alualua, ne mu kujadika malu amvua mumvua ne mumona.

20 Ne ndi njadika ne bantu ba Nefi bakakeba ne dinanukila bua kupinguluja Bena Lamana ku ditabuija dilelela kudi Nzambi. Kadi midimu yetu ivua tshianana; lukinu luabu luvua lushindama, ne bavua balombodibua kudi buikadi bubi buabu ne bakalua bena mu tshisuku, ne bena tshikisu, ne bantu bamatshishi ba mashi, buwula ne ditendelela dia mpingu ne bukoya; badia nyama idi idia mikuabu; basomba mu ntenta, ne batambakanyi mu tshipela ne tshiseba tshipi tshisuika ku bimonu biabu ne mitu yabu mikungula; ne tshiabu bumanyi buvua ku dienzela dia difuma, ne kela ka mvita, ne kasuyi. Ne ba bungi ba munkatshi muabu bavua badia amu munyinyi mubishi; ne bavua bakeba misangu yonsu bua kutushipa.

21 Ne biakalua ne bantu ba Nefi bakadima buloba, ne bakakuna mishindu yonsu ya nteta, ne wa bimuma, ne bakamuna bisumbu bia bimuna, ne bisumbu bia nyama ya mishindu yonsu, ne mbuji, ne mbuji ya muitu, ne tubalu tua bungi kabidi.

22 Ne kuvua bambi bapita bungi munkatshi muetu. Ne bantu bavua bantu ba nshingu mîminyina, bena ngumvuilu mukesa.

23 Ne kakuvua tshintu to pa kumbusha mêyi makola mapita, diyisha kuamba ku Nyuma bua mvita, ne makokangana, ne dinyanguka, ne dibavuluija lufu misangu yonsu, ne bula bua tshiendelela, ne bitungu ne bukola bua Nzambi, ne bintu bionsu ebi—kubasonsola misangu yonsu ne kubalama mu ditshina dia Mukalenga. Ndi ngamba kakuvu tshintu tshivua tshipanga bintu ebi to, ne diakula patoka dinena menamena, divua mua kubapandisha kudipueka lubilu mu dibutuka. Ne bilondeshila mushindu ewu ndi mfunda malu abu.

24 Ne ngakamona mvita pankatshi pa Bena Nefi ne Bena Lamana munkatshi mua matuku anyi.

25 Ne biakalua ne ngakabanga kukulakaja, ne bidimu lukama makumi muanda muteketa ne tshitema biakapita katshia ku tshikondu tshiakumbuka tatuetu Lehi ku Yelushalema.

26 Ne ngakamona ne ndi pabuipi ne tshia kupueka mu lukita luanyi, mumana kuenzejibua kudi bukola bua Nzambi bua mema kuyisha dîyi ne kuamba ku Nyuma kudi bantu aba, ne kuakula dîyi bilondeshila bulelela budi mu Kilisto. Ne mvua mubuakula mu matuku anyi onsu, ne mvua musankamu kupita bia pa buloba.

27 Ne katataka ndi nya ku muaba wa tshikishilu tshianyi, kudi Musungidi wanyi; bualu ndi mumanya ne nengikisha munda muenda. Ne ndi nsanka bua dituku diavuala mubidi wanyi wa lufu mubidi udi kawuyi ufua, ne wimana kumpala kuenda; apu nemmona mpala wenda ne disanka, ne neangambila: Luaku kundi, wewa mubeneshibua, kudi muaba muklongoluela mu nzubu wa Tatuanyi. Amena.