1 ’E i muri a’era, e hua’ai ’o Seza nō Heta—’e ’ua pohe ihora Heta i te tupura’a te o’e, ’e tōna ’utuāfare pā’āto’a, maori rā ’o Seza—nō reira, ’ua ha’amata ihora Seza i te ha’apūai fa’ahou i taua feiā ra i topa i roto i te ’ati.

2 ’E i muri a’era, tē ha’amana’o ra Seza i te ha’amoura’ahia tōna mau metua, ’e ’ua fa’ati’a ’oia i te hō’ē bāsileia parauti’a ; nō te mea ’ua ha’amana’o ’oia i tā te Fatu i rave nō te ’āfa’ira’a mai ia Iareda ’e tōna taea’e nā ni’a i te moana hōhonu ; ’e ’ua pe’e ’oia i te mau ’ē’a o te Fatu, ’e ’ua fānau mai ’oia i te mau tamari’i tamāroa ’e te mau tamari’i tamāhine.

3 ’E ’ua ’ōrurehau mai tāna tamaiti matahiapo iāna, ’o Seza tōna i’oa ; ’āre’a rā ’ua taparahihia Seza e te rima o te hō’ē ta’ata ’eiā haru, nō tāna mau tao’a rahi, i tupu fa’ahou ai te hau o tōna ra metua tāne.

4 ’E i muri a’era, ’ua patu tōna metua tāne i te mau ’oire rarahi e rave rahi i ni’a i te fenua, ’e ’ua ha’amata fa’ahou te mau ta’ata i te purara haere i ni’a i te fenua. ’E ’ua ora a’era Seza ē tae noa atu ’ua rū’au roa ’oia ; ’e ’ua fānau ihora tāna ’o Ripelakisa. ’E ’ua pohe ihora ’oia, ’e ’ua fa’atere mai ra Ripelakisa ’ei mono nōna.

5 ’E i muri a’era, ’aita roa Ripelakisa i rave i te mea tano i mua i te aro o te Fatu, ’e ’ua rave ho’i ’oia e rave rahi mau vahine ’e te mau vahine tāvini, ’e ’ua tu’u ’oia i te mea teiaha roa i ni’a iho i te tapono o te ta’ata ; ’oia ïa, ’ua tute ’oia ia rātou i te tute teiaha roa ; ’e nā roto i taua mau tute ra ’ua patu ’oia i te mau fare rarahi e rave rahi.

6 ’E ’ua hāmani ihora ’oia i te hō’ē terōno nehenehe roa nōna, ’e ’ua patu ihora i te mau fare tāpe’ara’a e rave rahi, ’e te feiā ’o tē ’ore e ’aufau i tā rātou mau tute ’ua huri ’oia ia rātou i roto i te fare tāpe’ara’a ; ’e te feiā ’o tē ’ore e ti’a ’ia ’aufau i tā rātou mau tute, ’ua huri ’oia ia rātou i roto i te fare tāpe’ara’a ; ’e ’ua fa’aue ’oia ’ia rave noa rātou i te ’ohipa nō te pāturu ia rātou ; ’e te feiā ’o tei pāto’i ’ia rave i te ’ohipa, ’ua fa’aue ’oia ’ia ha’apohe-roa-hia rātou.

7 Nō reira ’ua roa’a iāna te tā’āto’ara’a nō tāna mau ’ohipa maitata’i roa ; ’oia ïa, tāna ’auro maita’i ’o tāna i fa’aue ’ia tāmāhia i roto i te fare tāpe’ara’a ; ’e ’ua fa’aue ’oia ’ia ravehia te mau huru ’ohipa maitata’i ato’a i roto i te fare tāpe’ara’a. ’E i muri a’era, ’ua fa’atae ’oia i te ’ati i ni’a i te mau ta’ata nā roto i tāna mau ’ohipa tai’ata ’e te mau ’ohipa vi’ivi’i.

8 ’E ’ia ma’iri te ārea nō te maha ’ahuru ’e ma piti matahiti te maoro nō tāna fa’aterera’a, ’ua ’ōrurehau a’era te mau ta’ata iāna ; ’e ’ua tupu fa’ahou ihora te ’arora’a i ni’a i te fenua, ’e nō reira ho’i ’ua taparahihia ihora Ripelakisa, ’e ’ua ti’avaruhia atu ra tōna hua’ai i rāpae i te fenua.

9 ’E i muri a’era, i muri iho i te ārea nō te mau matahiti e rave rahi te maoro, ’ua ha’aputuputu ’āmui ihora Morianetona (e hua’ai ho’i ’oia nō Ripelakisa) i te hō’ē nu’u fa’ehau nō roto mai i taua feiā i ti’avaruhia ra, ’e ’ua haere atu ra ’oia ’e ’ua ’aro atu ra i te mau ta’ata ; ’e ’ua roa’a a’era iāna te mana i ni’a i te mau ’oire e rave rahi ; ’e ’ua tupu a’era te ’arora’a i te rahi roa, ’e ’ua tupu te reira e rave rahi matahiti te maoro ; ’e ’ua roa’a a’era te mana iāna i ni’a i te mau fenua ato’a, ’e ’ua fa’ariro ’oia iāna iho ’ei ari’i i ni’a i te mau fenua ato’a.

10 ’E i muri iho i tōna fa’arirora’a iāna ’ei ari’i, ’ua ha’amāmā ihora ’oia i te hōpoi’a i ni’a i te mau ta’ata, ’e nō reira ’ua herehia ’oia e te mau ta’ata, ’e ’ua fa’atāhinu a’era rātou iāna ’ei ari’i nō rātou.

11 ’E ’ua rave ’oia i te ’ohipa tano i ni’a i te mau ta’ata, ’aita rā ’oia i nā reira iāna iho, nō te mea tē rave rahi ra ’oia i te mau ’ohipa tai’ata ; nō reira ’ua tāpū-’ē-hia ’oia i te aro o te Fatu.

12 ’E i muri a’era, ’ua patu ihora Morianetona i te mau ’oire e rave rahi, ’e ’ua riro te mau ta’ata ’ei feiā tao’a rahi i raro a’e i tāna fa’aterera’a, i te pae nō te mau fare, ’e te ’auro, ’e te ’ārio, ’e te fa’a’apu sītona, ’e te mau nana māmoe, ’e te mau nana pua’atoro, ’e te mau mea i fa’aho’ihia mai ia rātou ra.

13 ’E ’ua ora noa Morianetona ē tae noa atu ’ua rū’au roa ’oia, ’ei reira ’ua fānau mai ra tāna ’o Kima ; ’e ’ua fa’atere ihora Kima ’ei mono i tōna metua tāne ; ’e ’ua fa’atere noa ’oia e va’u matahiti ’e ’ua pohe ihora tōna metua tāne. ’E i muri a’era ’aita Kima i fa’atere ma te parauti’a, nō reira ’aita ’oia i auhia mai e te Fatu.

14 ’E ’ua ’ōrurehau mai ra tōna taea’e iāna, ’e nā roto i te reira ’ua tu’u ’oia iāna i roto i te fa’atītīra’a ; ’e ’ua vai noa ’oia i raro a’e i te fa’atītīra’a i te tā’āto’ara’a nō tōna mau mahana ; ’e ’ua fānau ihora ’oia i te mau tamari’i tamāroa ’e te mau tamari’i tamāhine ’a vai noa ai ’oia i raro a’e i te fa’atītīra’a ; ’e i tōna ruhiruhiāra’a ’ua fānau mai ’oia ia Levi, ’e pohe atu ra ’oia.

15 ’E i muri a’era, ’ua tāvini noa Levi i roto i te fa’atītīra’a i muri iho i te pohera’a o tōna metua tāne, nō te ārea e maha ’ahuru ’e ma piti matahiti te maoro. ’E ’ua ’aro atu ’oia i te ari’i o te fenua, ’e ’ua roa’a a’era iāna te bāsileia.

16 ’E i muri iho i te roa’ara’a mai te bāsileia iāna, ’ua rave ’oia i te mea tano i mua i te aro o te Fatu ; ’e ’ua manuia te mau ta’ata i ni’a i te fenua ; ’e ’ua ora noa ’oia ē tae noa atu i te ruhiruhiā-roa-ra’a, ’e ’ua fānau ihora ’oia i te mau tamari’i tamāroa ’e te mau tamari’i tamāhine ; ’e ’ua fānau ato’a a’era ’oia ia Koroma, ’o tāna i fa’atāhinu ’ei ari’i ’ei mono nōna.

17 ’E i muri a’era, ’ua rave Koroma i te mea maita’i i mua i te aro o te Fatu i te tā’āto’ara’a o tōna ra mau mahana ; ’e ’ua fānau ihora ’oia i te mau tamari’i tamāroa ’e te mau tamari’i tamāhine e rave rahi ; ’e ’ia ’ite a’era ’oia i te mau mahana e rave rahi, ’ua pohe atu ra ’oia, mai tō te ao ato’a nei ; ’e ’ua fa’atere a’era Kisa ’ei mono nōna.

18 ’E i muri a’era, ’ua pohe ato’a ihora Kisa, ’e ’ua fa’atere mai ra Liba ’ei mono nōna.

19 ’E i muri a’era, ’ua rave ato’a Liba i te mea maita’i i mua i te aro o te Fatu. ’E i te mau mahana o Liba ’ua ha’amouhia taua mau ’ōphī ta’ero ra. Nō reira ’ua haere atu ra rātou i te fenua i te pae apato’a nō te taparahi haere i te ’ānimara ’ei mā’a nā te mau ta’ata o te fenua, nō te mea ’ua ’ī roa te fenua i te mau ’ānimara nō te uru rā’au. ’E ’ua riro ato’a atu ra Liba ’ei ta’ata ’aravihi i te ’ohipa taparahi ’ānimara.

20 ’E ’ua patu ihora rātou i te hō’ē ’oire rahi i te fenua oaoa, i te vāhi e fa’ata’a ’ē te moana i te fenua.

21 ’E ’ua fa’aherehere noa ihora rātou i te fenua i te pae apato’a ’ei mēdēbara, ’ia roa’a mai te ’ānimara ’ōviri. ’E te fenua i te pae apato’erau ra, ’ua ’ī roa ïa i te ta’ata.

22 ’E ’ua riro rātou ’ei feiā itoito i te rave i te ’ohipa, ’e te ho’o mai ra ’e te ho’o atu ra rātou, ’e te taui noa ho’i te tahi i te tahi, ’ia roa’a ia rātou te faufa’a.

23 ’E ’ua ’ohipa rātou i te mau huru ’ōfa’i metalo ato’a, ’e ’ua roa’a ia rātou te ’auro, ’e te ’ārio, ’e te ’āuri, ’e te veo, ’e te mau huru metalo ato’a ; ’ua ’ō mai rātou i te reira nō roto mai i te fenua ; nō reira, ’ua ha’apu’e teitei rātou i te repo ’ia roa’a te ’ōfa’i metalo, tei roto te ’auro, ’e te ’ārio, ’e te ’āuri, ’e te kapa. ’E ’ua rave rātou i te mau huru ’ohipa maitata’i ato’a.

24 ’E tē vai ra tā rātou mau tirita, ’e te ’ahu paruai maita’i roa ; ’e ’ua hāmani rātou i te mau huru ’ahu ato’a, ’ia ti’a ia rātou ’ia fa’a’ahu ia rātou iho i tō rātou vai-taha’a-ra’a.

25 ’E ’ua hāmani rātou i te mau huru mauha’a rave ’ohipa ato’a nō te fa’a’apu i te fenua, nō te ’ārote i te fenua ’e nō te ueue i te huero, nō te ’ō’oti ’e nō te ’ūtaru, ’e nō te papa’i ato’a ho’i i te huero sītona.

26 ’E ’ua hāmani rātou i te mau huru mauha’a rave ’ohipa ato’a nō te fa’a’ohipa i tā rātou mau ’ānimara.

27 ’E ’ua hāmani rātou i te mau huru mauha’a tama’i ato’a. ’E ’ua hāmani ato’a rātou i te mau huru ’ohipa ta’a ’ē roa.

28 ’E ’aita atu e feiā i ha’amaita’i-rahi-hia atu mai ia rātou te huru, ’e ’o tei ha’amanuia-rahi-hia atu e te rima o te Fatu. ’E tē pārahi ra rātou i te fenua tei hau atu i te maita’i i te mau fenua ato’a, ’e nā te Fatu ho’i i parau mai i te reira.

29 ’E i muri a’era, ’ua ora noa Liba e rave rahi matahiti, ’e ’ua fānau ihora ’oia i te mau tamari’i tamāroa ’e te mau tamari’i tamāhine ; ’e ’ua fānau ato’a mai ’oia ia Hearetoma.

30 ’E i muri a’era, ’ua fa’atere a’era ’o Hearetoma ’ei mono nō tōna ra metua tāne. ’E ’ia ma’iri te piti ’ahuru ’e ma maha matahiti nō te fa’aterera’a a Hearetoma, inaha, ’ua rave-’ē-hia atu te bāsileia mai iāna atu. ’E ’ua tāvini noa ’oia e rave rahi matahiti i roto i te fa’atītīra’a ; ’oia ïa, ē hope roa a’e tōna ra pu’e mahana.

31 ’E ’ua fānau a’era ’oia ia Heta, ’e ’ua ora noa Heta i roto i te fa’atītīra’a i te tā’āto’ara’a nō tōna ra pu’e mahana. ’E ’ua fānau a’era Heta ia Aarona, ’e ’ua ora noa Aarona i roto i te fa’atītīra’a i te tā’āto’ara’a nō tōna ra pu’e mahana ; ’e ’ua fānau ihora ’oia ia Amenigada, ’e ’ua ora noa ato’a Amenigada i roto i te fa’atītīra’a i te tā’āto’ara’a nō tōna ra pu’e mahana ’e ’ua fānau a’era ’oia ia Korianetuma, ’e ’ua ora noa Korianetuma i roto i te fa’atītīra’a i te tā’āto’ara’a nō tōna ra pu’e mahana ’e ’ua fānau ihora ’oia ia Koma.

32 ’E i muri a’era, ’ua rave atu Koma i te hō’ē ’āfara’a o te bāsileia nō te pe’e atu iāna. ’E ’ua fa’atere a’era ’oia i ni’a i taua ’āfara’a nō te bāsileia ra e maha ’ahuru ’e ma piti matahiti ; ’e ’ua haere atu ’oia e ’aro i te ari’i ra ia Amigida, ’e ’ua ’aro noa rātou nō te ārea e rave rahi matahiti te maoro, ’e i taua taime ra ’ua roa’a ia Koma te mana i ni’a ia Amigida, ’e ’ua roa’a ato’a te mana iāna i ni’a i te toe’a o te bāsileia.

33 ’E i te mau mahana o Koma ’ua tupu fa’ahou ihora te mau ’ohipa ’eiā haru i ni’a i te fenua ; ’e ’ua fa’a’ohipa rātou i te mau ’ōpuara’a tahito, ’e ’ua fa’atere i te mau tapura’a mai tō tahito ra, ’e ’ua tītau fa’ahou a’era ’ia ha’amou i te bāsileia.

34 I teienei ’ua ’aro rahi atu Koma ia rātou ; noa atu i te reira, ’aita ’oia i manuia i ni’a ia rātou.