1 Kag natabo ini nga si Sez, nga isa ka kaliwat ni Het—kay si Het napatay tungod sang tiggulutom, kag ang tanan niya nga panimalay luwas lang kay Sez—gani, ginsugdan ni Sez ang pagpabakod liwat sing isa ka nabungkag nga katawhan.

2 Kag natabo ini nga nadumduman ni Sez ang kalaglagan sang iya mga amay, kag nagpauswag sia sing isa ka matarong nga ginharian; kay nadumduman niya kon ano ang ginhimo sang Ginuo sa pagdala kay Jared kag sa iya utod patabok sa kadadalman; kag naglakat sia sa mga dalanon sang Ginuo; kag nangin amay sia sang mga anak nga lalaki kag mga anak nga babayi.

3 Kag ang iya kamagulangan nga anak nga lalaki, nga ang ngalan amo si Sez, nagrebelde batok sa iya; apang, si Sez gin-atake paagi sa kamot sing isa ka tulisan, tungod sang iya tuman nga manggad, nga nagdala liwat sang paghidaet sa iya amay.

4 Kag natabo ini nga ang iya amay nagpauswag sang madamo nga siyudad sa ibabaw sang kadutaan, kag ang katawhan nagsugod liwat sa paglinapta sa tanan nga bahin sang ibabaw sang kadutaan. Kag si Sez nagkabuhi tubtob sa tuman nga katigulangon; kag nangin amay sia ni Riplakis. Kag napatay sia, kag si Riplakis naggahum bulos sa iya.

5 Kag natabo ini nga si Riplakis wala naghimo sinang matarong sa panulok sang Ginuo, kay may madamo sia nga asawa kag mga oloasawa, kag gintungtong niya sa mga abaga sang mga tawo inang mabudlay pas-anon; huo, ginbuwisan niya sila sang mabug-at nga mga buwis; kag paagi sa mga buwis nagpatukod sia sang madamo nga maligwa nga mga bilding.

6 Kag nagpahimo sia para sa iya kaugalingon sing isa ka tuman katahum nga trono; kag nagtukod sia sang madamo nga bilanggoan, kag kon sin-o man ang indi magpaidalom sa mga buwis ginhunong niya sa bilanggoan; kag kon sin-o man ang indi makabayad sang mga buwis ginhunong niya sa bilanggoan; kag nagsugo sia nga mag-obra sila sing dalayon para sa ila ikabuhi; kag kon sin-o man ang indi mag-obra ginapapatay niya.

7 Gani naangkon niya ang tanan niya nga pulido nga hinimo, huo, bisan ang iya puraw nga bulawan ginpapino niya sa bilanggoan; kag ang tanan nga sari sang pulido nga pagpanghimo ginpahanabo niya nga himuon sa bilanggoan. Kag natabo ini nga ginpaantos niya ang katawhan sang iya mga pagkamakihilawason kag mga kangil-aran.

8 Kag sang naggahum sia sa sulod sang kwarenta’y dos ka tuig ang katawhan nag-alsa sa pagrebelde batok sa iya; kag nagsugod nga may giyera liwat sa kadutaan, sa bagay nga napatay si Riplakis, kag ang iya mga kaliwat ginpanabog halin sa kadutaan.

9 Kag natabo ini, pagkatapos nga nakaligad ang madamo nga tinuig, si Morianton, (sia nga isa ka kaliwat ni Riplakis) nagtipon sang kasoldadohan sang mga sinikway, kag nagsalakay kag nakig-away sa katawhan; kag nakaangkon sia sing gahum sa madamo nga siyudad; kag ang giyera nangin tuman kagrabe, kag naglawig sa sulod sang madamo nga tinuig; kag nakaangkon sia sing gahum sa bug-os nga kadutaan, kag ginpahamtang ang iya kaugalingon bilang hari sa bug-os nga kadutaan.

10 Kag pagkatapos nga napahamtang niya ang iya kaugalingon bilang hari ginpamag-an niya ang palas-anon sang katawhan, nga sa sini naangkon niya ang kahamuot sa mga mata sang katawhan, kag ginhaplas nila sia nga mangin ila hari.

11 Kag ginpatuman niya ang hustisya sa katawhan, apang indi sa iya kaugalingon tungod sang iya madamo nga pagkamakihilawason; gani ginsikway sia halin sa presensya sang Ginuo.

12 Kag natabo ini nga si Morianton nagpatukod sang madamo nga siyudad, kag ang katawhan nangin tuman kamanggaranon sa idalom sang iya pagginahum, sa mga bilding, kag sa bulawan kag pilak, kag sa pagpananom sang uyas, kag sa mga panong, kag mga kasapatan, kag sinang mga butang nga ginpanumbalik sa ila.

13 Kag si Morianton nagkabuhi tubtob sa tuman nga katigulangon, kag dayon nangin amay sia ni Kim; kag si Kim naggahum bulos sa iya amay; kag naggahum sia sing walo ka tuig, kag ang iya amay napatay. Kag natabo ini nga si Kim wala naggahum sa pagkamatarong, gani wala sia nahamut-an sang Ginuo.

14 Kag ang iya utod nag-alsa sa pagrebelde batok sa iya, nga sa amo nga paagi gindala niya sia sa pagkabihag; kag nagpabilin sia sa pagkabihag sa tanan niya nga adlaw; kag nangin amay sia sang mga anak nga lalaki kag mga anak nga babayi sa pagkabihag, kag sa iya katigulangon nangin amay sia ni Levi; kag napatay sia.

15 Kag natabo ini nga si Levi nag-alagad sa pagkabihag pagkatapos sang kamatayon sang iya amay sa sulod sang kwarenta’y dos ka tuig. Kag nakig-away sia batok sa hari sang kadutaan, nga sa amo nga paagi naangkon niya para sa iya kaugalingon ang ginharian.

16 Kag pagkatapos nga naangkon niya para sa iya kaugalingon ang ginharian ginhimo niya inang husto sa panulok sang Ginuo; kag ang katawhan nag-uswag sa kadutaan; kag nangin malawig ang iya kabuhi, kag nangin amay sang madamo nga mga anak nga lalaki kag mga anak nga babayi; kag nangin amay man sia ni Corom, nga iya ginhaplas bilang hari bulos sa iya.

17 Kag natabo ini nga ginhimo ni Corom inang maayo sa panulok sang Ginuo sa tanan niya nga adlaw; kag nangin amay sia sang madamo nga mga anak nga lalaki kag mga anak nga babayi; kag pagkatapos nga nabuhi sia sang madamo nga adlaw nagtaliwan sia, bisan pareho sang iban pa sa duta; kag si Kis naggahum bulos sa iya.

18 Kag natabo ini nga si Kis nagtaliwan man, kag si Lib naggahum bulos sa iya.

19 Kag natabo ini nga ginhimo man ni Lib inang maayo sa panulok sang Ginuo. Kag sa mga adlaw ni Lib nagkalamatay ang dalitan nga mga man-og. Gani nagkadto sila sa kadutaan pa-sur agud magpangita sang makaon para sa katawhan sang kadutaan kay ang kadutaan bugana sing mga kasapatan sang lasang. Kag si Lib man mismo nangin isa ka sagad nga mangangayam.

20 Kag nagtukod sila sing isa ka dako nga siyudad malapit sa makitid nga duta, malapit sa lugar nga sa diin ginatunga sang dagat ang duta.

21 Kag gintigana nila ang kadutaan pa-sur nga mangin isa ka kamingawan agud makapangayam. Kag ang bug-os nga ibabaw sang kadutaan pa-norte napuno sang mga pumuluyo.

22 Kag tuman sila kapisan, kag nagbinaklanay sila kag nagbinaligyaanay kag nagnegosyohanay agud makakwarta sila.

23 Kag nagpanghimo sila sang tanan nga sari sang milinahon, kag nagpanghimo sila sang bulawan, kag pilak, kag salsalon, kag saway, kag tanan nga sari sang mga metal; kag ginpangutkot nila ini halin sa duta; gani, nagkutkot sila sang dalagko nga tinumpokan sang duta agud magkuha sang milinahon, sang bulawan, kag sang pilak, kag sang salsalon, kag sang tumbaga. Kag nagpanghimo sila sang tanan nga sari sang pulido nga hinimo.

24 Kag may mga sida sila, kag lino nga manipis; kag nagpanghimo sila sang tanan nga sari sang tela agud mapanaptan nila ang ila mga kaugalingon halin sa ila pagkahublas.

25 Kag nagpanghimo sila sang tanan nga sari sang mga galamiton sa pag-uma sang duta, sa pag-arado kag sa pagsab-og, sa pag-ani kag sa pagsadol, kag sa paglinas man.

26 Kag nagpanghimo sila sang tanan nga sari sang mga galamiton nga paagi sa sini ginpatrabaho nila ang ila mga sapat.

27 Kag nagpanghimo sila sang tanan nga sari sang mga armas sa giyera. Kag nagpangabudlay sila sa tanan nga sari sang buluhaton nga may tuman kapulido nga pagkahimo.

28 Kag wala na sing katawhan nga labaw pa nga ginbugayan sangsa ila, kag labaw pa nga ginpauswag sang kamot sang Ginuo. Kag yara sila sa kadutaan nga labing pinili sa tanan nga kadutaan kay ang Ginuo ang naghambal sini.

29 Kag natabo ini nga si Lib nagkabuhi sa madamo nga tinuig, kag nangin amay sang mga anak nga lalaki kag mga anak nga babayi; kag nangin amay man sia ni Hiertom.

30 Kag natabo ini nga si Hiertom naggahum bulos sa iya amay. Kag sang naggahum si Hiertom sang beynte kwatro ka tuig, tan-awa, ang ginharian gin-agaw sa iya. Kag nag-alagad sia sing madamo nga tinuig sa pagkabihag, huo, bisan sa tanan nga nabilin niya nga mga adlaw.

31 Kag nangin amay sia ni Het, kag si Het nagkabuhi sa pagkabihag sa tanan niya nga mga adlaw. Kag si Het nangin amay ni Aaron, kag si Aaron nagpuyo sa pagkabihag sa tanan niya nga mga adlaw; kag nangin amay sia ni Amnigadas, kag si Amnigadas nagpuyo man sa pagkabihag sa tanan niya nga mga adlaw; kag nangin amay sia ni Coriantum, kag si Coriantum nagpuyo sa pagkabihag sa tanan niya nga mga adlaw; kag nangin amay sia ni Com.

32 Kag natabo ini nga napasunod ni Com ang katunga sang ginharian. Kag naggahum sia sa katunga sang ginharian sa kwarenta’y dos ka tuig; kag nagsulong sia agud magpakig-away batok sa hari nga si Amgid, kag nag-away sila sa sulod sang madamo nga tinuig, nga sa sulod sini nga panahon naangkon ni Com ang gahum kay Amgid, kag naangkon ang gahum sa nabilin sang ginharian.

33 Kag sa mga adlaw ni Com nagsugod nga may mga tulisan sa kadutaan; kag ginsunod nila ang dumaan nga mga plano, kag nagpahayag sang mga panumpa suno sa paagi sang mga dumaan, kag nagtinguha liwat sa paglaglag sang ginharian.

34 Karon si Com nakig-away sing tuman batok sa ila; apang, wala sia nagdaug batok sa ila.