1 ’E i teienei, ’ua tupu te hō’ē ’anatemara’a rahi i ni’a i te fenua tā’āto’a nō te mau ’ohipa ’ī’ino a te mau ta’ata ; ’e nō te reira ’ia vaiiho te hō’ē ta’ata i tāna mauha’a rave ’ohipa ’e ’aore rā i tāna ’o’e i ni’a iho i tāna ’iri vaira’a, ’e ’aore rā i te vāhi i ha’apa’ohia nō te reira, inaha, ’ia ao a’e, ’aita ïa te reira e ’itehia iāna, nō te rahi o te ’anatemara’a i ni’a i te fenua.

2 Nō reira ’ua mau māite te ta’ata tāta’itahi i tāna ihora i tōna rima, e ’aore ’oia e tīpe’e e ’aore ato’a e hōro’a ia tīpe’ehia ; ’e e tāpe’a noa te ta’ata tāta’itahi i te tāpe’ara’a o tāna ’o’e i tōna rima atau, nō te pāruru i tāna tao’a e i tōna iho ora, e tō tāna ra mau vahine e tō tāna ra mau tamari’i.

3 ’E i teienei, i muri iho i te ārea nō te piti matahiti, ’e i muri iho i te pohera’a o Sareda, inaha, ’ua ti’a mai ra te taea’e o Sareda ’e ’ua ’aro mai ra ia Korianetumera, ’e ’ua pau ihora ’oia ia Korianetumera, ’e ’ua a’ua’u atu ra ’oia iāna ē tae atu ra i te mēdēbara ra i Akisa.

4 ’E i muri a’era, ’ua ’aro mai ra te taea’e o Sareda iāna i roto i te mēdēbara i Akisa ; ’e ’ua pūai roa te ’arora’a, ’e ’ua pohe e rave rahi tauatini i te ’o’e.

5 ’E i muri a’era, ’ua pārahi ha’a’ati a’era Korianetumera i te mēdēbara ra, ’e i te pō ’ua haere mai ra te taea’e o Sareda i rāpae i te mēdēbara, ’e ’ua taparahi ihora ’oia i te hō’ē pae o te nu’u fa’ehau o Korianetumera, ’a ta’ero ai rātou i te ’ava.

6 ’E ’ua haere a’era ’oia i te fenua ra nō Morona, ’e ’ua tu’u ihora ’oia ïāna iho i ni’a i te terōno o Korianetumera.

7 ’E i muri a’era, ’ua pārahi ihora Korianetumera ’e tōna nu’u fa’ehau i roto i te mēdēbara nō te ārea e piti matahiti te maoro, ’e ’ua tupu ihora tōna nu’u fa’ehau i te rahi.

8 I teienei, ’ua tupu ato’a a’era ho’i te nu’u fa’ehau o te taea’e o Sareda i te rahi, ’o Gileada tōna i’oa, nō te mea tē vai ra te mau pupu ’ohipa huna.

9 ’E i muri a’era, ’ua taparahi ihora tōna tahu’a rahi iāna ’a pārahi ai ’oia i ni’a iho i tōna ra terōno.

10 ’E i muri a’era, ’ua taparahihia ihora ’oia e te hō’ē o te mau pupu ’ohipa huna i roto i te hō’ē ’ē’a ’ite-’ore-hia, ’e ’ua roa’a mai ra te bāsileia iāna ; ’e tōna i’oa ’o Liba ïa ; ’e e ta’ata tino rahi roa ’o Liba, hau atu i te rahi i te tahi atu ta’ata i rotopū i te mau ta’ata ato’a.

11 ’E i muri a’era, i te matahiti mātāmua nō tā Liba fa’aterera’a, ’ua tae mai ra Korianetumera i te fenua ra nō Morona, ’e ’ua ’aro mai ra ia Liba.

12 ’E i muri a’era, ’ua ’aro mai ra ’oia ia Liba, ’e ’ua tā’iri ihora Liba i tōna rima, ’e ’ua puta ihora ; noa atu rā i te reira, ’ua ’aro noa te nu’u fa’ehau o Korianetumera ia Liba, ’e ’ua horo atu ra ’oia i te mau hiti nō te pae tahatai.

13 ’E i muri a’era, ’ua a’ua’u atu ra Korianetumera iāna ; ’e ’ua ’aro mai ra Liba iāna i te pae tahatai.

14 ’E i muri a’era, ’ua tā’iri ihora Liba i te nu’u fa’ehau o Korianetumera, ’e ’ua horo fa’ahou atu ra rātou i roto i te mēdēbara o Akisa.

15 ’E i muri a’era, ’ua a’ua’u atu ra Liba iāna e tae atu ra i te mau fenua pāpū nō Agosa. ’E ’ua rave atu Korianetumera i te mau ta’ata ato’a nā muri iho iāna ’a horo atu ai ’oia mai mua atu ia Liba i te vāhi tāna i horo atu.

16 ’E ’a tae atu ai ’oia i te mau fenua pāpū o Agosa ra, ’ua ’aro atu ra ’oia ia Liba, ’e ’ua tā’iri noa ihora ’oia iāna ē tae roa atu ’ua pohe roa ’oia ; noa atu rā i te reira, ’ua haere mai te taea’e o Liba ’ei mono iāna nō te ’aro ia Korianetumera, ’e ’ua pūai roa te ’arora’a, ’e ’ua horo ’ē fa’ahou atu ra Korianetumera mai mua atu i te nu’u fa’ehau o te taea’e o Liba.

17 I teienei, te i’oa o te taea’e o Liba ’o Siza ïa. ’E i muri a’era, ’ua a’ua’u atu ra Siza ia Korianetumera ’e ’ua ha’amou ’oia i te mau ’oire e rave rahi, ’e ’ua taparahi i te mau vahine ’e te mau tamari’i, ’e ’ua tūtu’i ihora ’oia i te mau ’oire i te auahi.

18 ’E ’ua tupu a’era te mata’u nō ni’a ia Siza i ni’a i te fenua tā’āto’a ; ’oia ïa, ’ua tae atu te parau nā ni’a i te fenua tā’āto’a—’O vai tē ti’a ’ia ti’a atu i mua i te nu’u fa’ehau o Siza ? Inaha, te pau ra tō te fenua i mua iāna.

19 ’E i muri a’era, ’ua ta’iruru ’āmui ihora te mau ta’ata i roto i te mau nu’u fa’ehau, i ni’a i te fenua tā’āto’a.

20 ’E ’ua ’āmahamaha a’era rātou ; ’e ’ua horo atu ra te hō’ē pae i roto i te nu’u fa’ehau o Siza, ’e ’ua horo a’era te tahi pae i roto i te nu’u fa’ehau o Korianetumera.

21 ’E nō te rahi ’e te maoro o taua ’arora’a ra, ’e nō te maoro o te ha’amani’ira’a toto ’e te taparahira’a ta’ata, i ’ī roa ai te fenua tā’āto’a i te mau tino pohe ra.

22 ’E nō te rū ’e te ’oi’oi o taua ’arora’a ra, ’aita e ta’ata toe nō te tanu i te feiā pohe, ’e ’ua haere ti’a rā rātou mai te ha’amani’ira’a toto i te ha’amani’ira’a toto, ma te vaiiho noa i te mau tino pohe o te mau tāne ’e te mau vahine, ’e tō te mau tamari’i i ni’a i te fenua, ’ei mā’a nā te mau tu’a o te tino nei.

23 ’E ’ua haere te hau’a ’ino nā ni’a i te fenua, ’oia ïa i ni’a i te fenua tā’āto’a ; nō reira ’ua pe’ape’a roa te mau ta’ata i te ao ’e te pō, nō taua hau’a ’ino ra.

24 Noa atu rā i te reira, ’aita roa ’o Siza i fa’aea i te a’ua’u atu ia Korianetumera ; nō te mea ’ua tapu ’oia ’ia tāho’o atu ia Korianetumera nō te toto o tōna taea’e i taparahihia, ’e ’ia fa’ahapa ho’i i te parau a te Fatu i tae mai ia Etera, i te nā-’ō-ra’a mai ē, e ’ore roa Korianetumera e pohe i te ’o’e.

25 ’E nō reira tē ’ite nei tātou ē, ’ua tae mai iho ā te Fatu i rotopū ia rātou nā roto i te ’īra’a o tōna ra riri ’ū’ana, ’e nā tā rātou mau ’ohipa ’ī’ino ’e tā rātou mau ’ohipa vi’ivi’i i fa’aineine i te ’ē’a nō tō rātou pohe mure ’ore.

26 ’E i muri a’era, ’ua a’ua’u atu ra Siza ia Korianetumera i te pae i te hiti’a o te rā ra, ē tae noa atu i te mau hiti i tahatai ra, ’e i reira ’ua ’aro mai ra ’oia ia Siza nō te ārea e toru mahana te maoro.

27 ’E e mea ri’ari’a roa te pau i rotopū i te mau nu’u fa’ehau o Siza, ’e nō reira ’ua tupu ihora te mata’u o te mau ta’ata, ’e ’ua ha’amata ihora rātou i te horo atu mai mua atu i te mau nu’u fa’ehau o Korianetumera ; ’e ’ua horo atu ra rātou i te fenua ra nō Korihora, ’e ’ua taparahi ihora i te mau ta’ata i mua ia rātou, ’ia rātou pā’āto’a ’o tē ’ore e ’āmui mai ia rātou.

28 ’E ’ua fa’ati’a ihora rātou i tō rātou mau ti’ahapa i te peho ra o Korihora. ’E ’ua fa’ati’a a’era Korianetumera i tōna ra mau ti’ahapa i te peho ra o Sura. I teienei, e mea fātata te peho ra o Sura i te ’āivi ra o Kominora ; nō reira, ’ua ha’aputuputu ’āmui mai ra Korianetumera i tōna mau nu’u fa’ehau i ni’a i te ’āivi ra o Kominora, ’e ’ua fa’a’oto a’era ’oia i te pū i te mau nu’u fa’ehau o Siza, nō te tītau atu ia rātou ’ia haere mai e ’aro.

29 ’E i muri a’era, ’ua haere mai ra rātou, ’e ’ua tūra’i-fa’ahou-hia rātou i muri ; ’e ’ua haere fa’ahou mai rātou i te piti o te taime, ’e ’ua tūra’i-fa’ahou-hia rātou i muri i te piti o te taime. ’E i muri a’era, ’ua haere fa’ahou mai ra rātou i te toru o te taime, ’e ’ua pūai roa te ’arora’a.

30 ’E i muri a’era, ’ua tā’iri ihora Siza ia Korianetumera, ’e ’ua rahi roa ihora tōna mau puta hōhonu ; ’e nō te rahi o tōna toto i pau, ’ua matapōirihia ihora Korianetumera, ’e ’ua hōpoi-’ē-hia atu ra ’oia mai te mea ra ē, ’ua pohe roa ’oia.

31 I teienei, ’ua rahi roa te mau tāne, ’e te mau vahine, ’e te mau tamari’i i pau i nā pae e piti ato’a ra, nō reira ’ua fa’aue ihora Siza i tōna mau ta’ata ’eiaha rātou e a’ua’u atu i te mau nu’u fa’ehau o Korianetumera ; nō reira, ’ua ho’i mai ra rātou i tō rātou ra pūhapara’a.