1 Kag natabo ini, sang nag-ayo si Coriantumer sa iya mga pilas, nagsugod nga nadumduman niya ang mga pulong nga ginhambal sa iya ni Eter.

2 Nakita niya nga may nagkalamatay paagi sa espada nga halos duha na ka milyon sang iya katawhan, kag nagsugod sia sa pagpangasubo sa iya tagipusuon; huo, may nagkalamatay nga duha ka milyon sang kusganan nga mga lalaki, kag amo man ila mga asawa kag mga anak.

3 Nagsugod sia sa paghinulsol sang malain nga iya nahimo; nagsugod nga nadumduman niya ang mga pulong nga ginhambal sang baba sang tanan nga propeta, kag nakita niya ang mga ini nga natuman ang mga ini tubtob sina nga tion, ang tagsa ka tinipik; kag ang iya kalag nagkalisud kag indi mapasulhay.

4 Kag natabo ini nga naghimo sia sing isa ka sulat kay Siz nga nagapangabay sa iya nga kaluoyan niya ang katawhan, kag iampo niya ang ginharian para sa mga kabuhi sang katawhan.

5 Kag natabo ini nga sang nabaton ni Siz ang iya sulat naghimo sia sing isa ka sulat kay Coriantumer, nga kon iampo niya ang iya kaugalingon, agud mapatay niya sia sa iya kaugalingon nga espada, nga kaluoyan niya ang mga kabuhi sang katawhan.

6 Kag natabo ini nga ang katawhan wala naghinulsol sang ila kalainan; kag ang katawhan ni Coriantumer nasugyot sa pagkaakig batok sa katawhan ni Siz; kag ang katawhan ni Siz nasugyot sa pagkaakig batok sa katawhan ni Coriantumer; gani, ang katawhan ni Siz nakig-away sa katawhan ni Coriantumer.

7 Kag sang nakita ni Coriantumer nga nagahana na sia nga mapierde nalagyo sia liwat sa atubang sang katawhan ni Siz.

8 Kag natabo ini nga nakaabot sia sa mga tubig sang Ripliancum, nga, kon sayuron, dako, ukon labaw sa tanan; gani, sang nakaabot sila sa sining mga tubig nagpatindog sila sang ila mga tolda; kag si Siz man nagpatindog sang iya mga tolda malapit sa ila; kag gani pagkaaga nagsugod sila sa pag-inaway.

9 Kag natabo ini nga nag-away sila sang tuman kagrabe nga inaway, nga sa diin si Coriantumer napilasan liwat, kag nalipong sia tungod sang kakulang sing dugo.

10 Kag natabo ini nga ang mga kasoldadohan ni Coriantumer nagsalakay sa mga kasoldadohan ni Siz nga napierde nila sila, nga nahimo nila nga magpalagyo sila sa ila atubang; kag nagpalagyo sila pa-sur, kag nagpatindog sang ila mga tolda sa isa ka lugar nga ginatawag nga Ogat.

11 Kag natabo ini nga ang kasoldadohan ni Coriantumer nagpatindog sang ila mga tolda sa tupad sang bungyod sang Rama; kag amo man ini ang bungyod nga sa diin gintago sang akon amay nga si Mormon ang mga kasulatan para sa Ginuo, nga mga sagrado.

12 Kag natabo ini nga gintipon nila ang tanan nga katawhan sa bug-os nga ibabaw sang kadutaan, nga wala nagkalamatay, luwas lang kay Eter.

13 Kag natabo ini nga nakita ni Eter ang tanan nga ginahimo sang katawhan; kag nakita niya nga ang katawhan nga para kay Coriantumer nagtililipon sa kasoldadohan ni Coriantumer; kag ang katawhan nga para kay Siz nagtililipon sa kasoldadohan ni Siz.

14 Gani, sa sulod sang apat ka tuig gintipon nila ang katawhan agud makuha nila ang tanan nga yara sa ibabaw sang kadutaan, kag agud makabaton sila sang tanan nga kusog nga mahimo nila mabaton.

15 Kag natabo ini nga sang natipon na sila tanan, ang tagsa-tagsa sa kasoldadohan nga iya luyag, upod ang ila mga asawa kag ang ila mga anak—pareho nga mga lalaki, mga babayi kag mga kabataan nga naarmasan sing mga armas sa giyera, nga may mga taming, kag mga taming sa dughan, kag mga panaming sa ulo, kag napanaptan suno sa paagi sang giyera—nagsulong sila ang isa batok sa isa sa inaway; kag nag-away sila sa bug-os sina nga adlaw, kag wala nagmadinalag-on.

16 Kag natabo ini nga sang nag-abot ang gab-i kinapoy sila, kag nagbalik sa ila mga kampo; kag pagkatapos nga nakabalik sila sa ila mga kampo nagsugod sila sang pagtangis kag panalambiton sa pagkadula sang nagkalamatay sa ila katawhan; kag sa pagkagahod sang ila mga paghinibi, sang ila mga pagtangis kag mga panalambiton, nga gintublag nila sing tuman ang kapalibutan.

17 Kag natabo ini nga pagkaaga nagpakig-away sila liwat, kag dako kag makakululba yadtong adlaw; apang, wala sila nagmadinalag-on, kag sang nag-abot liwat ang gab-i gintublag nila ang kapalibutan sa ila mga paghinibi, kag sang ila mga pagtangis, kag sang ila mga pagkalisud, sa pagkadula sang nagkalamatay sa ila katawhan.

18 Kag natabo ini nga si Coriantumer naghimo liwat sing isa ka sulat kay Siz, nga nagapangabay nga indi na sia liwat magkadto agud makig-away, kundi nga kuhaon na lang niya ang ginharian, kag kaluoyan ang mga kabuhi sang katawhan.

19 Apang tan-awa, ang Espiritu sang Ginuo nag-untat na sa pag-impluwensya sa ila, kag si Satanas may bug-os nga gahum sa mga tagipusuon sang katawhan; kay nagpadaug sila sa katig-a sang ila mga tagipusuon, kag sa pagkabulag sang ila mga kaisipan agud malaglag sila; gani nagpakig-away sila liwat.

20 Kag natabo ini nga nag-away sila sa bilog sina nga adlaw, kag sang nag-abot ang gab-i nagtulog sila sa ila mga espada.

21 Kag pagkaaga nag-away sila bisan tubtob pag-abot sang gab-i.

22 Kag sang nag-abot ang gab-i nagkalahubog sila sa kaakig, bisan pareho sing isa ka tawo nga nahubog sang alak; kag nagtulog sila liwat sa ila mga espada.

23 Kag pagkaaga nag-away sila liwat; kag sang nag-abot ang gab-i nagkalamatay sila tanan paagi sa espada luwas lang sa singkwenta’y dos sang katawhan ni Coriantumer, kag sisenta’y nuebe sang katawhan ni Siz.

24 Kag natabo ini nga nagtulog sila sa ila mga espada sa sina nga gab-i, kag pagkaaga nag-away sila liwat, kag nag-inaway sila sa ila kusog paagi sa ila mga espada kag sa ila mga taming sa bilog sina nga adlaw.

25 Kag sang nag-abot ang gab-i may treinta’y dos sang katawhan ni Siz, kag beynte dos sang katawhan ni Coriantumer.

26 Kag natabo ini nga nagkaon sila kag nagtulog, kag naghanda para sa kamatayon pagkaaga. Kag dalagko sila kag kusganan nga mga lalaki suno sa kusog sang tawo.

27 Kag natabo ini nga nag-away sila sa sulod sang tatlo ka oras, kag nagkalalipong sila tungod sang kakulang sing dugo.

28 Kag natabo ini nga sang nakabaton sing nagakaigo nga kusog ang mga tinawo ni Coriantumer agud makalakat sila, naghana sila sa pagpalagyo para sa ila mga kabuhi; apang tan-awa, nagtindog si Siz, kag amo man ang iya mga tinawo, kag nanumpa sia sa iya kaakig nga patyon niya si Coriantumer ukon mapatay sia paagi sa espada.

29 Gani, ginlagas niya sila, kag pagkaaga nalab-ot niya sila; kag nag-away sila liwat paagi sa espada. Kag natabo ini nga sang nagkalamatay sila tanan paagi sa espada, luwas lang sanday Coriantumer kag Siz, tan-awa si Siz nalipong tungod sang kakulang sing dugo.

30 Kag natabo ini nga sang nakasandig si Coriantumer sa iya espada, nga nakapahuway na sia diutay, gin-utod niya ang ulo ni Siz.

31 Kag natabo ini, pagkatapos nga nautod niya ang ulo ni Siz, nga si Siz nagbangon sa iya mga kamot kag natumba; kag pagkatapos nga ginlagas niya ang iya pagginhawa, napatay sia.

32 Kag natabo ini nga si Coriantumer natumba sa duta, kag nangin daw wala na sia sing kabuhi.

33 Kag ang Ginuo naghambal kay Eter, kag nagsiling sa iya: Lakat. Kag naglakat sia, kag nakita nga ang mga pulong sang Ginuo natuman na tanan; kag gintapos niya ang iya kasulatan; (kag ang ika-isa ka gatos nga bahin wala ko nasulat) kag gintago niya ang mga ini sa isa ka paagi nga nasapwan ini sang katawhan ni Limhi.

34 Karon ang katapusan nga mga pulong nga ginsulat ni Eter amo ini: Kon buot sang Ginuo nga magbag-o ako sing dagway, ukon nga batason ko ang kabubut-on sang Ginuo sa unod, indi ini importante, basta maluwas ako sa ginharian sang Dios. Amen.