Te Buka a Etera

1 ’E i teienei, e pāpa’i au, ’o Moroni, i te hō’ē ’ā’amu nō te mau ta’ata i te ’anotau tahito i ha’amouhia e te rima o te Fatu i ni’a i te fenua i te pae apato’erau.

2 ’E tē ’īriti nei au i teie ’ā’amu nō roto mai i te mau ’api e piti ’ahuru ’e ma maha ’o tei ’itehia e te mau ta’ata o Limehi, ’e ’o tei parauhia te Buka a Etera.

3 ’E tē mana’o nei au ē, i vai na te tufa’a mātāmua nō teie pāpa’a parau i rotopū i te mau ’āti Iuda, ’e tē parau nei te reira nō ni’a i te hāmanira’a o te ao nei, ’e o Adamu ho’i, ’e te ’ā’amu mai taua taime ra ē tae roa mai i te pare rahi, ’e te mau mea ho’i i tupu i rotopū i te mau tamari’i a te ta’ata ē tae roa atu i taua taime ra—

4 Nō reira, ’aita vau e pāpa’i i te mau mea i tupu mai te mau mahana mai o Adamu ē tae roa atu i taua taime ra ; ’ua pāpa’ihia rā te reira i ni’a iho i taua mau ’api ra ; ’e ’o ’oia ’o tē ’ite i te reira e roa’a ïa iāna te mana nō te fāri’i i te tā’āto’ara’a nō te ’ā’amu.

5 Inaha rā, ’aita vau e hōro’a atu i te tā’āto’ara’a nō te ’ā’amu, e hōro’a atu rā vau i te tahi noa tufa’a nō te ’ā’amu, mai te tau o te pare ē tae roa atu i tō rātou ha’amoura’ahia.

6 E fa’a’ite atu vau i te ’ā’amu mai teie te huru. Te ta’ata i pāpa’i i teie pāpa’a parau, ’o Etera ïa, ’e e hua’ai ’oia nō Korianetora.

7 E tamaiti Korianetora nā Morona.

8 ’E e tamaiti Morona nā Etema.

9 ’E e tamaiti Etema nā Ahaha.

10 ’E e tamaiti Ahaha nā Seta.

11 ’E e tamaiti Seta nā Sibelona.

12 ’E e tamaiti Sibelona nā Koma.

13 ’E e tamaiti Koma nā Korianetuma.

14 ’E e tamaiti Korianetuma nā Amenigada.

15 ’E e tamaiti Amenigada nā Aarona.

16 ’E e hua’ai Aarona nā Heta, te tamaiti a Hearetoma.

17 ’E e tamaiti Hearetoma nā Liba.

18 ’E e tamaiti Liba nā Kisa.

19 ’E e tamaiti Kisa nā Koroma.

20 ’E e tamaiti Koroma nā Levi.

21 ’E e tamaiti Levi nā Kima.

22 ’E e tamaiti Kima nā Morianetona.

23 ’E e hua’ai Morianetona nā Ripelakisa.

24 ’E e tamaiti Ripelakisa nā Seza.

25 ’E e tamaiti Seza nā Heta.

26 ’E e tamaiti Heta nā Koma.

27 ’E e tamaiti Koma nā Korianetuma.

28 ’E e tamaiti Korianetuma nā Emera.

29 ’E e tamaiti Emera nā Omera.

30 ’E e tamaiti Omera nā Sule.

31 ’E e tamaiti Sule nā Kiba.

32 ’E e tamaiti Kiba nā Oriha, te tamaiti a Iareda.

33 I tae mai ho’i Iareda ’e tōna taea’e ’e tō rāua ’utuāfare, ’e te tahi atu mau ta’ata ’e tō rātou mau ’utuāfare, mai te pare rahi mai ra, i te taime te Fatu i fa’ahuru ’ē ai i te reo o te mau ta’ata, ’e i tapu ai i roto i tōna ra riri ’ū’ana e ha’apurara-’ē-hia rātou nā roto i te ao ato’a nei ; ’e mai te au i te parau a te Fatu ra ’ua ha’apurara-’ē-hia atu ra te mau ta’ata.

34 E ta’ata rahi ’e te pūai te taea’e o Iareda, ’e e ta’ata au-roa-hia ho’i e te Fatu ; ’e ’ua parau mai ra ho’i Iareda, tōna taea’e, iāna nā ’ō mai ra : ’A ti’aoro atu i te Fatu ’ia ’ore ’oia ’ia fa’ahuru ’ē i tō tātou reo, e ’ore ho’i tātou e māramarama i tā tātou mau parau.

35 ’E i muri a’era, ’ua ti’aoro atu ra te taea’e o Iareda i te Fatu, ’e ’ua aroha mai ra te Fatu ia Iareda ; nō reira, ’aita atu ra ’oia i fa’ahuru ’ē i te reo o Iareda ; ’e ’aita a’era te reo o Iareda ’e tō tōna taea’e i fa’ahuru-’ē-hia.

36 I muri iho i te reira ’ua parau atu ra Iareda i tōna taea’e : ’A ti’aoro fa’ahou atu i te Fatu, penei a’e ’o te fāriu ’ē atu tōna riri ia rātou, i tō taua mau hoa, ’e ’aita ’oia e fa’ahuru ’ē i tō rātou reo.

37 ’E i muri a’era, ’ua ti’aoro atu ra te taea’e o Iareda i te Fatu, ’e ’ua aroha mai ra te Fatu i tō rātou mau hoa ’e tō rātou ato’a mau ’utuāfare, ’e ’aita atu ra tō rātou reo i fa’ahuru-’ē-hia.

38 ’E i muri a’era, ’ua parau fa’ahou atu ra Iareda i tōna taea’e, nā ’ō atu ra : ’A haere atu e ani i te Fatu e ti’avaru ānei ’oia ia tātou i rāpae i teie nei fenua, ’e mai te mea e ti’avaru ’oia ia tātou i rāpae i teie nei fenua, ’a ani atu iāna e haere tātou i hea. ’E ’o vai ho’i tei ’ite e hōpoi ānei te Fatu ia tātou i te hō’ē fenua maita’i roa a’e i te mau fenua o te ao nei ? ’E mai te mea e nā reira ’oia, ’ia ha’apa’o maita’i ïa tātou i te hina’aro o te Fatu, ’ia roa’a ia tātou te reira ’ei ’āi’a nō tātou.

39 ’E i muri a’era, ’ua ti’aoro atu ra te taea’e o Iareda i te Fatu mai te au i te parau i parauhia mai i te vaha o Iareda ra.

40 ’E i muri a’era, ’ua fa’aro’o mai ra te Fatu i te parau a te taea’e o Iareda, ’e ’ua aroha mai ra iāna, ’e ’ua nā ’ō mai ra iāna :

41 ’A haere ’e ’a ha’aputuputu ’āmui mai i tā ’oe mau nana, te oni ’e te ufa, nō te mau huru ’ānimara ato’a ; ’e te mau huru huero ato’a o te fenua ; ’e tō ’oe ra mau ’utuāfare ; ’e tō ’oe ato’a ra taea’e ’o Iareda ’e tōna ’utuāfare ; ’e tō ’oe ato’a ra mau hoa ’e tō rātou mau ’utuāfare ; ’e te mau hoa o Iareda ’e tō rātou ra mau ’utuāfare.

42 ’E ’ia oti teie mau mea ia ’oe i te ravehia, e haere atu ’oe nā mua roa nō te arata’i ia rātou i raro i te peho i te pae apato’erau. ’E i reira e fārerei ai au ia ’oe, ’e e haere atu vau nā mua ia ’oe i te hō’ē fenua maita’i roa a’e i te mau fenua ato’a o te ao nei.

43 ’E i reira e ha’amaita’i ai au ia ’oe ’e tō ’oe ra hua’ai, ’e e fa’atupu ai au i te hō’ē nūna’a rahi nō’u nō roto mai i tō ’oe hua’ai, ’e te hua’ai ho’i o tō ’oe ra taea’e, ’e nō roto mai ho’i i te hua’ai o te feiā e pe’e atu ia ’oe ra. ’E ’aita roa e nūna’a rahi atu i te nūna’a ’o tā’u e fa’atupu nō roto mai i tō ’oe hua’ai i ni’a i te fenua nei. ’E e nā reira ho’i au ia ’oe nō te mea e mea maoro tō ’oe ti’aorora’a mai iā’u nei.