Ang Libro ni Eter

1 Kag karon ako, si Moroni, nagapadayon sa paghatag sang panaysayon parte sadtong dumaan nga mga pumuluyo nga ginlaglag sang kamot sang Ginuo sa ibabaw sining pungsod sa norte.

2 Kag ginkuha ko ang akon panaysayon halin sa beynte kwatro ka lamina nga nasalapoan sang katawhan ni Limhi, nga ginatawag nga Libro ni Eter.

3 Kag tungod nagahunahuna ako nga ang una nga bahin sini nga kasulatan, nga nagahambal parte sa pagtuga sang kalibutan, kag amo man parte kay Adan, kag sang kasaysayan halin sa sina nga tion bisan tubtob sa dako nga tore, kag kon ano pa nga mga butang nga nagkalatabo sa mga anak sang katawhan tubtob sa sina nga tion, yara sa mga Judio—

4 Gani wala ko pag-isulat yadtong mga butang nga nagkalatabo halin sa mga adlaw ni Adan tubtob sa sina nga tion; apang yara ang mga ini sa mga lamina; kag kon sin-o man ang makakita sang mga ini, ang amo man makaangkon sing gahum nga makuha niya ang bug-os nga kasaysayan.

5 Apang tan-awa, indi ko pag-ihatag ang bug-os nga kasaysayan, kundi isa ka bahin sang kasaysayan ang akon ihatag, halin sa tore tubtob nga nalaglag sila.

6 Kag sa sini nga paagi ihatag ko ang kasaysayan. Sia nga nagsulat sini nga kasulatan amo si Eter, kag kaliwat sia ni Coriantor.

7 Si Coriantor anak ni Moron.

8 Kag si Moron anak ni Etem.

9 Kag si Etem anak ni Acias.

10 Kag si Acias anak ni Set.

11 Kag si Set anak ni Siblon.

12 Kag si Siblon anak ni Com.

13 Kag si Com anak ni Coriantum.

14 Kag si Coriantum anak ni Amnigadas.

15 Kag si Amnigadas anak ni Aaron.

16 Kag si Aaron kaliwat ni Het, nga anak ni Hiertom.

17 Kag si Hiertom anak ni Lib.

18 Kag si Lib anak ni Kis.

19 Kag si Kis anak ni Corom.

20 Kag si Corom anak ni Levi.

21 Kag si Levi anak ni Kim.

22 Kag si Kim anak ni Morianton.

23 Kag si Morianton kaliwat ni Riplakis.

24 Kag si Riplakis anak ni Sez.

25 Kag si Sez anak ni Het.

26 Kag si Het anak ni Com.

27 Kag si Com anak ni Coriantum.

28 Kag si Coriantum anak ni Emer.

29 Kag si Emer anak ni Omer.

30 Kag si Omer anak ni Shul.

31 Kag si Shul anak ni Kib.

32 Kag si Kib anak ni Orihas, nga anak ni Jared;

33 Nga ang amo nga Jared nagbiya upod sang iya utod nga lalaki kag ila mga panimalay, upod ang pila ka iban pa kag ila mga panimalay, halin sa dako nga tore, sa tion nga ginlabugay sang Ginuo ang lengguahe sang katawhan, kag nagsumpa sa iya kaakig nga ipalapta sila sa bug-os nga ibabaw sang duta; kag suno sa pulong sang Ginuo naglinapta ang katawhan.

34 Kag ang utod ni Jared nga isa ka dako kag gamhanan nga lalaki, kag isa ka tawo nga labing pinasulabi sang Ginuo, si Jared, nga iya utod, nagsiling sa iya: Mag-ampo ka sa Ginuo, nga indi niya paglabugayon ang aton lengguahe nga indi naton mahangpan ang aton mga pulong.

35 Kag natabo ini nga ang utod ni Jared nag-ampo sa Ginuo, kag ang Ginuo naluoy kay Jared; gani wala niya ginlabugay ang lengguahe ni Jared; kag si Jared kag ang iya utod wala nagtalang-talang.

36 Dayon si Jared nagsiling sa iya utod: Mag-ampo ka liwat sa Ginuo, kag basi pa lang ipaiway niya ang iya kaakig sa ila nga aton mga kaabyanan, agud indi niya paglabugayon ang ila lengguahe.

37 Kag natabo ini nga ang utod ni Jared nag-ampo sa Ginuo, kag ang Ginuo naluoy sa ila mga kaabyanan kag sa ila man mga panimalay, nga wala sila nagtalang-talang.

38 Kag natabo ini nga si Jared naghambal liwat sa iya utod nga nagasiling: Pamangkota ang Ginuo kon tabugon niya kita pagwa sa kadutaan, kag kon tabugon niya kita pagwa sa kadutaan, magpakitluoy ka sa iya kon diin kita makadto. Kag wala sing may nakahibalo pero basi dal-on kita sang Ginuo padulong sa kadutaan nga labing pinili sa tanan sa bug-os nga duta? Kag kon amo sina, mangin tampad kita sa Ginuo, agud nga mabaton naton ini bilang aton palanublion.

39 Kag natabo ini nga ang utod ni Jared nag-ampo sa Ginuo suno sa sinang ginhambal halin sa baba ni Jared.

40 Kag natabo ini nga ginpamatian sang Ginuo ang utod ni Jared, kag naluoy sa iya, kag nagsiling sa iya:

41 Lakat kag panipuna ang imo mga panong, pareho nga lalaki kag babayi, sang tagsa ka sahi; kag amo man ang binhi sang duta sang tagsa ka sahi; kag ang imo mga panimalay; kag amo man si Jared nga imo utod kag ang iya panimalay; kag amo man ang imo mga kaabyanan kag ang ila mga panimalay, kag ang mga kaabyanan ni Jared kag ang ila mga panimalay.

42 Kag kon nahimo mo na ini maglakat ka sa pagpanguna sa ila padulhog sa patag nga pa-norte. Kag didto sugataon ko ikaw, kag magalakat ako sa imo unahan padulong sa isa ka kadutaan nga labing pinili sa tanan nga kadutaan sang kalibutan.

43 Kag didto pakamaayohon ko ikaw kag ang imo kaliwatan, kag magabangon para sa akon halin sa imo kaliwatan, kag halin sa kaliwatan sang imo utod, kag sa ila nga magaupod sa imo, sing isa ka dako nga nasyon. Kag didto wala na sing mangin mas gamhanan pa sangsa nasyon nga akon pagabangonon para sa akon halin sa imo kaliwatan sa bug-os nga ibabaw sang duta. Kag amo ini ang akon pagahimuon sa imo tungod sa sining malawig na nga panahon nag-ampo ka sa akon.